➖ »
«
➖ ➕
Peshitta OT
PesOT
Peshitta NT (Khabouris)
PesNT(Kha)
←
Proverbs
Pro
8
→
[1]ܡܸܛܠܗܵܢܵܐ ܚܸܟ݂ܡ̱ܬ̣ܵܐ ܐܲܟ݂ܪܸܙ. ܘܣܘܼܟܵܠܵܐ ܢܸܥܢܹܝܟ݂. [No book]
[2]ܥܲܠ ܪܹܫ ܪ̈ܵܡܵܬ̣ܵܐ ܓܹܝܪ ܐܝܼܬܹܝܗ̇ ܚܸܟ݂ܡ̱ܬ̣ܵܐ. ܘܒܹܝܬ̣ ܐܘܼܪ̈ܚܵܬ̣ܵܐ ܘܥܲܠ ܝܲܕ݂ ܫܒ̣̈ܝܼܠܹܐ ܩܵܝ̇ܡܵܐ. [No book]
[3]ܘܥܲܠ ܬܲܪ̈ܥܹܐ ܒܦܘܼܡܵܗ̇ ܩܵܪܝܵܐ ܘܲܒ̣ܡܲܥܠܵܢܹ̈ܐ ܕܬܲܪ̈ܥܹܐ ܕܟܲܪܟ݂ܵܐ ܡܸܫܬܲܒ̇ܚܵܐ: ܘܐܵܡ̇ܪܵܐ. [No book]
[4]ܠܟ݂ܘܿܢ ܓܲܒ̣ܪܹ̈ܐ ܩܵܪܝܵܐ ܐ̄ܢܵܐ: ܘܩܵܠܝ ܥܲܠ ܒܢܲܝ̈ܢܵܫܵܐ. [No book]
[5]ܕܢܸܣܬܲܟ̇ܠܘܼܢ ܫܲܒ̣ܪܹ̈ܐ ܥܪܝܼܡܘܼܬ̣ܵܐ. ܘܚܲܣܝܼܪ̈ܲܝ ܪܸܥܝܵܢܵܐ ܢܸܣܬܲܟ̇ܠܘܼܢ ܒܠܸܒ̇ܗܘܿܢ. [No book]
[6]ܫܘܼܡܥܘܼܢܝ: ܡܸܛܠ ܕܫܲܪܝܼܪܬܵܐ ܗ̄ܘܼ ܡܡܲܠܠܵܐ ܐ̄ܢܵܐ. ܘܡܲܦ̮ܬܲܚ ܦܘܼܡܝ ܬܪܝܼܨܘܼܬ̣ܵܐ. [No book]
[7]ܩܘܼܫܬܵܐ ܗ̄ܘܼ ܓܹܝܪ ܪܵܢܹ̇ܐ ܦܘܼܡܝ. ܘܛܲܡܵܐ̈ܢ ܩܕ݂ܵܡܲܝ ܣܸܦ̈ܘܵܬ̣ܵܐ ܕܲܓܵܠܵـ̈ـܬ̣ܵܐ. [No book]
[8]ܘܲܒ̣ܙܲܕ̇ܝܼܩܘܼܬ̣ܵܐ ܐܸܢܹܝܢ ܟܠܗܹܝܢ ܡܸܠܲܝ̈ ܦܘܼܡܝ. ܘܠܲܝܬ̇ ܒܗܹܝܢ ܦܘܼܬܵܠܵܐ ܘܥܘܼܩܵܡܵܐ. [No book]
[9]ܘܟ݂ܠܗܹܝܢ ܓܲܠ̈ܝܵܢ ܐܸܢܹܝܢ ܠܐܲܝܢܵܐ ܕܡܸܫܬܵܘܕܲܥ ܠܗܹܝܢ. ܘܲܬ̣ܪ̈ܝܼܨܵܐ ܐܸܢܹܝܢ ܠܐܲܝܠܹܝܢ ܕܨܵܒܹ̇ܝܢ ܠܡܸܕܲܥ ܐܸܢܹܝܢ. [No book]
