|
|
| [1]ܗܵܐ ܝܵܘܡܹܗ ܕܡܵܪܝܵܐ ܐܵܬܹ̇ܐ: ܘܬܸܬ̣ܦܲܠܲܓ̣ ܒܸܙܬܹܟ݂ܝ ܒܹܟ݂ܝ. |
[No book] |
| [2]ܘܐܸܟܲܢܸܫ ܠܟ݂ܠܗܘܿܢ ܥܲܡܡܹ̈ܐ ܠܐܘܿܪܸܫܠܸܡ ܠܲܩܪܵܒ̣ܵܐ: ܘܬܸܬ̇ܚܸܕ݂ ܡܕ݂ܝܼܢ̄ܬܵܐ: ܘܢܸܬ̣ܒܲܙܙܘܼܢ ܒܵـ̈ـܬܹ̇ܐ: ܘܢܸܫܹ̈ܐ ܢܸܨܛܲܥܪ̈ܵܢ: ܘܢܸܦܘܿܩ ܦܸܠܓܵܗ̇ ܕܲܡܕ݂ܝܼܢ̄ܬܵܐ ܒܫܸܒ̣ܝܵܐ: ܘܦܸܠܓܹ̇ܗ ܕܥܲܡܵܐ ܠܵܐ ܢܹܐܒܲܕ݂ ܡ̣ܢ ܡܕ݂ܝܼܢ̄ܬܵܐ. |
[No book] |
| [3]ܘܢܸܩܘܿܩ ܡܵܪܝܵܐ ܘܢܸܬ̣ܟܲܬܲܫ ܥܲܡ ܥܲܡܡܹ̈ܐ ܗܵܢ̇ܘܿܢ ܐܲܝܟ݂ ܝܵܘܡܵܐ ܕܐܸܬ̣ܟܲܬܲܫ ܒܝܵܘܡܵܐ ܕܲܩܪܵܒ̣ܵܐ. |
[No book] |
| [4]ܘܲܢܩܘܼ̈ܡܵܢ ܪܸ̈ܓ̣ܠܵܘܗܝ ܥܲܠ ܛܘܼܪܵܐ ܕܙܲܝ̈ܬܹ̇ܐ: ܕܠܘܼܩܒܲܠ ܐܘܿܪܸܫܠܸܡ ܒܡܲܕ݂ܢ̱ܚܵܝܵܗ̇: ܘܢܸܬ̣ܦܠܸܓ̣ ܛܘܼܪܵܐ ܕܙܲܝ̈ܬܹ̇ܐ ܦܸܠܓܹ̇ܗ ܠܡܲܕ݂ܢ̱ܚܵܐ ܘܦܸܠܓܹ̇ܗ ܠܡܲܥ̱ܪܒ̣ܵܐ: ܘܢܸܗܘܹܐ ܒܹܗ ܢܲܚܠܵܐ ܕܛܵܒ̣ ܪܲܒ̇: ܘܢܸܫܬ̇ܒܸܩ ܦܸܠܓܹ̇ܗ ܕܛܘܼܪܵܐ ܠܓܲܪܒ̇ܝܵܐ: ܘܦܸܠܓܹ̇ܗ ܠܬܲܝܡ̄ܢܵܐ. |
[No book] |
| [5]ܘܬܸܥ̱ܪܩܘܼܢ ܠܢܲܚܠܵܐ ܕܛܘܼܪܹ̈ܐ: ܡܸܛܠ ܕܢܸܡܛܸܐ ܢܲܚܠ̱ܗܘܿܢ ܕܛܘܼܪܹ̈ܐ ܠܐܘܼܠܨܵܢܵܐ: ܘܬܸܥ̱ܪܩܘܼܢ ܐܲܝܟ݂ ܕܲܥܪܲܩ̣ܬ̇ܘܿܢ ܡ̣ܢ ܩܕ݂ܵܡ ܙܵܘܥܵܐ ܕܲܗܘ̤ܵܐ ܒܝܵܘܡܵܘ̈ܗܝ ܕܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܘܢܸܥܘܿܠ ܡܵܪܝܵܐ ܐܲܠܵܗܝ ܘܟ݂ܠܗܘܿܢ ܩܲܕ̇ܝܼܫܵܘ̈ܗܝ ܥܲܡܹܗ. |
