➖ »
«
➖ ➕
Peshitta OT
PesOT
Peshitta NT (Khabouris)
PesNT(Kha)
←
Malachi
Mal
4
   
[1]ܡܸܛܠ ܕܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܘܢܹܐܩܲܕ݂ ܐܲܝܟ݂ ܬܲܢܘܼܪܵܐ ܪܘܼܓ̣ܙܝ: ܘܢܸܗܘܘܿܢ ܟܠܗܘܿܢ ܥܵܘܿܠܹܐ ܘܟ݂ܠܗܘܿܢ ܥܵܒ̣ܕܲܝ̈ ܚܛܝܼܬ̣ܵܐ ܚܲܒ̇ܬ̣ܵܐ: ܘܢܵܘܩܸܕ݂ ܐܸܢܘܿܢ ܝܵܘܡܵܐ ܕܐܵܬܹ̇ܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܘܠܵܐ ܢܸܫܒ̇ܘܿܩ ܠܗܘܿܢ ܥܸܩܵܪܵܐ ܘܥܵܘܦܵܐ. [No book]
[2]ܘܬܸܕ݂ܢܲܚ ܠܟ݂ܘܿܢ ܠܕ݂ܵܚ̈ܠܲܝ ܫܹܡܝ ܫܸܡܫܵܐ ܕܙܲܕ̇ܝܼܩܘܼܬ̣ܵܐ: ܘܐܵܣܝܘܼܬ̣ܵܐ ܥܲܠ ܠܸܫܵܢܵܗ̇: ܘܬܸܦܩܘܼܢ ܘܲܬ̇ܕܲܝܨܘܼܢ ܐܲܝܟ݂ ܥܸܓ̣̈ܠܹܐ ܕܒܲܩܪܵܐ. [No book]
[3]ܘܲܬ̇ܕܲܝܫܘܼܢ ܠܥܵܘܿܠܹܐ: ܡܸܛܠ ܕܢܸܗܘܘܿܢ ܩܸܛܡܵܐ ܬܚܹܝܬ̣ ܦܲܣܲܬ̣ ܪܸ̈ܓ̣ܠܲܝܟ̇ܘܿܢ: ܒܝܵܘܡܵܐ ܕܥܵܒܹ̇ܕ݂ ܐ̄ܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ. [No book]
[4]ܐܸܬ̇ܕܲܟ݂ܪܘ ܢܵܡܘܿܣܹܗ ܕܡܘܼܫܹܐ ܥܲܒ̣ܕ̇ܝ ܕܦܲܩܸܕ̇ܬܹ̇ܗ ܒܚܘܿܪܝܼܒ̣: ܥܲܠ ܟܠܹܗ ܝܼܣܪܵܝܹܠ: ܦܘܼܩ̈ܕܵܢܹܐ ܘܕ݂ܝܼܢܹ̈ܐ. [No book]
[5]ܗܵܐ ܡܫܲܕܲܪ ܐ̄ܢܵܐ ܠܟ݂ܘܿܢ ܠܐܹܠܝܼܵܐ ܢܒ̣ܝܼܵܐ: ܩܕ݂ܵܡ ܕܢܹܐܬܹܐ ܝܵܘܡܹܗ ܕܡܵܪܝܵܐ ܪܲܒܵܐ ܘܲܕ݂ܚܝܼܠܵܐ. [No book]
[6]ܕܢܲܦܢܸܐ ܠܸܒܵܐ ܕܐܲܒ̣ܗܹ̈ܐ ܥܲܠ ܒܢܲـ̈ـܝܵܐ: ܘܠܸܒܵܐ ܕܲܒ̣ܢܲـ̈ـܝܵܐ ܥܲܠ ܐܲܒ̣ܵܗܲܝ̈ܗܘܿܢ: ܥܲܕ݂ܠܵܐ ܐܹܬܸܐ ܘܐܸܡܚܹܝܗ̇ ܠܐܲܪܥܵܐ ܠܐܲܒ̣ܕܵܢ. [No book]
 
Top