|
|
| [1]ܘܐܸܡܲܪ ܡܵܪܝܵܐ ܠܝܼܫܘܿܥ: ܠܵܐ ܬܸܕ݂ܚܲܠ: ܘܠܵܐ ܬܙܘܼܥ: ܕܒܲܪ ܥܲܡܵܟ݂ ܠܟ݂ܠܹܗ ܥܲܡܵܐ ܘܲܥܒܸܕ݂ ܩܪܵܒ̣ܵܐ: ܘܲܩܘܼܡ ܣܲܩ ܠܥܵܝ ܡܸܛܠ ܕܐܲܫܠܸܡܬܹ̇ܗ ܒܐܝܼܕܲܝ̈ܟ ܠܡܲܠܟܵܐ ܕܥܵܝ: ܘܲܠܥܲܡܹܗ: ܘܠܲܡܕ݂ܝܼܢ̄ܬܹܗ: ܘܠܲܐܪܥܹܗ. |
[No book] |
| [2]ܘܲܥܒܸܕ݂ ܠܥܵܝ ܘܲܠܡܲܠܟܵܗ̇: ܐܲܝܟܲܢܵܐ ܕܲܥܒܲܕ̇ܬ̇ ܠܐܝܼܪܝܼܚܘܿ: ܘܲܠܡܲܠܟܵܗ̇ ܒܲܠܚܘܿܕ݂ ܕܹܝܢ ܒܹܝܬ̣ ܘܲܒ̣ܥܝܼܪܵܐ ܒܘܿܙܘ ܠܟ݂ܘܿܢ: ܘܐܲܟ݂ܡܸܢܘ ܠܟ݂ܘܿܢ ܟܡܹܐܢܵܐ ܡ̣ܢ ܒܸܣܬ̇ܪܵܗ̇ ܕܲܡܕ݂ܝܼܢ̄ܬܵܐ. |
[No book] |
| [3]ܘܩܵܡ ܝܼܫܘܿܥ ܘܟ݂ܠܹܗ ܥܲܡܵܐ ܥܵܒ̣ܕܲܝ̈ ܩܪܵܒ̣ܵܐ ܠܡܸܣܲܩ ܠܥܵܝ. ܘܲܓ̣ܒ̣ܵܐ ܝܼܫܘܿܥ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܕܓܲܢ̄ܒܵܪ̈ܝܼܢ ܒܚܲܝ̱ܠܗܘܿܢ: ܘܫܲܕܲܪ ܐܸܢܘܿܢ ܒܠܸܠܝܵܐ. |
[No book] |
| [4]ܘܦܲܩܸܕ݂ ܐܸܢܘܿܢ: ܘܐܸܡܲܪ ܠܗܘܿܢ: ܚܙܵܘ ܡܵܐ ܕܟ݂ܵܡܢܝܼܢ ܐ̄ܢܬ̇ܘܿܢ ܥܲܠ ܡܕ݂ܝܼܢ̄ܬܵܐ: ܡ̣ܢ ܒܸܣܬ̇ܪܵܗ̇ ܕܲܡܕ݂ܝܼܢ̄ܬܵܐ: ܠܵܐ ܬܲܪܚ̄ܩܘܼܢ ܛܵܒ̣ ܡܸܢܵܗ̇ ܡ̣ܢ ܡܕ݂ܝܼܢ̄ܬܵܐ: ܘܲܗ̤ܘܲܝܬ̇ܘܿܢ ܡܛܲܝܒ̣ܝܼܢ ܟܠܟ݂ܘܿܢ. |
[No book] |
| [5]ܘܐܸܢܵܐ ܘܥܲܡܵܐ ܕܐܝܼܬ̣ ܥܲܡܝ ܢܸܬ̣ܩܲܪܲܒ̣ ܠܲܡܕ݂ܝܼܢ̄ܬܵܐ: ܘܡܵܐ ܕܲܢܦܲܩ̣ܘ ܠܐܘܼܪܥܲܢ ܐܲܝܟ݂ ܕܲܒ̣ܩܲܕ݂ܡܵܝܬܵܐ: ܗܵܐ ܥܵܪܩܝܼܢ ܚ̄ܢܲܢ ܡ̣ܢ ܩܕ݂ܵܡܲܝܗܘܿܢ. |
