|
|
| [1]לַמְנַצֵּ֗חַ מִזְמֹ֥ור לְדָוִֽד׃ |
[1]למנצח מזמור לדוד |
| [2]חַלְּצֵ֣נִי יְ֭הוָה מֵאָדָ֣ם רָ֑ע מֵאִ֖ישׁ חֲמָסִ֣ים תִּנְצְרֵֽנִי׃ |
[2]חלצני יהוה מאדם רע מאיש חמסים תנצרני |
| [3]אֲשֶׁ֤ר חָשְׁב֣וּ רָעֹ֣ות בְּלֵ֑ב כָּל־יֹ֝֗ום יָג֥וּרוּ מִלְחָמֹֽות׃ |
[3]אשר חשבו רעות בלב כל־יום יגורו מלחמות |
| [4]שָֽׁנֲנ֣וּ לְשֹׁונָם֮ כְּֽמֹו־נָ֫חָ֥שׁ חֲמַ֥ת עַכְשׁ֑וּב תַּ֖חַת שְׂפָתֵ֣ימֹו סֶֽלָה׃ |
[4]שננו לשונם כמו־נחש חמת עכשוב־תחת שפתימו סלה |
| [5]שָׁמְרֵ֤נִי יְהוָ֨ה ׀ מִ֘ידֵ֤י רָשָׁ֗ע מֵאִ֣ישׁ חֲמָסִ֣ים תִּנְצְרֵ֑נִי אֲשֶׁ֥ר חָ֝שְׁב֗וּ לִדְחֹ֥ות פְּעָמָֽי׃ |
[5]שמרני יהוה מידי רשע מאיש חמסים תנצרני אשר חשבו לדחות פעמי |
| [6]טָֽמְנֽוּ־גֵאִ֨ים ׀ פַּ֡ח לִ֗י וַחֲבָלִ֗ים פָּ֣רְשׂוּ רֶ֭שֶׁת לְיַד־מַעְגָּ֑ל מֹקְשִׁ֖ים שָֽׁתוּ־לִ֣י סֶֽלָה׃ |
[6]טמנו גאים פח לי וחבלים פרשו רשת ליד־מעגל מקשים שתו־לי סלה |
| [7]אָמַ֣רְתִּי לַ֭יהוָה אֵ֣לִי אָ֑תָּה הַאֲזִ֥ינָה יְ֝הוָ֗ה קֹ֣ול תַּחֲנוּנָֽי׃ |
[7]אמרתי ליהוה אלי אתה האזינה יהוה קול תחנוני |
| [8]יְהֹוִ֣ה אֲ֭דֹנָי עֹ֣ז יְשׁוּעָתִ֑י סַכֹּ֥תָה לְ֝רֹאשִׁ֗י בְּיֹ֣ום נָֽשֶׁק׃ |
[8]יהוה אדני עז ישועתי סכתה לראשי ביום נשק |
| [9]אַל־תִּתֵּ֣ן יְ֭הוָה מַאֲוַיֵּ֣י רָשָׁ֑ע זְמָמֹ֥ו אַל־תָּ֝פֵ֗ק יָר֥וּמוּ סֶֽלָה׃ |
[9]אל־תתן יהוה מאויי רשע זממו אל־תפק ירומו סלה |
| [10]רֹ֥אשׁ מְסִבָּ֑י עֲמַ֖ל שְׂפָתֵ֣ימֹו [יְכַסּוּמֹו כ] (יְכַסֵּֽמֹו ׃ ק) |
[10]ראש מסבי עמל שפתימו יכסומו [Q: יכסימו] |
| [11][יָמִיטוּ כ] (יִמֹּ֥וטוּ ק) עֲלֵיהֶ֗ם גֶּֽחָ֫לִ֥ים בָּאֵ֥שׁ יַפִּלֵ֑ם בְּ֝מַהֲמֹרֹ֗ות בַּֽל־יָקֽוּמוּ׃ |
[11]ימיטו [Q: ימוטו] עליהם גחלים באש יפלם במהמרות בל־יקומו |
| [12]אִ֥ישׁ לָשֹׁון֮ בַּל־יִכֹּ֪ון בָּ֫אָ֥רֶץ אִישׁ־חָמָ֥ס רָ֑ע יְ֝צוּדֶ֗נּוּ לְמַדְחֵפֹֽת׃ |
[12]איש לשון בל־יכון בארץ איש־חמס רע־יצודנו למדחפת |
| [13][יָדַעְתָּ כ] (יָדַ֗עְתִּי ק) כִּֽי־יַעֲשֶׂ֣ה יְ֭הוָה דִּ֣ין עָנִ֑י מִ֝שְׁפַּ֗ט אֶבְיֹנִֽים׃ |
[13]ידעת [Q: ידעתי]־כי־יעשה יהוה דין עני משפט אבינים |
| [14]אַ֣ךְ צַ֭דִּיקִים יֹוד֣וּ לִשְׁמֶ֑ךָ יֵשְׁב֥וּ יְ֝שָׁרִ֗ים אֶת־פָּנֶֽיךָ׃ |
[14]אך צדיקים יודו לשמך ישבו ישרים את־פניך |