➖ »
«
➖ ➕
Wycliffe's English Translation (1388)
Wyc
The First Book of Clement
1Clem
←
John
Joh
4
→
[1]Therfor as Jhesu knew, that the Farisees herden, that Jhesu makith and baptisith mo disciplis than Joon, [No book]
[2]thouy Jhesus baptiside not, but hise disciplis, he lefte Judee, [No book]
[3]and wente ayen in to Galilee. [No book]
[4]And it bihofte hym to passe bi Samarie. [No book]
[5]Therfor Jhesus cam in to a citee of Samarie, that is seid Sicar, bisidis the place, that Jacob yaf to Joseph, his sone. [No book]
[6]And the welle of Jacob was there; and Jhesus was weri of the iourney, and sat thus vpon the welle. And the our was, as it were the sixte. [No book]
[7]And a womman cam fro Samarie, to drawe watir. And Jhesus seith to hir, Yyue me drynk. [No book]
[8]And hise disciplis weren gon in to the citee, to bie mete. [No book]
[9]Therfor thilke womman of Samarie seith to him, Hou thou, `whanne thou art a Jewe, axist of me drynk, that am a womman of Samarie? for Jewis vsiden not to dele with Samaritans. [No book]
[10]Jhesus answerde, and seide to hir, If thou wistist the yifte of God, and who `he is, that seith to thee, Yyue me drynk, thou perauenture woldist haue axid of hym, and he schulde haue youun to thee quyk watir. [No book]
[11]The womman seith to him, Sire, thou hast not where ynne to drawe, and the pit is deep; wherof thanne hast thou quik watir? [No book]
[12]Whethir thou art grettere than oure fadir Jacob, that yaf to vs the pit? and he drank therof, and hise sones, and hise beestis. [No book]
[13]Jhesus answerde, and seide to hir, Eche man that drynkith of this watir, schal thirste efte soone; but he that drynkith of the watir that Y schal yyue hym, schal not thirste with outen ende; but the watir that Y schal yyue hym, [No book]
[14]schal be maad in hym a welle `of watir, spryngynge vp in to euerlastynge lijf. [No book]
[15]The womman seith to hym, Sire, yyue me this watir, that Y thirste not, nether come hidur to drawe. [No book]
[16]Jhesus seith to hir, Go, clepe thin hosebonde, and come hidir. [No book]
[17]The womman answerde, and seide, Y haue noon hosebonde. Jhesus seith to hir, Thou seidist wel, That Y haue noon hosebonde; [No book]
[18]for thou hast hadde fyue hosebondis, and he that thou hast, is not thin hosebonde. This thing thou seidist sotheli. [No book]
[19]The womman seith to hym, Lord, Y se, that thou art a prophete. [No book]
[20]Oure fadris worschipiden in this hil, and ye seien, that at Jerusalem is a place, where it bihoueth to worschipe. [No book]
[21]Jhesus seith to hir, Womman, bileue thou to me, for the our schal come, whanne nether in this hil, nethir in Jerusalem, ye schulen worschipe the fadir. [No book]
[22]Ye worschipen that ye knowen not; we worschipen that that we knowen; for helthe is of the Jewis. [No book]
[23]But the tyme is comun, and now it is, whanne trewe worschiperis schulen worschipe the fadir in spirit and treuthe; for also the fadir sekith suche, that worschipen hym. [No book]
[24]God is a spirit, and it bihoueth hem that worschipen hym, to worschipe in spirit and treuthe. [No book]
[25]The womman seith to hym, Y woot that Messias is comun, that is seid Crist; therfor whanne he cometh, he schal telle vs alle thingis. [No book]
[26]Jhesus seith to hir, Y am he, that spekith with thee. [No book]
[27]And anoon hise disciplis camen, and wondriden, that he spak with the womman; netheles no man seide to hym, What sekist thou, or, What spekist thou with hir? [No book]
[28]Therfor the womman lefte hir watir pot, and wente in to the citee, and seide to tho men, [No book]
[29]Come ye, and se ye a man, that seide to me alle thingis that Y haue don; whether he be Crist? [No book]
[30]And thei wenten out of the citee, and camen to hym. [No book]
[31]In the mene while hise disciplis preieden hym, and seiden, Maistir, ete. [No book]
[32]But he seide to hem, Y haue mete to ete, that ye knowen not. [No book]
[33]Therfor disciplis seiden togidir, Whether ony man hath brouyt him mete to ete? [No book]
[34]Jhesus seith to hem, My mete is, that Y do the wille of hym that sente me, that Y perfourme the werk of hym. [No book]
[35]Whether ye seien not, that yit foure monethis ben, and rype corn cometh? Lo! Y seie to you, lifte vp youre iyen, and se ye the feeldis, for now thei ben white to repe. [No book]
[36]And he that repith takith hire, and gaderith fruyt in to euerlastynge lijf; that bothe he that sowith, and he that repith, haue ioye togidere. [No book]
[37]In this thing is the word trewe, for anothir is that sowith, and anothir that repith. [No book]
[38]Y sente you to repe, that that ye `haue not trauelid; `othere men han trauelid, and ye han entrid `in to her trauels. [No book]
[39]And of that citee many Samaritans bileueden in hym, for the word of the womman, that bare witnessyng, That he seide to me alle thingis that Y haue don. [No book]
[40]Therfor whanne Samaritans camen to hym, thei preieden hym to dwelle there; and he dwelte there twey daies. [No book]
[41]And many mo bileueden for his word, [No book]
[42]and seiden to the womman, That now not for thi speche we bileuen; for we han herd, and we witen, that this is verili the sauyour of the world. [No book]
[43]And aftir twei daies he wente out fro thennus, and wente in to Galilee. [No book]
[44]And he bar witnessyng, that a profete in his owne cuntre hath noon onour. [No book]
[45]Therfor whanne he cam in to Galilee, men of Galilee resseyueden hym, whanne thei hadden seyn alle thingis that he hadde don in Jerusalem in the feeste dai; for also thei hadden comun to the feeste dai. [No book]
[46]Therfor he cam eftsoone in to the Cane of Galile, where he made the watir wiyn. And `a litil kyng was, whos sone was sijk at Cafarnaum. [No book]
[47]Whanne this hadde herd, that Jhesu schulde come fro Judee in to Galilee, he wente to hym, and preiede hym, that he schulde come doun, and heele his sone; for he bigan to die. [No book]
[48]Therfor Jhesus seide to him, But ye se tokenes and grete wondris, ye bileuen not. [No book]
[49]The litil kyng seith to hym, Lord, come doun, bifor that my sone die. [No book]
[50]Jhesus seith to hym, Go, thi sone lyueth. The man bileuede to the word, that Jhesus seide to hym, and he wente. [No book]
[51]And now whanne he cam doun, the seruauntis camen ayens hym, and telden to hym, and seiden, That his sone lyuede. [No book]
[52]And he axide of hem the our, in which he was amendid. And thei seiden to hym, For yistirdai in the seuenthe our the feuer lefte him. [No book]
[53]Therfor the fadir knewe, that thilke our it was, in which Jhesus seide to hym, Thi sone lyueth; and he bileuede, and al his hous. [No book]
[54]Jhesus dide eft this secounde tokene, whanne he cam fro Judee in to Galilee. [No book]
Author: John Wycliffe (1328 – 1384)
 Translation: Charles H. Hoole (1885)
Source: www.earlychristianwritings.com
Top