[No book] |
| [6]ܘܢܵܦܩܝܼܢ ܒܵܬ̣ܪܲܢ ܘܪܵܕ݂ܦܝܼܢ ܠܲܢ ܡ̣ܢ ܡܕ݂ܝܼܢ̄ܬܵܐ: ܡܸܛܠ ܕܐܵܡ̇ܪܝܼܢ: ܕܥܵܪܩܝܼܢ ܐܸܢܘܿܢ ܡ̣ܢ ܩܕ݂ܵܡܲܝܢ ܐܲܝܟ݂ ܕܲܒ̣ܩܲܕ݂ܡܵܝܬܵܐ: ܘܲܚܢܲܢ ܗܵܐ ܥܵܪܩܝܼܢ ܚ̄ܢܲܢ ܡ̣ܢ ܩܕ݂ܵܡܲܝܗܘܿܢ. |
[No book] |
| [7]ܘܐܲܢ̄ܬ̇ܘܿܢ ܩܘܼܡܘ ܡ̣ܢ ܟܡܹܐܢܟ݂ܘܿܢ: ܘܚܘܼܪܒ̇ܘܼܗ̇ ܠܲܡܕ݂ܝܼܢ̄ܬܵܐ: ܘܢܲܫܠ̱ܡܝܼܗ̇ ܡܵܪܝܵܐ ܐܲܠܵܗܟ݂ܘܿܢ ܒܐܝܼܕܲܝ̈ܟ̇ܘܿܢ. |
[No book] |
| [8]ܘܡܵܐ ܕܐܸܚܲܕ̇ܬ̇ܘܿܢܵܗ̇ ܠܲܡܕ݂ܝܼܢ̄ܬܵܐ: ܐܵܘܩܕ݂ܘܼܗ̇ ܒܢܘܼܪܵܐ: ܐܲܝܟ݂ ܡܸܠܬܹܗ ܕܡܵܪܝܵܐ ܥܒܸܕ݂ܘ: ܘܲܚܙܵܘ ܕܹܝܢ ܕܦܲܩܸܕ̇ܬ̇ܟ݂ܘܿܢ. |
[No book] |
| [9]ܘܫܲܕܲܪ ܐܸܢܘܿܢ ܝܼܫܘܿܥ: ܘܐܸܙܸܠ̣ܘ ܠܒܹܝܬ̣ ܟܡܹܐܢܵܐ: ܘܝܼܬܸܒ̣ܘ ܒܲܝܢܵܬ̣ ܒܹܝܬ̣ ܐܹܝܠ ܠܥܵܝ: ܡ̣ܢ ܡܲܥ̱ܪܒ̣ܵܝܵܗ̇ ܕܲܡܕ݂ܝܼܢ̄ܬܵܐ: ܘܒ̣ܵܬ̣ ܝܼܫܘܿܥ ܒܠܸܠܝܵܐ ܗܵܘ̇ ܒܓ̣ܵܘ ܥܲܡܵܐ. |
[No book] |
| [10]ܘܩܲܕܸܡ ܝܼܫܘܿܥ ܒܨܲܦܪܵܐ ܘܲܡܢܵܝܗܝ ܠܥܲܡܵܐ: ܘܲܣܠܸܩ̣ܘ ܗ̤ܘ ܘܣܵܒܹ̈ܐ ܕܝܼܣܪܵܝܹܠ ܠܥܵܝ ܩܕ݂ܵܡ ܥܲܡܵܐ. |
[No book] |
