|
|
| [1]ܘܟܲܢܸܫ ܝܼܫܘܿܥ ܠܟ݂ܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ ܠܲܫܟܹܝܡ: ܘܲܩܪܵܐ ܠܩܲܫ̈ܝܼܫܹܐ ܕܝܼܣܪܵܝܹܠ: ܘܲܠܪܹ̈ܫܵܢܲܝܗܘܿܢ ܘܲܠܕܲܝܵܢܲܝ̈ܗܘܿܢ: ܘܲܠܣܵܦܪ̈ܲܝܗܘܿܢ: ܘܩܵܡ̣ܘ ܩܕ݂ܵܡ ܡܲܫܟܲܢ ܙܲܒ̣ܢܵܐ ܩܕ݂ܵܡ ܐܲܠܵܗܵܐ. |
[No book] |
| [2]ܘܐܸܡܲܪ ܝܼܫܘܿܥ ܠܟ݂ܠܹܗ ܥܲܡܵܐ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܒܥܸܒ̣ܪܵܐ ܕܢܲܗܪܵܐ ܝܸܬ̣ܒ̣ܘ ܗ̄ܘ̣ܵܘ ܐܲܒ̣ܵܗܲܝ̈ܟ̇ܘܿܢ ܡ̣ܢ ܥܵܠܲܡ: ܬܲܪܚ ܐܲܒ̣ܘܼܗܝ ܕܐܲܒ̣ܪܵܗܵܡ: ܘܐܲܒ̣ܘܼܗܝ ܕܢܵܚܘܿܪ: ܘܦܵܠܚܝܼܢ ܗ̄ܘ̣ܵܘ ܬܲܡܵܢ ܠܐܲܠܵܗܹ̈ܐ ܐ̄ܚܪ̈ܵܢܹܐ. |
[No book] |
| [3]ܘܕܸܒ̣ܪܹܬ̣ ܠܐܲܒ̣ܪܵܗܵܡ ܐܲܒ̣ܘܼܟ݂ܘܿܢ ܡ̣ܢ ܥܸܒ̣ܪܵܐ ܕܢܲܗܪܵܐ: ܘܗܲܠܸܟ݂ܬܹ̇ܗ ܒܟ݂ܠܵܗ̇ ܐܲܪܥܵܐ ܕܲܟ݂ܢܲܥܢ: ܘܐܲܣܓܝܼܬ̣ ܙܲܪܥܹܗ: ܘܝܸܗ̄ܒܹ̇ܬ̣ ܠܹܗ ܠܐܝܼܣܚܵܩ. |
[No book] |
| [4]ܘܝܸܗ̄ܒܹ̇ܬ̣ ܠܐܝܼܣܚܵܩ ܠܝܲܥܩܘܿܒ̣ ܘܲܠܥܹܣܘܿ: ܘܝܸܗ̄ܒܹ̇ܬ̣ ܠܥܹܣܘܿ ܝܘܼܪܬܵܢܵܐ ܛܘܼܪܵܐ ܕܣܵܥܝܼܪ. ܘܝܲܥܩܘܿܒ̣ ܘܲܒ̣ܢܵܘ̈ܗܝ ܢܚܸܬ̣ܘ ܠܡܸܨܪܹܝܢ. |
[No book] |
| [5]ܘܫܲܕ̇ܪܹܬ̣ ܠܡܘܼܫܹܐ ܘܠܲܐܗܪܘܿܢ: ܘܲܡܚܹ̇ܝܬ̣ ܠܡܸܨܪ̈ܵܝܹܐ: ܘܬܸܕ݂ܡ̱ܪ̈ܵܬ̣ܵܐ ܥܸܒ̣ܕܹ̇ܬ̣ ܒܲܝܢܵܬ̣ܗܘܿܢ: ܘܡ̣ܢ ܒܵܬܲܪ ܗܵܝܕܹ̇ܝܢ ܐܲܦܲܩܬ̇ܟ݂ܘܿܢ. |
[No book] |
| [6]ܘܐܲܦܩܹ̇ܬ̣ ܠܐܲܒ̣ܵܗܲܝ̈ܟ̇ܘܿܢ ܡ̣ܢ ܡܸܨܪܹܝܢ: ܘܐܲܝܬܝܼܬ̣ ܐܸܢܘܿܢ ܠܝܲܡܵܐ: ܘܲܪܕܲܦ̣ܘ ܡܸܨܪ̈ܵܝܹܐ ܒܵܬܲܪ ܐܲܒ̣ܵܗܲܝ̈ܟ̇ܘܿܢ: ܒܩܵܪ̈ܘܿܟܹܐ ܘܲܒ̣ܦܲܪ̈ܵܫܹܐ ܠܝܲܡܵܐ ܕܣܘܿܦ. |
[No book] |
| [7]ܘܲܓ̣ܥܵܘ ܐܲܒ̣ܵܗܲܝ̈ܟ̇ܘܿܢ ܠܘܵܬ̣ ܡܵܪܝܵܐ: ܘܲܥ̣ܒܲܕ݂ ܚܸܫܘܿܟ݂ܵܐ ܒܲܝܢܵܬ̣ܗܘܿܢ ܠܡܸܨܪ̈ܵܝܹܐ. ܘܦܲܠܲܓ̣ ܡܵܪܝܵܐ ܝܲܡܵܐ ܕܣܘܿܦ: ܘܐܲܥܒܲܪ ܠܐܲܒ̣ܵܗܲܝ̈ܟ̇ܘܿܢ ܒܓ̣ܵܘܹܗ: ܘܐܲܝܬ̇ܝܹܗ ܠܝܲܡܵܐ ܥܲܠ ܡܸܨܪܹ̈ܝܢ ܘܟܲܣܝܼ ܐܸܢܘܿܢ. ܘܲܚܙܲܝ̈ ܥܲܝܢܲܝ̈ܟ̇ܘܿܢ ܡܸܕܸ̇ܡ ܕܥܸܒ̣ܕܹܬ̣ ܠܡܸܨܪ̈ܵܝܹܐ. ܘܐܲܝܬ̇ܝܼܬ̇ܟ݂ܘܿܢ ܠܡܲܕ݂ܒ̇ܪܵܐ: ܘܝܸܬ̣ܒ̣ܬ̇ܘܿܢ ܒܡܲܕ݂ܒ̇ܪܵܐ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ. |
[No book] |
| [8]ܘܐܲܝܬ̇ܝܼܬ̇ܟ݂ܘܿܢ ܠܐܲܪܥܵܐ ܕܐܵܡܘܿܪ̈ܵܝܹܐ ܕܝܵܬ̣ܒ̇ܝܼܢ ܒܥܸܒ̣ܪܵܐ ܕܝܘܿܪܕ̇ܢܵܢ: ܘܐܸܬ̣ܟܲܬܲܫ̣ܘ ܥܲܡܟ݂ܘܿܢ: ܘܐܲܫ̱ܠܡܹ̇ܬ̣ ܐܸܢܘܿܢ ܒܐܝܼܕܲܝ̈ܟ̇ܘܿܢ: ܘܐܵܘܒ̇ܕܹܬ̣ ܐܸܢܘܿܢ ܡ̣ܢ ܩܕ݂ܵܡܲܝܟ̇ܘܿܢ: ܘܝܼܪܸܬ̇ܬ̇ܘܿܢ ܐܲܪܥ̱ܗܘܿܢ. |
[No book] |
