➖ »
«
➖ ➕
Aleppo Codex (~920)
Alep
The First Book of Clement
1Clem
←
Jeremiah
Jer
5
→
[1]שוטטו בחוצות ירושלם וראו נא ודעו ובקשו ברחובותיה אם תמצאו איש אם יש עשה משפט מבקש אמונה־ואסלח לה [No book]
[2]ואם חי יהוה יאמרו לכן לשקר ישבעו [No book]
[3]יהוה עיניך הלוא לאמונה־הכיתה אתם ולא חלו כליתם מאנו קחת מוסר חזקו פניהם מסלע מאנו לשוב [No book]
[4]ואני אמרתי אך דלים הם נואלו־כי לא ידעו דרך יהוה משפט אלהיהם [No book]
[5]אלכה לי אל הגדלים ואדברה אותם־כי המה ידעו דרך יהוה משפט אלהיהם אך המה יחדו שברו על נתקו מוסרות [No book]
[6]על כן הכם אריה מיער זאב ערבות ישדדם־נמר שקד על עריהם כל היוצא מהנה יטרף כי רבו פשעיהם עצמו משבותיהם [No book]
[7]אי לזאת אסלוח [Q: אסלח] לך־בניך עזבוני וישבעו בלא אלהים ואשבע אותם וינאפו ובית זונה יתגודדו [No book]
[8]סוסים מיזנים משכים היו איש אל אשת רעהו יצהלו [No book]
[9]העל אלה לוא אפקד נאם יהוה ואם בגוי אשר כזה לא תתנקם נפשי [No book]
[10]עלו בשרותיה ושחתו וכלה אל תעשו הסירו נטישותיה כי לוא ליהוה המה [No book]
[11]כי בגוד בגדו בי בית ישראל ובית יהודה־נאם יהוה [No book]
[12]כחשו ביהוה ויאמרו לוא הוא ולא תבוא עלינו רעה וחרב ורעב לוא נראה [No book]
[13]והנביאים יהיו לרוח והדבר אין בהם כה יעשה להם [No book]
[14]לכן כה אמר יהוה אלהי צבאות יען דברכם את הדבר הזה הנני נתן דברי בפיך לאש והעם הזה עצים־ואכלתם [No book]
[15]הנני מביא עליכם גוי ממרחק בית ישראל נאם יהוה גוי איתן הוא גוי מעולם הוא־גוי לא תדע לשנו ולא תשמע מה ידבר [No book]
[16]אשפתו כקבר פתוח כלם גבורים [No book]
[17]ואכל קצירך ולחמך יאכלו בניך ובנותיך־יאכל צאנך ובקרך יאכל גפנך ותאנתך ירשש ערי מבצריך אשר אתה בטח בהנה־בחרב [No book]
[18]וגם בימים ההמה נאם יהוה לא אעשה אתכם כלה [No book]
[19]והיה כי תאמרו תחת מה עשה יהוה אלהינו לנו את כל אלה ואמרת אליהם כאשר עזבתם אותי ותעבדו אלהי נכר בארצכם־כן תעבדו זרים בארץ לא לכם [No book]
[20]הגידו זאת בבית יעקב והשמיעוה ביהודה לאמר [No book]
[21]שמעו נא זאת עם סכל ואין לב עינים להם ולא יראו אזנים להם ולא ישמעו [No book]
[22]האותי לא תיראו נאם יהוה אם מפני לא תחילו אשר שמתי חול גבול לים חק עולם ולא יעברנהו ויתגעשו ולא יוכלו והמו גליו ולא יעברנהו [No book]
[23]ולעם הזה היה לב סורר ומורה סרו וילכו [No book]
[24]ולוא אמרו בלבבם נירא נא את יהוה אלהינו הנתן גשם וירה [Q: יורה] ומלקוש בעתו שבעת חקות קציר ישמר לנו [No book]
[25]עונותיכם הטו אלה וחטאותיכם מנעו הטוב מכם [No book]
[26]כי נמצאו בעמי רשעים ישור כשך יקושים הציבו משחית אנשים ילכדו [No book]
[27]ככלוב מלא עוף כן בתיהם מלאים מרמה על כן גדלו ויעשירו [No book]
[28]שמנו עשתו גם עברו דברי רע־דין לא דנו דין יתום ויצליחו ומשפט אביונים לא שפטו [No book]
[29]העל אלה לא אפקד נאם יהוה אם בגוי אשר כזה לא תתנקם נפשי [No book]
[30]שמה ושערורה נהיתה בארץ [No book]
[31]הנבאים נבאו בשקר והכהנים ירדו על ידיהם ועמי אהבו כן ומה תעשו לאחריתה [No book]
Source: unbound.biola.edu
 Translation: Charles H. Hoole (1885)
Source: www.earlychristianwritings.com
Top