Peshitta OT
Peshitta OT
➕
←
Daniel
Dan
2
→
[
1
]
ܒܲܫܢܲܬ̣
ܬܲܪܬܹ̇ܝܢ ܕܡܲܠܟ̇ܘܼܬܹܗ ܕܲܢܒ̣ܘܼܟܲܕܼܢܵܨܲܪ: ܚ̣ܠܲܡ ܢܒ̣ܘܼܟܲܕܼܢܵܨܲܪ ܚܸܠܡܵܐ: ܘܐܸܫܬܲܢܝܲܬ̤ ܪܘܼܚܹܗ: ܘܫܸܢܬܹܗ ܗܘ̤ܵܬ̣ ܥܠܵܘܗܝ
[
2
]
ܘܐܸܡܲܪ
ܡܲܠܟܵܐ ܠܡܸܩܪܵܐ ܠܚܲܪ̈ܫܹܐ: ܘܠܵܐܫܘܿܦܹ̈ܐ: ܘܠܲܡܓ̣ܘܼܫܹ̈ܐ: ܘܲܠܟܲܠܕܵܝܹ̈ܐ: ܠܲܡܚܵܘܵܝܘܼ ܠܡܲܠܟܵܐ ܚܸܠܡܹܗ: ܘܐܸܬ̣ܵܘ ܘܩܵܡ̣ܘ ܩܕܼܵܡ ܡܲܠܟܵܐ.
[
3
]
ܘܐܸܡܲܪ
ܠܗܘܿܢ ܡܲܠܟܵܐ: ܚܸܠܡܵܐ ܚܙܹ̇ܝܬ̣: ܘܐܸܫܬܲܢܝܲܬ̤ ܪܘܼܚܝ ܠܡܸܕ̇ܥܹܗ ܠܚܸܠܡܵܐ.
[
4
]
ܘܡܲܠܸܠ̣ܘ
ܟܲܠܕܵܝܹ̈ܐ ܩܕܼܵܡ ܡܲܠܟܵܐ ܐܲܪܡܵܐܝܼܬ̣: ܘܐܵܡ̇ܪܝܼܢ: ܡܲܠܟܵܐ ܠܥܵܠܲܡ ܚܝܝܼ: ܐܸܡܲܪ ܚܸܠܡܵܐ ܠܥܲܒ̣ܕܲܝ̈ܟ: ܘܦܫܵܪܹܗ ܚܢܲܢ ܚܵܝܘܸܐ.
[
5
]
ܥܢ̣ܵܐ
ܡܲܠܟܵܐ ܘܐܸܡܲܪ ܠܟܲܠܕܵܝܹ̈ܐ: ܫܲܪܝܼܪܵܐ ܗ̄ܝܼ ܡܸܠܬ̣ܵܐ ܕܐܸܡ̇ܪܹܬ̣: ܕܐܸܢ ܠܵܐ ܬܚܵܘܘܿܢܵܢܝ ܚܸܠܡܵܐ ܘܲܦܫܵܪܹܗ: ܗܲܕܵܡ ܬܸܬ̣ܦܲܣܩܘܼܢ: ܘܒ̣ܵܬܲܝ̈ܟ̇ܘܿܢ ܢܸܬ̣ܒܲܙܙܘܿܢ.
[
6
]
ܐܸܢ
ܕܹܝܢ ܚܸܠܡܵܐ ܘܲܦܫܵܪܹܗ ܬܚܵܘܘܿܢܵܢܝ: ܡܵܘ̈ܗܒ̣ܵܬ̣ܵܐ ܘܥܘܼܬ̣ܪܵܐ ܘܐܝܼܩܵܪܵܐ ܣܲܓ̇ܝܼܵܐܐ ܬܩܲܒܠܘܼܢ ܡܹܢܝ: ܒܲܠܚܘܿܕܼ ܚܸܠܡܵܐ ܘܲܦܫܵܪܹܗ ܚܵܘܵܐܘܼܢܝ.
[
7
]
ܥ̣ܢܵܘ
ܬܘܼܒ̣ ܘܐܵܡ̇ܪܝܼܢ ܠܹܗ: ܡܲܠܟܵܐ ܚܸܠܡܵܐ ܢܹܐܡܲܪ ܠܥܲܒ̣ܕܵܘ̈ܗܝ: ܘܲܦܫܵܪܹܗ ܚܢܲܢ ܢܚܵܘܸܐ.
