➖ »
«
➖ ➕
Wycliffe's English Translation (1388)
Wyc
Aleppo Codex (~920)
Alep
   
Luke
Luk
1
→
[1]Forsothe for manye men enforceden to ordeyne the tellyng of thingis, whiche ben fillid in vs, [No book]
[2]as thei that seyn atte the bigynnyng, and weren ministris of the word, [No book]
[3]bitaken, it is seen also to me, hauynge alle thingis diligentli bi ordre, to write to thee, [No book]
[4]thou best Theofile, that thou knowe the treuthe of tho wordis, of whiche thou art lerned. [No book]
[5]In the daies of Eroude, kyng of Judee, ther was a prest, Sakarie bi name, of the sorte of Abia, and his wijf was of the douytris of Aaron, and hir name was Elizabeth. [No book]
[6]And bothe weren iust bifor God, goynge in alle the maundementis and iustifiyngis of the Lord, withouten pleynt. [No book]
[7]And thei hadden no child, for Elizabeth was bareyn, and bothe weren of grete age in her daies. [No book]
[8]And it bifel, that whanne Zacarie schulde do the office of preesthod, in the ordre of his cours tofor God, [No book]
[9]aftir the custome of the preesthod, he wente forth bi lot, and entride in to the temple, to encense. [No book]
[10]And al the multitude of the puple was with outforth, and preiede in the our of encensyng. [No book]
[11]And an aungel of the Lord apperide to hym, and stood on the riythalf of the auter of encense. [No book]
[12]And Zacarie seynge was afraied, and drede fel vpon hym. [No book]
[13]And the aungel seide to hym, Zacarie, drede thou not; for thi preyer is herd, and Elizabeth, thi wijf, schal bere to thee a sone, and his name schal be clepid Joon. [No book]
[14]And ioye and gladyng schal be to thee; and many schulen `haue ioye in his natyuyte. [No book]
[15]For he schal be greet bifor the Lord, and he schal not drynke wyn and sidir, and he schal be fulfillid with the Hooli Goost yit of his modir wombe. [No book]
[16]And he schal conuerte many of the children of Israel to her Lord God; [No book]
[17]and he schal go bifor hym in the spirit and the vertu of Helie; and he schal turne the hertis of the fadris in to the sones, and men out of bileue to the prudence of iust men, to make redi a perfit puple to the Lord. [No book]
[18]And Zacarie seide to the aungel, Wherof schal Y wite this? for Y am eld, and my wijf hath gon fer in to hir daies. [No book]
[19]And the aungel answeride, and seide to hym, For Y am Gabriel, that stonde niy bifor God; and Y am sent to thee to speke, and to euangelize to thee these thingis. [No book]
[20]And lo! thou schalt be doumbe, and thou schalt not mow speke til in to the dai, in which these thingis schulen be don; for thou hast not bileued to my wordis, whiche schulen be fulfillid in her tyme. [No book]
[21]And the puple was abidynge Zacarie, and thei wondriden, that he tariede in the temple. [No book]
[22]And he yede out, and myyte not speke to hem, and thei knewen that he hadde seyn a visioun in the temple. And he bikenyde to hem, and he dwellide stille doumbe. [No book]
[23]And it was don, whanne the daies of his office weren fulfillid, he wente in to his hous. [No book]
[24]And aftir these daies Elizabeth, his wijf, conseyuede, and hidde hir fyue monethis, and seide, [No book]
[25]For so the Lord dide to me in the daies, in whiche he bihelde, to take awei my repreef among men. [No book]
[26]But in the sixte moneth the aungel Gabriel was sent fro God in to a citee of Galilee, whos name was Nazareth, [No book]
[27]to a maidyn, weddid to a man, whos name was Joseph, of the hous of Dauid; and the name of the maidun was Marie. [No book]
[28]And the aungel entride to hir, and seide, Heil, ful of grace; the Lord be with thee; blessid be thou among wymmen. [No book]
[29]And whanne sche hadde herd, sche was troublid in his word, and thouyte what maner salutacioun this was. [No book]
[30]And the aungel seide to hir, Ne drede thou not, Marie, for thou hast foundun grace anentis God. [No book]
[31]Lo! thou schalt conceyue in wombe, and schalt bere a sone, and thou schalt clepe his name Jhesus. [No book]
[32]This schal be greet, and he schal be clepid the sone of the Hiyeste; and the Lord God schal yeue to hym the seete of Dauid, his fadir, and he schal regne in the hous of Jacob with outen ende, [No book]
[33]and of his rewme schal be noon ende. [No book]
[34]And Marie seide to the aungel, On what maner schal this thing be doon, for Y knowe not man? [No book]
[35]And the aungel answeride, and seide to hir, The Hooly Goost schal come fro aboue in to thee, and the vertu of the Hiyeste schal ouerschadewe thee; and therfor that hooli thing that schal be borun of thee, schal be clepid the sone of God. [No book]