| [11]ܘܟ݂ܠܗܘܿܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ ܕܥܲܡܹܗ: ܣܠܸܩ̣ܘ: ܘܲܩ̣ܪܸܒ̣ܘ ܠܩܘܼܒ̣ܠܵܗ̇ ܕܲܡܕ݂ܝܼܢ̄ܬܵܐ: ܘܲܫܪܵܘ ܡ̣ܢ ܓܲܪܒܝܵܝܵܗ̇ ܕܥܵܝ: ܘܢܲܚܠܵܐ ܐܝܬ̣ ܗ̄ܘ̣ܵܐ ܒܲܝܢܵܬ̣ܗܘܿܢ ܠܥܵܝ. |
[No book] |
| [12]ܘܲܕ݂ܒܲܪ ܝܼܫܘܿܥ ܚܲܡܫܵܐ ܐܲܠܦ̈ܝܼܢ ܓܲܒ̣ܪ̈ܝܼܢ: ܘܐܵܘܬܸ̇ܒ̣ ܐܸܢܘܿܢ ܒܲܟ݂ܡܹܐܢܵܐ ܒܲܝܢܵܬ̣ ܒܹܝܬ̣ ܐܹܝܠ ܠܥܵܝ: ܡ̣ܢ ܡܲܥܪ̱ܒ̣ܵܝܵܗ̇ ܕܲܡܕ݂ܝܼܢ̄ܬܵܐ. |
[No book] |
| [13]ܘܥܲܒ̣ܕܹ̇ܗ ܠܥܲܡܹܗ ܘܲܠܟ݂ܠܵܗ̇ ܡܲܫܪܝܼܬܹܗ ܡ̣ܢ ܓܲܪܒ̇ܝܵܝܵܗ̇ ܕܲܡܕ݂ܝܼܢ̄ܬܵܐ: ܘܢܵܛܪ̈ܲܝ ܥܸܩܒ̣ܵܐ ܡ̣ܢ ܡܲܥܪ̱ܒ̣ܵܝܵܗ̇ ܕܲܡܕ݂ܝܼܢ̄ܬܵܐ. ܘܐܸܙܲܠ̣ ܝܼܫܘܿܥ ܒܠܸܠܝܵܐ ܗܵܘ̇ ܒܓ̣ܵܘ ܥܲܡܵܐ. |
[No book] |
| [14]ܘܟܲܕ݂ ܚܙ̣ܵܐ ܡܲܠܟܵܐ ܕܥܵܝ ܐܸܣܬܲܪܗܲܒ̣ ܘܩܵܡ̣ܘ ܢܦܲܩ̣ܘ ܐ̄ܢܵܫܹܝ̈ܗ̇ ܕܲܡܕ݂ܝܼܢ̄ܬܵܐ ܠܐܘܼܪܥܹܗ ܕܝܼܣܪܵܝܹܠ: ܘܲܗܘ̤ܵܘ ܟܠܹܗ ܥܲܡܵܐ ܕܥܵܝ ܒܲܦܩܲܥܬ̣ܵܐ: ܘܥܲܡܵܐ ܠܵܐ ܝܵܕܲܥ ܗ̄ܘ̣ܵܐ ܕܲܟ݂ܡܹܐܢܵܐ ܐܝܼܬ̣ ܗ̄ܘ̣ܵܐ ܠܗܘܿܢ ܡ̣ܢ ܒܸܣܬ̇ܪܵܗ̇ ܕܲܡܕ݂ܝܼܢ̄ܬܵܐ. |
[No book] |
| [15]ܘܐܸܬ̣ܒܲܕܲܪ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܡ̣ܢ ܩܕ݂ܵܡܲܝܗܘܿܢ ܠܡܸܥܪܲܩ ܒܐܘܼܪܚܵܐ ܕܡܲܕ݂ܒ̇ܪܵܐ. |
[No book] |
| [16]ܘܲܩ̣ܥܵܐ ܟܠܹܗ ܥܲܡܵܐ ܕܥܵܝ ܠܡܸܪܕܲܦ ܒܵܬܲܪܗܘܿܢ: ܘܲܪܕܲܦܲܘ ܒܵܬܲܪ ܝܼܫܘܿܥ: ܘܐܸܣܬܲܪܲܩܘ ܠܗܘܿܢ ܡ̣ܢ ܡܕ݂ܝܼܢ̄ܬܵܐ. |
