➖ »
«
➖ ➕
Peshitta OT
PesOT
The First Book of Clement
1Clem
←
Proverbs
Pro
20
→
[1]ܥܲܫܝܼܢ ܗ̄ܘܼ ܚܲܡܪܵܐ. ܘܪܵܘܵܝܘܼܬ̣ܵܐ ܡܨܲܥܪܵܢ̄ܝܵܐ. ܘܟ݂ܠ ܕܡܸܫܬ̇ܪܲܚ ܒܵܗ̇: ܠܵܐ ܗ̄ܘܼܵܐ ܚܲܟ̇ܝܼܡ. [No book]
[2]ܢܵܗܹ̇ܡ ܐܲܝܟ݂ ܐܲܪܝܵܐ ܪܘܼܓ̣ܙܹܗ ܕܡܲܠܟܵܐ ܘܲܕ݂ܡܲܚܡܸܬ̣ ܠܹܗ: ܚܵܛܹ̇ܐ ܥܲܠ ܢܲܦ̮ܫܹܗ. [No book]
[3]ܬܸܫܒ̇ܘܿܚܬܹ̇ܗ ܕܓܲܒ̣ܪܵܐ ܡܵܐ ܕܡܲܦܪܸܩ ܚܸܪܝܵܢܵܐ. ܘܟ݂ܠ ܕܲܣܟܲܠ ܡܡܲܝܸܩ. [No book]
[4]ܡܸܬ̣ܚܲܣܲܕ݂ ܚܒܸܢܵܢܵܐ: ܘܠܵܐ ܫܵܬܹ̇ܩ. ܘܫܵܐܹ̇ܠ ܒܲܚܨܵܕ݂ܵܐ: ܘܠܲܝܬ̇ ܡܲـ̈ـܝܵܐ. [No book]
[5]ܥܲܡܝܼܩܵܐ ܡܸܠܬ̣ܵܐ ܒܠܸܒܹ̇ܗ ܕܡܲܠܟܵܐ. ܘܓܲܒ̣ܪܵܐ ܚܲܟ̇ܝܼܡܵܐ ܢܸܕ݂ܠܹܝܗ̇. [No book]
[6]ܣܘܿܓ̣ܵܐܐ ܕܲܒ̣ܢܲܝ̈ܢܵܫܵܐ ܡܸܬ̣ܩܪܹܝܢ ܓܲܒ̣ܪܹ̈ܐ ܡܪ̈ܲܚܡܵܢܹܐ. ܓܲܒ̣ܪܵܐ ܕܹܝܢ ܡܗܲܝܡܢܵܐ: ܡܲܢ̣ܘܼ ܡܸܫܟܲܚ. [No book]
[7]ܙܲܕ̇ܝܼܩܵܐ ܕܲܡܗܲܠܸܟ݂ ܒܬܲܡܝܼܡܘܼܬ̣ܵܐ: ܛܘܼܒܲܝܗܘܿܢ ܠܲܒ̣ܢܵܘ̈ܗܝ ܡ̣ܢ ܒܵܬ̣ܪܹܗ. [No book]
[8]ܡܲܠܟܵܐ ܝܵܬܹ̇ܒ̣ ܥܲܠ ܟܘܼܪܣܝܵܐ ܕܕ݂ܝܼܢܵܐ: ܘܡܸܬ̣ܒܲܕ̇ܪ̈ܵܢ ܡ̣ܢ ܩܕ݂ܵܡܵܘܗܝ ܟܠܗܹܝܢ ܒܝܼ̈ܫܵܬ̣ܵܐ. [No book]
[9]ܡ̇ܢ ܢܹܐܡܲܪ ܕܙܲܟܵܝ ܐܲܢ̄ܬ̇ ܠܹܒ̇ܝ. ܘܐܸܬ̣ܕܲܟ̇ܝܼܬ̣ ܡ̣ܢ ܚܛܵܗܹ̈ܐ. [No book]
[10]ܡܲܬ̣ܩܵܠܵܐ ܘܡܲܬ̣ܩܵܠܵܐ: ܟܲܝܠܵܐ ܘܲܟ݂ܝܵܠܬܵܐ: ܡܲܣܠܹܝܢ ܐܸܢܘܿܢ ܩܕ݂ܵܡ ܡܵܪܝܵܐ ܬܪ̈ܲܝܗܘܿܢ. [No book]
[11]ܐܵܦ ܒܲܥܒ̣ܵܕ݂ܵܘ̈ܗܝ ܡܸܬ̣̱ܝܼܕܲܥ ܛܲܠܝܵܐ: ܐܸܢ ܕܟܸܐ ܘܐܸܢ ܬܪܝܼܨܝܼܢ ܥܒ̣ܵܕ݂ܵܘ̈ܗܝ. [No book]
[12]ܐܸܕ݂ܢܵܐ ܕܫܵܡܥܵܐ: ܘܥܲܝܢܵܐ ܕܚܵܙ̇ܝܵܐ: ܡܵܪܝܵܐ ܥ̣ܒܲܕ݂ ܐܸܢܹܝܢ. [No book]
[13]ܠܵܐ ܬܸܪܚܲܡ ܫܸܢܬ̣ܵܐ: ܕܠܵܐ ܬܸܬ̣ܡܲܣܟܸ̇ܢ. ܐܸܠܵܐ ܦܬܲܚ ܥܲܝܢܲܝ̈ܟ: ܘܲܣܒܲܥ ܠܲܚܡܵܐ. [No book]
[14]ܪܵܚ̇ܡܵܐ ܢܹܐܡܲܪ ܠܚܲܒ̣ܪܹܗ ܕܲܩܢܹ̇ܝܬ̣: ܘܗܵܝܕܹ̇ܝܢ ܢܸܫܬܲܒܲܚ. [No book]
[15]ܘܢܹܐܡܲܪ ܕܐܝܼܬ̣ ܕܲܗܒ̣ܵܐ: ܘܣܘܿܓ̣ܵܐܐ ܕܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܘܡܵܐܢܹ̈ܐ ܝܲܩܝܼܪܹ̈ܐ: ܘܣܸܦ̈ܘܵܬ̣ܵܐ ܕܝܼܕܲܥܬ̣ܵܐ. [No book]
[16]ܢܣܲܒ̣ܘ ܡܲܪܛܘܼܛܹܗ ܕܡ̇ܢ ܕܥܵܪܹܒ̣ ܠܢܘܼܟ݂ܪܵܝܵܐ. ܘܥܲܠ ܐܲܦܲܝ̈ ܢܘܼܟ݂ܪܵܝܵܐ ܢܣܲܒ̣ܘ ܡܸܫܟܵܢܹܗ. [No book]
[17]ܥ̣ܪܲܒ̣ ܠܓܲܒ̣ܪܵܐ ܒܠܲܚܡܵܐ ܕܲܓܵܠܵܐ. ܘܒ̣ܵܬܲܪ ܗܵܝܕܹ̇ܝܢ ܢܸܬ̣ܡ̱ܠܹܗ ܦܘܼܡܹܗ ܚܨܵܨܹ̈ܐ. [No book]
[18]ܡܲܚܫܲܒ̣ܬ̣ܵܐ ܒܬܲܪܥܝܼܬ̣ܵܐ ܡܲܬ̣ܩܢܵܐ. ܘܲܒ̣ܓ̣ܘܼܪܵܓ̣ܵܐ ܡܸܬ̣ܥ̱ܒܸܕ݂ ܩܪܵܒ̣ܵܐ. [No book]
[19]ܕܓ̣ܵܠܹܐ ܐ̄ܪܵܙܵܐ: ܐܵܟܹ̇ܠ ܩܲܪܨܵܐ. ܘܥܲܡ ܡ̇ܢ ܕܲܡܣܲܪ̱̈ܗܒ̣ܵܢ ܣܸܦ̈ܘܵܬܹܗ: ܠܵܐ ܬܸܬ̣ܚܲܠܲܛ. [No book]
[20]ܕܠܵܐܹ̇ܛ ܠܐܲܒ̣ܘܼܗܝ ܘܠܐܸܡܹܗ: ܢܸܕ݂ܥܲܟ݂ ܫܪܵܓܹܗ: ܐܲܝܟ݂ ܒܵܒ̣ܬ̣ܵܐ ܚܸܫܘܿܟ݂ܬܵܐ. [No book]
