➕
←
Numbers
Num
23
→
[1]ܘܐܸܡܲܪ ܒܸܠܥܵܡ ܠܒ̣ܵܠܵܩ: ܒܢܝܼ ܠܝܼ ܗܵܪܟܵܐ ܫܲܒܥܵܐ ܡܲܕ݂ܒ̇ܚ̈ܝܼܢ: ܘܛܲܝܸܒ̣ ܠܝܼ ܗܵܪܟܵܐ ܫܲܒ̣ܥܵܐ ܬܲܘܪ̈ܝܼܢ: ܘܫܲܒ̣ܥܵܐ ܕܸܟ݂ܪ̈ܝܼܢ. [2]ܘܲܥܒܲܕ݂ ܒܵܠܵܩ ܐܲܝܟ݂ ܕܐܸܡܲܪ ܠܹܗ ܒܸܠܥܵܡ: ܘܐܲܣܸܩܘ ܒܵܠܵܩ ܘܒܸܠܥܵܡ ܬܵܘܪܹ̈ܐ ܘܕܸܟ݂ܪܹ̈ܐ ܥܲܠ ܡܲܕ݂ܒ̇ܚܵܐ. [3]ܘܐܸܡܲܪ ܒܸܠܥܵܡ ܠܒ̣ܵܠܵܩ: ܩܘܼܡ ܗܵܪܟܵܐ ܠܘܵܬ̣ ܥ̈ܠܵܘܵܬ̣ܵܟ݂: ܘܐܸܢܵܐ ܐܹܙܲܠ: ܛܵܟ݂ ܢܸܩܪܸܐ ܡܵܪܝܵܐ ܠܐܘܼܪܥܝ: ܘܦܸܬ̣ܓ̣ܵܡܵܐ ܕܲܡܚܵܘܹܐ ܠܝܼ ܐܹܚܵܘܹܝܘܗܝ ܠܵܟ݂. ܘܐܸܙܲܠ ܫܲܦܝܵܐܝܼܬ̣. [4]ܘܐܸܬ̣ܓ̇ܠܝܼ ܐܲܠܵܗܵܐ ܥܲܠ ܒܸܠܥܵܡ: ܘܐܸܡܲܪ ܠܹܗ: ܫܲܒ̣ܥܵܐ ܡܲܕ݂ܒ̇ܚ̈ܝܼܢ ܛܲܝܸܒ̣ܬ̇: ܘܐܲܣܩܬ̇ ܬܵܘܪܹ̈ܐ ܘܕܸܟ݂ܪܹ̈ܐ ܥܲܠ ܡܲܕ݂ܒ̇ܚܵܐ. [5]ܘܣܵܡ ܡܵܪܝܵܐ ܡܸܠܬ̣ܵܐ ܒܦܘܼܡܹܗ ܕܒܸܠܥܵܡ: ܘܐܸܡܲܪ ܠܹܗ: ܙܸܠ ܠܘܵܬ̣ ܒܵܠܵܩ: ܘܗܵܟܲܢܵܐ ܡܲܠܸܠ. [6]ܘܐܸܬ̣ܵܐ ܠܘܵܬܹܗ: ܘܗ̤ܘ ܩܵܐܹ̇ܡ ܗ̄ܘ̣ܵܐ ܠܘܵܬ̣ ܥ̈ܠܵܘܵܬܹܗ: ܗ̤ܘ ܘܟ݂ܠܗܘܿܢ ܪܵܘ̱ܪ̈ܒ̣ܵܢܹܐ ܕܡܘܼܐܵܒ̣. [7]ܘܐܲܪܝܼܡ ܒܡܲܬ̣ܠܹܗ: ܘܐܸܡܲܪ: ܡ̣ܢ ܐܵܪܵܡ ܕܲܒ̣ܪܲܢܝ ܒܵܠܵܩ ܡܲܠܟܵܐ ܕܡܘܼܐܵܒ̣ܵܝܹ̈ܐ: ܡ̣ܢ ܛܘܼܪ̈ܲܝ ܡܲܕ݂ܢ̱ܚܵܐ: ܘܐܸܡܲܪ ܠܝܼ ܬܵܐ ܠܘܼܛ ܠܝܼ ܠܝܲܥܩܘܿܒ̣: ܘܬ̣ܵܐ ܐܵܘܒܸ̇ܕ݂ ܠܝܼ ܠܝܼܣܪܵܝܹܠ. [8]ܡܵܢܵܐ ܐܹܠܘܼܛܝܼܘܗܝ: ܕܠܵܐ ܠܵܛܹܗ ܐܲܠܵܗܵܐ: ܘܡܵܢܵܐ ܐܵܘܒ̇ܕ݂ܝܼܘܗܝ: ܕܠܵܐ ܐܵܘܒ̇ܕܹܗ ܡܵܪܝܵܐ. [9]ܡܸܛܠ ܕܡ̣ܢ ܪܹܫܵܐ ܕܛܘܼܪܹ̈ܐ ܚܙܹܝܬܹܗ: ܘܡ̣ܢ ܪ̈ܵܡܵܬ̣ܵܐ ܚܵܪܬܹ̇ܗ: ܗܵܐ ܥܲܡܵܐ ܒܲܠܚܘܿܕ݂ܵܘܗܝ ܫܪܵܐ: ܘܲܒ̣ܥܲܡܡܹ̈ܐ ܠܵܐ ܡܸܬ̣ܚ̄ܫܸܒ̣. [10]ܡܲܢܘܼ ܡܸܫܟܲܚ ܠܡܸܡܢܵܐ ܥܲܟ݂ܪܹܗ ܕܝܲܥܩܘܿܒ̣: ܘܡܸܢܝܵܢܵܐ ܕܪܘܼܒ̣ܥܹܗ ܕܝܼܣܪܵܝܹܠ. ܬܡܘܼܬ̣ ܢܲܦ̮ܫܝ ܡܵܘܬܵܐ ܕܲܬ̣ܪ̈ܝܼܨܲܝܗܘܿܢ: ܘܬܸܗܘܹܐ ܚܲܪܬ̣ܝ ܐܲܟ݂ܘܵܬ̣ܗܘܿܢ. [11]ܘܐܸܡܲܪ ܒܵܠܵܩ ܠܒܸܠܥܵܡ: ܡܵܢܵܐ ܥܒܲܕ̇ܬ̇ ܠܝܼ: ܠܲܡܠܵܛ ܒܥܸܠ̈ܠܕ̇ܒ̣ܵܒܲܝ ܩܪܹܝܬ̣ܵܟ݂: ܘܗܵܐ ܡܒܲܪܵܟ݂ܘ ܡܒܲܪܸܟ݂ ܐܲܢ̄ܬ̇ ܠܗܘܿܢ. [12]ܘܲܥܢܵܐ ܒܸܠܥܵܡ ܘܐܸܡܲܪ: ܗܵܐ ܡܸܕܸ̇ܡ ܕܣܵܐܹ̇ܡ ܡܵܪܝܵܐ ܒܦܘܼܡܝ: ܗܵܘ̇ ܗ̄ܘ̣ ܢܵܛܲܪ ܐ̄ܢܵܐ ܠܲܡܡܲܠܵܠܘܼ. [13]ܘܐܸܡܲܪ ܠܹܗ ܒܵܠܵܩ: ܬܵܐ ܥܲܡܝ ܠܐܲܬ̣ܪܵܐ ܐ̄ܚܪܹܢܵܐ ܕܬܸܚܙܹܝܘܗܝ ܡ̣ܢ ܬܲܡܵܢ: ܒܪܲܡ ܕܹܝܢ ܚܲܪܬܹܗ ܬܸܚܙܹܐ: ܘܟ݂ܠܹܗ ܠܵܐ ܬܸܚܙܹܐ: ܘܠܘܼܛܲܝܗܝ ܠܝܼ ܡ̣ܢ ܬܲܡܵܢ. [14]ܘܕܲܒ̣ܪܹܗ ܠܲܚܫܲܠ ܕܵܘ̈ܩܵܐ ܠܪܹܫ ܪܵܡܬ̣ܵܐ ܘܲܒ̣ܢܵܐ ܫܲܒ̣ܥܵܐ ܡܲܕ݂ܒ̇ܚ̈ܝܼܢ: ܘܐܲܣܸܩ ܬܵܘܪܹ̈ܐ ܘܕܸܟ݂ܪܹ̈ܐ ܥܲܠ ܡܲܕ݂ܒ̇ܚܹ̈ܐ. [15]ܘܐܸܡܲܪ ܒܸܠܥܵܡ ܠܒ̣ܵܠܵܩ: ܩܘܼܡ ܗܵܪܟܵܐ ܠܘܵܬ̣ ܥ̈ܠܵܘܵܬ̣ܵܟ݂: ܘܐܸܢܵܐ ܐܸܡܛܹܐ ܥܕܲܡܵܐ ܠܗܵܪܟܵܐ. [16]ܘܐܸܬ̣ܓ̇ܠܝܼ ܡܵܪܝܵܐ ܥܲܠ ܒܸܠܥܵܡ: ܘܣܵܡ ܡܸܠܬ̣ܵܐ ܒܦܘܼܡܹܗ: ܘܐܸܡܲܪ ܠܹܗ: ܙܸܠ ܠܘܵܬ̣ ܒܵܠܵܩ ܘܗܵܟܲܢܵܐ ܐܸܡܲܪ ܠܹܗ. [17]ܘܐܸܬ̣ܵܐ ܠܘܵܬܹܗ: ܘܗ̤ܘ ܩܵܐܹ̇ܡ ܗ̄ܘ̣ܵܐ ܠܘܵܬ̣ ܥ̈ܠܵܘܵܬܹܗ: ܘܪܵܘ̱ܪ̈ܒ̣ܵܢܹܐ ܕܡܘܼܐܵܒ̣ ܥܲܡܹܗ: ܘܐܸܡܲܪ ܠܹܗ ܒܵܠܵܩ: ܡܵܢܵܐ ܐܸܡܲܪ ܡܵܪܝܵܐ. [18]ܘܐܲܪܝܼܡ ܒܡܲܬ̣ܠܹܗ: ܘܐܸܡܲܪ: ܩܘܼܡ ܒܵܠܵܩ ܘܲܫܡܲܥ ܘܨܘܼܬ̣ ܠܣܵܗܕ̇ܘܼܬ̣ܝ ܒܲܪܨܸܦܘܿܪ. [19]ܠܵܐ ܗ̄ܘ̣ܵܐ ܓܲܒ̣ܪܵܐ ܐܲܠܵܗܵܐ ܕܲܢܕܲܓܸ̇ܠ: ܘܐܵܦܠܵܐ ܒܲܪܢܵܫܵܐ ܕܢܸܬ̣ܡܠܸܟ݂ ܗ̤ܘ ܐܵܡܲܪ ܘܥܵܒܹ̇ܕ݂: ܘܡܸܠܬܹܗ ܩܲܝܵܡܵܐ ܠܥܵܠܡܝܼ̈ܢ. [20]ܗܵܐ ܠܲܡܒܲܪܵܟ݂ܘܼ ܐܸܬ̇ܕܲܒ̣ܪܹܬ̣. ܘܒ̣ܘܼܪܟ̇ܬ̣ܵܐ ܠܵܐ ܐܲܗܦܸܟ݂. [21]ܠܵܐ ܚܵܙܹ̇ܐ ܐ̄ܢܵܐ ܥܵܘܼܠܵܐ ܒܝܲܥܩܘܿܒ̣: ܘܠܵܐ ܚܵܐܲܪ ܐ̄ܢܵܐ ܥܲܠܝܵܐ ܒܝܼܣܪܵܝܹܠ ܡܵܪܝܵܐ ܐܲܠܵܗܹܗ ܥܲܡܹܗ: ܘܬܸܫܒ̇ܘܼܚܬܵܐ ܕܡܲܠܟܹ̇ܗ ܒܹܗ. [22]ܐܲܠܵܗܵܐ ܕܐܲܦܸܩ ܐܸܢܘܿܢ ܡ̣ܢ ܡܸܨܪܹܝܢ: ܒܥܘܼܫܢܹܗ ܘܲܒ̣ܪܵܘܡܹܗ. [23]ܡܸܛܠ ܕܠܵܐ ܢܸܫܚܵܐ ܒܝܲܥܩܘܿܒ̣: ܘܐܵܦܠܵܐ ܩܸܨܡܵܐ ܒܝܼܣܪܵܝܹܠ: ܐܲܝܟ݂ ܕܲܒ̣ܙܲܒ̣ܢܵܐ ܗܵܢܵܐ ܢܸܬ̣ܐ̱ܡܲܪ ܠܝܲܥܩܘܿܒ̣ ܘܠܝܼܣܪܵܝܹܠ ܡܵܢܵܐ ܥܵܒܹ̇ܕ݂ ܐܲܠܵܗܵܐ. [24]ܗܵܐ ܥܲܡܵܐ ܐܲܝܟ݂ ܐܲܪܝܵܐ ܩܵܐܹ̇ܡ: ܘܐܲܝܟ݂ ܐܲܪܝܵܐ ܡܸܫܬܲܩܲܠ ܠܵܐ ܢܸܕ݂ܡܲܟ݂ ܥܕܲܡܵܐ ܕܢܹܐܟ݂ܘܿܠ ܬܒ̣ܵܪܵܐ: ܘܲܕ݂ܡܵܐ ܕܲܩ̈ܛܝܼܠܹܐ ܢܸܫܬܹ̇ܐ. [25]ܘܐܸܡܲܪ ܒܵܠܵܩ ܠܒ̣ܠܥܵܡ: ܠܵܐ ܡܠܵܛ ܬܠܘܼܛܝܼܘܗܝ: ܘܐܵܦܠܵܐ ܡܒܲܪܵܟ݂ܘܼ ܬܒܲܪܟ݂ܝܼܘܗܝ. [26]ܘܲܥܢܵܐ ܒܸܠܥܵܡ ܘܐܸܡܲܪ ܠܒ̣ܵܠܵܩ: ܠܵܐ ܐܸܡ̇ܪܹܬ̣ ܠܵܟ݂ ܕܟ݂ܠ ܕܐܵܡܲܪ ܠܝܼ ܡܵܪܝܵܐ: ܗܵܘ̇ ܗ̄ܘ̣ ܥܵܒܹ̇ܕ݂ ܐ̄ܢܵܐ. [27]ܘܐܸܡܲܪ ܒܵܠܵܩ ܠܒܸܠܥܵܡ: ܬܵܐ ܐܸܕ݂ܒ̇ܪܵܟ݂ ܠܐܲܬ̣ܪܵܐ ܐ̄ܚܪܹܢܵܐ: ܟܒܲܪ ܢܸܫܦܲܪ ܒܥܲܝ̈ܢܲܝ ܐܲܠܵܗܵܐ: ܘܠܘܼܛܲܝܗܝ ܠܝܼ ܡ̣ܢ ܬܲܡܵܢ. [28]ܘܲܕ݂ܒܲܪ ܒܵܠܵܩ ܠܒܸܠܥܵܡ: ܠܪܹܫ ܦܥܘܿܪ ܕܡܸܬ̣ܚܙܹܐ ܠܘܼܩܒܲܠ ܐܲܫܝܼܡܘܿܢ. [29]ܘܐܸܡܲܪ ܒܸܠܥܵܡ ܠܒ̣ܵܠܵܩ: ܒܢܝܼ ܠܝܼ ܗܵܪܟܵܐ ܫܲܒ̣ܥܵܐ ܡܲܕ݂ܒ̇ܚ̈ܝܼܢ: ܘܛܲܝܸܒ̣ ܠܝܼ ܗܵܪܟܵܐ ܫܲܒ̣ܥܵܐ ܬܵܘܪ̈ܝܼܢ: ܘܫܲܒ̣ܥܵܐ ܕܸܟ݂ܪ̈ܝܼܢ. [30]ܘܲܥܒܲܕ݂ ܒܵܠܵܩ ܐܲܝܟ݂ ܕܐܸܡܲܪ ܠܹܗ ܒܸܠܥܵܡ: ܘܐܲܣܸܩ ܬܵܘܪܹ̈ܐ ܘܕܸܟ݂ܪܹ̈ܐ ܥܲܠ ܡܲܕ݂ܒ̇ܚܹ̈ܐ.
 
Top