[No book] |
| [17]ܘܠܵܐ ܐܸܫܬ̇ܚܲܪ ܐ̄ܢܵܫ ܒܥܵܝ: ܘܲܒ̣ܒܹܬ̣ ܐܹܝܠ: ܕܠܵܐ ܢܦܲܩ̣ܘ ܒܵܬܲܪ ܝܼܣܪܵܝܹܠ. ܘܫܲܒ̣ܩܘܼܗ̇ ܠܲܡܕ݂ܝܼܢ̄ܬܵܐ ܟܲܕ݂ ܦܬ̣ܝܼܚܵܐ: ܘܲܪܕܲܦ̣ܘ ܒܵܬܲܪ ܝܼܣܪܵܝܹܠ. |
[No book] |
| [18]ܘܐܸܡܲܪ ܡܵܪܝܵܐ ܠܝܼܫܘܿܥ: ܐܲܪܝܼܡ ܒܢܲܝܙܟ݂ܵܐ ܕܒ̣ܐܝܼܕ݂ܵܟ݂ ܥܲܠ ܥܵܝ: ܡܸܛܠ ܕܒ̣ܐܝܼܕܲܝ̈ܟ ܐܲܫܠܸܡ̇ܬܵܗ̇. ܘܐܲܪܝܼܡ ܝܼܫܘܿܥ ܒܢܲܝܙܟ݂ܵܐ ܕܐܲܚܝܼܕ݂ ܗ̄ܘ̣ܵܐ ܒܐܝܼܕܹܗ ܥܲܠ ܡܕ݂ܝܼܢ̄ܬܵܐ. |
[No book] |
| [19]ܘܲܟ݂ܡܹܐܢܵܐ ܩܵܡ̣ ܡܣܵܪ̱ܗܒ̣ܵܐܝܼܬ̣ ܡ̣ܢ ܕܘܼܟ̇ܬܹܗ: ܘܲܪܗܸܛܘ ܚܦܝܼܛܵܐܝܼܬ̣ ܐܲܝܟ݂ ܡܲܦܢܸܐ ܐܝܼܕ݂ܵܐ. ܘܥܲܠ̣ܘ ܠܲܡܕ݂ܝܼܢ̄ܬܵܐ ܘܐܲܚܕ̇ܘܼܗ̇: ܘܐܸܣܬܲܪܗܲܒ̣ܘ ܘܐܵܘܩܕ݂ܘܼܗ̇ ܠܲܡܕ݂ܝܼܢ̄ܬܵܐ ܒܢܘܼܪܵܐ. |
[No book] |
| [20]ܘܐܸܬ̣ܦܢܝܼܘ ܐ̄ܢܵܫܵܐ ܕܥܵܝ ܠܒܸܣܬܲܪܗܘܿܢ: ܘܲܚܙܵܘ ܕܣܵܠܹܩ ܬܸܢܵܢܵܐ ܕܲܡܕ݂ܝܼܢ̄ܬ̇ܗܘܿܢ ܥܕܲܡܵܐ ܠܲܫܡܲܝܵܐ: ܘܠܵܐ ܐܵܘܦܝܼܘ ܠܡܸܥܪܲܩ ܠܟ݂ܵܐ ܘܲܠܟ݂ܵܐ. ܘܥܲܡܵܐ ܕܝܼܣܪܵܝܹܠ ܕܥܵܪܹܩ ܗ̄ܘ̣ܵܐ ܒܡܲܕ݂ܒ̇ܪܵܐ: ܐܸܬ̣ܗ̱ܦܲܟ݂ ܥܲܠ ܪ̈ܵܕ݂ܘܿܦܵܘܗܝ. |
[No book] |
| [21]ܘܝܼܫܘܿܥ ܘܟ݂ܠܹܗ ܝܼܣܪܵܝܹܠ: ܚܙ̣ܵܘ ܕܟܲܒ̣ܫܵܗ̇ ܟܡܹܐܢܵܐ ܠܲܡܕ݂ܝܼܢ̄ܬܵܐ: ܘܲܣܠܸܩ ܬܸܢܵܢܵܗ̇ ܕܲܡܕ݂ܝܼܢ̄ܬܵܐ: ܘܲܗܦܲܟ݂ܘ ܘܲܚܪܲܒ̣ܘ ܐܸܢܘܿܢ ܠܐ̄ܢܵܫܹ̈ܝܗ̇ ܕܥܵܝ. |
