➕
←
Jeremiah
Jer
20
→
[1]ܘܲܫـ̣ܡܲܥ ܦܸܫܚܘܿܪ ܒܲܪ ܐܲܡܲܪܝܵܐ ܟܵܗܢܵܐ: ܘܗ̤ܘ ܦܵܩܘܿܕ݂ܵܐ ܗ̄ܘ̣ܵܐ ܘܫܲܠܝܼܛܵܐ ܒܒܲܝܬܹܗ̇ ܕܡܵܪܝܵܐ: ܠܐܹܪܲܡܝܵܐ ܢܒ̣ܝܼܵܐ ܟܲܕ݂ ܡܸܬ̣ܢܲܒܸ̇ܐ ܦܸܬ̣ܓ̣ܵܡܹ̈ܐ ܗܵܠܹܝܢ. [2]ܘܲܡܚ̣ܵܝܗܝ ܦܸܫܚܘܿܪ ܠܐܹܪܲܡܝܵܐ ܢܒ̣ܝܼܵܐ: ܘܐܲܪܡܝܹܗ ܒܚܵܕܲܪܬܵܐ ܕܲܒ̣ܬܲܪܥܵܐ ܕܒܹܝܬ̣ ܒܸܢܝܵܡܸܝܢ ܥܸܠܵܝܵܐ: ܕܲܒ̣ܒܲܝܬܹ̇ܗ ܕܡܵܪܝܵܐ. [3]ܘܲܗܘ̤ܵܐ ܠܒ̣ܵܬܲܪ ܝܵܘܡܵܐ: ܘܐܲܦ̣ܩܹܗ ܦܸܫܚܘܿܪ ܠܐܹܪܲܡܝܵܐ ܡ̣ܢ ܚܵܕܲܪܬܵܐ: ܘܐܸܡ݂ܲܪ ܠܹܗ ܐܹܪܲܡܝܵܐ: ܠܵܐ ܗ̄ܘ̤ܵܐ ܦܸܫܚܘܿܪ ܩ̣ܪܵܐ ܡܵܪܝܵܐ ܫܡܵܟ݂: ܐܸܠܵܐ ܬܵܘܬܵܒ̣ܵܐ ܘܚܵܕܘܿܪܵܐ. [4]ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܗܵܐ ܥܵܒܹܕ݂ ܐ̄ܢܵܐ ܠܵܟ݂: ܬܵܘܬܵܒ̣ܵܐ ܠܵܟ݂ ܘܲܠܟ݂ܠܗܘܿܢ ܪܲܚܡܲܝܟ: ܘܢܸܦܠܘܼܢ ܒܚܲܪܒܵܐ ܕܲܒ̣ܥܸܠܕܒ̣ܵܒܲܝ̈ܗܘܿܢ: ܘܥܲܝܢܲܝ̈ܟ ܢܸܚܙ̈ܝܵܢ: ܘܲܠܟ݂ܠܹܗ ܝܼܗܘܼܕ݂ܵܐ ܐܲܫܠܸܡ ܒܐܝܼܕܹܗ ܕܡܲܠܟܵܐ ܕܒ̣ܵܒܹܠ: ܘܢܸܫܒܹ̇ܐ ܐܸܢܘܿܢ ܠܒ̣ܵܒܹܠ: ܘܲܢܩܲܛܸܠ ܐܸܢܘܿܢ ܒܚܲܪܒܵܐ. [5]ܘܐܲܫܠܸܡ ܟܠܗܘܿܢ ܚܸܣܢܲܝ̈ ܩܪܝܼܬ̣ܵܐ ܗܵܕܹܐ: ܘܟ݂ܠܵܗ̇ ܠܹܐܘܬ̣ܵܗ̇: ܘܟ݂ܠܹܗ ܐܝܼܩܵܪܵܗ̇: ܘܟ݂ܠܗܘܿܢ ܓܲܙܹ̈ܐ ܕܡܲܠ̈ܟܹ̇ܐ ܕܲܝܗܘܼܕ݂ܵܐ: ܐܲܫܠܸܡ ܒܐܝܼܕ݂ܵܐ ܕܲܒ̣ܥܸܠܕܒ̣ܵܒܲܝ̈ܗܘܿܢ: ܘܢܸܫܒ̇ܘܿܢ ܐܸܢܘܿܢ: ܘܢܸܒ̇ܙܘܼܢ ܐܸܢܘܿܢ: ܘܢܵܘܒ̇ܠܘܼܢ ܐܸܢܘܿܢ ܠܒ̣ܵܒܹܠ. [6]ܘܐܲܢ̄ܬ̇ ܦܸܫܚܘܿܪ ܘܟ݂ܠܗܘܿܢ ܐ̄ܢܵܫܲܝ̈ ܒܲܝܬܵܟ݂ ܬܹܐ̄ܙܠܘܼܢ ܒܫܸܒ݂ܝܵܐ: ܘܲܠܒ̣ܵܒܹܠ ܬܹܐܙܲܠ: ܙܬܲܡܵܢ ܬܡܘܼܬ̣: ܘܬܲܡܵܢ ܬܸܬ̣ܩܒܲܪ: ܐܲܢ̄ܬ̇ ܘܟ݂ܠܗܘܿܢ ܖ̈ܵܚܡܲܝܟ ܕܐܸܬ̣ܢܲܒ̇ܝܼܬ̇ ܠܗܘܿܢ ܒܫܘܼܩܪܵܐ. [7]ܫܲܕܸܠܬܵܢܝ ܡܵܪܝܵܐ ܘܐܸܫܬܲܕܠܹ̇ܬ̣: ܚܣܲܢ̣ܬܵܢܝ ܘܲܙܟ݂ܝܬܵܢܝ: ܗܘܹ݁ܝܬ̣ ܓܘܼܚܟܵܐ ܟܠܝܘܿܡ: ܘܟ݂ܠܗܘܿܢ ܡܡܲܝܩܝܢ ܒܝܼ. [8]ܘܒܲܙܒܲܢ ܕܲܡܡܲܠܸܠ ܗ̄ܘܹ̇ܝܬ̣ ܘܡܲܙܥܸܩ: ܥܲܠ ܚܵܛ݁ܘܿܦܹ̈ܐ ܘܥܲܠ ܒܵܙܘܿܙܹ̈ܐ ܩܵــ݁ܪܹܐ ܗ̄ܘܹ̇ܝܬ̣: ܡܸܛܠ ܕܲܗܘ̤ܵܐ ܠܝܼ ܦܸܬ̣ܓ̣ܵܡܹܗ ܕܡܵܪܝܵܐ ܠܚܸܣܕܵܐ ܘܲܠܡܘܼܝܵܩܵܐ ܟܠܝܘܿܡ. [9]ܘܐܸܡ̇ܪܹܬ̣ ܕܠܵܐ ܐܸܕܲܟ݂ܪܝܼܘܗܝ: ܘܠܵܐ ܐܹܡܲܠܸܠ ܬܘܼܒ̣ ܒܲܫܡܹܗ: ܘܲܗܘ̤ܵܐ ܒܠܹܒ̇ܝ ܐܲܝܟ݂ ܢܘܼܪܵܐ ܕܝܵــ̇ܩܕܵܐ ܘܚܵܒܵܐ ܒܓܲܖ̈ܡܲܝ: ܘܲܒ̣ܥܹܝ̇ܬ̣ ܠܲܡܣܲܝܒܵܪܘܼ ܘܠܵܐ ܐܹܫܟ̇ܚܹ̇ܬ̣. [10]ܡܸܛܠ ܕܫܸܡ̇ܥܹܬ̣ ܪܸܢܝܵܐ ܕܣܲܓ̇ܝܹ̈ܐܐ ܕܡܸܬ̣ܟܲܢܫܝܼܢ ܡ̣ܢ ܚܕܵܖ̈ܲܝ: ܘܐܵܡ݁ܪܝܼܢ ܟܠܗܘܿܢ ܕܫܵܐܠ̇ܝܼܢ ܒܲܫܠܵܡܝ ܒܦܘܼܡܗܘܿܢ: ܘܣܵܢܹ݁ܝܢ ܠܝܼ ܒܠܸܒ̇ܗܘܿܢ: ܚܵܘܵܐܘܼܗܝ ܠܲܢ ܘܲܢܩܘܼܡ ܥܠܵܘܗܝ: ܟܒܲܪ ܢܸܫܬܲܕܲܠ ܠܲܢ: ܘܢܸܬ̣ܒܲܥ ܥܝܵܪܬܲܢ ܡܸܢܹܗ. [11]ܘܡܵܪܝܵܐ ܥܲܡܝ ܐܲܝܟ݂ ܓܲܢ̄ܒܵܪܵܐ ܥܲܫܝܼܢܵܐ: ܡܸܛܠ ܗܵܢܵܐ ܟܠܗܘܿܢ ܖ̈ܵܕ݂ܘܿܦܲܝ ܢܸܒ̣ܗ̱ܬ̣ܘܼܢ ܘܠܵܐ ܢܸܫܬܲܟ݂ܚܘܼܢ: ܒܗܸܬ̣ܘ ܛܵܒ̣ ܡܸܛܠ ܕܠܵܐ ܐܸܣܬܲܟܲܠܘ: ܒܸܗܬ̇ܬ̣ܵܐ ܕܥܵܠܲܡ ܕܠܵܐ ܡܸܬ̇ܛܲܥܝܵܐ. [12]ܘܡܵܪܝܵܐ ܚܲܝܠܬ̣ܵܢܵܐ ܒܵـ̇ܚܲܪ ܙܸܕ݂ܩܵܐ: ܚܵـ̇ܙܹܐ ܟܘܿܠܝܵ̈ܬ̣ܵܐ ܘܠܸܒܵܐ: ܐܸܚܙܸܐ ܦܘܼܪܥܵܢܵܟ݂ ܡܸܢܗܘܿܢ: ܡܸܛܠ ܕܠܵܟ݂ ܚܠܹـ̇ܝܬ̣ ܕܝܼ̈ܢܲܝ. [13]ܫܲܒܲܚܘ ܠܡܵܪܝܵܐ ܫܲܒܲܚܘ ܠܡܵܪܝܵܐ: ܕܦܲܨܝܼ ܢܲܦ̮ܫܹܗ ܕܡܸܣܟܹܢܵܐ ܡ̣ܢ ܐܝܼܕ݂ܵܐ ܕܡܲܒ̣ܐ̱ܫܵܢܹ̈ܐ. [14]ܠܝܼܛ ܗ̄ܘ̣ ܝܵܘܡܵܐ ܕܐܸܬ̣ܝܲـ̇ܠܕܹܬ̣ ܒܹܗ: ܝܵܘܡܵܐ ܕܝܼܠܸܕ݂ܬܲܢܝ ܐܹܡܝ ܠܵܐ ܢܸܗܘܸܐ ܒܪܝܼــܟ݂. [15]ܠܝܼܛ ܗ̄ܘ̣ ܓܲܒ̣ܪܵܐ ܕܣܲܒܲܪ ܠܐܵܒ̣ܝ: ܘܐܸܡ݂ܲܪ ܠܹܗ ܕܐܸܬ̣̱ܝܼܠܸܕ݂ ܠܵܟ݂ ܒܪܵܐ ܕܸܟ݂ܪܵܐ: ܘܲܣـ݂ܒܲܪ ܕܲܡܚܲܕܵܝܘܼ ܚܲܕ̇ܝܹܗ. [16]ܢܸܗܘܸܐ ܓܲܒ̣ܪܵܐ ܗܵܘ̇ ܐܲܝܟ݂ ܩܘܼܖ̈ܝܵܐ ܕܲܗܦܲܟ݂ ܡܵܪܝܵܐ: ܘܠܵܐ ܐܸܬ̣ܪܲܥܝܼ ܠܗܹܝܢ: ܢܸܫܡܲܥ ܝܑܼܠܲܠܬܵܐ ܒܨܲܦܪܵܐ: ܘܝܘܼܒܵܒ̣ܵܐ ܒܛܲܗܪܵܐ. [17]ܕܠܵܐ ܐܲܡܝܼܬܲܢܝ ܒܡܲܪܒܥܵܐ: ܘܲܗܘ̤ܵܬ̣ ܠܝܼ ܕܸܝܢ ܐܹܡܝ ܩܲܒ̣ܪܵܐ: ܘܲܒ̣ܡܲܪܒܥܵܐ ܒܲܛܢܘܼܬ̣ܝ ܠܥܵܠܲܡ. [18]ܠܡܵܢܵܐ ܢܸܦܩܹ̇ܬ̣ ܡ̣ܢ ܡܲܪܒ̇ܥܵܐ: ܠܡܸܚܙܵܐ ܥܲܡܠܵܐ ܘܕ݂ܵܘܘܿܢܵܐ: ܘܲܓ̣ـ݂ܡܲܪܘ ܒܒܸܗܬ̇ܬ̣ܵܐ ܝܵܘ̈ܡܲܝ.
 
Top