➕
←
1 Chronicles
1Ch
16
→
[1]ܘܐܲܝܬ̇ܝܘܼܗ̇ ܠܩܹܒ̣ܘܿܬ̣ܵܐ ܕܡܵܪܝܵܐ: ܘܣܵܡܘܼܗ̇ ܒܕ݂ܘܼܟ̇ܬ̣ܵܗ̇: ܒܓ̣ܵܘ ܡܲܫܟ̇ܢܵܐ ܕܲܢܩܲܫ ܠܵܗ̇ ܕܵܘܝܼܕ݂. ܘܩܲܪܸܒ̣ܘ ܥܠܵـ̈ـܘܵܬ̣ܵܐ ܘܫܲܠܡܹ̈ܐ ܩܕ݂ܵܡ ܩܹܒ̣ܘܿܬ̣ܵܐ ܕܡܵܪܝܵܐ. [2]ܘܟܲܕ݂ ܫܲܠܸܡ ܕܵܘܝܼܕ݂ ܠܲܡܩܲܪܵܒ̣ܘܼ ܥܠܵـ̈ـܘܵܬ̣ܵܐ ܘܫܲܠܡܹ̈ܐ: ܒܲܪܸܟ݂ ܠܥܲܡܵܐ ܕܝܼܣܪܵܝܹܠ ܒܲܫܡܹܗ ܕܡܵܪܝܵܐ ܚܲܝܠܬ̣ܵܢܵܐ. [3]ܘܦܲܠܸܓ̣ ܠܟ݂ܠܹܗ ܥܲܡܵܐ: ܠܟ݂ܠܗܘܿܢ ܕܒܹܝܬ̣ ܝܼܣܪܵܝܹܠ: ܡ̣ܢ ܓܲܒ̣ܪܹ̈ܐ ܘܲܥܕܲܡܵܐ ܠܢܸܫܹ̈ܐ: ܘܡ̣ܢ ܓܲܕ̇ܘܼ̈ܕܹܐ ܠܝܵܢܩܲܝ̈ ܬܕܲܝܵܐ ܠܟܠ ܓܒܲܪ ܘܲܓ̣ܒܲܪ: ܓܪܝܼܨܬܵܐ ܕܠܲܚܡܵܐ ܚܕ݂ܵܐ: ܘܲܡܢܵܬ̣ܵܐ ܚܕ݂ܵܐ: ܘܲܣܢܵܪܩܵܐ ܚܕ݂ܵܐ: ܘܐܸܙܲܠܘ ܟܠܹܗ ܥܲܡܵܐ ܐ̄ܢܵܫ ܠܒܲܝܬܹ̇ܗ. [4]ܘܝܲܗ̄ܒ̣ ܩܕ݂ܵܡ ܩܹܒ̣ܘܿܬ̣ܵܐ ܕܡܵܪܝܵܐ: ܠܹܘܵܝܹ̈ܐ ܕܲܡܫܲܡܫܝܼܢ ܩܕ݂ܵܡ ܡܵܪܝܵܐ: ܘܡܲܕ݂ܟ̇ܪܝܼܢ ܘܡܵܘܕܹ̇ܝܢ: ܘܲܡܫܲܒ̇ܚܝܼܢ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. [5]ܐܵܣܵܦ ܪܹܫܗܘܿܢ: ܬܸܢܝܵܢܵܐ ܙܟܲܪܝܵܐ: ܘܝܘܿܥܹܝܠ: ܘܝܘܿܚܵܐܹܝܠ: ܘܡܲܬ̇ܝܼܬ̣ܵܐ: ܘܐܹܠܝܼܵܒ̣: ܘܲܒ̣ܢܵܝܵܐ: ܘܐܵܣܵܦ: ܘܥܲܡܝܼܢܵܕ݂ܵܒ̣: ܘܐܵܣܵܦ: ܘܢܲܚܙܵܐܹܝܠ: ܘܐܵܣܵܦ. [6]ܗܵܠܹܝܢ ܟܠܗܘܿܢ ܟܵܗ̈ܢܹܐ ܕܩܵܪܹܝܢ ܒܩܲܪ̈ܢܵܬ̣ܵܐ: ܐܲܡܝܼܢܵܐܝܼܬ̣ ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ. [7]ܗܵܝܕܹ̇ܝܢ ܦܬܲܚ ܦܘܼܡܹܗ ܕܵܘܝܼܕ݂ ܒܝܵܘܡܵܐ ܗܵܘ̇: ܗ̤ܘ ܘܪܹ̈ܫܲܝ ܟܠܗܘܿܢ ܟܵܗܢܹ̈ܐ ܘܠܹܘܵܝܹ̈ܐ ܠܲܡܫܲܒܵܚܘܼ ܠܡܵܪܝܵܐ: ܥܲܠ ܛܝܵܪܵܐ ܕܐܵܣܵܦ ܘܕܲܐܚܵܘ̈ܗܝ ܘܗܵܠܹܝܢ ܪܹ̈ܫܹܐ ܕܬܸܫ̈ܒ̇ܚܵܬ̣ܵܐ ܕܐܸܡܲܪ ܕܵܘܝܼܕ݂: ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ ܒܝܵܘܡܵܐ ܗܵܘ̇. [8]ܐܵܘܕܵܘ ܠܡܵܪܝܵܐ: ܘܲܩܪܵܘ ܫܡܹܗ. ܐܵܘܕܲܥܘ ܒܹܝܬ̣ ܥܲܡܡܹ̈ܐ ܥܒ̣ܵܕ݂ܵܘ̈ܗܝ. [9]ܫܲܒܲܚܘ ܠܹܗ:ܘܐܵܘܕܵܘ ܠܹܗ:ܐܸܫܬܲܥܵܘ ܟܠܗܹܝܢ ܓܒܲܪ̈ܘܵܬܹܗ. [10]ܐܸܫܬܲܒܲܚܘ ܒܲܫܡܵܐ ܕܩܘܼܕ݂ܫܹܗ: ܢܸܚܕܹ̇ܐ ܠܸܒܵܐ ܕܟ݂ܠ ܕܒ̣ܵܥܹܝܢ ܠܡܵܪܝܵܐ ܘܲܠܥܘܼܫܢܹܗ. [11]ܨܲܠܵܘ ܩܕ݂ܵܡܵܘܗܝ ܐܲܡܝܼܢܵܐܝܼܬ̣. [12]ܐܸܬ̇ܕܲܟ݂ܪܘ ܓܒܲܪ̈ܘܵܬܹܗ ܕܲܥܒܲܕ݂: ܓܒܲܪ̈ܘܵܬܹܗ ܘܕ݂ܝܼܢܹ̈ܐ ܕܦܘܼܡܹܗ. [13]ܙܲܪܥܹܗ ܕܐܲܒ̣ܪܵܗܵܡ ܥܲܒ̣ܕܹ̇ܗ: ܘܲܒ̣ܢܵܘܗܝ ܕܝܲܥܩܘܿܒ̣ ܓܒܲܝܵܐ ܕܲܓ̣ܒ̣ܵܐ. [14]ܗ̤ܘܝܘܼ ܡܵܪܝܵܐ ܐܲܠܵܗܲܢ: ܕܲܒ̣ܟ݂ܠܵܗ̇ ܐܲܪܥܵܐ ܢܵܡܘܿܣܵܘ̈ܗܝ. [15]ܐܸܬ̇ܕܲܟ݂ܪܘ ܠܥܵܠܲܡ ܕܝܵܬܹܩܹܐ ܕܝܼܠܹܗ: ܡܸܠܬ̣ܵܐ ܕܦܲܩܸܕ݂ ܠܐܵܠܸܦ ܕܵܪ̈ܝܼܢ. [16]ܕܝܼܡܵܐ ܠܐܲܒ̣ܪܵܗܵܡ: ܘܲܕ݂ܝܵܬ̣ܩܹܐ ܕܝܲܗ̄ܒ̣ ܠܲܒ̣ܢܵܘ̈ܗܝ ܕܐܝܼܣܚܵܩ: ܘܓܲܙܪܵܗ̇ ܠܝܲܥܩܘܿܒ̣ ܠܥܵܠܲܡ. [17]ܠܝܼܣܪܵܝܹܠ ܝܲܗ̄ܒ̣ ܠܗܘܿܢ ܕܝܵܬܹܩܹܐ ܠܥܵܠܲܡ ܥܵܠܡܝܼܢ. [18]ܘܐܸܡܲܪ ܠܗܘܿܢ: ܕܲܠܟ݂ܘܿܢ ܝܵܗܹܒ̣ ܐ̄ܢܵܐ ܠܵܗ̇ ܐܲܪܥܵܐ ܕܲܟ݂ܢܲܥ̄ܢ: ܦܸܨܬ̣ܵܐ ܕܝܵܪܬ̇ܘܼܬ̣ܟ݂ܘܿܢ. [19]ܟܲܕ݂ ܗ̤ܘܲܝܬ̇ܘܿܢ ܐ̄ܢܵܫܲܝ̈ ܡܸܢܝܵܢܵܐ: ܙܥܘܿܪ̈ܝܼܢ ܘܥܵܡܘܿܪ̈ܝܼܢ ܒܵܗ̇. [20]ܘܐܸܫܬ̇ܒ̣ܝܼܬ̇ܘܿܢ ܡ̣ܢ ܥܲܡܵܐ ܠܥܲܡܵܐ: ܘܡ̣ܢ ܡܲܠܟ̇ܘܼܬ̣ܵܐ ܠܡܲܠܟ̇ܘܼܬ̣ܵܐ ܐ̄ܚܪܹܬ̣ܵܐ. [21]ܠܵܐ ܫܒܲܩ ܠܫܲܠܝܼܛܵܢܹ̈ܐ ܕܢܵܗܪܘܼܢܵܟ݂ܘܿܢ. ܘܲܪܕܵܐ ܡܸܛܠܵܬ̣ܟ݂ܘܿܢ ܡܲܠ̈ܟܹ̇ܐ: ܘܐܸܡܲܪ ܠܗܘܿܢ. [22]ܠܵܐ ܬܸܬ̣ܩܲܪܒ̣ܘܿܢ ܠܲܡܫܝܼܚܲܝ̈: ܘܲܠܢܒ̣ܝܲܝ̈ ܠܵܐ ܬܲܒ̣ܐ̱ܫܘܼܢ. [23]ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ: ܣܲܒܲܪܘ ܟܠܝܘܿܡ ܒܝܘܿܡ ܦܘܼܪܩܵܢܹܗ. [24]ܐܸܫܬܲܥܵܘ ܒܹܝܬ̣ ܥܲܡܡܹ̈ܐ ܐܝܼܩܵܪܹܗ. [25]ܡܸܛܠ ܕܪܲܒ̇ ܗ̄ܘ̣ ܡܵܪܝܵܐ ܘܲܫܒ̣ܝܼܚ ܛܵܒ̣: ܘܲܕ݂ܚܝܼܠ ܗ̄ܘ̣ ܥܲܠ ܟܠܗܘܿܢ ܡܲܠ̈ܟܹ̇ܐ. [26]ܡܸܛܠ ܕܟ݂ܠܗܘܿܢ ܦܬܲܟ݂ܪܹ̈ܐ ܕܥܲܡܡܹ̈ܐ ܨܲܠܡܹ̈ܐ ܐܸܢܘܿܢ: ܘܡܵܪܝܵܐ ܫܡܲܝܵܐ ܥܒܲܕ݂. [27]ܬܸܫܒ̇ܘܿܚܬܵܐ ܘܝܵܐܝܘܼܬ̣ܵܐ ܩܕ݂ܵܡܵܘܗܝ. ܥܘܼܫܢܵܐ ܘܪܲܒ̇ܘܼܬ̣ܵܐ ܒܡܲܩܕ̇ܫܹܗ. [28]ܐܵܘܕܵܘ ܠܡܵܪܝܵܐ ܫܲܪ̈ܒ̣ܵܬ̣ܵܐ ܕܥܲܡܡܹ̈ܐ. ܐܵܘܕܵܘ ܩܕ݂ܵܡ ܡܵܪܝܵܐ ܒܐܝܼܩܵܪܹܗ ܘܲܒ̣ܥܘܼܫܢܹܗ. [29]ܐܵܘܕܵܘ ܠܡܵܪܝܵܐ ܒܐܝܼܩܵܪܵܐ ܕܲܫܡܹܗ. ܫܩܘܿܠܘ ܩܘܼܪ̈ܒܵܢܹܐ: ܘܐܵܘܕܵܘ ܩܕ݂ܵܡܵܘܗܝ ܒܲܨܠܘܿܬ̣ܵܐ ܕܦܘܼܡܟ݂ܘܿܢ ܘܲܣܓܘܿܕ݂ ܠܡܵܪܝܵܐ ܒܬܸܫܒ̇ܚܵܬ̣ܵܐ ܕܩܘܼܕ݂ܫܵܐ. [30]ܬܙܘܼܥ ܡ̣ܢ ܩܕ݂ܵܡܵܘܗܝ ܟܠܵܗ̇ ܐܲܪܥܵܐ: ܘܬܸܬ̣ܩܲܢ ܬܹܒܹܝܠ ܕܠܵܐ ܬܙܘܼܥ. [31]ܢܸܚܕ̇ܘܼܢ ܫܡܲܝܵܐ: ܘܲܬ̣ܫܲܒܲܚ ܐܲܪܥܵܐ. ܘܢܹܐܡܪܘܿܢ ܒܹܝܬ̣ ܥܲܡܡܹ̈ܐ: ܡܵܪܝܵܐ ܐܲܡ̣ܠܸܟ݂. [32]ܢܫܲܒܲܚ ܝܲܡܵܐ ܒܲܡܠܐܹܗ ܘܢܸܚ̈ܕ̇ܝܵܢ ܚܲܩ̈ܠܵܬ̣ܵܐ ܘܟ݂ܠ ܕܐܝܼܬ̣ ܒܗܹܝܢ. [33]ܗܵܝܕܹ̇ܝܢ ܢܫܲܒ̇ܚܘܼܢ ܐܝܼܠܵܢܹ̈ܐ ܕܥܵܒ̣ܵܐ: ܡ̣ܢ ܩܕ݂ܵܡ ܡܵܪܝܵܐ ܕܐܵܬܹܐ ܠܲܡܕ݂ܵܢܵܗ̇ ܠܐܲܪܥܵܐ. ܢܕ݂ܘܼܢ ܬܹܒܹܝܠ ܒܟܹܐܢܘܼܬ̣ܵܐ: ܘܢܲܟܸ̇ܣ ܠܥܲܡܡܹ̈ܐ ܒܗܲܝܡܵܢܘܼܬ̣ܵܐ. [34]ܘܐܸܡܲܪ: ܐܵܘܕܵܘ ܠܡܵܪܝܵܐ ܕܛܵܒ̣ ܗ̄ܘ̣: ܘܲܠܥܵܠܲܡ ܛܲܝܒ̇ܘܼܬܹܗ. [35]ܦܪܘܿܩܲܝܢ ܡܵܪܝܵܐ: ܦܪܘܿܩܲܝܢ ܘܟܲܢܸܫܲܝܢ: ܘܩܲܪܸܒܲܝܢ ܡ̣ܢ ܒܹܝܬ̣ ܥܲܡܡܹ̈ܐ: ܠܡܵܘܕܵܝܘܼ ܠܲܫܡܵܐ ܕܩܘܼܕ݂ܫܵܟ݂: ܘܠܲܡܫܲܒܵܚܘܼ ܬܸܫܒ̇ܚܵܬ̣ܵܟ݂. [36]ܒܪܝܼܟ݂ ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܡ̣ܢ ܥܵܠܡܹ̈ܐ ܘܲܥܕܲܡܵܐ ܠܥܵܠܡܹ̈ܐ. ܘܢܹܐܡܲܪ ܟܠܹܗ ܥܲܡܵܐ ܐܵܡܹܝܢ. ܒܦܘܼܡܵܐ ܒܲܣܝܼܡܵܐ ܘܕܲܟ݂ܝܵܐ: ܢܫܲܒ̇ܚܘܼܢ ܠܐܲܠܵܗܗܘܿܢ. [37]ܘܲܫܒܲܩ ܬܲܡܵܢ ܩܕ݂ܵܡ ܩܹܒ̣ܘܿܬ̣ܵܐ ܕܲܕ݂ܝܵܬܹܩܵܐ ܕܡܵܪܝܵܐ: ܠܐܵܣܵܦ ܘܠܲܐܚܵܘ̈ܗܝ: ܠܲܡܫܲܡܵܫܘܼ ܩܕ݂ܵܡ ܡܵܪܝܵܐ ܐܲܡܝܼܢܵܐܝܼܬ̣: ܐ̄ܢܵܫ ܐ̄ܢܵܫ ܒܝܵܘܡܹܗ. [38]ܘܥܘܼܒ̣ܵܪ ܐܲܕ݂ܘܿܡ ܘܐܲܚܵܘ̈ܗܝ ܫܬ̇ܝܼܢ ܘܲܬ̣ܡܵܢܝܵܐ ܘܥܘܼܒ̣ܵܪ ܐܲܕ݂ܘܿܡ ܙܥܘܿܪܵܐ ܒܪܹܗ ܕܝܘܿܬ̣ܵܡ: ܘܚܵܣܘܼ ܗܵܠܹܝܢ ܟܠܗܘܿܢ ܢܵܛܪ̈ܲܝ ܬܲܪ̈ܥܹܐ ܒܲܪ̈ܵܝܹܐ. [39]ܘܨܵܕ݂ܘܿܩ ܟܵܗܢܵܐ: ܘܐܲܚܵܘ̈ܗܝ ܟܵܗܢܹ̈ܐ: ܗܵܠܹܝܢ ܟܠܗܘܿܢ ܟܵܗܢܹ̈ܐ ܕܲܡܫܲܡܫܝܼܢ ܩܕ݂ܵܡ ܡܲܫܟ̇ܢܹܗ ܕܡܵܪܝܵܐ: ܒܒ̣ܘܼܣܵܡܵܐ ܪܲܒܵܐ ܒܩܘܼܪܝܲܬ̣ ܓܸܒ̣ܥܘܿܢ. [40]ܠܲܡܩܲܪܵܒ̣ܘܼ ܥܠܵܘܵܬ̣ܵܐ ܠܡܵܪܝܵܐ ܥܲܠ ܡܲܕ݂ܒ̇ܚܵܐ ܕܲܥܠܵܬ̣ܵܐ: ܐܲܡܝܼܢܵܐܝܼܬ̣ ܒܨܲܦܪܵܐ ܘܲܒ̣ܪܲܡܫܵܐ: ܘܲܠܡܸܥܒܲܕ݂ ܟܠ ܡܵܐ ܕܲܟ݂ܬ̣ܝܼܒ̣ ܒܢܵܡܘܿܣܵܐ ܕܡܵܪܝܵܐ: ܕܝܲܗ̄ܒ̣ ܥܲܠ ܐܝܼܕ݂ܵܐ ܕܡܘܼܫܹܐ: ܠܡܲܠܵܦܘܼ ܠܲܒ̣ܢܲܝ̈ ܝܼܣܪܵܝܹܠ. [41]ܘܗܵܠܹܝܢ ܫܡܵܗܹ̈ܐ ܕܓܲܒ̣ܪܹ̈ܐ ܕܩܵܝ̇ܡܝܼܢ ܒܬܸܫ̈ܒ̇ܚܵܬ̣ܵܐ: ܗܵܡܵܢ ܘܐܵܪܝܼܬ̣ܘܼܢ: ܘܫܲܪܟܵܐ ܕܐ̄ܢܵܫܵܐ ܙܲܕ̇ܝܼܩܹ̈ܐ ܐܲܝܠܹܝܢ ܕܐܸܬ̣ܟܲܣܝܼܘ ܫܡܵܗܲܝ̈ܗܘܿܢ: ܠܡܵܘܕܵܝܘܼ ܠܡܵܪܝܵܐ ܡܸܛܠ ܕܲܠܥܵܠܲܡ ܛܲܝܒ̇ܘܼܬܹܗ. [42]ܘܗܸܢܘܿܢ ܗܵܠܹܝܢ ܐ̄ܢܵܫܵܐ ܙܲܕ̇ܝܼܩܹ̈ܐ ܡܫܲܒ̇ܚܝܼܢ ܗ̄ܘ̣ܵܘ: ܠܵܐ ܗ̄ܘ̣ܵܐ ܒܡܵܐܢܲܝ̈ ܬܸܫ̈ܒ̇ܚܵܬ̣ܵܐ: ܘܠܵܐ ܒܲܦ̈ܠܲܓܹܐ: ܘܠܵܐ ܒܲܪ̈ܒ̣ܝܼܥܹܐ: ܘܠܵܐ ܒܩܲܪ̈ܢܵܬ̣ܵܐ ܟܦܝܼ̈ܦܵܬ̣ܵܐ: ܘܐܵܦܠܵܐ ܒܲܦܫܝܼ̈ܛܵܬ̣ܵܐ: ܘܐܵܦܠܵܐ ܒܨܸܨ̈ܠܹܐ ܡܫܲܒ̇ܚܝܼܢ ܗ̄ܘ̣ܵܘ: ܐܸܠܵܐ ܒܦܘܼܡܵܐ ܒܲܣܝܼܡܵܐ: ܘܒܲܨܠܘܿܬ̣ܵܐ ܕܟ݂ܝܼܬ̣ܵܐ ܘܲܡܫܲܡܠܲܝܬܵܐ: ܘܲܒ̣ܟܹܐܢܘܼܬ̣ܵܐ ܘܲܒ̣ܬܲܡܝܼܡܘܼܬ̣ܵܐ: ܠܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܡܵܪܹܗ ܕܝܼܣܪܵܝܹܠ: ܡܵܪܵܐ ܕܟ݂ܠܗܘܿܢ ܥܒ̣ܵܕܹ̈ܐ. [43]ܘܲܫ̣ܪܵܐ ܕܵܘܝܼܕ݂ ܠܥܲܡܵܐ. ܘܐܸܙܲܠܘ ܥܲܡܵܐ ܐ̄ܢܵܫ ܐ̄ܢܵܫ ܠܒܲܝܬܹ̇ܗ ܘܲܗܦܲܟ݂ ܕܵܘܝܼܕ݂ ܠܒܲܝܬܹ̇ܗ ܠܲܡܒܲܪܵܟ݂ܘܼ ܠܲܒ̣ܢܲܝ̈ ܒܲܝܬܹ̇ܗ.
 
Top