[No book] |
| [22]ܘܗܵܠܹܝܢ ܢܦܲܩ̣ܘ ܡ̣ܢ ܡܕ݂ܝܼܢ̄ܬܵܐ ܠܐܘܼܪ̱ܥܗܘܿܢ: ܘܲܗܘ̣ܵܘ ܠܗܘܿܢ ܐ̄ܢܵܫܹ̈ܝܗ̇ ܕܥܵܝ ܒܲܡܨܲܥܬܹܗ ܕܝܼܣܪܵܝܹܠ: ܘܗܵܠܹܝܢ ܡܸܟܵܐ ܘܗܵܠܹܝܢ ܡܸܟܵܐ. ܘܲܚܪܲܒ̣ܘ ܐܸܢܘܿܢ: ܘܲܣܪܝܼܕ݂ܵܐ ܠܵܐ ܫܒܲܩ̣ܘ ܠܗܘܿܢ. |
[No book] |
| [23]ܘܲܠܡܲܠܟܵܐ ܕܥܵܝ ܐܲܚܕ̇ܘܼܗܝ ܟܲܕ݂ ܚܲܝ: ܘܩܲܪܒ̣ܘܼܗܝ ܠܘܵܬ̣ ܝܼܫܘܿܥ. |
[No book] |
| [24]ܘܟܲܕ݂ ܓܲܡܲܪ ܝܼܣܪܵܝܹܠ ܠܡܸܚܪܲܒ̣ ܠܟ݂ܠܗܘܿܢ ܥܵܡ̇ܘܿܪܹ̈ܝܗ̇ ܕܥܵܝ: ܒܚܲܩ̈ܠܵܬ̣ܵܐ ܘܲܒ̣ܡܲܕ݂ܒ̇ܪܵܐ ܪܵܕ݂ܦܝܼܢ ܗ̄ܘ̣ܵܘ ܠܗܘܿܢ ܘܲܢܦܲܠ̣ܘ ܟܠܗܘܿܢ ܒܦܘܼܡܵܐ ܕܚܲܪܒܵܐ ܥܕܲܡܵܐ ܕܲܓ̣ܡܲܪܘ. ܘܲܗܦܲܟ݂ܘ ܟܠܹܗ ܝܼܣܪܵܝܹܠ ܠܥܵܝ: ܘܚܲܪܒ̣ܵܘܼܗ̇ ܒܦܘܼܡܵܐ ܕܚܲܪܒܵܐ. |
[No book] |
| [25]ܘܟ݂ܠܗܘܿܢ ܕܲܢܦܲܠ̣ܘ ܒܝܵܘܡܵܐ ܗܵܘ̇: ܡ̣ܢ ܓܲܒ̣ܪܹ̈ܐ ܘܲܥܕܲܡܵܐ ܠܢܸܫܹ̈ܐ ܬܪܸܥܣܲܪ ܐܲܠܦ̈ܝܼܢ: ܟܠܗܘܿܢ ܐ̄ܢܵܫܵܐ ܕܥܵܝ. |
[No book] |
| [26]ܘܝܼܫܘܿܥ ܠܵܐ ܐܲܗܦܲܟ݂ ܐܝܼܕܹܗ ܕܐܲܪܝܼܡ ܗ̄ܘ̣ܵܐ ܒܢܲܝܙܟ݂ܵܐ: ܥܕܲܡܵܐ ܕܲܚܪܲܒ̣ ܐܸܢܘܿܢ ܠܟ݂ܠܗܘܿܢ ܥܵܡܘܿܪܹ̈ܝܗ̇ ܕܥܵܝ. |
[No book] |