[
8
]
ܥܢ̣ܵܐ
ܡܲܠܟܵܐ ܘܐܸܡܲܪ: ܫܲܪܝܼܪܵܐܝܼܬ̣ ܝܵܕܲܥ̇ ܐ̄ܢܵܐ ܕܙܲܒ̣ܢܵܐ ܗ̄ܘܼ ܫܵܐ̇ܠܝܼܢ ܐ̄ܢܬ̇ܘܿܢ: ܡܸܛܠ ܕܲܚ̣ܙܲܝܬ̇ܘܿܢ ܕܫܲܪܝܼܪܵܐ ܗ̄ܝܼ ܡܸܠܲܬܝ.
[
9
]
ܕܐܸܢ
ܚܸܠܡܵܐ ܠܵܐ ܬܚܵܘܘܿܢܵܢܝ: ܚܕܼܵܐ ܗ̄ܝܼ ܕܵܬ̣ܟ̣ܘܿܢ: ܘܡܸܠܬ̣ܵܐ ܟܲܕܵܒ̣ܬ̣ܵܐ ܘܲܣܪܝܼܩܬܵܐ ܐܸܬ̣ܪܲܥܝܼܬ̇ܘܿܢ ܠܡܹܐܡܲܪ ܩܕܼܵܡܲܝ: ܥܲܕܼ ܙܲܒ̣ܢܵܐ ܢܸܥܒܲܪ. ܐܸܠܵܐ ܚܸܠܡܵܐ ܐܸܡܲܪܘ ܠܝܼ: ܕܐܸܕܲܥ ܕܐܵܦ ܦܫܵܪܹܗ ܡܚܵܘܹܝܢ ܐ̄ܢܬ̇ܘܿܢ ܠܝܼ.
[
10
]
ܥܢ̣ܵܘ
ܟܲܠܕܵܝܹ̈ܐ ܘܐܵܡ̇ܪܝܼܢ ܩܕܼܵܡ ܡܲܠܟܵܐ: ܠܲܝܬ̇ ܐ̄ܢܵܫ ܥܲܠ ܐܲܪܥܵܐ ܕܡܸܠܲܬ̣ ܡܲܠܟܵܐ ܡܸܫܟܲܚ ܠܲܡܚܵܘܵܝܘܼ: ܐܵܦܠܵܐ ܡ̣ܢ ܡܬ̣ܘܿܡ ܡܠܸܟ ܪܲܒ̇ ܘܫܲܠܝܼܛ ܡܸܠܬ̣ܵܐ ܐܲܝܟ ܗܵܕܹܐ ܫܲܐܸܠ: ܠܟ̣ܠ ܚܲܪܵܫ ܘܐܵܫܘܿܦ ܘܟܲܠܕܼܵܝ.
[
11
]
ܘܡܸܠܬ̣ܵܐ
ܕܡܲܠܟܵܐ ܫܲܐܸܠ ܝܲܩܝܼܪܵܐ ܗ̄ܝܼ: ܘܐ̄ܢܵܫ ܠܲܝܬ̇ ܕܲܢܚܵܘܹܝܗ̇ ܩܕܼܵܡ ܡܲܠܟܵܐ: ܐܸܠܵܐ ܐܸܢ ܐܲܠܵܗ̈ܝܼܢ ܕܠܲܝܬ̇ ܡܲܥܡܲܪܗܘܿܢ ܥܲܡ ܒܢܲܝ̈ ܒܸܣܪܵܐ.
[
12
]
ܗܵܝܕܹ̇ܝܢ
ܡܲܠܟܵܐ ܐܸܬ̣ܚܲܡܲܬ̣ ܪܵܘܪܒ̣ܵܐܝܼܬ̣: ܘܲܒ̣ܪܘܼܓ̣ܙܵܐ ܣܲܓ̇ܝܼܵܐܐ ܐܸܡܲܪ: ܠܡܵܘܒܵܕܼܘܼ ܠܟ̣ܠܗܘܿܢ ܚܲܟ̇ܝܼܡܹ̈ܐ ܕܒ̣ܵܒܹܠ.
[
13
]
ܘܦܘܼܩܕܵܢܵܐ
ܢܦܲܩ̣ ܘܚܲܟ̇ܝܼܡܹ̈ܐ ܡܸܬ̣ܩܲܛܠܝܼܢ: ܘܲܒ̣ܥܵܘ ܕܢܸܩܛܠܘܼܢ ܠܕܵܐܢܝܼܐܹܝܠ ܘܲܠܚܲܒ̣ܪ̈ܵܘܗܝ.
[
14
]
ܗܵܝܕܹ̇ܝܢ
ܕܵܢܝܼܐܹܝܠ ܐܸܬ̣ܪܲܥܝܼ ܘܐܸܬܡܲܠܲܡ: ܘܐܸܡܲܪ ܠܐܵܪܝܼܘܿܟ ܪܲܒ̇ ܕܲܚܫܹ̈ܐ ܕܡܲܠܟܵܐ: ܗܵܘܿ ܕܲܢܦܲܩ̣ ܠܲܡܩܲܛܵܠܘܼ ܠܚܲܟ̇ܝܼܡܹ̈ܐ ܕܒ̣ܵܒܹܠ.
[
15
]
ܥܲܠ
ܡܵܢܵܐ ܗܵܢܵܐ ܦܘܼܩܕܵܢܵܐ ܡܲܚܨܲܦ ܡ̣ܢ ܩܕܼܵܡ ܡܲܠܟܵܐ: ܘܲܓ̣ܠܵܗ̇ ܡܸܠܬ̣ܵܐ ܐܵܪܝܼܘܿܟ ܠܕܼܵܐܢܝܼܐܹܝܠ.
[
16
]
ܘܕܵܢܝܼܐܹܝܠ
ܒܥ̣ܵܐ ܡ̣ܢ ܡܲܠܟܵܐ ܕܙܲܒ̣ܢܵܐ ܢܸܬܸ̇ܠ ܠܹܗ: ܘܦܫܵܪܵܐ ܠܡܲܠܟܵܐ ܢܚܵܘܸܐ.
[
17
]
ܗܵܝܕܹ̇ܝܢ
ܕܵܢܝܼܐܹܝܠ ܠܒܲܝܬܹ̇ܗ ܐܸܙܲܠ: ܘܲܠܚܲܢܲܢܝܵܐ: ܘܲܠܡܝܼܫܵܐܝܹܠ: ܘܲܠܥܲܙܲܪܝܵܐ ܚܲܒ̣ܪ̈ܵܘܗܝ: ܡܸܠܬ̣ܵܐ ܗܵܕܹܐ ܓܠ̣ܵܐ.
[
18
]
ܕܢܸܒ̣ܥܘܿܢ
ܪ̈ܲܚܡܹܐ ܡ̣ܢ ܩܕܼܵܡ ܐܲܠܵܗܵܐ ܕܲܫܡܲܝܵܐ ܥܲܠ ܐ̄ܪܵܙܵܐ ܗܵܢܵܐ: ܕܠܵܐ ܢܹܐܒ̣ܕ̇ܘܼܢ ܕܵܢܝܼܐܹܝܠ ܘܚܲܒ̣ܪ̈ܵܘܗܝ ܥܲܡ ܫܲܪܟܵܐ ܕܚܲܟ̇ܝܼܡܹ̈ܐ ܕܒ̣ܵܒܹܠ.
[
19
]
ܗܵܝܕܹ̇ܝܢ
ܠܕܼܵܢܝܼܐܹܝܠ ܒܚܸܙܘܵܐ ܕܠܸܠܝܵܐ ܐ̄ܪܵܙܵܐ ܐܸܬ̣ܓ̇ܠܝܼ: ܘܕܼܵܢܝܼܐܹܝܠ ܒܲܪܸܟ ܠܐܲܠܵܗܵܐ ܕܲܫܡܲܝܵܐ.
[
20
]
ܥܢ̣ܵܐ
ܕܵܢܝܼܐܹܝܠ ܘܐܸܡܲܪ: ܢܸܗܘܹܐ ܫܡܹܗ ܕܡܵܪܝܵܐ ܡܒܲܪܲܟ: ܡ̣ܢ ܥܵܠܲܡ ܘܲܥܕܲܡܵܐ ܠܥܵܠܲܡ: ܕܚܸܟ̣ܡ̱ܬ̣ܵܐ ܘܓܲܢ̄ܒܵܪܘܼܬ̣ܵܐ ܕܝܼܠܹܗ ܗ̄ܝܼ.
[
21
]
ܘܗ̤ܘ
ܡܚܲܠܸܦ ܙܲܒ̣ܢܹ̈ܐ ܘܥܸܕܵܢܹ̈ܐ: ܡܲܥܒܲܪ ܡܲܠܟ̇ܝܼ̈ܢ ܘܲܡܩܝܼܡ ܡܲܠܟ̇ܝܼ̈ܢ: ܝܵܗܹ̇ܒ̣ ܚܸܟ̣ܡ̱ܬ̣ܵܐ ܠܚܲܟ̇ܝܼܡܹ̈ܐ: ܘܡܲܕ̇ܥܵܐ ܠܝܵܕܼܥܲܝ̈ ܣܘܼܟܵܠܵܐ.
