➖ »
«
➖ ➕
Aleppo Codex (~920)
Alep
Book of Jasher (1840)
Jas(1840)
←
Psalms
Psa
104
→
[1]ברכי נפשי את־יהוה יהוה אלהי גדלת מאד הוד והדר לבשת [No book]
[2]עטה־אור כשלמה נוטה שמים כיריעה [No book]
[3]המקרה במים עליותיו השם־עבים רכובו המהלך על־כנפי־רוח [No book]
[4]עשה מלאכיו רוחות משרתיו אש להט [No book]
[5]יסד־ארץ על־מכוניה בל־תמוט עולם ועד [No book]
[6]תהום כלבוש כסיתו על־הרים יעמדו מים [No book]
[7]מן־גערתך ינוסון מן־קול רעמך יחפזון [No book]
[8]יעלו הרים ירדו בקעות אל־מקום זה יסדת להם [No book]
[9]גבול־שמת בל־יעברון בל־ישבון לכסות הארץ [No book]
[10]המשלח מעינים בנחלים בין הרים יהלכון [No book]
[11]ישקו כל־חיתו שדי ישברו פראים צמאם [No book]
[12]עליהם עוף־השמים ישכון מבין עפאים יתנו־קול [No book]
[13]משקה הרים מעליותיו מפרי מעשיך תשבע הארץ [No book]
[14]מצמיח חציר לבהמה ועשב לעבדת האדם להוציא לחם מן־הארץ [No book]
[15]ויין ישמח לבב־אנוש להצהיל פנים משמן ולחם לבב־אנוש יסעד [No book]
[16]ישבעו עצי יהוה ארזי לבנון אשר נטע [No book]
[17]אשר־שם צפרים יקננו חסידה ברושים ביתה [No book]
[18]הרים הגבהים ליעלים סלעים מחסה לשפנים [No book]
[19]עשה ירח למועדים שמש ידע מבואו [No book]
[20]תשת־חשך ויהי לילה בו־תרמש כל־חיתו־יער [No book]
[21]הכפירים שאגים לטרף ולבקש מאל אכלם [No book]
[22]תזרח השמש יאספון ואל־מעונתם ירבצון [No book]
[23]יצא אדם לפעלו ולעבדתו עדי־ערב [No book]
[24]מה־רבו מעשיך יהוה כלם בחכמה עשית מלאה הארץ קנינך [No book]
[25]זה הים גדול ורחב ידים שם־רמש ואין מספר חיות קטנות עם־גדלות [No book]
[26]שם אניות יהלכון לויתן זה־יצרת לשחק־בו [No book]
[27]כלם אליך ישברון לתת אכלם בעתו [No book]
[28]תתן להם ילקטון תפתח ידך ישבעון טוב [No book]
[29]תסתיר פניך יבהלון תסף רוחם יגועון ואל־עפרם ישובון [No book]
[30]תשלח רוחך יבראון ותחדש פני אדמה [No book]
[31]יהי כבוד יהוה לעולם ישמח יהוה במעשיו [No book]
[32]המביט לארץ ותרעד יגע בהרים ויעשנו [No book]
[33]אשירה ליהוה בחיי אזמרה לאלהי בעודי [No book]
[34]יערב עליו שיחי אנכי אשמח ביהוה [No book]
[35]יתמו חטאים מן־הארץ ורשעים עוד אינם ברכי נפשי את־יהוה הללו־יה [No book]
Source: unbound.biola.edu
 See information...
Top