➖ »
«
➖ ➕
Peshitta OT
PesOT
The Acts of Thomas
ActThom
←
Zechariah
Zec
13
→
[1]ܒܹܗ ܒܝܵܘܡܵܐ ܗܵܘܿ: ܢܸܗܘܹܐ ܡܲܒ̇ܘܼܥܵܐ ܕܡܸܬ̣ܦܬܲܚ ܠܲܕ݂ܒܹܝܬ̣ ܕܵܘܝܼܕ݂: ܘܲܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܠܲܪܣܵܣܵܐ ܘܲܠܬܲܕ݂ܟ̇ܝܼܬ̣ܵܐ. [No book]
[2]ܒܹܗ ܒܝܵܘܡܵܐ ܗܵܘܿ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܵܘܒܸ̇ܕ݂ ܫܡܵܐ ܕܲܦܬܲܟ݂ܪܹ̈ܐ ܡ̣ܢ ܐܲܪܥܵܐ: ܘܬܘܼܒ̣ ܠܵܐ ܢܸܬ̇ܕܲܟ݂ܪܘܼܢ: ܘܐܲܥܒܲܪ ܡ̣ܢ ܐܲܪܥܵܐ ܢܒ̣ܝܹ̈ܐ ܕܲܓܵܠܹ̈ܐ ܘܪ̈ܘܼܚܹܐ ܛܲܢ̈ܦܵܬ̣ܵܐ. [No book]
[3]ܘܐܸܢ ܬܘܼܒ̣ ܢܸܬ̣ܢܲܒܸ̇ܐ ܓܲܒ̣ܪܵܐ: ܢܹܐܡܪܘܼܢ ܠܹܗ ܐܲܒ̣ܘܼܗܝ ܘܐܸܡܹܗ ܠܵܐ ܬܸܚܸܐ: ܡܸܛܠ ܕܕܲܓܵܠܘܼܬ̣ܵܐ ܡܲܠܸܠ̣ܬ̇ ܒܲܫܡܹܗ ܕܡܵܪܝܵܐ: ܘܢܹܐܣܪܘܼܢܹܗ ܐܲܒ̣ܘܼܗܝ ܘܐܸܡܹܗ ܕܝܲܠܕ̇ܘܼܗܝ ܡܵܐ ܕܐܸܬ̣ܢܲܒ̇ܝܼ. [No book]
[4]ܒܹܗ ܒܝܵܘܡܵܐ ܗܵܘܿ: ܢܸܒ̣ܗ̱ܬ̣ܘܼܢ ܢܒ̣ܝܹ̈ܐ ܕܲܓܵܠܹ̈ܐ ܐ̄ܢܵܫ ܡ̣ܢ ܚܸܙܘܵܐ ܕܲܢܒ̣ܝܼܘܼܬܹܗ: ܘܠܵܐ ܢܸܬ̣ܟܲܒ̣ܢܘܼܢ ܡܸܫܟܹ̇ܐ ܕܣܲܥܪܵܐ ܡܸܛܠ ܕܟܲܕܸ̇ܒ̣ܘ. [No book]
[5]ܘܢܹܐܡܲܪ ܠܵܐ ܗܘܹ̇ܝܬ̣ ܢܒ̣ܝܼܵܐ: ܐܸܠܵܐ ܓܲܒ̣ܪܵܐ ܐ̄ܢܵܐ ܕܦܵܠܲܚ ܒܐܲܪܥܵܐ: ܘܒܲܪܢܵܫܵܐ ܐܲܛܢܲܢܝ ܡ̣ܢ ܛܲܠܝܘܼܬ̣ܝ. [No book]
[6]ܘܢܹܐܡܪܘܼܢ ܠܹܗ: ܡܵܢܵܐ ܐܸܢܹܝܢ ܗܵܠܹܝܢ ܡܲܚ̈ܘܵܬ̣ܵܐ ܕܒ̣ܐܝܼܕܲܝ̈ܟ: ܘܢܹܐܡܲܪ ܗܵܠܹܝܢ ܡܲܚ̈ܘܵܬ̣ܵܐ ܕܒܸܠ̇ܥܹܬ̣ ܒܹܝܬ̣ ܪ̈ܵܚܡܲܝ. [No book]
[7]ܣܲܝܦܵܐ ܐܸܬ̇ܬ̇ܥܝܼܪ ܥܲܠ ܪܵܥܝܵܐ ܕܝܼܠܝ: ܘܥܲܠ ܓܲܒ̣ܪܵܐ ܪܵܚܹܡ̇ܝ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܡܚܝܼ ܠܪܵܥܝܵܐ ܘܬܸܬ̣ܒܲܕܲܪ ܥܵܢܹ̈ܗ: ܘܐܲܗܦܸܟ݂ ܐܝܼܕ݂ܝ ܥܲܠ ܥܲܠܠܵܢܹ̈ܐ. [No book]
[8]ܘܢܸܗܘܹܐ ܒܟ݂ܠܵܗ̇ ܐܲܪܥܵܐ ܐܵܡܲܪ ܡܵܪܝܵܐ: ܘܬܲܪܬܹ̇ܝܢ ܡ̈ܢܵܘܵܢ ܕܒ̣ܵܗ̇ ܢܣܘܼܦܘܼܢ: ܘܢܹܐܒ̣ܕ̇ܘܼܢ: ܘܬ̣ܘܼܠܬ̣ܵܐ ܢܸܫܬ̇ܚܲܪ ܒܵܗ̇. [No book]
[9]ܘܐܲܥܠܝܼܘܗܝ ܠܬ̣ܘܼܠܬ̣ܵܐ ܕܢܸܫܬ̇ܚܲܪ ܒܢܘܼܪܵܐ: ܘܐܸܨܪܘܿܦ ܐܸܢܘܿܢ ܐܲܝܟ݂ ܕܨܵܪܦܝܼܢ ܠܣܹܐܡܵܐ: ܘܐܸܒ̣ܚܘܿܪ ܐܸܢܘܿܢ ܐܲܝܟ݂ ܕܒ̣ܵܚܪܝܼܢ ܠܕܲܗܒ̣ܵܐ: ܗ̤ܘ ܢܸܩܪܸܐ ܒܫܹܡܝ ܘܐܸܢܵܐ ܐܸܥܢܹܝܘܗܝ: ܘܐܹܡܲܪ ܕܗܵܢܵܘ ܥܲܡܝ: ܘܗ̤ܘ ܢܹܐܡܲܪ ܡܵܪܝܵܐ ܐܲܠܵܗܝ. [No book]
 
Top