| [9]ܘܩܵܡ ܒܵܠܵܩ ܒܲܪ ܨܸܦܘܿܪ ܡܲܠܟܵܐ: ܕܡܘܼܐܵܒ̣ܵܝܹ̈ܐ: ܘܐܸܬ̣ܟܲܬܲܫ̣ ܥܲܡ ܝܼܣܪܵܝܹܠ: ܘܫܲܕܲܪ ܩܪܵܐ ܠܒܸܠܥܵܡ ܒܲܪ ܒܥܘܿܪ ܠܲܡܠܵܛܘܼܬ̣ܟ݂ܘܿܢ. |
[No book] |
| [10]ܘܠܵܐ ܨܒܹܝܬ̣ ܠܡܸܫ̱ܡܥܹܗ ܠܒܸܥܠܵܡ: ܘܲܡܒܲܪܵܟ݂ܘܼ ܒܲܪܸܟ݂ܬ̇ܟ݂ܘܿܢ ܘܦܲܨܵܝܬ̇ܟ݂ܘܿܢ ܡ̣ܢ ܐܝܼܕ݂ܵܘ̈ܗܝ. |
[No book] |
| [11]ܘܲܥܒܲܪܬ̇ܘܿܢ ܝܘܿܪܕ̇ܢܵܢ: ܘܐܸܬܲܝܬ̇ܘܿܢ ܠܐܝܼܪܝܼܚܘܿ. ܘܐܸܬ̣ܟܲܬܲܫܘ ܥܲܡܟ݂ܘܿܢ ܓܲܒ̣ܪܹ̈ܐ ܕܐܝܼܪܝܼܚܘܿ: ܘܐܵܡܘܿܪ̈ܵܝܹܐ: ܘܲܟ݂ܢܲܥܢܵܝܹ̈ܐ: ܘܦܲܪ̈ܙܵܝܹܐ: ܘܚܹـ̈ـܬ̣ܵܝܹܐ: ܘܓܲܪ̈ܓ̇ܘܿܣܵܝܹܐ: ܘܚܵܘܵܝܹ̈ܐ: ܘܝܵܒ̣ܘܿܣܵܝܹ̈ܐ ܘܐܲܫ̱ܠܡܹ̇ܬ̣ ܐܸܢܘܿܢ ܒܐܝܼܕܲܝ̈ܟ̇ܘܿܢ. |
[No book] |
| [12]ܘܫܲܕܪܹܬ̣ ܩܕ݂ܵܡܲܝܟ̇ܘܿܢ ܕܸܒ̇ܘܿܪ̈ܝܵܬ̣ܵܐ: ܘܐܵܘܒ̇ܕܹܬ̣ ܡ̣ܢ ܩܕ݂ܵܡܲܝܟ̇ܘܿܢ ܬܪܹܝܢ ܡܲܠܟܲܝ̈ܗܘܿܢ. ܕܐܵܡܘܿܪ̈ܵܝܹܐ: ܠܵܐ ܒܣܲܝܦܲܝ̈ܟ̇ܘܿܢ: ܐܵܦܠܵܐ ܒܩܸܫ̈ܬܵܬ̣ܟ݂ܘܿܢ. |
[No book] |
| [13]ܘܝܸܗ̄ܒܹ̇ܬ̣ ܠܟ݂ܘܿܢ ܐܲܪܥܵܐ ܕܠܵܐ ܠܐܝܼܬ̇ܘܿܢ ܒܵܗ̇: ܘܩܘܼܪ̈ܝܵܐ ܕܠܵܐ ܒܢܲܝܬ̇ܘܿܢ: ܘܝܸܬ̣ܒ̣ܬ̇ܘܿܢ ܒܗܹܝܢ. ܘܟܲܪ̈ܡܹܐ ܘܙܲܝ̈ܬܹ̇ܐ ܕܠܵܐ ܢܨܲܒ̣ܬ̇ܘܿܢ: ܗܵܐ ܐܵܟ݂ܠܝܼܢ ܐ̄ܢܬ̇ܘܿܢ. |
[No book] |
