|
|
| [1]מזמור לאסף אך טוב לישראל אלהים לברי לבב |
[1]מִזְמֹ֗ור לְאָ֫סָ֥ף אַ֤ךְ טֹ֭וב לְיִשְׂרָאֵ֥ל אֱלֹהִ֗ים לְבָרֵ֥י לֵבָֽב׃ |
| [2]ואני־כמעט נטוי [Q: נטיו] רגלי כאין שפכה [Q: שפכו] אשרי |
[2]וַאֲנִ֗י כִּ֭מְעַט [נָטוּי כ] (נָטָ֣יוּ ק) רַגְלָ֑י כְּ֝אַ֗יִן [שֻׁפְּכָה כ] (שֻׁפְּכ֥וּ ק) אֲשֻׁרָֽי׃ |
| [3]כי־קנאתי בהוללים שלום רשעים אראה |
[3]כִּֽי־קִ֭נֵּאתִי בַּֽהֹולְלִ֑ים שְׁלֹ֖ום רְשָׁעִ֣ים אֶרְאֶֽה׃ |
| [4]כי אין חרצבות למותם ובריא אולם |
[4]כִּ֤י אֵ֖ין חַרְצֻבֹּ֥ות לְמֹותָ֗ם וּבָרִ֥יא אוּלָֽם׃ |
| [5]בעמל אנוש אינמו ועם־אדם לא ינגעו |
[5]בַּעֲמַ֣ל אֱנֹ֣ושׁ אֵינֵ֑מֹו וְעִם־אָ֝דָ֗ם לֹ֣א יְנֻגָּֽעוּ׃ |
| [6]לכן ענקתמו גאוה יעטף־שית חמס למו |
[6]לָ֭כֵן עֲנָקַ֣תְמֹו גַאֲוָ֑ה יַעֲטָףשִׁ֝֗־ית חָמָ֥ס לָֽמֹו׃ |
| [7]יצא מחלב עינמו עברו משכיות לבב |
[7]יָ֭צָא מֵחֵ֣לֶב עֵינֵ֑מֹו עָ֝בְר֗וּ מַשְׂכִּיֹּ֥ות לֵבָֽב׃ |
| [8]ימיקו וידברו ברע עשק ממרום ידברו |
[8]יָמִ֤יקוּ ׀ וִידַבְּר֣וּ בְרָ֣ע עֹ֑שֶׁק מִמָּרֹ֥ום יְדַבֵּֽרוּ׃ |
| [9]שתו בשמים פיהם ולשונם תהלך בארץ |
[9]שַׁתּ֣וּ בַשָּׁמַ֣יִם פִּיהֶ֑ם וּ֝לְשֹׁונָ֗ם תִּֽהֲלַ֥ךְ בָּאָֽרֶץ׃ |
| [10]לכן ישיב [Q: ישוב] עמו הלם ומי מלא ימצו למו |
[10]לָכֵ֤ן ׀ [יָשִׁיב כ] (יָשׁ֣וּב ק) עַמֹּ֣ו הֲלֹ֑ם וּמֵ֥י מָ֝לֵ֗א יִמָּ֥צוּ לָֽמֹו׃ |
| [11]ואמרו איכה ידע־אל ויש דעה בעליון |
[11]וְֽאָמְר֗וּ אֵיכָ֥ה יָדַֽע־אֵ֑ל וְיֵ֖שׁ דֵּעָ֣ה בְעֶלְיֹֽון׃ |
| [12]הנה־אלה רשעים ושלוי עולם השגו־חיל |
[12]הִנֵּה־אֵ֥לֶּה רְשָׁעִ֑ים וְשַׁלְוֵ֥י עֹ֝ולָ֗ם הִשְׂגּוּ־חָֽיִל׃ |
| [13]אך־ריק זכיתי לבבי וארחץ בנקיון כפי |
[13]אַךְ־רִ֭יק זִכִּ֣יתִי לְבָבִ֑י וָאֶרְחַ֖ץ בְּנִקָּיֹ֣ון כַּפָּֽי׃ |
| [14]ואהי נגוע כל־היום ותוכחתי לבקרים |
[14]וָאֱהִ֣י נָ֭גוּעַ כָּל־הַיֹּ֑ום וְ֝תֹוכַחְתִּ֗י לַבְּקָרִֽים׃ |