| [27]ܒܲܠܚܘܿܕ݂ ܒܥܝܼܪܵܐ ܘܒܸܙܬ̣ܵܐ ܕܲܡܕ݂ܝܼܢ̄ܬܵܐ ܗܵܝ̇: ܒܲܙܘ ܠܗܘܿܢ ܒ̈ܢܲܝ ܝܼܣܪܵܝܹܠ: ܐܲܝܟ݂ ܡܸܠܬܹܗ ܕܡܵܪܝܵܐ ܕܦܲܩܸܕ݂ ܠܝܼܫܘܿܥ. |
[No book] |
| [28]ܘܐܵܘܩܕ݂ܵܗ̇ ܝܼܫܘܿܥ ܠܥܵܝ: ܘܥܲܒ̣ܕܵܗ̇ ܬܸܠܵܐ ܚܲܪܒܵܐ ܠܥܵܠܲܡ: ܥܕܲܡܵܐ ܠܝܵܘܡܵܢܵܐ. |
[No book] |
| [29]ܘܲܠܡܲܠܟܵܐ ܕܥܵܝ ܙܲܩ̣ܦܹܗ ܥܲܠ ܩܲܝܣܵܐ: ܥܕܲܡܵܐ ܠܙܲܒ̣ܢܵܐ ܕܪܲܡܫܵܐ. ܘܟܲܕ݂ ܥܸܪܒܲܬ̤ ܫܸܡܫܵܐ: ܦ̣ܩܲܕ݂ ܝܼܫܘܿܥ ܘܐܲܚܬ̣ܘܼܗ̇ ܠܲܫܠܲܕܵܐ ܡ̣ܢ ܩܲܝܣܵܐ: ܘܐܲܪܡ̱ܝܘܼܗ̇ ܒܡܲܥܠܵܢܵܐ ܕܬܲܪܥܵܐ ܕܲܡܕ݂ܝܼܢ̄ܬܵܐ: ܘܐܲܩܝܼܡܘ ܥܠܵܘܗܝ ܝܲܓܪܵܐ ܕܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ ܥܕܲܡܵܐ ܠܝܵܘܡܵܢܵܐ. |
[No book] |
| [30]ܗܵܝܕܹ̇ܝܢ ܒܢ̣ܵܐ ܝܼܫܘܿܥ ܡܲܕ݂ܒ̇ܚܵܐ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܒܛܘܼܪܵܐ ܕܲܓ̣ܒܸܠ. |
[No book] |
| [31]ܐܲܝܟ݂ ܕܦܲܩܸܕ݂ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ ܠܲܒ̣̈ܢܲܝ ܝܼܣܪܵܝܹܠ: ܐܲܝܟ݂ ܕܲܟ݂ܬ̣ܝܼܒ̣ ܒܣܸܦܪܵܐ ܕܢܵܡܘܿܣܵܐ ܕܡܘܼܫܹܐ: ܡܲܕ݂ܒ̇ܚܵܐ ܕܟܹܐܦܹ̈ܐ ܫܠܲܡ̱ܠ̈ܡܵܬ̣ܵܐ: ܕܠܵܐ ܢܸܦܲܠ ܥܠܲܝܗܹܝܢ ܦܲܪܙܠܵܐ: ܘܩܲܪܸܒ̣ܘ ܥܠܵܘܗܝ ܝܲܩ̈ܕܹ̇ܐ ܫܲܠܡܹ̈ܐ ܠܡܵܪܝܵܐ: ܘܕܲܒܲܚܘ ܕܸܒ̣̈ܚܵܬ̣ܵܐ. |
[No book] |