| [14]ܡܸܟܹ̇ܝܠ ܕܚܲܠܘ ܡ̣ܢ ܡܵܪܝܵܐ: ܘܦܘܼܠܚܘܼܗܝ. ܒܬܲܡܝܼܡܘܼܬ̣ܵܐ ܘܲܒ̣ܩܘܼܫܬܵܐ. ܘܐܲܥܒܲܪܘ ܡ̣ܢ ܠܸܒ̇ܟ݂ܘܿܢ ܐܲܠܵܗܹ̈ܐ ܢܘܼܟ݂ܪ̈ܵܝܹܐ: ܕܲܦܠܲܚ̣ܘ ܐܲܒ̣ܵܗܲܝ̈ܟ̇ܘܿܢ ܒܥܸܒ̣ܪܵܐ ܕܢܲܗܪܵܐ ܘܲܒ̣ܡܸܨܪܹܝܢ: ܘܐܲܢ̄ܬ̇ܘܿܢ ܦܠܘܿܚܘ ܠܡܵܪܝܵܐ. |
[No book] |
| [15]ܘܐܸܢ ܒܝܼܫ ܗ̄ܘ̣ ܒܥܲܝܢܲܝ̈ܟ̇ܘܿܢ ܠܡܸܦܠܲܚ ܠܡܵܪܝܵܐ: ܓܒ̣ܵܘ ܠܟ݂ܘܿܢ ܝܵܘܡܵܢܵܐ ܠܡ̇ܢ ܦܵܠܚܝܼܢ ܐ̄ܢܬ̇ܘܿܢ: ܐܸܢ ܐܲܠܵܗܹ̈ܐ ܕܲܦܠܲܚܘ ܐܲܒ̣ܵܗܲܝ̈ܟ̇ܘܿܢ ܒܥܸܒ̣ܪܵܐ ܕܢܲܗܪܵܐ: ܘܐܸܢ ܠܐܲܠܵܗܹ̈ܐ ܕܐܵܡܘܿܪ̈ܵܝܹܐ ܕܥܵܡ̇ܪܝܼܢ ܐ̄ܢܬ̇ܘܿܢ ܒܐܲܪ̱ܥܗܘܿܢ. ܐܸܢܵܐ ܕܹܝܢ ܘܲܒ̣̈ܢܲܝ ܒܲܝܬ̇ܝ: ܠܡܵܪܝܵܐ ܗ̄ܘ̣ ܐܲܠܵܗܵܐ ܦܵܠܚܝܼܢ ܚ̄ܢܲܢ. |
[No book] |
| [16]ܘܲܥܢ̣ܵܘ ܟܠܹܗ ܥܲܡܵܐ ܘܐܸܡܲܪ: ܚܵܣ ܠܲܢ ܕܢܸܫܒ̇ܘܿܩ ܠܡܵܪܝܵܐ: ܘܢܸܦܠܘܿܚ ܠܐܲܠܵܗܹ̈ܐ ܐ̄ܚܪ̈ܵܢܹܐ. |
[No book] |
| [17]ܡܸܛܠ ܕܡܵܪܝܵܐ ܗ̄ܘ̣ ܐܲܠܵܗܲܢ: ܗܵܘ̇ ܕܐܲܣܩܲܢ ܡ̣ܢ ܐܲܪܥܵܐ ܕܡܸܨܪܹܝܢ ܡ̣ܢ ܒܹܝܬ̣ ܥܲܒ̣ܕ̇ܘܼܬ̣ܵܐ: ܘܲܥܒܲܕ݂ ܩܕ݂ܵܡܲܝܢ ܗܵܠܹܝܢ ܐܲܬ̣̈ܘܵܬ̣ܵܐ ܪܵܘ̱ܪ̈ܒ̣ܵܬ̣ܵܐ. ܘܢܲܛܪܲܢ ܒܟ݂ܠܵܗ̇ ܐܘܼܪܚܵܐ ܕܗܲܠܸܟ݂ܢ ܒܵܗ̇: ܘܲܒ̣ܟ݂ܠܗܘܿܢ ܥܲܡܡܹ̈ܐ ܕܲܥܒܲܪ̄ܢ ܒܲܝܢܵܬ̣ܗܘܿܢ. |
[No book] |