[10]ܩܲܒܸ̇ܠܘ ܡܲܪܕ̇ܘܼܬ̣ܵܐ: ܘܠܵܐ ܟܸܣܦܵܐ. ܘܓ̣ܒ̣ܵܘ ܠܟ݂ܘܿܢ ܝܼܕܲܥܬ̣ܵܐ ܛܵܒ̣ ܡ̣ܢ ܕܲܗܒ̣ܵܐ ܣܢܝܼܢܵܐ. [No book]
[11]ܡܸܛܠ ܕܛܵܒ̣ܵܐ ܗ̄ܝܼ ܚܸܟ݂ܡ̱ܬ̣ܵܐ: ܛܵܒ̣ ܡ̣ܢ ܕܲܗܒ̣ܵܐ ܣܢܝܼܢܵܐ: ܛܵܒ̣ ܡ̣ܢ ܟܹܐܦܹ̈ܐ ܛܵܒ̣ܵـ̈ـܬ̣ܵܐ. ܘܡܸܕܹ̇ܡ ܠܵܐ ܦܵܚܹ̇ܡ ܠܵܗ̇. [No book]
[12]ܐܸܢܵܐ ܚܸܟ݂ܡ̱ܬ̣ܵܐ ܒܪܹܝܬ̣ ܥܪܝܼܡܘܼܬ̣ܵܐ. ܘܝܼܕܲܥܬ̣ܵܐ ܘܬܲܪܥܝܼܬ̣ܵܐ ܐܸܢܵܐ ܩܵܢܝܵܐ. [No book]
[13]ܕܸܚ̱ܠܬܹܗ ܕܡܵܪܝܵܐ ܣܵܢ̇ܝܵܐ ܒܝܼܫܘܼܬ̣ܵܐ: ܘܓܲܐܝܼܘܼܬ̣ܵܐ: ܘܪܵܡܘܼܬ̣ܵܐ: ܘܐܘܼܪܚܵܐ ܒܝܼܫܬܵܐ. ܘܦܘܼܡܵܐ ܗܦܝܼܟ݂ܵܐ ܣܵܢ̇ܝܵܐ ܐ̄ܢܵܐ. [No book]
[14]ܕܝܼܠܝ ܗ̄ܝܼ ܬܲܪܥܝܼܬ̣ܵܐ: ܘܝܘܼܠܦܵܢܵܐ. ܕܝܼܠܝ ܗ̄ܘܼ ܣܘܼܟܵܠܵܐ: ܘܕ݂ܝܼܠܝ ܗ̄ܝܼ ܓܲܢ̄ܒܵܪܘܼܬ̣ܵܐ. [No book]
[15]ܡܸܛܠܵܬ̣ܝ ܡܲܠ̈ܟܹ̇ܐ ܡܲܡ̱ܠܟ݂ܝܼܢ. ܘܫܲܠܝܼܛܵܢܹ̈ܐ ܒܵـ̇ـܕ݂ܩܝܼܢ ܙܲܕ̇ܝܼܩܘܼܬ̣ܵܐ. [No book]
[16]ܡܸܛܠܵܬ̣ܝ ܫܲܠܝܼܛܵܝܹ̈ܐ ܡܸܫܬܲܠܛܝܼܢ. ܘܪܵܘ̱ܪ̈ܒ̣ܵܢܹܐ ܘܟ݂ܠܗܘܿܢ ܕܲܝܵܢܹ̈ܐ ܕܙܲܕܝܼܩܘܼܬ̣ܵܐ. [No book]
[17]ܐܸܢܵܐ ܪܵܚ̇ܡܵܐ ܐ̄ܢܵܐ ܪ̈ܵܚܡܲܝ. ܘܐܲܝܠܹܝܢ ܕܒ̣ܵܥܹ̇ܝܢ ܠܝܼ: ܢܸܫܟ̇ܚܘܼܢܵܢܝ. [No book]
