➕
←
Ruth
Rut
4
   
[1]ܘܲܣܠܸܩ ܒܵܥܵܙ: ܘܝܼܬܸܒ̣ ܥܲܠ ܬܲܪܥܵܐ ܕܲܡܕܼܝܼܢ̄ܬܵܐ: ܘܗܵܐ ܬܵܒܲܥ ܥܝܵܪܬܵܐ ܥܵܒܲܪ: ܗܵܘ̇ ܕܐܸܡܲܪ ܥܠܵܘܗܝ ܒܵܥܵܙ: ܘܐܸܡܲܪ ܠܹܗ ܬܵܐ ܐܸܒ̣ ܗܵܪܟܵܐ: ܗ̤ܘ ܕܹܝܢ ܐܸܡܲܪ ܠܹܗ ܡܵܢܵܘ: ܘܝܼܬܸܒ̣ ܠܘܵܬܹܗ. [2]ܘܲܓ̣ܒ̣ܵܐ ܠܹܗ ܥܸܣܪܵܐ ܓܲܒ̣ܪ̈ܝܼܢ: ܡ̣ܢ ܣܵܒܹ̈ܐ ܕܲܡܕܼܝܼܢ̄ܬܵܐ: ܘܐܵܘܬܸܒ̣ ܐܸܢܘܿܢ ܠܘܵܬܹܗ. [3]ܘܐܸܡܲܪ ܠܬ̣ܵܒܲܥ ܝܵܪܬ̇ܘܼܬ̣ܵܐ: ܦܵܠܓ̇ܘܼܬ̣ܵܐ ܕܚܲܩܠܵܐ ܐܹܠܝܼܡܲܠܟ ܙܲܒ̇ܢܲܬ̤ ܠܝܼ ܢܲܥܡܝܼ. [4]ܘܐܸܢܵܐ ܐܸܡܪܹܬ̣ ܕܐܸܓ̣ܠܸܐ ܘܐܵܘܕܲܥܵܟ: ܘܐܹܡܲܪ ܠܵܟ ܕܲܩܢܝܼ ܐܲܢ̄ܬ̇ ܩܕܼܵܡ ܗܵܠܹܝܢ ܕܝܵܬ̣ܒ̇ܝܼܢ: ܘܐܸܢܵܐ ܐ̄ܢܵܐ ܕܚܵܘܝܼܬ̣ ܢܲܦ̮ܫܝ ܠܡܹܐܡܲܪ ܘܲܠܡܸܩܢܵܐ ܩܕܼܵܡ ܗܵܠܹܝܢ ܣܵܒܹ̈ܐ ܕܥܲܡܝ ܕܝܵܬ̣ܒ̇ܝܼܢ. ܘܗܵܫܵܐ ܐܸܢܗ̤ܘ ܕܬ̣ܵܒܲܥ ܐܲܢ̄ܬ̇ ܬܒܲܥ. ܘܐܸܢ ܠܵܐ ܬܵܒܲܥ ܐܲܢ̄ܬ̇: ܐܸܡܲܪ ܠܝܼ: ܘܐܸܕܲܥ ܗ̤ܘܲܝܬ̇ ܬܵܒ̣ܘܿܥܵܐ: ܘܐܸܢܵܐ ܐܸܬ̣ܒܲܥ. ܘܐܸܡܲܪ ܬܵܒܲܥ ܐ̄ܢܵܐ. [5]ܘܐܸܡܲܪ ܒܵܥܵܙ: ܒܝܵܘܡܵܐ ܕܙܵܒܹܢ ܐܲܢ̄ܬ̇ ܚܲܩܠܵܐ ܡ̣ܢ ܢܲܥܡܝܼ ܘܡ̣ܢ ܪܥܘܿܬ̣ ܡܘܼܐܵܒ̣ܵܝܬܵܐ ܐܲܢ̄ܬ̇ܬܹܗ ܕܗܵܘ̇ ܕܡܝܼܬ̣: ܩܢܝܼ ܥܕܲܡܵܐ ܕܲܬ̣ܩܝܼܡ ܫܡܹܗ ܕܡܝܼܬ̣ܵܐ ܥܲܠ ܝܵܪܬ̇ܘܼܬܹܗ. [6]ܘܐܸܡܲܪ ܬܵܒ̣ܘܿܥܵܐ: ܠܵܐ ܡܸܫܟܲܚ ܐ̄ܢܵܐ ܕܐܸܬ̣ܒܲܥ: ܕܲܠܡܵܐ ܐܹܚܲܒܸ̇ܠ ܝܵܪܬ̇ܘܼܬ̣ܝ. ܬܒܲܥ ܐܲܢ̄ܬ̇: ܡܸܛܠ ܚܲܣܝܼܪܘܼܬ̣ ܗܲܝܡܵܢܘܼܬ̣ܝ ܕܝܼܠܝ ܕܠܵܐ ܡܸܫܟܲܚ ܐ̄ܢܵܐ ܕܐܸܬ̣ܒܲܥ. [7]ܘܗܵܕܹܐ ܬܒܲܥܬ̣ܵܐ: ܗܵܐ ܩܘܼܕܼܡܲܬ̣ ܒ̈ܢܲܝ ܝܼܣܪܵܝܹܠ: ܘܫܘܼܚܠܵܦܵܐ ܕܲܬ̣ܒܲܥܬ̣ܵܐ ܠܲܡܩܵܡܘܼ: ܫܵܪܹܐ ܓܲܒ̣ܪܵܐ ܡܣܵܢܹܗ. ܘܝܵܗܹܒ̣ ܠܚܲܒ̣ܪܹܗ. ܘܗܵܕܼܐ ܗ̄ܝܼ ܣܵܗܕ̇ܘܼܬ̣ܵܐ ܒܝܼܣܪܵܝܹܠ. [8]ܘܐܸܡܲܪ ܗܵܘ̇ ܬܵܒ̣ܘܿܥܵܐ ܠܒ̣ܵܥܵܙ: ܩܢܝܼ ܠܢܲܦ̮ܫܵܟ: ܘܲܫܪܵܐ ܡ̣ܢ ܪܸ̈ܓ̣ܠܵܘܗܝ. [9]ܘܐܸܡܲܪ ܒܵܥܵܙ ܠܣܵܒܹ̈ܐ ܘܲܠܟ̣ܠܹܗ ܥܲܡܵܐ: ܐܲܢ̄ܬ̇ܘܿܢ ܣܵܗܕܝܼܢ ܝܵܘܡܵܢܵܐ: ܕܲܩܢܹܝܬ̣ ܟܠ ܡܵܐ ܕܐܝܼܬ̣ ܗ̄ܘܼܵܐ ܠܐܹܝܠܝܼܡܲܠܟ: ܘܟ̣ܠ ܡܵܐ ܕܐܝܼܬ̣ ܗ̄ܘܼܵܐ ܠܡܲܠܝܘܿܢ ܘܲܠܟ̣ܠܝܘܿܢ ܡ̣ܢ ܐܝܼܕܼܵܐ ܕܢܲܥܡܝܼ. [10]ܘܠܹܟ̣ܝ ܪܥܘܿܬ̣ ܡܘܼܐܵܒ̣ܵܝܬܵܐ ܐܵܢ̄ܬܲܬ̣ ܡܲܠܝܘܿܢ ܢܣܲܒ̣ܬܹܟ̣ܝ ܠܝܼ ܐܲܢ̄ܬ̇ܬ̣ܵܐ: ܠܡܩܵܡܘܼ ܫܡܹܗ ܕܡܝܼܬ̣ܵܐ ܥܲܠ ܝܵܪܬ̇ܘܼܬܹܗ: ܕܠܵܐ ܢܸܬ̇ ܛܥܸܐ ܕܘܼܟ̣ܪܵܬܹܗ ܕܡܝܼܬ̣ܵܐ ܡ̣ܢ ܒܲܝܢܵܬ̣ ܐܲܚܵܘ̈ܗܝ ܘܡ̣ܢ ܫܲܪܒ̇ܬܹܗ: ܐܲܢ̄ܬ̇ܘܿܢ ܣܵܗܕܝܼܢ ܝܵܘܡܵܐ. [11]ܘܲܥܢܵܘ ܣܵܒܹ̈ܐ ܘܟ̣ܠܹܗ ܥܲܡܵܐ ܕܲܒ̣ܬܲܪܥܵܐ ܕܲܩܪܝܼܬ̣ܵܐ ܘܐܵܡܪܝܼܢ: ܣܵܗܕܲܝܼܢ ܚ̄ܢܲܢ. ܘܒܲܪܟ̣ܘܼܗܝ: ܘܐܸܡܲܪܘ ܠܹܗ: ܢܸܥܒܸ̇ܕܼ ܡܵܪܝܵܐ ܐܲܢ̄ܬ̇ܬ̣ܵܐ ܗܵܕܹܐ ܩܕܼܵܡܲܝܟ: ܐܲܝܟ ܪܵܚܹܝܠ ܘܐܲܝܟ ܠܲܝܵܐ: ܗܵܠܹܝܢ ܕܗܸܢܹܝܢ ܬܲܪ̈ܬܲܝܗܹܝܢ ܒ̈ܢܲܝ ܒܲܝܬܵܐ ܠܝܼܣܪܵܝܹܠ: ܘܲܥܒܲܕܼ ܚܲܝ̈ܠܹܐ ܒܐܵܦܲܪܬ̣ܵܐ: ܘܲܩܪ̈ܲܝ ܫܡܵܗ̇ ܒܹܝܬ̣ ܠܚܸܡ. [12]ܘܢܸܗܘܸܐ ܒܲܝܬܵܟ ܐܲܝܟ ܒܲܝܬܹܗ ܕܦܲܪܨ: ܗܵܘ̇ ܕܝܼܠܕܼ̇ܬ̤ ܬܵܡܵܪ ܠܲܝܗܘܼܕܼܵܐ. ܘܢܸܬܸ̇ܠ ܠܵܟ ܡܵܪܝܵܐ ܙܲܪܥܵܬ ܡ̣ܢ ܐܲܢ̄ܬ̇ܬ̣ܵܐ ܗܵܕܹܐ. [13]ܘܬܲܣܒܵܗ̇ ܒܵܥܵܙ ܠܲܪܥܘܿܬ̣ ܘܲܗܘ̤ܵܬ̣ ܠܹܗ ܐܲܢܬ̇ܬ̣ܵܐ: ܘܥܲܠ ܠܘܵܬ̣ܵܗ̇. ܘܝܲܗ̄ܒ̣ ܠܵܗ̇ ܡܵܪܝܵܐ ܘܒܸܛܢܲܬ̤ ܘܝܸܠܕܲܬ̤ ܒܪܵܐ. [14]ܘܐܵܡܪ̈ܢ ܢܸܫܹ̈ܐ ܠܢܲܥܡܝܼ: ܒܪܝܼܟ ܗ̄ܘ̣ ܡܵܪܝܵܐ ܕܠܵܐ ܐܲܥܢܸܕܼ ܠܹܟ̣ܝ ܬܵܒ̣ܘܿܥܵܐ ܝܵܘܡܵܢܵܐ: ܘܬܸܩܪܹܝܢ ܫܡܹܗ ܒܝܼܣܪܵܝܹܠ. [15]ܘܬܸܗܘܸܐ ܡܒܲܝܐܵܢܵܐ ܠܢܲܦ̮ܫܹܟ̣ܝ: ܘܲܡܬܲܪܣܝܵܢܵܐ ܠܲܡܕܼܝܼܢ̄ܬܹܟ̣ܝ. ܡܸܛܠ ܕܟܲܠܬܹܟ̣ܝ ܕܐܲܚܸܒ̣ܬܹܟ̣ܝ ܝܼܠܸܕܼܬܹܗ: ܗܵܝ̇ ܕܛܸܐܒܲܬ̤ ܒܥܲܝܢܲܝ̈ܟ̇ܝ ܝܲܬ̇ܝܼܪ ܡ̣ܢ ܫܲܒ̣ܥܵܐ ܒܢ̈ܝܼܢ. [16]ܘܲܫܩܲܠܬܹܗ ܢܲܥܡܝܼ ܠܛܲܠܝܵܐ ܘܣܵܡܬܹܗ ܒܚܲܢܵܗ̇: ܘܲܗܘ̤ܵܬ̣ ܠܹܗ ܡܪܲܒ̇ܝܵܢܝܼܬ̣ܵܐ. [17]ܘܐܸܡܲܪ ܫ̈ܒ̣ܵܒ̣ܵܗ̇ ܐܸܬ̣̱ܝܼܠܕܼ ܒܪܵܐ ܠܢܲܥܡܝܼ: ܘܲܩܪܲܝ ܫܡܹܗ ܥܘܿܒ̣ܝܼܕܼ: ܗܘ̤ܝܘܼ ܐܲܒ̣ܘܼܗܝ ܕܐܝܼܫܲܝ ܐܲܒ̣ܘܼܗܝ ܕܕܼܵܘܝܼܕܼ. [18]ܘܗܵܠܹܝܢ ܬܵܘ̈ܠ̱ܕܼܵܬܹܗ ܕܦܲܪܨ: ܦܲܪܨ ܐܵܘܠܸܕܼ ܠܚܸܨܪܘܿܢ. [19]ܚܸܨܪܘܿܢ ܐܵܘܠܸܕܼ ܠܐܵܪܵܡ: ܐܵܪܵܡ ܐܵܘܠܸܕܼ ܠܥܲܡܝܼܢܵܕܼܵܒ̣. [20]ܥܲܡܝܼܢܵܕܼܵܒ̣ ܐܵܘܠܸܕܼ ܠܢܸܚܫܘܿܢ: ܢܸܚܫܘܿܢ ܐܵܘܠܸܕܼ ܠܫܸܠܵܐ. [21]ܘܫܸܠܵܐ ܘܵܘܠܸܕܼ ܠܒ̣ܵܥܵܙ: ܙܒ̣ܵܥܵܙ ܐܵܘܠܸܕܼ ܠܥܘܿܒ̣ܝܼܕܼ. [22]ܘܥܘܿܒ̣ܝܼܕܼ ܐܵܘܠܸܕܼ ܠܐܝܼܫܲܝ: ܘܐܝܼܫܲܝ ܐܵܘܠܸܕܼ ܠܕܼܵܘܝܼܕܼ ܡܲܠܟܵܐ.
 
Top