| [32]ܘܲܟ݂ܬܲܒ̣ ܬܲܡܵܢ ܥܲܠ ܟܹܐܦܹ̈ܐ ܗܵܠܹܝܢ ܕܡܲܕ݂ܒ̇ܚܵܐ: ܦܲܪܫܲܓ̣ܢܵܐ ܕܢܵܡܘܿܣܹܗ ܕܡܘܼܫܹܐ: ܕܲܟ݂ܬܲܒ̣ ܩܕ݂ܵܡ ܒ̈ܢܲܝ ܝܼܣܪܵܝܹܠ. |
[No book] |
| [33]ܘܟ݂ܠܹܗ ܝܼܣܪܵܝܹܠ: ܘܩܲܫܝܼܫܵܘ̈ܗܝ: ܘܣܵܦܪ̈ܵܘܗܝ: ܘܕܲܝܵܢܵܘ̈ܗܝ: ܩܵܝ̇ܡܝܼܢ ܡܸܟܵܐ ܘܡܸܟܵܐ: ܡ̣ܢ ܬܪ̈ܲܝܗܘܿܢ ܣܸܛܪܹ̈ܝܗ̇ ܕܩܹܒ̣ܘܿܬ̣ܵܐ: ܠܘܼܩܒܲܠ ܟܵܗܢܹ̈ܐ ܘܠܹܘܵܝܹ̈ܐ ܕܲܫܩܝܼܠܝܼܢ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܐܲܝܟ݂ ܒܘܼܟ݂ܢܹ̈ܐ. ܘܗܵܟ݂ܘܵܬ̣ ܥܵܡܘܿܪܹ̈ܐ ܦܸܠܓ̇ܗܘܿܢ ܠܘܼܩܒܲܠ ܛܘܼܪܵܐ ܕܓܲܪܙܝܼܡ: ܘܦܸܠܓܗܘܿܢ ܠܘܼܩܒܲܠ ܛܘܼܪܵܐ ܕܲܓ̣ܒܸܠ: ܐܲܝܟܲܢܵܐ ܕܦܲܩܸܕ݂ ܡܘܼܫܹܐ ܥܲܒ̣ܕܹܗ ܕܡܵܪܝܵܐ: ܠܲܡܒܲܪܵܟ݂ܘܼ ܠܝܼܣܪܵܝܹܠ ܐܲܝܟ݂ ܕܡ̣ܢ ܩܕ݂ܝܼܡ. |
[No book] |
| [34]ܘܡ̣ܢ ܒܵܬܲܪܟܸ̇ܢ ܩ̣ܪܵܐ ܝܼܫܘܿܥ ܟܠܗܘܿܢ ܦܸܬ̣ܓ̣ܵܡܵܘ̈ܗܝ ܕܢܵܡܘܿܣܵܐ: ܒܘܼܪ̈ܟܵܬ̣ܵܐ ܘܠܵܘ̈ܛܵܬ̣ܵܐ ܟܠܗܹܝܢ ܕܲܟ݂ܬ̣ܝܼܒ̣ܵܢ ܒܣܸܦܪܵܐ ܕܢܵܡܘܿܣܵܐ. |
[No book] |
| [35]ܠܵܐ ܫܒܲܩ ܚܕ݂ܵܐ ܡܸܠܬܵܐ ܡ̣ܢ ܟܠ ܕܦܲܩܸܕ݂ ܡܘܼܫܹܐ ܕܠܵܐ ܩ̣ܪܵܐ ܝܼܫܘܿܥ ܩܕ݂ܵܡ ܟܠܵܗ̇ ܟܢܘܼܫܬܵܐ ܕܝܼܣܪܵܝܹܠ: ܘܲܩܕ݂ܵܡ ܢܸܫܹ̈ܐ: ܘܲܩܕ݂ܵܡ ܛܠܵܝܹ̈ܐ: ܘܲܩܕ݂ܵܡ ܬܵܘܬܵܒ̣̈ܐ ܕܒܲܝܢܵܬ̣ܗܘܿܢ. |
[No book] |