[18]ܥܘܼܬ̣ܪܵܐ ܘܐܝܼܩܵܪܵܐ ܕܝܼܠܝ ܗ̄ܘܼ: ܘܩܸܢܝܵܢܵܐ ܥܲܬ̇ܝܼܩܵܐ: ܘܙܲܕ̇ܝܼܩܘܼܬ̣ܵܐ. [No book]
[19]ܘܦܹܐܪ̈ܲܝ ܛܵܒ̣ܝܼܢ ܐܸܢܘܿܢ ܡ̣ܢ ܕܲܗܒ̣ܵܐ ܣܢܝܼܢܵܐ: ܘܥܲܠ̈ܠܵܬ̣ܝ ܡ̣ܢ ܣܹܐܡܵܐ ܓܲܒ̣ܝܵܐ. [No book]
[20]ܒܐܘܼܪܚܵܐ ܕܙܲܕ̇ܝܼܩܘܼܬ̣ܵܐ ܡܗܲܠܟ݂ܵܐ ܐ̄ܢܵܐ: ܘܲܒ̣ܓ̣ܵܘ ܫܒ̣ܝܼ̈ܠܹܐ ܕܕ݂ܝܼܢܵܐ. [No book]
[21]ܕܐܵܘܪܹܬ̣ ܠܪ̈ܵܚܡܲܝ ܣܲܒ̣ܪܵܐ. ܘܣܝܼ̈ܡܵܬ̣ܗܘܿܢ ܐܸܡܠܹܐ. [No book]
[22]ܡܵܪܝܵܐ ܒܝܼܪܵܢܝ ܒܪܹܫ ܒܪܝܼܬܹܗ: ܡ̣ܢ ܩܕ݂ܵܡ ܥܒ̣ܵܕ݂ܵܘ̈ܗܝ ܟܠܗܘܿܢ. [No book]
[23]ܘܡ̣ܢ ܩܕ݂ܵܡ ܥܵܠܡܹ̈ܐ ܐܲܬ̣ܩܢܵܢܝ: ܘܡ̣ܢ ܪܹܫܝܼܬ̣ܵܐ ܘܡ̣ܢ ܩܕ݂ܵܡ ܕܢܸܥܒܸ̇ܕ݂ ܐܲܪܥܵܐ. [No book]
[24]ܥܲܕ݂ܠܵܐ ܢܸܗܘܘܿܢ ܬܗܘܿܡܹ̈ܐ ܐܸܬ̣ܝܲܠ̇ܕܹ̇ܬ̣ ܘܥܲܕ݂ܠܵܐ ܢܸܗܘܘܿܢ ܡܲـ̈ـܝܵܐ ܒܡܲܒ̇ـ̈ـܘܼܥܹܐ. [No book]
[25]ܘܥܲܕ݂ܠܵܐ ܢܸܬ̣ܩ̄ܢܘܼܢ ܛܘܼܪܹ̈ܐ: ܘܲܩܕ݂ܵܡ ܪܵܡܵܬ̣ܵܐ ܐܸܬ̣ܒܲܛܢܹ̇ܬ̣. [No book]
[26]ܥܲܕ݂ܠܵܐ ܢܸܥܒܸ̇ܕ݂ ܐܲܪܥܵܐ: ܘܢܲܚ̈ܠܹܐ: ܘܪܹܫ ܥܲܦܪܵܗ̇ ܕܬܹܒܹܝܠ. [No book]
[27]ܟܲܕ݂ ܡܲܬ̣ܩܸܢ ܫܡܲܝܵܐ: ܥܲܡܹܗ ܗ̄ܘܹ̇ܝܬ̣. ܘܟܲܕ݂ ܥ̣ܒܲܕ݂ ܚܘܼܓ̣ܬ̣ܵܐ ܥܲܠ ܐܲܦܲܝ̈ ܬܗܘܿܡܹ̈ܐ. [No book]
