➕
←
Amos
Amo
2
→
[1]ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܬܠܵܬ̣ܵܐ ܚܵܘ̈ܒܵܘܗܝ ܕܡܘܼܐܵܒ̣: ܘܕܲܐܪܒ̇ܥܵܐ ܠܵܐ ܐܲܗܦܸܟ݂ ܡܸܢܗܘܿܢ: ܥܲܠ ܕܐܵܘܩܸܕ݂ܘ ܓܲܪ̈ܡܵܘܗܝ ܕܡܲܠܟܵܐ ܕܐܲܕ݂ܘܿܡ ܠܣܲܝܕܵܐ. [2]ܐܹܫܲܕܲܪ ܢܘܼܪܵܐ ܥܲܠ ܡܘܼܐܵܒ̣: ܘܬܹܐܟ݂ܘܿܠ ܣܵܚܪ̈ܵܬ̣ܵܗ̇ ܕܩܸܪܝܘܿܬ̣: ܘܲܢܡܘܼܬ̣ ܡܘܼܐܵܒ̣ ܒܲܕ݂ܠܘܼܚܵܐ: ܒܲܩܥܵܬ̣ܵܐ ܘܲܒ̣ܩܵܠܵܐ ܕܫܝܼܦܘܿܪܵܐ. [3]ܘܐܵܘܒܸ̇ܕ݂ ܕܲܝܵܢܵܐ ܡ̣ܢ ܓܵܘܹܗ: ܘܟ݂ܠܗܘܿܢ ܪܵܘܪ̈ܒ̣ܵܢܵܘܗܝ ܐܸܚܪܘܿܒ̣ ܥܲܡܹܗ ܐܵܡܲܪ ܡܵܪܝܵܐ. [4]ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܬܠܵܬ̣ܵܐ ܚܵܘܒܵܘ̈ܗܝ ܕܲܝܗܘܼܕ݂ܵܐ: ܘܕܲܐܪܒ̇ܥܵܐ ܠܵܐ ܐܲܗܦܸܟ݂ ܡܸܢܗܘܿܢ: ܥܲܠ ܕܐܲܣܠܝܼܘ ܢܵܡܘܿܣܹܗ ܕܡܵܪܝܵܐ: ܘܦܘܼܩܕܵܢܵܘ̈ܗܝ ܠܵܐ ܢ̣ܛܲܪܘ: ܘܐܲܛܥܝܼ ܐܸܢܘܿܢ ܣܪ̈ܝܼܩܵܬ̣ܵܐ ܕܐܸܙܲܠ̣ܘ ܐܲܒ̣ܵܗܲܝ̈ܗܘܿܢ ܒܵܬܲܪܗܹܝܢ. [5]ܐܹܫܲܕܲܪ ܢܘܼܪܵܐ ܒܲܝܗܘܼܕ݂ܵܐ: ܘܬܹܐܟ݂ܘܿܠ ܣܵܚܪ̈ܵܬ̣ܵܗ̇ ܕܐܘܿܪܸܫܠܸܡ. [6]ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܬܠܵܬ̣ܵܐ ܚܵܘܒܵܘ̈ܗܝ ܕܝܼܣܪܵܝܹܠ: ܘܕܲܐܪܒ̇ܥܵܐ ܠܵܐ ܐܲܗܦܸܟ݂ ܡܸܢܗܘܿܢ: ܥܲܠ ܕܙܲܒܸ̇ܢ̣ܘ ܠܙܲܕ̇ܝܼܩܵܐ ܒܟܸܣܦܵܐ: ܘܲܠܡܸܣܟܹ̇ܢܵܐ ܡܸܛܠ ܡܣܵܢܹ̈ܐ ܕܕ݂ܵܝ̇ܫܝܼܢ ܥܲܠ ܥܲܦܪܵܐ ܕܐܲܪܥܵܐ. [7]ܘܲܡܩܲܦܚܝܼܢ ܠܡܸܣ̈ܟܹ̇ܢܹܐ: ܘܐܘܼܪܚܵܐ ܕܒ̣ܵܝܫܹ̈ܐ ܨܠ̣ܵܘ: ܘܓܲܒ̣ܪܵܐ ܘܐܲܒ̣ܘܼܗܝ ܐܵܙ̇ܠ̄ܝܼܢ ܠܘܵܬ̣ ܐܲܢ̄ܬ̇ܬ̣ܵܐ: ܡܸܛܠ ܕܲܢܛܲܢܦܘܼܢ ܫܡܵܐ ܕܩܘܼܕ݂ܫܝ. [8]ܘܥܲܠ ܠܒ̣ܘܼܫܹ̈ܐ ܚܲܒ̣̈ܠܹܐ ܚܵܙ̇ܩܝܼܢ ܗ̄ܘܼܵܘ ܥܲܠ ܓܸܢ̄ܒ̣ ܟܠ ܡܲܕ݂ܒܲܚ: ܘܚܲܡܪܵܐ ܥܲܬ̇ܝܼܩܵܐ ܫܵܬܹ̇ܝܢ ܗ̄ܘܼܵܘ ܒܹܝܬ̣ ܐܲܠܵܗܲܝ̈ܗܘܿܢ. [9]ܘܐܸܢܵܐ ܐܵܘܒ̇ܕܸܬ̣ ܠܐܵܡܘܿܪܵܝܵܐ ܡ̣ܢ ܩܕ݂ܵܡܲܝܗܘܿܢ: ܕܪܵܘܡܹܗ ܐܲܝܟ݂ ܪܵܘܡܵܐ ܕܐܲܪܙܵܐ: ܘܚܲܣܝܼܢ ܗ̄ܘܼܵܐ ܐܲܝܟ݂ ܒܲܠܘܼܛܵܐ: ܐܵܘܒ̇ܕܸܬ̣ ܦܹܐܪ̈ܵܘܗܝ ܡ̣ܢ ܠܥܸܠ: ܘܥܸܩܵܪ̈ܵܘܗܝ ܡ̣ܢ ܠܬܲܚܬ̇. [10]ܘܐܸܢܵܐ ܐܲܣܸܩܬ̇ܟ݂ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܘܕܲܒܲܪܬ̇ܟ݂ܘܿܢ ܒܡܲܕ݂ܒ̇ܪܵܐ ܐܲܪܒ̇ܥܝܼܢ ܫܢܝܼ̈ܢ: ܘܐܲܝܬ̇ܝܼܬ̇ܟ݂ܘܿܢ ܠܐܲܬ̣ܪܵܐ ܗܵܢܵܐ: ܠܡܹܐܪܲܬ̣ ܐܲܪܥܵܐ ܕܐܵܡܘܿܪ̈ܵܝܹܐ. [11]ܘܐܲܩܝܼܡܹ̇ܬ̣ ܡ̣ܢ ܒܢܲܝ̈ܟ̇ܘܿܢ ܢܒ̣̈ܝܹܐ: ܘܡ̣ܢ ܥܠܲܝܡܲܝ̈ܟ̇ܘܿܢ ܢܙܝܼܪܹ̈ܐ: ܕܲܠܡܵܐ ܐܝܬܲܝܗܘܿܢ ܗܵܠܹܝܢ ܒܢܲܝ̈ ܝܑܼܣܪܵܝܹܠ: ܐܵܡܲܪ ܡܵܪܝܵܐ. [12]ܘܐܲܫܩܝܼܬ̇ܘܿܢ ܠܲܢܙܝܼܪܹ̈ܐ ܚܲܡܪܵܐ ܘܠܲܢܒ̣ܝܹ̈ܐ ܦܲܩܸܕ̇ܬ̇ܘܿܢ ܕܠܵܐ ܢܸܬ̣ܢܲܒ̇ܘܿܢ. [13]ܗܵܐ ܐܸܢܵܐ ܡܥܝܼܩ ܐ̄ܢܵܐ ܬܚܘܿܬܲܝܟ̇ܘܿܢ: ܐܲܝܟ݂ ܕܲܡܥܝܼܩܵܐ ܥܵܓܹܠܬܵܐ ܕܡܲܠܝܵܐ ܫܸܒ̇ܠܹ̈ܐ. [14]ܘܢܹܐܒܲܕ݂ ܪܲܗܛܵܐ ܡ̣ܢ ܩܲܠܝܼܠܵܐ: ܘܲܕ݂ܥܲܫܝܼܢ ܠܵܐ ܢܚܲܡܣܝܼܢ ܚܲܝܠܹܗ: ܘܲܕ݂ܓܲܢ̄ܒܵܪ ܠܵܐ ܢܦܲܨܹܐ ܢܲܦ̮ܫܹܗ. [15]ܘܩܲܫܵܬ̣ܵܐ ܠܵܐ ܢܩܘܼܡ: ܘܲܕ݂ܩܲܠܝܼܠ ܒܪܲܗܛܹܗ ܠܵܐ ܢܸܬ̣ܦܲܨܹܐ: ܘܦܲܪܵܫܵܐ ܠܵܐ ܢܫܵܘܙܸܒ̣ ܢܲܦ̮ܫܹܗ. [16]ܘܲܕ݂ܥܲܫܝܼܢ ܠܸܒܹ̇ܗ ܐܲܝܟ݂ ܕܓܲܢ̄ܒܵܪܵܐ: ܥܲܪܛܸܠ ܢܸܥܪܘܿܩ ܒܝܵܘܡܵܐ ܗܵܘܿ ܐܵܡܲܪ ܡܵܪܝܵܐ.
 
Top