➖ »
«
➖ ➕
Wycliffe's English Translation (1388)
Wyc
Epistle to the Laodiceans (Latin)
Lao[LA]
←
John
Joh
12
→
[1]Therfor Jhesus bifor sixe daies of pask cam to Bethanye, where Lazarus hadde be deed, whom Jhesus reiside. [No book]
[2]And thei maden to hym a soopere there, and Martha mynystride to hym; and Lazarus was oon of men that saten at the mete with hym. [No book]
[3]Therfor Marie took a pound of oynement of trewe narde precious, and anoyntide the feet of Jhesu, and wipte hise feet with hir heeris; and the hous was fulfillid of the sauour of the oynement. [No book]
[4]Therfor Judas Scarioth, oon of hise disciplis, that was to bitraye hym, [No book]
[5]seide, Whi is not this oynement seeld for thre hundrid pens, and is youun to nedi men? [No book]
[6]But he seide this thing, not for it perteynede to hym of nedi men, but for he was a theef, and he hadde the pursis, and bar tho thingis that weren sent. [No book]
[7]Therfor Jhesus seide, Suffre ye hir, that in to the day of my biriyng sche kepe that; [No book]
[8]for ye schulen euermore haue pore men with you, but ye schulen not euermore haue me. [No book]
[9]Therfore myche puple of Jewis knew, that Jhesus was there; and thei camen, not oonli for Jhesu, but to se Lazarus, whom he hadde reisid fro deth. [No book]
[10]But the princis of prestis thouyten to sle Lazarus, [No book]
[11]for manye of the Jewis wenten awei for him, and bileueden in Jhesu. [No book]
[12]But on the morew a myche puple, that cam togidere to the feeste dai, whanne thei hadden herd, that Jhesus cam to Jerusalem, [No book]
[13]token braunchis of palmes, and camen forth ayens hym, and crieden, Osanna, blessid is the kyng of Israel, that cometh in the name of the Lord. [No book]
[14]And Jhesus foond a yonge asse, and sat on hym, [No book]
[15]as it is writun, The douytir of Syon, nyle thou drede; lo! thi kyng cometh, sittynge on `an asse fole. [No book]
[16]Hise disciplis knewen not first these thingis, but whanne Jhesus was glorified, thanne thei hadden mynde, for these thingis weren writun of hym, and these thingis thei diden to hym. [No book]
[17]Therfor the puple bar witnessyng, that was with hym, whanne he clepide Lazarus fro the graue, and reiside hym fro deth. [No book]
[18]And therfor the puple cam, and mette with hym, for thei herden that he hadde don this signe. [No book]
[19]Therfor the Farisees seiden to hem silf, Ye seen, that we profiten no thing; lo! al the world wente aftir hym. [No book]
[20]And there weren summe hethene men, of hem that hadden come vp to worschipe in the feeste dai. [No book]
[21]And these camen to Filip, that was of Bethsaida of Galilee, and preieden hym, and seiden, Sire, we wolen se Jhesu. [No book]
[22]Filip cometh, and seith to Andrew; eft Andrew and Filip seiden to Jhesu. [No book]
[23]And Jhesus answerde `to hem, and seide, The our cometh, that mannus sone be clarified. [No book]
[24]Treuli, treuli, Y seie to you, but a corn of whete falle in to the erthe, and be deed, it dwellith aloone; [No book]
[25]but if it be deed, it bryngith myche fruyt. He that loueth his lijf, schal leese it; and he that hatith his lijf in this world, kepith it in to euerlastynge lijf. [No book]
[26]If ony man serue me, sue he me; and where Y am, there my mynystre schal be. If ony man serue me, my fadir schal worschipe hym. [No book]
[27]Now my soule is troublid, and what schal Y seie? Fadir, saue me fro this our; but therfor Y cam in to this our; [No book]
[28]fadir, clarifie thi name. And a vois cam fro heuene, and seide, And Y haue clarified, and eft Y schal clarifie. [No book]
[29]Therfor the puple that stood, and herde, seide, that `thundur was maad; othere men seide, an aungel spak to hym. [No book]
[30]Jhesus answerde, and seide, This vois cam not for me, but for you. [No book]
[31]Now is the doom of the world, now the prince of this world schal be cast out. [No book]
[32]And if Y schal be enhaunsid fro the erthe, Y schal drawe alle thingis to my silf. [No book]
[33]And he seide this thing, signifiynge bi what deth he `was to die. [No book]
[34]And the puple answeride to hym, We han herd of the lawe, that Crist dwellith with outen ende; and hou seist thou, It bihoueth mannys sone to be arerid? [No book]
[35]Who is this mannus sone? And thanne Jhesus seith to hem, Yit a litil liyt is in you; walke ye, the while ye han liyt, that derknessis catche you not; he that wandrith in derknessis, woot nere whidur he goith. [No book]
[36]While ye han liyt, bileue ye in liyt, that ye be the children of liyt. Jhesus spak these thingis, and wente, and hidde hym fro hem. [No book]
[37]And whanne he hadde don so many myraclis bifor hem, thei bileueden not `in to hym; [No book]
[38]that the word of Ysaie, the prophete, schulde be fulfillid, which he seide, Lord, who bileuede to oure heryng, and to whom is the arm of the Lord schewid? [No book]
[39]Therfor thei myyten not bileue, for eft Ysaye seide, [No book]
[40]He hath blyndid her iyen, and he hath maad hard the herte of hem, that thei se not with iyen, and vndurstonde with herte; and that thei be conuertid, and Y heele hem. [No book]
[41]Ysaye seide these thingis, whanne he say the glorie of hym, and spak of hym. [No book]
[42]Netheles `of the pryncis manye bileueden in hym, but for the Farisees thei knowlechiden not, that thei schulden not be put out of the synagoge; [No book]
[43]for thei loueden the glorie of men, more than the glorie of God. [No book]
[44]And Jhesus criede, and seide, He that bileueth in me, bileueth not in me, but in hym that sente me. [No book]
[45]He that seeth me, seeth hym that sente me. [No book]
[46]Y liyt cam in to the world, that ech that bileueth in me, dwelle not in derknessis. [No book]
[47]And if ony man herith my words, and kepith hem, Y deme hym not; for Y cam not, that Y deme the world, but that Y make the world saaf. [No book]
[48]He that dispisith me, and takith not my wordis, hath hym that schal iuge hym; thilke word that Y haue spokun, schal deme hym in the last dai. [No book]
[49]For Y haue not spokun of my silf, but thilke fadir that sente me, yaf to me a maundement, what Y schal seie, and what Y schal speke. [No book]
[50]And Y woot, that his maundement is euerlastynge lijf; therfor tho thingis that Y speke, as the fadir seide to me, so Y speke. [No book]
Author: John Wycliffe (1328 – 1384)
Top