[36]And lo! Elizabeth, thi cosyn, and sche also hath conceyued a sone in hir eelde, and this moneth is the sixte to hir that is clepid bareyn; [No book]
[37]for euery word schal not be inpossible anentis God. [No book]
[38]And Marie seide, Lo! the handmaydyn of the Lord; be it don to me aftir thi word. And the aungel departide fro hir. [No book]
[39]And Marie roos vp in tho daies, and wente with haaste in to the mounteyns, in to a citee of Judee. [No book]
[40]And sche entride in to the hous of Zacarie, and grette Elizabeth. [No book]
[41]And it was don, as Elizabeth herde the salutacioun of Marie, the yong child in hir wombe gladide. And Elizabeth was fulfillid with the Hooli Goost, [No book]
[42]and criede with a greet vois, and seide, Blessid be thou among wymmen, and blessid be the fruyt of thi wombe. [No book]
[43]And whereof is this thing to me, that the modir of my Lord come to me? [No book]
[44]For lo! as the voice of thi salutacioun was maad in myn eeris, the yong child gladide in ioye in my wombe. [No book]
[45]And blessid be thou, that hast bileued, for thilke thingis that ben seid of the Lord to thee, schulen be parfitli don. [No book]
[46]And Marie seide, Mi soule magnyfieth the Lord, [No book]
[47]and my spirit hath gladid in God, myn helthe. [No book]
[48]For he hath biholdun the mekenesse of his handmaidun. [No book]
[49]For lo! of this alle generaciouns schulen seie that Y am blessid. For he that is myyti hath don to me grete thingis, and his name is hooli. [No book]
[50]And his mercy is fro kynrede in to kynredes, to men that dreden hym. [No book]
[51]He made myyt in his arme, he scaterede proude men with the thouyte of his herte. [No book]
[52]He sette doun myyti men fro sete, and enhaunside meke men. [No book]
[53]He hath fulfillid hungri men with goodis, and he hath left riche men voide. [No book]
[54]He, hauynge mynde of his mercy, took Israel, his child; [No book]
[55]as he hath spokun to oure fadris, to Abraham and to his seed, in to worldis. [No book]
[56]And Marie dwellide with hir, as it were thre monethis, and turnede ayen in to hir hous. [No book]
[57]But the tyme of beryng child was fulfillid to Elizabeth, and sche bare a sone. [No book]
[58]And the neiyboris and cosyns of hir herden, that the Lord hadde magnyfied his mercy with hir; and thei thankiden hym. [No book]
[59]And it was don in the eiyte dai, thei camen to circumcide the child; and thei clepiden hym Zacarie, bi the name of his fadir. [No book]
[60]And his moder answeride, and seide, Nay, but he schal be clepid Joon. [No book]
[61]And thei seiden to hir, For no man is in thi kynrede, that is clepid this name. [No book]
[62]And thei bikeneden to his fadir, what he wolde that he were clepid. [No book]
[63]And he axynge a poyntil, wroot, seiynge, Joon is his name. [No book]
[64]And alle men wondriden. And anoon his mouth was openyd, and his tunge, and he spak, and blesside God. [No book]
[65]And drede was maad on alle her neiyboris, and alle these wordis weren pupplischid on alle the mounteyns of Judee. [No book]
[66]And alle men that herden puttiden in her herte, and seiden, What maner child schal this be? For the hoond of the Lord was with hym. [No book]
[67]And Zacarie, his fadir, was fulfillid with the Hooli Goost, and prophesiede, [No book]
[68]and seide, Blessid be the Lord God of Israel, for he hath visitid, and maad redempcioun of his puple. [No book]
[69]And he hath rerid to vs an horn of heelthe in the hous of Dauid, his child. [No book]
[70]As he spak bi the mouth of hise hooli prophetis, that weren fro the world. [No book]
[71]Helthe fro oure enemyes, and fro the hoond of alle men that hatiden vs. [No book]
[72]To do merci with oure fadris, and to haue mynde of his hooli testament. [No book]
[73]The greet ooth that he swoor to Abraham, oure fadir, to yyue hym silf to vs. [No book]
[74]That we with out drede delyuered fro the hoond of oure enemyes, [No book]
[75]serue to hym, in hoolynesse and riytwisnesse bifor hym in alle oure daies. [No book]
[76]And thou, child, schalt be clepid the prophete of the Hiyest; for thou schalt go bifor the face of the Lord, to make redi hise weies. [No book]
[77]To yyue scyence of helthe to his puple, in to remyssioun of her synnes; [No book]
[78]bi the inwardnesse of the merci of oure God, in the whiche he spryngynge vp fro an hiy hath visitid vs. [No book]
[79]To yyue liyt to hem that sitten in derknessis and in schadewe of deeth; to dresse oure feet in to the weie of pees. [No book]
[80]And the child wexide, and was coumfortid in spirit, and was in desert placis `til to the dai of his schewing to Israel. [No book]
Author: John Wycliffe (1328 – 1384)
 Source: unbound.biola.edu
Top