➕
←
1 Chronicles
1Ch
23
→
[1]ܘܕ݂ܵܘܝܼܕ݂ ܩܲܫ̣ ܘܲܣܒܲܥ ܒܝܵܘ̈ܡܵܬܹܗ. ܘܐܲܩܝܼܡ ܠܲܫܠܹܝܡܘܿܢ ܒܪܹܗ ܒܡܲܠܟ̇ܘܼܬ̣ܵܐ ܥܲܠ ܝܼܣܪܵܝܹܠ. [2]ܘܟܲܢܸܫ ܟܠܗܘܿܢ ܩܲܫܝܼ̈ܫܹܐ ܕܟ݂ܵܗܢܹ̈ܐ ܘܲܕ݂ܠܹܘܵܝܹ̈ܐ. [3]ܘܐܸܬ̣ܡ̱ܢܝܼܘ ܠܹܘܵܝܹ̈ܐ ܡ̣̤ ܒܲܪ ܬܠܵܬ̣ܝܼܢ ܫܢ̈ܝܼܢ ܘܲܠܥܸܠ. ܘܲܗܘ̤ܵܐ ܡܸܢܝܵܢܵܐ ܕܓܲܒ̣ܪܹ̈ܐ ܠܪܸܫ ܐ̄ܢܵܫ: ܬܠܵܬ̣ܝܼܢ ܘܲܬ̣ܡܵܢܝܵܐ ܐܲܠܦ̈ܝܼܢ. [4]ܘܐܲܩܝܼܡ ܡܸܢܗܘܿܢ ܕܵܘܝܼܕ݂ ܫܲܠܝܼܛܵܢܹ̈ܐ ܥܲܠ ܥܒ̣ܝܼ̈ܕ݂ܵܬ̣ܵܐ ܕܒܲܝܬܹ̇ܗ ܕܡܵܪܝܵܐ: ܥܸܣܪܝܼܢ ܘܐܲܪܒ̇ܥܵܐ ܓܲܒ̣ܪ̈ܝܼܢ ܥܲܠ ܐܵܠܹܦ: ܘܕܲܝܵܢܹ̈ܐ ܘܣܵܦܪܹ̈ܐ: ܫܬܵܐ ܫܬܵܐ ܥܲܠ ܡܲܐܬ̣ܵܐ. [5]ܕܢܸܗܘܘܿܢ ܚܵܙܹ̇ܝܢ ܒܸܢܝܵܢܵܐ: ܘܩܵܝ̇ܡܝܼܢ ܘܪܵܗ̇ܛܝܼܢ ܒܚܲܝܠܗܘܿܢ: ܘܲܒ̣ܡܲܪ̈ܗܵܛܲܝܗܘܿܢ: ܘܒܲܥܒ̣ܝܼ̈ܕ݂ܵܬ̣ܗܘܿܢ: ܘܲܒ̣ܚܘܼܫܒܵܢܲܝ̈ܗܘܿܢ: ܘܲܒ̣ܢܸܟ݂ܣܲܝ̈ܗܘܿܢ: ܘܲܒ̣ܙܸܕ݂ܩܵـ̈ـܬ̣ܵܐ. ܕܢܸܗܘܘܿܢ ܡܦܲܪܢܣܝܼܢ ܡܸܣܟܹ̇ܢܹ̈ܐ ܘܐܲܩܝܼܡ ܕܵܘܝܼܕ݂ ܥܲܠ ܡܸܣܟܹ̇ܢܹ̈ܐ ܘܥܲܠ ܒܵܝܫܹ̈ܐ: ܡܦܲܪ̈ܢܣܵܢܹܐ: ܘܩܲܝܘܼܡܹ̈ܐ: ܕܢܸܗܘܘܿܢ ܙܵܝܢܝܼܢ ܘܲܡܦܲܪܢܣܝܼܢ ܡܸܣܟܹ̇ܢܹ̈ܐ: ܚܲܕ݂ ܥܲܠ ܥܸܣܪܵܐ: ܘܡܸܕܸ̇ܡ ܠܵܐ ܡܲܚ̄ܣܪܝܼܢ ܠܗܘܿܢ. [6]ܘܐܲܩܝܼܡ ܐܸܢܘܿܢ ܕܵܘܝܼܕ݂ ܠܟ݂ܠܗܘܿܢ ܒܫܘܼܠܛܵܢܲܝ̈ܗܘܿܢ: ܠܲܒ̣ܢܵܘ̈ܗܝ ܕܠܹܘܝܼ: ܓܸܪܫܘܿܢ: ܩܵܗܵܬ̣: ܘܲܡܪܵܪܝܼ. [7]ܠܓܸܪܫܘܿܢ: ܠܲܥܕܵܢ: ܘܫܲܡܥܝܼ. [8]ܘܲܒ̣ܢܵܘ̈ܗܝ ܕܠܲܥܕܵܢ: ܩܲܫܝܼܫܹܗ ܢܲܚܠܵܐܝܹܠ: ܘܝܘܿܬ̣ܵܡ: ܘܝܘܿܐܹܝܠ. ܬܠܵܬ̣ܵܐ. [9]ܒܢܵܘ̈ܗܝ ܕܲܫܡܲܥܝܵܐ: ܣܲܠܡܘܿܬ̣: ܘܲܚܙܵܐܹܝܠ: ܘܐܵܪܵܢ. ܬܠܵܬ̣ܵܐ ܗܵܠܹܝܢ ܪܹ̈ܫܲܝ ܐܲܒ̣ܵـ̈ـܗܵܬ̣ܵܐ ܕܫܲܡܥܝܼ. [10]ܒܢܵܘ̈ܗܝ ܕܫܲܡܥܝܼ: ܢܵܚܵܬ̣: ܙܲܒ̣ܕܵܐ: ܝܲܥܘܿܫ: ܒܪܝܼܥܐ. ܗܵܠܹܝܢ ܒܢܵܘ̈ܗܝ ܕܫܲܡܥܝܼ ܐܲܪܒ̇ܥܵܐ. [11]ܘܲܗܘ̤ܵܐ ܢܵܚܵܬ̣ ܩܲܫܝܼܫܹܗ: ܘܙܲܒ̣ܕܵܐ ܬܸܢܝܵܢܵܐ: ܘܝܲܥܘܿܫ ܘܲܒ̣ܪܝܼܥܵܐ. ܘܲܒ̣ܪܝܼܥܵܐ ܠܵܐ ܐܲܣܓܝܼ ܠܹܗ ܒܢܲـ̈ـܝܵܐ. ܘܲܗܘ̤ܵܐ ܠܒܹܝܬ̣ ܐܲܒ̣ܘܼܗܘܿܢ ܫܲܪܒ̇ܬ̣ܵܐ ܚܕ݂ܵܐ. [12]ܒܢܵܘ̈ܗܝ ܕܩܵܗܵܬ̣: ܥܲܡܪܲܡ: ܘܝܲܨܗܵܪ: ܘܚܸܒ̣ܪܘܿܢ: ܘܥܘܼܙܹܝܠ: ܐܲܪܒ̇ܥܵܐ. [13]ܒܢܵܘ̈ܗܝ ܕܥܲܡܪܲܡ: ܐܲܗܪܘܿܢ: ܘܡܘܼܫܹܐ. ܘܐܸܬ̣ܓ̇ܒ̣ܝܼ ܐܲܗܪܘܿܢ ܠܲܡܫܲܡܵܫܘܼ ܒܲܩܕ݂ܘܿܫ ܩܘܼܕ݂ܫܹ̈ܐ: ܗ̤ܘ ܘܲܒ̣ܢܵܘ̈ܗܝ ܥܕܲܡܵܐ ܠܥܵܠܲܡ: ܠܲܡܩܲܪܵܒ̣ܘܼ ܩܕ݂ܵܡ ܡܵܪܝܵܐ ܩܲܛܪ̈ܘܼܩܹܐ ܕܒܸܣܡܹ̈ܐ: ܠܲܡܫܲܡܵܫܘܼܬܹܗ ܘܠܲܡܒܲܪܵܟ݂ܘܼ ܒܲܫܡܹܗ ܥܕܲܡܵܐ ܠܥܵܠܲܡ. [14]ܘܡܘܼܫܹܐ ܢܒ̣ܝܼܵܐ ܕܡܵܪܝܵܐ: ܐܸܬ̣ܩܪܝܼ ܫܲܒ̣ܛܵܐ ܕܒܹܝܬ̣ ܠܹܘܝܼ. [15]ܒܢܵܘ̈ܗܝ ܕܡܘܼܫܹܐ ܓܸܪܫܘܿܢ: ܘܐܹܠܝܼܥܵܙܲܪ. [16]ܒܢܵܘ̈ܗܝ ܕܓܸܪܫܘܿܢ: ܫܡܘܼܐܹܝܠ ܩܲܫܝܼܫܹܗ. [17]ܘܲܗܘ̤ܵܘ ܒܢܵܘ̈ܗܝ ܕܐܹܠܝܼܥܵܙܲܪ: ܐܲܪܚܝܼܡܵܐ ܩܲܫܝܼܫܹܗ. ܘܠܵܐ ܗܘ̤ܵܘ ܠܐܹܠܝܼܥܵܙܲܪ ܐ̄ܚܪ̈ܵܢܹܐ. ܘܲܒ̣ܢܵܘ̈ܗܝ ܕܐܲܪܚܝܼܡܵܐ: ܪܝܼܒ̣ܝܼ ܩܲܫܝܼܫܹܗ. [18]ܒܢܵܘ̈ܗܝ ܕܝܲܨܗܵܪ: ܣܲܠܡܘܿܬ̣ ܩܲܫܝܼܫܹܗ. [19]ܒܢܵܘ̈ܗܝ ܕܚܸܒ̣ܪܘܿܢ: ܝܘܼܕ݂ܵܐ ܩܲܫܝܼܫܹܗ: ܐܹܡܲܪܝܵܐ ܬܸܢܝܵܢܵܐ: ܢܲܚܙܵܐܹܝܠ ܬܠܝܼܬ̣ܵܝܵܐ: ܢܲܩܡܵܐܹܝܠ ܪܒ̣ܝܼܥܵܝܵܐ. [20]ܒܢܵܘ̈ܗܝ ܕܥܲܙܝܵܐܹܝܠ: ܡܝܼܟ݂ܵܐ ܩܲܫܝܼܫܹܗ: ܫܘܿܚ ܬܸܢܝܵܢܵܐ. [21]ܒܢܵܘ̈ܗܝ ܕܲܡܪܵܪܝܼ: ܡܲܚܠܝܼ: ܘܡܘܼܫܝܼ ܒܢܵܘ̈ܗܝ ܕܡܲܚܠܝܼ: ܐܹܠܝܼܥܵܙܲܪ ܘܩܝܼܫ. [22]ܘܡ̣ܝܼܬ̣ ܐܹܠܝܼܥܵܙܲܪ ܘܠܵܐ ܗܘ̤ܵܘ ܠܹܗ ܒܢܲـ̈ـܝܵܐ ܐܸܠܵܐ ܒܢܵـ̈ـܬ̣ܵܐ. ܘܲܢܣܲܒ̣ܘ ܐܸܢܹܝܢ ܒܢܵܘ̈ܗܝ ܕܩܝܼܫ ܕܵܕ݂ܗܹܝܢ. [23]ܒܢܵܘ̈ܗܝ ܕܡܘܼܫܝܼ: ܡܲܚܠܝܼ: ܘܥܵܕ݂ܵܪ: ܘܝܲܪܡܘܿܬ̣ ܬܠܵܬ̣ܵܐ. [24]ܗܵܠܹܝܢ ܒܢܵܘ̈ܗܝ ܕܠܹܘܝܼ ܠܒܹܝܬ̣ ܐܲܒ̣ܵܗܲܝ̈ܗܘܿܢ: ܪܹ̈ܫܲܝ ܐܲܒ̣ܵـ̈ـܗܵܬ̣ܵܐ ܠܡܸܢܝܵܢܗܘܿܢ ܒܡܸܢܝܵܢܵܐ ܕܲܫܡܵܗܲܝ̈ܗܘܿܢ: ܠܪܸܫ ܐ̄ܢܵܫ ܩܵܝܡܲܝ̈ ܥܲܠ ܥܒ̣ܝܼ̈ܕ݂ܵܬ̣ܵܐ ܕܒܲܝܬܹ̇ܗ ܕܡܵܪܝܵܐ: ܡ̣ܢ ܒܲܪ ܥܸܣܪܝܼܢ ܫܢ̈ܝܼܢ ܘܲܠܥܸܠ. [25]ܡܸܛܠ ܕܐܸܡܲܪ ܕܵܘܝܼܕ݂: ܐܲܢܝܼܚ ܡܵܪܹܐ ܡܵܪ̈ܵܘܵܬ̣ܵܐ ܠܝܼܣܪܵܝܹܠ ܥܲܡܹܗ: ܘܲܫ̣ܪܵܐ ܒܐܘܿܪܸܫܠܸܡ: ܡܸܟܹ̇ܝܠ ܘܲܥܕܲܡܵܐ ܠܥܵܠܲܡ. [26]ܘܐܵܦ ܠܹܘܵܝܹ̈ܐ ܗܸܢܘܿܢ: ܢܸܫ̄ܩܠܘܼܢ ܡܲܫܟ̇ܢܵܐ: ܘܟ݂ܠܗܘܿܢ ܡܵܐܢܲܝ̈ ܥܒ̣ܝܼ̈ܕ݂ܵܬܹܗ. [27]ܡܸܛܠ ܕܲܒ̣ܡܸܠܵܘ̈ܗܝ ܕܕ݂ܵܘܝܼܕ݂ ܐ̄ܚܪ̈ܵܝܵܬ̣ܵܐ: ܫܠܸܡ ܡܸܢܝܵܢܵܐ ܕܲܒ̣ܢܲܝ̈ ܠܹܘܝܼ: ܡ̣ܢ ܒܲܪ ܥܸܣܪܝܼܢ ܫܢ̈ܝܼܢ ܘܲܠܥܸܠ. [28]ܡܸܛܠ ܕܐܲܩܝܼܡ ܐܸܢܘܿܢ ܥܲܠ ܓܹܢ̄ܒ̣ ܒܢܲܝ̈ ܐܲܗܪܘܿܢ: ܕܢܸܗܘܘܿܢ ܫܲܠܝܼܛܝܼܢ ܒܒܲܝܬܹ̇ܗ ܕܡܵܪܝܵܐ: ܥܲܠ ܐܲܝܠܹܝܢ ܕܩܵܪܹܝܢ ܒܩܲܪ̈ܢܵܬ̣ܵܐ ܦܫܝܼ̈ܛܵܬ̣ܵܐ ܘܲܟ݂ܦ̈ܝܼܦܵܬ̣ܵܐ: ܘܥܲܠ ܦܲܪ̈ܕܲܝܣܩܹܐ ܕܚܵܡܠܝܼܢ ܒܗܘܿܢ ܡܵܐܢܲܝ̈ ܩܘܼܕ݂ܫܵܐ ܕܡܵܪܝܵܐ. [29]ܘܲܠܠܲܚܡܵܐ ܕܣܸܕ݂ܪܹ̈ܐ: ܘܠܲܢܫܝܼܦܵܐ: ܘܠܲܟ݂ܡܝܼܣܹ̈ܐ ܦܲܛܝܼܪܹ̈ܐ: ܘܲܠܟ݂ܠ ܕܲܡܫܲܒ̇ܚܝܼܢ ܘܡܵܘܕܹ̇ܝܢ. [30]ܕܢܸܗܘܘܿܢ ܩܵܝ̇ܡܝܼܢ ܒܟ݂ܠ ܨܦܲܪ ܘܲܨܦܲܪ: ܘܡܵܘܕܹ̇ܝܢ: ܘܲܡܫܲܒ̇ܚܝܼܢ ܠܡܵܪܝܵܐ: ܘܐܵܦ ܒܟ݂ܠ ܪܡܸܫ ܘܲܪܡܸܫ. [31]ܘܲܠܡܲܣܵܩܘܼ ܥܠܵـ̈ـܘܵܬ̣ܵܐ ܠܡܵܪܝܵܐ: ܒܫܲـ̈ـܒܹ̇ܐ: ܘܲܒ̣ܪܹܫ ܝܲܪ̈ܚܹܐ: ܘܲܒ̣ܥܹـ̈ـܐܕܹܐ ܒܡܸܢܝܵܢܗܘܿܢ: ܐܲܝܟ݂ ܕܙܵܕܹ̇ܩ ܠܗܘܿܢ ܐܲܡܝܼܢܵܐܝܼܬ̣ ܩܕ݂ܵܡ ܡܵܪܝܵܐ. [32]ܢܸܗܘܘܿܢ ܢܵܛ̇ܪܝܼܢ ܡܲܛܲܪܬܵܐ ܕܡܵܐܢܲܝ̈ ܡܲܫܟ̇ܢܵܐ: ܘܡܵܢܲܝ̈ ܩܘܼܕ݂ܫܵܐ. ܢܸܗܘܘܿܢ ܢܵܛ̇ܪܝܼܢ ܡܲܛܲܪܬܵܐ ܕܲܒ̣ܢܲܝ̈ ܐܲܗܪܘܿܢ ܐܲܚܲܝ̈ܗܘܿܢ: ܐܸܡܲܬ̣ܝ ܕܡܸܬ̣ܒ̇ܥܹܝܢ ܠܲܡܫܲܡܵܫܘܼ ܒܒܲܝܬܹ̇ܗ ܕܡܵܪܝܵܐ.
 
Top