| [18]ܘܐܵܘܒܸ̇ܕ݂ ܐܸܢܘܿܢ ܡܵܪܝܵܐ ܐܲܠܵܗܲܢ ܠܟ݂ܠܗܘܿܢ ܥܲܡܡܹ̈ܐ ܗܵܠܹܝܢ. ܘܠܵܐܡܘܿܪ̈ܵܝܹܐ ܕܥܵܡ̇ܪܝܼܢ ܚ̄ܢܲܢ ܒܐܲܪ̱ܥܗܘܿܢ: ܐܵܘܒܸ̇ܕ݂ ܐܸܢܘܿܢ ܡܵܪܝܵܐ ܡ̣ܢ ܩܕ݂ܵܡܲܝܢ: ܡܸܛܠ ܗܵܢܵܐ ܠܡܵܪܝܵܐ ܗ̄ܘ̣ ܦܵܠܚܝܼܢ ܚ̄ܢܲܢ: ܡܸܛܠ ܕܗ̤ܘܝܘܼ ܐܲܠܵܗܵܐ ܒܲܠܚܘܿܕ݂ܵܘܗܝ: ܘܗ̤ܘܝܘܼ ܐܲܠܵܗܲܢ. |
[No book] |
| [19]ܘܐܸܡܲܪ ܝܼܫܘܿܥ ܠܥܲܡܵܐ: ܚܙܵܘ ܕܹܝܢ ܕܲܠܡܵܐ ܠܵܐ ܡܸܫܟ̇ܚܝܼܢ ܐ̄ܢܬ̇ܘܿܢ ܠܡܸܦܠܲܚ ܠܡܵܪܝܵܐ. ܡܸܛܠ ܕܐܲܠܵܗܵܐ ܗ̄ܘ̣ ܩܲܕ݂ܝܼܫܵܐ: ܘܐܲܠܵܗܵܐ ܗ̄ܘ̣ ܛܲܢܵܢܵܐ: ܘܠܵܐ ܕܹܝܢ ܫܵܒܹ̇ܩ ܠܚܵܘܒܲܝ̈ܟ̇ܘܿܢ ܘܠܲܚܛܵܗܲܝ̈ܟ̇ܘܿܢ. |
[No book] |
| [20]ܕܲܠܡܵܐ ܬܸܫܒ̇ܩܘܼܢܹܗ ܠܡܵܪܝܵܐ: ܘܬܸܦ̱ܠܚܘܼܢ ܠܐܲܠܵܗܹ̈ܐ ܐ̄ܚܪܵܢܹܐ ܢܘܼܟ݂ܪ̈ܵܝܹܐ ܕܐܲܪܥܵܐ: ܘܢܸܗܦܘܿܟ݂ ܡܵܪܝܵܐ ܠܡܲܒ̣ܐܵܫܘܼ ܠܟ݂ܘܿܢ: ܘܲܢܓܲܡܪܟ݂ܘܿܢ ܡ̣ܢ ܒܵܬܲܪ ܕܐܲܛܐܸܒ̣ ܠܟ݂ܘܿܢ. |
[No book] |
| [21]ܘܐܸܡܲܪܘ ܥܲܡܵܐ ܠܝܼܫܘܿܥ: ܠܵܐ ܗܵܘܹ̇ܐ ܠܲܢ ܦܘܼܠܚܵܢ ܐ̄ܚܪܹܝܢ: ܐܸܠܵܐ ܠܡܵܪܝܵܐ ܗ̄ܘ̣ ܐܲܠܵܗܵܐ ܦܵܠܚܝܼܢܲܢ. |
[No book] |
| [22]ܘܐܸܡܲܪ ܝܼܫܘܿܥ ܠܥܲܡܵܐ: ܣܵܗܕ̇ܝܼܢ ܐ̄ܢܬ̇ܘܿܢ ܒܢܲܦ̮ܫܟ݂ܘܿܢ: ܕܐܲܢ̄ܬ̇ܘܿܢ ܓܒܲܝܬ̇ܘܿܢ ܠܟ݂ܘܿܢ ܠܡܸܦܠܲܚ ܠܡܵܪܝܵܐ. ܘܐܵܡ̇ܪܝܼܢ ܠܹܗ ܣܵܗܕ̇ܝܼܢ ܚ̄ܢܲܢ. |
