➖ »
«
➖ ➕
Wycliffe's English Translation (1388)
Wyc
Vita Adae et Evae from "The Apocrypha and Pseudepigrapha of the Old Testament"
LOAE
←
Mark
Mar
11
→
[1]And whanne Jhesus cam nyy to Jerusalem and to Betanye, to the mount of Olyues, he sendith tweyne of hise disciplis, and seith to hem, [No book]
[2]Go ye in to the castel that is ayens you; and anoon as ye entren there ye schulen fynde a colt tied, on which no man hath sete yit; vntie ye, and brynge hym. [No book]
[3]And if ony man seye ony thing to you, What doen ye? seie ye, that he is nedeful to the Lord, and anoon he schal leeue hym hidir. [No book]
[4]And thei yeden forth, and founden a colt tied bifor the yate with out forth, in the metyng of twei weies; and thei vntieden hym. [No book]
[5]And summe of hem that stoden there seiden to hem, What doen ye, vntiynge the colt? [No book]
[6]And thei seiden to hem, as Jhesus comaundide hem; and thei leften it to hem. [No book]
[7]And thei brouyten the colt to Jhesu, and thei leiden on hym her clothis, and Jhesus sat on hym. [No book]
[8]And many strewiden her clothis in the weie, othere men kittiden braunchis fro trees, and strewiden in the weie. [No book]
[9]And thei that wenten bifor, and that sueden, crieden, and seiden, Osanna, [No book]
[10]blissid is he that cometh in the name of the Lord; blessid be the kyngdom of oure fadir Dauid that is come; Osanna in hiyest thingis. [No book]
[11]And he entride in to Jerusalem, in to the temple; and whanne he `hadde seyn al thing aboute, whanne it was eue, he wente out in to Betanye, with the twelue. [No book]
[12]And anothir daye, whanne he wente out of Betanye, he hungride. [No book]
[13]And whanne he hadde seyn a fige tree afer hauynge leeues, he cam, if happili he schulde fynde ony thing theron; and whanne he cam to it, he foonde no thing, out takun leeues; for it was not tyme of figis. [No book]
[14]And Jhesus answeride and seide to it, Now neuer ete ony man fruyt of thee more. And hise disciplis herden; [No book]
[15]and thei camen to Jerusalem. And whanne he was entrid in to the temple, he bigan to caste out silleris and biggeris in the temple; and he turnede vpsodoun the bordis of chaungeris, and the chayeris of men that selden culueris; [No book]
[16]and he suffride not, that ony man schulde bere a vessel thorou the temple. [No book]
[17]And he tauyte hem, and seide, Whether it is not writun, That myn hous schal be clepid the hous of preyng to alle folkis? but ye han maad it a denne of theues. [No book]
[18]And whanne this thing was herd, the princis of prestis and scribis souyten hou thei schulden leese hym; for thei dredden hym, for al the puple wondride on his techyng. [No book]
[19]And whanne euenyng was come, he wente out of the citee. [No book]
[20]And as thei passiden forth eerli, thei sayn the fige tree maad drye fro the rootis. [No book]
[21]And Petir bithouyte hym, and seide to hym, Maister, lo! the fige tree, whom thou cursidist, is dried vp. [No book]
[22]And Jhesus answeride and seide to hem, Haue ye the feith of God; [No book]
[23]treuli Y seie to you, that who euer seith to this hil, Be thou takun, and cast in to the see; and doute not in his herte, but bileueth, that what euer he seie, schal be don, it schal be don to hym. [No book]
[24]Therfor Y seie to you, alle thingis what euer thingis ye preynge schulen axe, bileue ye that ye schulen take, and thei schulen come to you. [No book]
[25]And whanne ye schulen stonde to preye, foryyue ye, if ye han ony thing ayens ony man, that youre fadir that is in heuenes, foryyue to you youre synnes. [No book]
[26]And if ye foryyuen not, nether youre fadir that is in heuenes, schal foryyue to you youre synnes. [No book]
[27]And eftsoone thei camen to Jerusalem. And whanne he walkide in the temple, the hiyeste prestis, and scribis, and the elder men camen to hym, [No book]
[28]and seyn to hym, In what power doist thou these thingis? or who yaf to thee this power, that thou do these thingis? [No book]
[29]Jhesus answeride and seide to hem, And Y schal axe you o word, and answere ye to me, and Y schal seie to you in what power Y do these thingis. [No book]
[30]Whether was the baptym of Joon of heuene, or of men? answere ye to me. [No book]
[31]And thei thouyten with ynne hem silf, seiynge, If we seien of heuene, he schal seie to vs, Whi thanne bileuen ye not to him; [No book]
[32]if we seien of men, we dreden the puple; for alle men hadden Joon, that he was verili a prophete. [No book]
[33]And thei answeryden, and seien to Jhesu, We witen neuer. And Jhesu answerde, and seide to hem, Nether Y seie to you, in what power Y do these thingis. [No book]
Author: John Wycliffe (1328 – 1384)
Top