[No book] |
| [6]ܒܹܗ ܒܝܵܘܡܵܐ ܗܵܘܿ: ܠܵܐ ܢܸܗܘܹܐ ܢܘܼܗܪܵܐ: ܐܸܠܵܐ ܥܲܪܝܵܐ ܘܲܓ̣ܠܝܼܕ݂ܵܐ. |
[No book] |
| [7]ܘܢܸܗܘܹܐ ܝܵܘܡܵܐ ܚܲܕ݂: ܘܝܵܘܡܵܐ ܗܵܘܿ ܢܸܬ̣̱ܝܼܕܲܥ ܠܡܵܪܝܵܐ: ܠܵܐ ܠܸܠܝܵܐ ܘܠܵܐ ܐܝܼܡܵܡܵܐ: ܘܲܠܥܸܕܵܢ ܪܲܡܫܵܐ ܢܸܗܘܹܐ ܢܘܼܗܪܵܐ. |
[No book] |
| [8]ܒܹܗ ܒܝܵܘܡܵܐ ܗܵܘܿ: ܢܸܦܩܘܼܢ ܡܲـ̈ـܝܵܐ ܚܲܝܹ̈ܐ ܡ̣ܢ ܐܘܿܪܸܫܠܸܡ: ܦܸܠܓ̇ܗܘܿܢ ܠܝܲܡܵܐ ܡܲܕ݂ܢ̱ܚܵܝܵܐ: ܘܦܸܠܓܗܘܿܢ ܠܝܲܡܵܐ ܡܲܥ̱ܪܒ̣ܵܝܵܐ: ܩܲܝܛܵܐ ܘܣܲܬ̣ܘܵܐ. |
[No book] |
| [9]ܘܢܸܗܘܹܐ ܡܵܪܝܵܐ ܡܲܠܟܵܐ ܥܲܠ ܟܠܵܗ̇ ܐܲܪܥܵܐ ܒܝܵܘܡܵܐ ܗܵܘܿ: ܢܸܗܘܸܐ ܡܵܪܝܵܐ ܚܲܕ݂: ܘܲܫܡܹܗ ܚܲܕ݂. |
[No book] |
| [10]ܘܢܸܚܕ̇ܪܝܼܗ̇ ܠܟ݂ܠܵܗ̇ ܐܲܪܥܵܐ ܐܲܝܟ݂ ܦܩܲܥܬ̣ܵܐ: ܡ̣ܢ ܓܒܲܥ ܘܲܥܕܲܡܵܐ ܠܪܲܡܘܿܢ ܕܲܒ̣ܬܲܝܡܢܵܝܵܗ̇ ܕܐܘܿܪܸܫܠܸܡ: ܘܬܸܬ̇ܪܝܼܡ ܘܬܸܬܸ̇ܒ̣ ܒܕ݂ܘܼܟ̇ܬ̣ܵܗ̇: ܡ̣ܢ ܬܲܪܥܵܐ ܕܒܸܢܝܵܡܹܝܢ: ܘܲܥܕܲܡܵܐ ܠܐܲܬ̣ܪܵܐ ܕܬܲܪܥܵܐ ܩܲܕ݂ܡܵܝܵܐ: ܘܲܥܕܲܡܵܐ ܠܬܲܪܥܵܐ ܕܙܵܘܝܼܬ̣ܵܐ: ܘܡ̣ܢ ܡܲܓܕ̇ܠܵܐ ܕܲܚܢܵܢܵܐܹܝܠ: ܘܲܥܕܲܡܵܐ ܠܡܲܥܨܲܪܬܵܐ ܕܡܲܠܟܵܐ. |
[No book] |
| [11]ܘܢܸܬ̇ܒ̣ܘܼܢ ܒܵܗ̇: ܘܬ̣ܘܼܒ̣ ܚܸܪܡܵܐ ܠܵܐ ܢܸܗܘܹܐ: ܘܬܸܬܸ̇ܒ̣ ܐܘܿܪܸܫܠܸܡ ܒܫܸܠܝܵܐ. |
[No book] |
| [12]ܘܗܵܕܹܐ ܬܸܗܘܹܐ ܡܚܘܿܬ̣ܵܐ ܕܢܸܡܚܸܐ ܡܵܪܝܵܐ ܠܟ݂ܠܗܘܿܢ ܥܲܡܡܹ̈ܐ ܕܡܸܬ̣ܚܲܝܠܝܼܢ ܥܲܠ ܐܘܿܪܸܫܠܸܡ: ܢܸܬ̣ܡ̱ܣܸܐ ܒܸܣ̱ܪܗܘܿܢ ܟܲܕ݂ ܩܵܝ̇ܡܝܼܢ ܥܲܠ ܪܸ̈ܓ̣ܠܲܝܗܘܿܢ: ܘܥܲܝܢܲܝ̈ܗܘܿܢ ܢܸܬ̣ܡܲܣ̈ܝܵܢ ܒܕ݂ܘܼܟ̇ܝܵܬ̣ܗܹܝܢ: ܘܠܸܫܵܢܗܘܿܢ ܢܸܬ̣ܡ̱ܣܸܐ ܒܦܘܼܡܗܘܿܢ. |
[No book] |
| [13]ܒܹܗ ܒܝܵܘܡܵܐ ܗܵܘܿ: ܬܸܗܘܹܐ ܒܗܘܿܢ ܬܵܘܹܗܬ̣ܵܐ ܪܲܒ̇ܬ̣ܵܐ ܕܡܵܪܝܵܐ: ܘܢܹܐܚܕ̇ܘܼܢ ܐ̄ܢܵܫ ܠܚܲܒ̣ܪܹܗ: ܘܬܸܕ݂ܒܲܩ ܐܝܼܕܹܗ ܒܐܝܼܕ݂ܵܐ ܕܚܲܒ̣ܪܹܗ. |
[No book] |
| [14]ܘܐܵܦ ܝܑܼܗܘܼܕ݂ܵܐ ܢܸܬ̣ܟܲܬܲܫ ܒܐܘܿܪܸܫܠܸܡ: ܘܲܢܟܲܢܸܫ ܩܸܢܝܵܢܵܐ ܕܟ݂ܠܗܘܿܢ ܥܲܡܡܹ̈ܐ ܕܲܚܕ̇ܝܼܪܝܼܢ ܠܵܗ̇: ܕܲܗܒ̣ܵܐ ܘܣܹܐܡܵܐ ܘܢܲܚ̈ܬܹ̇ܐ ܕܛܵܒ̣ ܣܲܓ̇ܝܼܐܝܼܢ. |
[No book] |
| [15]ܘܗܵܟܲܢܵܐ ܬܸܗܘܹܐ ܡܚܘܿܬ̣ܵܐ ܕܣܘܼܣܝܵܐ ܘܲܕ݂ܟ݂ܘܿܕܲܢܝܵܐ: ܘܲܕ݂ܓܲܡܠܵܐ ܘܕܲܚܡܵܪܵܐ: ܘܲܕ݂ܟ݂ܠܵܗ̇ ܒܥܝܼܪܵܐ ܕܬܸܗܘܹܐ ܒܡܲܫ̱ܪ̈ܝܵܬ̣ܵܐ ܗܵܠܹܝܢ: ܐܲܝܟ݂ ܡܚܘܿܬ̣ܵܐ ܗܵܕܹܐ. |
[No book] |
| [16]ܘܢܸܗܘܹܐ ܟܠ ܕܡܸܫܬ̇ܚܲܪ ܡ̣ܢ ܟܠܗܘܿܢ ܥܲܡܡܹ̈ܐ ܕܐܵܬܹ̇ܝܢ ܥܲܠ ܐܘܿܪܸܫܠܸܡ: ܢܸܣܩܘܼܢ ܡ̣ܢ ܫܢܵܐ ܠܲܫܢܵܐ: ܠܡܸܣܓܸ̇ܕ݂ ܠܡܲܠܟܵܐ ܡܵܪܝܵܐ ܚܲܝܠܬ̣ܵܢܵܐ: ܘܲܠܡܸܥܒܲܕ݂ ܥܲܕ݂ܥܹܕ݂ܵܐ ܕܲܡܛܲܠ̈ܠܹܐ. |