[No book] |
| [23]ܐܵܡܲܪ ܠܗܘܿܢ ܝܼܫܘܿܥ: ܡܸܟܹ̇ܝܠ ܐܲܥܒܲܪܘ ܐܲܠܵܗܹ̈ܐ ܢܘܼܟ݂ܪ̈ܵܝܹܐ ܕܒܲܝܢܵܬ̣ܟ݂ܘܿܢ: ܘܐܲܬ̣ܩܸܢܘ ܠܸܒ̇ܟ݂ܘܿܢ ܠܘܵܬ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. |
[No book] |
| [24]ܘܐܸܡܲܪܘ ܥܲܡܵܐ ܠܝܼܫܘܿܥ: ܠܡܵܪܝܵܐ ܐܲܠܵܗܲܢ ܦܵܠܚܝܼܢ ܚ̄ܢܲܢ: ܘܲܒ̣ܩܵܠܹܗ ܫܵܡܥܝܼܢ ܚ̄ܢܲܢ. |
[No book] |
| [25]ܘܐܲܩܝܼܡ ܝܼܫܘܿܥ ܕܝܵܬܹܩܹܐ ܠܥܲܡܵܐ ܒܹܐ ܒܝܵܘܡܵܐ ܗܵܘ̇: ܘܐܲܠܸܦ ܐܸܢܘܿܢ ܦܘܼܩ̈ܕܵܢܹܐ: ܘܕ݂ܝܼܢܹ̈ܐ: ܒܲܫܟܹܝܡ. |
[No book] |
| [26]ܘܲܟܬܲܒ̣ ܝܼܫܘܿܥ ܡܸܠܹ̈ܐ ܗܵܠܹܝܢ ܒܣܸܦܪܵܐ ܕܢܵܡܘܿܣܹܗ ܕܡܘܼܫܹܐ. ܘܲܢܣܲܒ̣ ܟܹܐܦܵܐ ܪܲܒ̇ܬ̣ܵܐ: ܘܐܲܩܝܼܡܵܗ̇ ܬܚܹܝܬ̣ ܒܸܛܡ̱ܬ̣ܵܐ ܕܒܹܝܬ̣ ܡܲܩܕ̇ܫܹܗ ܕܡܵܪܝܵܐ. |
[No book] |
| [27]ܘܐܸܡܲܪ ܝܼܫܘܿܥ ܠܟ݂ܠܹܗ ܥܲܡܵܐ: ܗܵܐ ܟܹܐܦܵܐ ܗܵܕܹܐ ܬܸܗܘܹܐ ܠܲܢ ܣܵܗܕ̇ܘܼܬ̣ܵܐ: ܡܸܛܠ ܕܗ̤ܝ ܫܸܡܥܲܬ̤ ܟܠܗܹܝܢ ܡܸܠܵܘ̈ܗܝ ܕܡܵܪܝܵܐ ܕܡܲܠܸܠ̣ ܥܲܡܲܢ: ܘܬܸܗܘܹܐ ܠܟ݂ܘܿܢ ܠܣܵܗܕ̇ܘܼܬ̣ܵܐ: ܕܠܵܐ ܬܟܲܕ̇ܒ̣ܘܼܢ ܒܡܵܪܝܵܐ ܐܲܠܵܗܟ݂ܘܿܢ. |
[No book] |