[21]ܝܵܪܬ̇ܘܼܬ̣ܵܐ ܕܲܡܣܲܪ̱ܗܒ̣ܵܐ ܒܩܲܕ݂ܡܵܝܬܵܗ̇: ܒܐܲܚܪܵܝܬܵܗ̇ ܠܵܐ ܬܸܬ̣ܒܲܪܲܟ݂. [No book]
[22]ܠܵܐ ܬܹܐܡܲܪ ܕܐܸܦܪܘܿܥ ܒܝܼܫܬܵܐ. ܐܸܠܵܐ ܣܲܟܵܐ ܠܡܵܪܝܵܐ ܕܢܸܦ̱ܪܩܵܟ݂. [No book]
[23]ܛܲܡܐܝܼܢ ܐܸܢܘܿܢ ܩܕ݂ܵܡ ܡܵܪܝܵܐ ܡܲܬ̣̈ܩܵܠܹܐ ܘܡܲܬ̣̈ܩܵܠܹܐ. ܘܡܲܣ̈ܐܵܬ̣ܵܐ ܕܢܸܟ݂ܠܵܐ ܠܵܐ ܫܲܦܝܼܪܵܢ. [No book]
[24]ܡ̣ܢ ܩܕ݂ܵܡ ܡܵܪܝܵܐ ܡܲܬ̣ܩ̈ܢܵܢ ܗܲܠܟ݂ܵܬܹ̈ܗ ܕܓܲܒ̣ܪܵܐ. ܘܐܲܝܢܵܐ ܗ̄ܘܼ ܒܲܪܢܵܫܵܐ ܕܢܲܬ̣ܩܸܢ ܐܘܼܪܚܹܗ. [No book]
[25]ܦܲܚܵܐ ܗ̄ܘܼ ܠܒܲܪܢܵܫܵܐ ܕܢܵܕܲܪ ܠܩܘܼܕ݂ܫܵܐ. ܘܡ̣ܢ ܒܵܬܲܪ ܕܢܵܕܲܪ: ܬܵܘ̇ܝܵܐ ܠܹܗ ܢܲܦ̮ܫܹܗ. [No book]
[26]ܡܒܲܕܲܪ ܠܥܵܘܿܠܹܐ ܡܲܠܟܵܐ ܚܲܟ̇ܝܼܡܵܐ. ܘܡܲܗܦܸܟ݂ ܥܠܲܝܗܘܿܢ ܓܝܼܓ̣ܠܵܐ. [No book]
[27]ܫܪܵܓܹܗ ܕܡܵܪܝܵܐ ܢܫܲܡܬ̣ܵܐ ܗ̄ܝܼ ܕܲܒ̣ܢܲܝ̈ܢܵܫܵܐ. ܘܒ̣ܵܨ̇ܝܵܐ ܟܠܗܘܿܢ ܬܵܘܵܢܹ̈ܐ ܕܟܲܪܣܵܐ. [No book]
[28]ܛܲܝܒ̇ܘܼܬ̣ܵܐ ܘܩܘܼܫܬܵܐ ܢܵܛ̇ܪܝܼܢ ܠܡܲܠܟܵܐ. ܘܡܲܬ̣ܩܲܢ ܟܘܼܪܣܝܹܗ ܒܛܲܝܒ̇ܘܼܬ̣ܵܐ. [No book]
[29]ܬܸܫܒ̇ܘܿܚܬܵܐ ܕܓܲܕܲܘܼ̈ܕܹܐ ܚܲܝ̱ܠܗܘܿܢ. ܘܗܸܕ݂ܪܵܐ ܕܩܲܫܝܼܫܹ̈ܐ ܣܲܝܒ̇ܘܼܬ̣ܵܐ. [No book]
[30]ܫܚܵܩܵܐ ܦܓܲܥ̣ܘ ܒܒ̣ܝܼܫܹ̈ܐ. ܘܲܡܚܘܿܬ̣ܐ ܠܬ̣ܵܘܢܹ̈ܐ ܕܟܲܪܣܗܘܿܢ. [No book]
Translation: Charles H. Hoole (1885)
Source: www.earlychristianwritings.com
Top