[No book] |
| [17]ܘܢܸܗܘܸܐ ܡܲܢ ܕܠܵܐ ܢܸܣܲܒ̣ ܡ̣ܢ ܟܠܗܹܝܢ ܫܲܪ̈ܒ̣ܵܬ̣ܵܐ ܕܐܲܪܥܵܐ ܠܐܘܿܪܸܫܠܸܡ: ܠܡܸܣܓܲܕ݂ ܠܡܲܠܟܵܐ ܡܵܪܝܵܐ ܚܲܝܠܬ̣ܵܢܵܐ: ܠܵܐ ܢܸܚܘܿܬ̣ ܥܠܲܝܗܘܿܢ ܡܸܛܪܵܐ. |
[No book] |
| [18]ܘܐܸܢ ܫܲܪܒ̇ܬ̣ܵܐ ܕܡܸܨܪܹܝܢ ܠܵܐ ܬܣܲܩ ܘܠܵܐ ܬܹܐܬܹܐ: ܘܐܵܦ ܥܠܲܝܗܘܿܢ ܬܸܗܘܹܐ ܡܚܘܿܬ̣ܵܐ ܕܢܸܡܚܸܐ ܡܵܪܝܵܐ ܠܥܲܡܡܹ̈ܐ: ܐܲܝܠܹܝܢ ܕܠܵܐ ܣܵܠܩܝܼܢ ܠܡܸܥܒܲܕ݂ ܥܲܕ݂ܥܹܕ݂ܵܐ ܕܲܡܛܲܠܵܠܹ̈ܐ. |
[No book] |
| [19]ܘܗܵܕܹܐ ܬܸܗܘܹܐ ܚܛܝܼܬ̣ܵܗ̇ ܕܡܸܨܪܹܝܢ: ܘܲܚܛܝܼܬ̣ܵܐ ܕܟ݂ܠܗܘܿܢ ܥܲܡܡܹ̈ܐ: ܐܲܝܠܹܝܢ ܕܠܵܐ ܣܵܠ̇ܩܝܼܢ ܠܡܸܥܒܲܕ݂ ܥܲܕ݂ܥܹܕ݂ܵܐ ܕܲܡܛܲܠ̈ܠܹܐ. |
[No book] |
| [20]ܒܹܗ ܒܝܵܘܡܵܐ ܗܵܘܿ: ܢܸܗܘܸܐ ܥܲܠ ܦܓ̣ܘܼܕ̇ܬܹ̇ܗ ܕܣܘܼܣܝܵܐ ܩܘܼܕ݂ܫܵܐ ܠܡܵܪܝܵܐ: ܘܢܸܗܘܘܿܢ ܩܲܕ݂ܣܹ̈ܐ ܕܲܒ̣ܒܲܝܬܹ̇ܗ ܕܡܵܪܝܵܐ: ܐܲܝܟ݂ ܦܝܼܠܵܣܹ̈ܐ ܕܲܩܕ݂ܵܡ ܡܲܕ݂ܒ̇ܚܵܐ. |
[No book] |
| [21]ܘܢܸܗܘܹܐ ܟܠ ܩܲܕ݂ܣܵܐ ܕܒ̣ܐܘܿܪܸܫܠܸܡ ܘܒܲܝܗܘܼܕ݂ܵܐ: ܩܘܼܕ݂ܫܵܐ ܠܡܵܪܝܵܐ ܚܲܝܠܬ̣ܵܢܵܐ: ܘܢܹܐܬ̣ܘܿܢ ܟܠ ܕܲܡܕܲܒ̇ܚܝܼܢ: ܘܢܸܣܒ̣ܘܼܢ ܡܸܢܗܘܿܢ ܘܲܢܒܲܫܠܘܼܢ ܒܗܘܿܢ: ܘܠܵܐ ܢܸܗܘܹܐ ܬܘܼܒ̣ ܟܢܲܥܢܵܝܵܐ ܒܒܲܝܬܹ̇ܗ ܕܡܵܪܝܵܐ ܚܲܝܠܬ̣ܵܢܵܐ ܒܝܵܘܡܵܐ ܗܵܘܿ. |
[No book] |