➖ »
«
➖ ➕
Aleppo Codex (~920)
Alep
Westminster Leningrad Codex
WLC
←
Psalms
Psa
124
→
[1]שיר המעלות לדוד לולי יהוה שהיה לנו יאמר־נא ישראל [1]שִׁ֥יר הַֽמַּעֲלֹ֗ות לְדָ֫וִ֥ד לוּלֵ֣י יְ֭הוָה שֶׁהָ֣יָה לָ֑נוּ יֹֽאמַר־נָ֝א יִשְׂרָאֵֽל׃
[2]לולי יהוה שהיה לנו בקום עלינו אדם [2]לוּלֵ֣י יְ֭הוָה שֶׁהָ֣יָה לָ֑נוּ בְּק֖וּם עָלֵ֣ינוּ אָדָֽם׃
[3]אזי חיים בלעונו בחרות אפם בנו [3]אֲ֭זַי חַיִּ֣ים בְּלָע֑וּנוּ בַּחֲרֹ֖ות אַפָּ֣ם בָּֽנוּ׃
[4]אזי המים שטפונו נחלה עבר על־נפשנו [4]אֲ֭זַי הַמַּ֣יִם שְׁטָפ֑וּנוּ נַ֝֗חְלָה עָבַ֥ר עַל־נַפְשֵֽׁנוּ׃
[5]אזי עבר על־נפשנו המים הזידונים [5]אֲ֭זַי עָבַ֣ר עַל־נַפְשֵׁ֑נוּ הַ֝מַּ֗יִם הַזֵּֽידֹונִֽים׃
[6]ברוך יהוה שלא נתננו טרף לשניהם [6]בָּר֥וּךְ יְהוָ֑ה שֶׁלֹּ֥א נְתָנָ֥נוּ טֶ֝֗רֶף לְשִׁנֵּיהֶֽם׃
[7]נפשנו כצפור נמלטה מפח יוקשים הפח נשבר ואנחנו נמלטנו [7]נַפְשֵׁ֗נוּ כְּצִפֹּ֥ור נִמְלְטָה֮ מִפַּ֪ח יֹ֫וקְשִׁ֥ים הַפַּ֥ח נִשְׁבָּ֗ר וַאֲנַ֥חְנוּ נִמְלָֽטְנוּ׃
[8]עזרנו בשם יהוה עשה שמים וארץ [8]עֶ֭זְרֵנוּ בְּשֵׁ֣ם יְהוָ֑ה עֹ֝שֵׂ֗ה שָׁמַ֥יִם וָאָֽרֶץ׃
Source: unbound.biola.edu
 Source: unbound.biola.edu

See information...
Top