➕
←
Psalms
Psa
144
→
[1]ܐܹܪܲܡܪ̱ܡܵܟ݂ ܡܵܪܝ ܡܲܠܟܵܐ. [2]ܘܐܹܒܲܪܸܟ݂ ܫܡܵܟ݂ ܠܥܵܠܲܡ ܥܵܠܡܝܼܢ. [3]ܒܟ̣ܠܝܘܿܡ ܐܹܒܲܪܟ̣ܵܟ݂ ܘܐܹܫܲܒܲܚ ܫܡܵܟ݂ ܠܥܵܠܲܡ. [4]ܪܲܒ̇ܘܼ ܡܵܪܲܢ ܘܲܡܫܲܒܲܚ ܛܵܒ̣. [5]ܘܠܲܝܬ̇ ܣܵܟ̣ܵܐ ܠܪܲܒ̇ܘܼܬܹܗ. [6]ܕܵܪܵܐ ܠܕ݂ܵܪܵܐ ܢܸܫܬܲܥܘܿܢ ܥܒ̣ܵܕܲܝ̈ܟ. [7]ܘܓܲܢ̄ܒܵܪܘܼܬ̣ܵܟ݂ ܢܚܲܘܘܿܢ. [8]ܘܥܘܼܫܢܵܐ ܕܲܕ݂ܚܝܼܠܘܼܬ̣ܵܟ݂ ܢܹܐܡܪܘܼܢ. [9]ܘܪܲܘ̱ܪ̈ܒ̣ܵܬ̣ܵܟ݂ ܢܸܫܬܲܥܘܿܢ. [10]ܘܲܕ݂ܚܝܼܠܘܼܬ̣ ܥܘܼܫܢܵܟ݂ ܢܹܐܡܪܘܼܢ. [11]ܘܪܲܒ̇ܘܼܬ̣ܵܟ݂ ܐܸܫܬܲܥܸܐ. [12]ܕܘܼܟ̣ܪܵܢܵܐ ܕܛܲܝ̈ܒ̇ܘܵܬ̣ܵܟ݂ ܣܲܓ̇ܝܼ̈ܐܵܬ̣ܵܐ. [13]ܢܸܒ̣ܥܘܿܢ ܙܲܕ݂ܝܼ̈ܩܲܝܟ ܘܢܸܫܟ̇ܚܘܼܢ. [14]ܡܪܲܚܡܵܢ ܗ̄ܘ̣ ܡܵܪܝܵܐ ܘܲܡܪܲܚܦܵܢ. [15]ܢܲܓ̇ܝܼܪܵܐ ܪܘܼܚܹܗ ܘܣܲܓ̇ܝܼܐܵܐ ܛܲܝܒ̇ܘܼܬܹܗ. [16]ܛܵܒ̣ܘܼ ܡܵܪܝܵܐ ܘܪ̈ܲܚܡܵܘܗܝ ܥܲܠ ܟܠܗܘܿܢ ܥܲܒ̣ܕܵܘ̈ܗܝ. [17]ܢܲܘܕ̇ܘܿܢ ܠܵܟ݂ ܡܵܪܝܵܐ ܥܲܒ̣ܕܲܝ̈ܟ. [18]ܘܙܲܕ̇ܝܼܩܲܝ̈ܟ ܢܫܲܒ̇ܚܘܼܢܵܟ݂. [19]ܘܫܘܼܒ̣ܚܵܐ ܕܡܲܠܟ̇ܘܼܬ̣ܵܟ݂ ܢܹܐܡܪܘܼܢ. [20]ܘܲܒ̣ܥܘܼܫܢܵܟ݂ ܢܡܲܠܠܘܼܢ. [21]ܕܲܢܚܲܘܘܿܢ ܠܲܒ̣ܢܲܝ̈ܢܵܫܵܐ ܓܲܢ̄ܒܵܪܘܼܬ̣ܵܟ݂ ܘܫܘܼܒ̣ܚܵܐ ܕܡܲܠܟ̇ܘܼܬ̣ܵܟ݂. [22]ܡܲܠܟ̇ܘܼܬ̣ܵܟ݂ ܡܲܠܟ̇ܘܼܬ̣ ܟܠ ܥܵܠܡܝܼܢ. [23]ܘܫܘܼܠܛܵܢܵܟ݂ ܒܟ̣ܠ ܕܵܪܕܵܪ̈ܝܼܢ. [24]ܡܗܲܝܡܲܢ̣ܘܼ ܡܵܪܝܵܐ ܒܡܸܠܵܘ̈ܗܝ. [25]ܘܙܲܕ̇ܝܼܩ ܒܟ̣ܠܗܘܿܢ ܥܒ̣ܵܕ݂ܵܘ̈ܗܝ. [26]ܣܵܡܹ̇ܟ݂ ܡܵܪܝܵܐ ܠܟ̣ܠ ܕܢܵܦܠ݁ܝܼܢ. [27]ܘܬ̣ܵܪܹܨ ܠܟ̣ܠ ܕܲܟ̣ܦܝܼܦܝܼܢ. [28]ܥܲܝܢܹ̈ܐ ܕܟ̣ܠܢܵܫ ܠܘܵܬ̣ܵܟ݂ ܬܲܠ̈ܝܵܢ. [29]ܕܝܵܗܹ̇ܒ̣ ܐܲܢ̄ܬ̇ ܠܗܘܿܢ ܡܹܐܟ̣ܘܼܠܬܵܐ ܒܙܲܒ̣ܢ̱ܗܘܿܢ. [30]ܦܵܬܲܚ݁ ܐܲܢ̄ܬ̇ ܐܝܼܕ݂ܵܟ݂ ܘܲܡܣܲܒܲܥ ܐܲܢ̄ܬ̇ ܨܸܒ̣ܝܵܢܵܐ ܕܟ̣ܠ ܕܚܲܝ̈. [31]ܙܲܕ̇ܝܼܩ ܗ̄ܘ̣ ܡܵܪܝܵܐ ܒܟ̣ܠܗܹܝܢ ܐܘܼܪ̈ܚܵܬܹܗ. [32]ܘܲܡܪܲܚܡܵܢ ܒܟ̣ܠܗܘܿܢ ܥܒ̣ܵܕ݂ܵܘ̈ܗܝ. [33]ܩܲܪܝܼܒ̣ܘܼ ܡܵܪܝܵܐ ܠܐܲܝܠܹܝܢ ܕܩܵܪܹܝܢ݁ ܠܹܗ ܒܩܘܼܫܬܵܐ. [34]ܘܥܵܒܹ̇ܕ݂ ܨܸܒ̣ܝܵܢܵܐ ܕܕ݂ܵܚܠܵܘ̈ܗܝ. [35]ܫܵܡܲܥ݁ ܒܵܥܘܼܬ̣ܗܘܿܢ ܘܦܵܪܸܩ̇ ܠܗܘܿܢ. [36]ܢܵܛܲ݁ܪ ܡܵܪܝܵܐ ܠܟ̣ܠܗܘܿܢ ܕܵܚܠܵܘ̈ܗܝ. [37]ܘܲܠܟ̣ܠܗܘܿܢ ܥܲܘܵܠܹ̈ܐ ܡܲܘܒܸ̇ܕ݂. [38]ܬܸܫ̈ܒ̇ܚܵܬܹܗ ܕܡܵܪܝܵܐ ܐܹܡܲܠܸܠ ܒܦܘܼܡܝ. [40]ܠܲܫܡܵܐ ܕܩܘܼܕ݂ܫܹܗ ܠܥܵܠܲܡ ܥܵܠܡܝܼܢ.
 
Top