➕
←
Psalms
Psa
32
→
[1]ܛܘܼܒ̣ܵܘܗܝ ܠܡܲܢ ܕܐܸܫܬ̇ܒܸܩ ܠܹܗ ܥܲܘܠܹܗ. [2]ܘܐܸܬ̣ܟܲܣܝܼܘ ܠܹܗ ܚܛܵܗܵܘ̈ܗܝ. [3]ܛܘܼܒ̣ܵܘܗܝ ܠܒܲܪܢܵܫܵܐ ܕܠܵܐ ܢܸܚܫܘܿܒ̣ ܠܹܗ ܡܵܪܝܵܐ ܚܛܝܼܬܹܗ. [4]ܘܠܲܝܬ̇ ܢܸܟ̣ܠܵܐ ܒܠܸܒܹܗ. [5]ܡܸܛܠ ܕܫܸܬ̣ܩܹ݁ܬ̣ ܒܠܝܼܘ ܓܲܪ̈ܡܲܝ. [6]ܟܲܕ݂ ܢܵܗܹܡ ܗ̄ܘܹܝܬ̣ ܝܲܘܡܵܐ ܟܠܹܗ. [7]ܡܸܛܠ ܕܠܸܠܝܵܐ ܘܐܝܼܡܵܡܵܐ ܝܸܩܪܲܬ̤ ܥܠܲܝ ܐܝܼܕ݂ܵܟ݂. [8]ܘܐܸܬ̣ܗܦܸܟ݂ ܒܚܲܕ݂ܝܝ ܟܹܐܒ̣ܵܐ ܠܡܸܩܛܠܲܢܝ. [9]ܚܛܵܗܲܝ̈ ܐܲܘܕܲܥܬܵܟ݂ ܘܣܲܟ̣̈ܠܘܵܬ̣ܝ ܠܵܐ ܟܲܣܝܼ݁ܬ̣ ܡܸܢܵܟ݂. [10]ܐܸܡ݁ܪܹܬ̣ ܕܐܲܘܕܸܐ ܠܡܵܪܝܵܐ ܥܲܠ ܣܲܟ̣̈ܠ̱ܘܵܬ̣ܝ. [11]ܘܐܲܢ̄ܬ̇ ܫܵܒܹܩ ܐܲܢ̄ܬ̇ ܠܝܼ ܟܠܗܘܿܢ ܚܛܵܗܲܝ̈. [12]ܡܸܛܠ ܗܵܢܵܐ ܢܨܲܠܸܐ ܠܵܟ݂ ܟܠܡܲܢ ܕܲܓ̣ܒܸܐ ܠܵܟ݂ ܒܙܲܒ̣ܢܵܐ ܡܩܲܒ̇ܠܵܐ. [13]ܚܹܐܦܵܐ ܕܹܝܢ ܕܡܲܝ̈ܵܐ ܣܲܓܝܼ̈ܐܹܐ. [14]ܠܘܵܬܹܗ ܠܵܐ ܢܸܬ̣ܩܲܪܒ̣ܘܼܢ. [15]ܐܲܢ̄ܬ̇ ܣܲܬܲܪܲܝܢܝ ܘܡ̣ܢ ܒܥܸܠܕܒ̣ܵܒܲܝ̈ ܢܲܛܲܪܲܝܢܝ. [16]ܫܘܼܒ̣ܚܵܐ ܘܦܘܼܪܩܵܢܵܐ ܐܲܟ̣ܪܸܟܲܝܢܝ ܕܐܸܣܬܲܟ̇ܠܵܟ݂. [17]ܘܐܲܘܕ̇ܥܵܟ݂ ܐܘܼܪܚܵܐ ܕܬܹܐܙܲܠ ܒܵܗ̇ ܘܐܹܣܝܼܡ ܥܲܝܢ̱ܝ ܥܠܲܝܟ. [18]ܠܵܐ ܬܸܗܘܘܿܢ ܐܲܝܟ݂ ܣܘܼܣܝܵܐ ܘܐܲܝܟ݂ ܟܘܼܕܲܢܝܵܐ ܕܠܵܐ ܚܲܟ̇ܝܼܡܝܼܢ. [19]ܕܒܲܦܓ̣ܘܼܕ̇ܬܵܐ ܡܟܲܒ̇ܫܝܼܢ ܠܗܘܿܢ ܡ̣ܢ ܛܲܠܝܘܼܬ̣ܗܘܿܢ. [20]ܘܠܵܐ ܩܵܪܒ̇ܝܼܢ ܠܘܵܬܹܗ. [21]ܣܲܓ̇ܝܼܐܝܼܢ ܟܹܐܒ̣ܵܘ̈ܗܝ ܕܥܲܘܵܠܵܐ. [22]ܘܐܲܝܢܵܐ ܕܲܡܣܲܒܲܪ ܒܡܵܪܝܵܐ ܛܲܝܒ̇ܘܼܬ̣ܵܐ ܬܸܚܕ̇ܪܝܼܘܗܝ. [23]ܚܕ݂ܵܘ ܙܲܕܝܼܩܹ̈ܐ ܘܐܸܬ̣ܒܲܣܲܡܘ ܒܡܵܪܝܵܐ. [24]ܘܫܲܒ̇ܚܘܼܗܝ ܟܠ ܬܪ̈ܝܼܨܲܝ ܠܸܒܵܐ.
 
Top