| [15]אם־אמרתי אספרה כמו הנה דור בניך בגדתי |
[15]אִם־אָ֭מַרְתִּי אֲסַפְּרָ֥ה כְמֹ֑ו הִנֵּ֤ה דֹ֭ור בָּנֶ֣יךָ בָגָֽדְתִּי׃ |
| [16]ואחשבה לדעת זאת עמל היא [Q: הוא] בעיני |
[16]וָֽ֭אֲחַשְּׁבָה לָדַ֣עַת זֹ֑את עָמָ֖ל [הִיא כ] (ה֣וּא ק) בְעֵינָֽי׃ |
| [17]עד־אבוא אל־מקדשי־אל אבינה לאחריתם |
[17]עַד־אָ֭בֹוא אֶל־מִקְדְּשֵׁי־אֵ֑ל אָ֝בִ֗ינָה לְאַחֲרִיתָֽם׃ |
| [18]אך בחלקות תשית למו הפלתם למשואות |
[18]אַ֣ךְ בַּ֭חֲלָקֹות תָּשִׁ֣ית לָ֑מֹו הִ֝פַּלְתָּ֗ם לְמַשּׁוּאֹֽות׃ |
| [19]איך היו לשמה כרגע ספו תמו מן־בלהות |
[19]אֵ֤יךְ הָי֣וּ לְשַׁמָּ֣ה כְרָ֑גַע סָ֥פוּ תַ֝֗מּוּ מִן־בַּלָּהֹֽות׃ |
| [20]כחלום מהקיץ אדני בעיר צלמם תבזה |
[20]כַּחֲלֹ֥ום מֵהָקִ֑יץ אֲ֝דֹנָי בָּעִ֤יר ׀ צַלְמָ֬ם תִּבְזֶֽה׃ |
| [21]כי יתחמץ לבבי וכליותי אשתונן |
[21]כִּ֭י יִתְחַמֵּ֣ץ לְבָבִ֑י וְ֝כִלְיֹותַ֗י אֶשְׁתֹּונָֽן׃ |
| [22]ואני־בער ולא אדע בהמות הייתי עמך |
[22]וַאֲנִי־בַ֭עַר וְלֹ֣א אֵדָ֑ע בְּ֝הֵמֹ֗ות הָיִ֥יתִי עִמָּֽךְ׃ |
| [23]ואני תמיד עמך אחזת ביד־ימיני |
[23]וַאֲנִ֣י תָמִ֣יד עִמָּ֑ךְ אָ֝חַ֗זְתָּ בְּיַד־יְמִינִֽי׃ |
| [24]בעצתך תנחני ואחר כבוד תקחני |
[24]בַּעֲצָתְךָ֥ תַנְחֵ֑נִי וְ֝אַחַ֗ר כָּבֹ֥וד תִּקָּחֵֽנִי׃ |
| [25]מי־לי בשמים ועמך לא־חפצתי בארץ |
[25]מִי־לִ֥י בַשָּׁמָ֑יִם וְ֝עִמְּךָ֗ לֹא־חָפַ֥צְתִּי בָאָֽרֶץ׃ |
| [26]כלה שארי ולבבי צור־לבבי וחלקי־אלהים לעולם |
[26]כָּלָ֥ה שְׁאֵרִ֗י וּלְבָ֫בִ֥י צוּר־לְבָבִ֥י וְחֶלְקִ֗י אֱלֹהִ֥ים לְעֹולָֽם׃ |
| [27]כי־הנה רחקיך יאבדו הצמתה כל־זונה ממך |
[27]כִּֽי־הִנֵּ֣ה רְחֵקֶ֣יךָ יֹאבֵ֑דוּ הִ֝צְמַ֗תָּה כָּל־זֹונֶ֥ה מִמֶּֽךָּ׃ |
| [28]ואני קרבת אלהים לי־טוב שתי באדני יהוה מחסי לספר כל־מלאכותיך |
[28]וַאֲנִ֤י ׀ קִֽרֲבַ֥ת אֱלֹהִ֗ים לִ֫י־טֹ֥וב שַׁתִּ֤י ׀ בַּאדֹנָ֣י יְהֹוִ֣ה מַחְסִ֑י לְ֝סַפֵּ֗ר כָּל־מַלְאֲכֹותֶֽיךָ׃ |