[1]בלשאצר מלכא עבד לחם רב לרברבנוהי אלף ולקבל אלפא חמרא שתה [2]בלשאצר אמר בטעם חמרא להיתיה למאני דהבא וכספא די הנפק נבוכדנצר אבוהי מן היכלא די בירושלם וישתון בהון מלכא ורברבנוהי שגלתה ולחנתה [3]באדין היתיו מאני דהבא די הנפקו מן היכלא די בית אלהא די בירושלם ואשתיו בהון מלכא ורברבנוהי שגלתה ולחנתה [4]אשתיו חמרא ושבחו לאלהי דהבא וכספא נחשא פרזלא־אעא ואבנא [5]בה שעתה נפקו [Q: נפקה] אצבען די יד אנש וכתבן לקבל נברשתא על גירא די כתל היכלא די מלכא ומלכא חזה פס ידא די כתבה [6]אדין מלכא זיוהי שנוהי ורעינהי יבהלונה וקטרי חרצה משתרין וארכבתה דא לדא נקשן [7]קרא מלכא בחיל להעלה לאשפיא כשדיא [Q: כשדאי] וגזריא ענה מלכא ואמר לחכימי בבל די כל אנש די יקרה כתבה דנה ופשרה יחונני ארגונא ילבש והמנוכא [Q: והמניכא] די דהבא על צוארה ותלתי במלכותא ישלט [8]אדין עללין [Q: עלין] כל חכימי מלכא ולא כהלין כתבא למקרא ופשרא [Q: ופשרה] להודעה למלכא [9]אדין מלכא בלשאצר שגיא מתבהל וזיוהי שנין עלוהי ורברבנוהי משתבשין [10]מלכתא־לקבל מלי מלכא ורברבנוהי לבית משתיא עללת [Q: עלת] ענת מלכתא ואמרת מלכא לעלמין חיי־אל יבהלוך רעיונך וזיויך [Q: וזיוך] אל ישתנו [11]איתי גבר במלכותך די רוח אלהין קדישין בה וביומי אבוך נהירו ושכלתנו וחכמה כחכמת אלהין השתכחת בה ומלכא נבכדנצר אבוך־רב חרטמין אשפין כשדאין גזרין הקימה אבוך מלכא [12]כל קבל די רוח יתירה ומנדע ושכלתנו מפשר חלמין ואחוית אחידן ומשרא קטרין השתכחת בה בדניאל די מלכא שם שמה בלטשאצר כען דניאל יתקרי ופשרה יהחוה [13]באדין דניאל העל קדם מלכא ענה מלכא ואמר לדניאל אנתה [Q: אנת] הוא דניאל די מן בני גלותא די יהוד די היתי מלכא אבי מן יהוד [14]ושמעת עליך [Q: עלך] די רוח אלהין בך ונהירו ושכלתנו וחכמה יתירה השתכחת בך [15]וכען העלו קדמי חכימיא אשפיא די כתבה דנה יקרון ופשרה להודעתני ולא כהלין פשר מלתא להחויה [16]ואנה שמעת עליך [Q: עלך] די תוכל [Q: תכול] פשרין למפשר וקטרין למשרא כען הן תוכל [Q: תכול] כתבא למקרא ופשרה להודעותני־ארגונא תלבש והמונכא [Q: והמניכא] די דהבא על צוארך ותלתא במלכותא תשלט [17]באדין ענה דניאל ואמר קדם מלכא מתנתך לך להוין ונבזביתך לאחרן הב ברם כתבא אקרא למלכא ופשרא אהודענה [18]אנתה [Q: אנת] מלכא אלהא עליא [Q: עלאה] מלכותא ורבותא ויקרא והדרא יהב לנבכדנצר אבוך [19]ומן רבותא די יהב לה־כל עממיא אמיא ולשניא הוו זאעין [Q: זיעין] ודחלין מן קדמוהי די הוא צבא הוה קטל ודי הוה צבא הוה מחא ודי הוה צבא הוה מרים ודי הוא צבא הוא משפל [20]וכדי רם לבבה ורוחה תקפת להזדה הנחת מן כרסא מלכותה ויקרה העדיו מנה [21]ומן בני אנשא טריד ולבבה עם חיותא שוי [Q: שויו] ועם ערדיא מדרה עשבא כתורין יטעמונה ומטל שמיא גשמה יצטבע עד די ידע די שליט אלהא עליא [Q: עלאה] במלכות אנשא ולמן די יצבא יהקים עליה [Q: עלה] [22]ואנתה [Q: ואנת] ברה בלשאצר לא השפלת לבבך כל קבל די כל דנה ידעת [23]ועל מרא שמיא התרוממת ולמאניא די ביתה היתיו קדמיך [Q: קדמך] ואנתה [Q: ואנת] ורברבניך [Q: ורברבנך] שגלתך ולחנתך חמרא שתין בהון ולאלהי כספא ודהבא נחשא פרזלא אעא ואבנא די לא חזין ולא שמעין ולא ידעין שבחת ולאלהא די נשמתך בידה וכל ארחתך לה־לא הדרת [24]באדין מן קדמוהי שליח פסא די ידא וכתבא דנה רשים [25]ודנה כתבא די רשים מנא מנא תקל ופרסין [26]דנה פשר מלתא מנא־מנה אלהא מלכותך והשלמה [27]תקל־תקילת במאזניא והשתכחת חסיר [28]פרס־פריסת מלכותך ויהיבת למדי ופרס [29]באדין אמר בלשאצר והלבשו לדניאל ארגונא והמנוכא [Q: והמניכא] די דהבא על צוארה והכרזו עלוהי די להוא שליט תלתא במלכותא [30]בה בליליא קטיל בלאשצר מלכא כשדיא [Q: כשדאה] [31]‏[No verse]
Credit

Source: unbound.biola.edu
Top