| [28]ܘܡ̣ܢ ܒܵܬܲܪ ܕܦܲܩܸܕ݂ ܝܼܫܘܿܥ ܠܥܲܡܵܐ: ܫܲܕܲܪ ܐܸܢܘܿܢ ܐ̄ܢܵܫ ܠܝܵܪܬ̇ܘܼܬܹܗ. |
[No book] |
| [29]ܘܡ̣ܢ ܒܵܬܲܪ ܡܸܠܹ̈ܐ ܗܵܠܹܝܢ: ܡܝܼܬ̣ ܝܼܫܘܿܥ ܒܲܪܢܘܿܢ ܥܲܒ̣ܕܹ̇ܗ ܕܡܵܪܝܵܐ: ܒܲܪܡܵܐܐ ܘܲܥܣܲܪ ܫܢ̈ܝܼܢ. |
[No book] |
| [30]ܘܩܲܒ̣ܪܘܼܗܝ ܒܲܬ̣ܚܘܼܡܵܐ ܕܝܵܪܬ̇ܘܼܬܹܗ: ܒܬܲܝܡܢܲܬ̣ ܣܪܲܚ ܕܲܒ̣ܛܘܼܪܵܐ ܕܐܲܦܪܹܝܡ: ܡ̣ܢ ܓܪܒ̇ܝܵܐ ܠܛܘܼܪܵܐ ܕܓ݂ܵܥܵܫ. |
[No book] |
| [31]ܘܲܦܠܲܚ ܝܼܣܪܵܝܹܠ ܠܡܵܪܝܵܐ ܟܠܗܘܿܢ ܝܵܘ̈ܡܵܬܹܗ ܕܝܼܫܘܿܥ: ܘܟ݂ܠܗܘܿܢ ܝܵܘ̈ܡܵܬ̣ܵܐ ܕܩܲܫ̈ܝܼܫܹܐ: ܕܲܚܝܵܘ ܢܘܼܓ̣ܪܵܐ ܒܵܬܲܪ ܝܼܫܘܿܥ: ܥܒ̣ܵܕ݂ܵܘ̈ܗܝ ܕܡܵܪܝܵܐ ܕܲܥܒܲܕ݂ ܠܝܼܣܪܵܝܹܠ. |
[No book] |
| [32]ܘܲܠܓܲܪ̈ܡܵܘܗܝ ܕܝܵܘܣܸܦ ܕܐܲܣܸܩ̣ܘ ܒ̈ܢܲܝ ܝܼܣܪܵܝܹܠ ܡ̣ܢ ܡܸܨܪܹܝܢ: ܩܒܲܪܘ ܒܲܫܟܹܝܡ: ܒܦܵܠܓܘܼܬ̣ܵܐ ܕܚܲܩܠܵܐ ܕܲܙܒܲܢ ܝܲܥܩܘܿܒ̣ ܡ̣ܢ ܚܡܘܿܪ ܐܲܒ̣ܘܼܗܝ ܕܲܫܟܹܝܡ ܒܡܵܐܐ ܢܩܵـ̈ـܘܵܢ: ܘܲܗܘ̤ܵܬ̣ ܝܵܪܬ̇ܘܼܬ̣ܵܐ ܠܲܒ̣̈ܢܲܝ ܝܵܘܣܸܦ. |
[No book] |
| [33]ܘܐܹܠܝܼܥܵܙܲܪ ܟܵܗܢܵܐ ܒܲܪ ܐܲܗܪܘܿܢ ܟܵܗܢܵܐ ܡܝܼܬ̣: ܘܩܲܒ̣ܪܘܼܗܝ ܒܲܓܒܲܥܬ̣ܵܐ ܕܦܝܼܢܚܸܣ ܒܪܹܗ: ܕܐܸܬ̣ܝܲܗܒܲܬ̤ ܠܹܗ ܒܛܘܼܪܵܐ ܕܐܲܦܪܹܝܡ. |
[No book] |