[28]ܟܲܕ݂ ܐܲܥ̣ܫܸܢ ܥܢܵܢܹ̈ܐ ܡ̣ܢ ܠܥܸܠ: ܘܟܲܕ݂ ܐܲܥܫܸܢ ܡܲܒ̇ـ̈ـܘܼܥܹܐ ܕܲܬ̣ܗܘܿܡܹ̈ܐ. [No book]
[29]ܘܟܲܕ݂ ܣܵܡ̣ ܢܵܡܘܿܣܵܐ ܠܝܲܡܵܐ: ܘܡܲـ̈ـܝܵܐ ܠܵܐ ܥܵܒ̣ܪܝܼܢ ܦܘܼܡܹܗ. ܘܟܲܕ݂ ܥ̣ܒܲܕ݂ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ. ܥܲܡܹܗ ܡܲܬ̣ܩܢܵܐ ܗ̄ܘܹ̇ܝܬ̣. [No book]
[30]ܒܝܼ ܚܵܕܹ̇ܐ ܗ̄ܘܼܵܐ ܟܠܝܘܿܡ. ܘܲܒ̣ܟ݂ܠܙܲܒܲܢ ܩܕ݂ܵܡܵܘܗܝ ܚܵܕ݂ܝܵܐ ܗ̄ܘܹ̇ܝܬ̣. [No book]
[31]ܚܵـ̇ـܕ݂ܝܵܐ ܗ̄ܘܹ̇ܝܬ̣ ܒܬܹܒܹܝܠ ܐܲܪܥܹܗ. ܘܡܸܫܬܲܒ̇ܚܵܐ ܗ̄ܘܹ̇ܝܬ̣ ܒܲܒ̣ܢܲܝ̈ܢܵܫܵܐ. [No book]
[32]ܡܸܟܹ̇ܝܠ ܒܢܲـ̈ـܝܵܐ ܫܘܼܡܥܘܼܢܝ ܛܘܼܒ̣ܵܘܗܝ ܠܡ̇ܢ ܕܢܵܛ̇ܲܪ ܐܘܼܪ̈ܚܵܬ̣ܝ. [No book]
[33]ܫܡܲܥܘ ܡܲܪܕ̇ܘܼܬ̣ܵܐ: ܘܐܸܬ̣ܚܲܟ̇ܝܼܡܘ ܘܠܵܐ ܬܸܛܥܘܿܢ. [No book]
[34]ܛܘܼܒ̣ܵܘܗܝ ܠܒܲܪܢܵܫܵܐ ܕܢܸܫ̱ܡܥܲܢܝ ܘܢܸܫܗܲܪ ܥܲܠ ܬܲܪ̈ܥܲܝ ܒܟ݂ܠ ܝܘܿܡ. ܘܢܸܛܲܪ ܐܸܣܟ̇ܦܵـ̈ـܬ̣ܵܐ ܕܬܲܪ̈ܥܲܝ. [No book]
[35]ܡܸܛܠ ܕܡܲܦܩܵܢܲܝ̈ ܡܲܦܩܵܢܹ̈ܐ ܐܸܢܘܿܢ ܕܚܲܝܹ̈ܐ ܘܢܵܦܹ̇ܩ ܨܸܒ̣ܝܵܢܵܐ ܡ̣ܢ ܡܵܪܝܵܐ. [No book]
[36]ܘܐܲܝܠܹܝܢ ܕܚܵܛܹ̇ܝܢ ܥܠܲܝ: ܢܲܦ̮ܫܗܘܿܢ ܢܵܟܹ̇ܝܢ. ܘܟ݂ܠܗܘܿܢ ܣܵܢ̇ܐܲܝ̈: ܪܵܚܡܹܐ ܐܸܢܘܿܢ ܕܡܵܘܬܵܐ. [No book]
 
Top