[
22
]
ܘܗ̤ܘ
ܓܵܠܹ̇ܐ ܥܲܡܝܼ̈ܩܵܬ̣ܵܐ ܘܟܲܣ̈ܝܵܬ̣ܵܐ: ܘܝܵܕܲܥ̇ ܡܵܐ ܕܲܒ̣ܚܸܫܘܿܟ̣ܵܐ: ܘܢܲܗܝܼܪܵܐ ܥܲܡܹܗ ܗ̄ܘܼ.
[
23
]
ܠܵܟ
ܐܲܠܵܗܵܐ ܕܐܲܒ̣ܵܗܲܝ̈ ܡܵܘܕܹ̇ܐ ܐ̄ܢܵܐ ܘܲܡܫܲܒܲܚ ܐ̄ܢܵܐ: ܕܚܸܟ̣ܡ̱ܬ̣ܵܐ ܘܓܲܢ̄ܒܵܪܘܼܬ̣ܵܐ ܝܲܗ̄ܒ̣ܬ̇ ܠܝܼ: ܘܗܵܫܵܐ ܐܵܘܕܼܥ̣ܬܵܢܝ ܕܲܒ̣ܥܲܝܢ ܡܸܢܵܟ: ܘܡܸܠܲܬ̣ ܡܲܠܟܵܐ ܐܵܘܕܲܥ̣ܬܵܢܝ.
[
24
]
ܘܒ̣ܵܗ̇
ܒܫܵܥܬ̣ܵܐ ܥܲܠ ܕܵܢܝܼܐܹܝܠ ܠܘܵܬ̣ ܐܵܪܝܼܘܿܟ: ܗܵܘܿ ܕܲܦܩܲܕܼ ܠܹܗ ܡܲܠܟܵܐ ܠܲܡܩܲܛܵܠܘܼ ܠܚܲܟ̇ܝܼܡܹ̈ܐ ܕܒ̣ܵܒܹܠ: ܘܐܸܙܲܠ ܘܗܵܟܲܢܵܐ ܐܸܡܲܪ ܠܹܗ: ܠܚܲܟ̇ܝܼܡܹ̈ܐ ܕܒ̣ܵܒܹܠ ܠܵܐ ܬܵܘܒܸ̇ܕܼ: ܐܸܠܵܐ ܐܲܥܸܠܲܝܢܝ ܩܕܼܵܡ ܡܲܠܟܵܐ: ܘܲܦܫܵܪܵܐ ܠܡܲܠܟܵܐ ܐܹܚܵܘܸܐ.
[
25
]
ܗܵܝܕܹ̇ܝܢ
ܐܵܪܝܼܘܿܟ ܚܦܝܼܛܵܐܝܼܬ̣ ܐܲܥ̣ܠܹܗ ܠܕܼܵܢܝܼܐܹܝܠ ܩܕܼܵܡ ܡܲܠܟܵܐ: ܘܐܸܡܲܪ ܠܹܗ: ܐܸܫܟ̇ܚܹ̇ܬ̣ ܓܲܒ̣ܪܵܐ ܡ̣ܢ ܒܢܲܝ̈ ܫܒ̣ܝܼܬ̣ܵܐ ܕܲܝܗܘܼܕܼܵܐ: ܕܲܦܫܵܪܵܐ ܠܡܲܠܟܵܐ ܢܘܕܲܥ.
[
26
]
ܥܢ̣ܵܐ
ܡܲܠܟܵܐ ܘܐܸܡܲܪ ܠܕܼܵܢܝܼܐܹܝܠ ܕܲܫܡܹܗ ܒܹܠܛܫܵܨܲܪ: ܡܸܫܟܲܚ ܐܲܢ̄ܬ̇ ܠܲܡܚܵܘܵܝܘܼܬܲܢܝ: ܚܸܠܡܵܐ ܕܲܚܙܹ̇ܝܬ̣ ܘܲܦܫܵܪܹܗ.
[
27
]
ܥܢ̣ܵܐ
ܕܵܢܝܼܐܹܝܠ ܘܐܸܡܲܪ ܩܕܼܵܡ ܡܲܠܟܵܐ: ܐ̄ܪܵܙܵܐ ܕܡܲܠܟܵܐ ܫܵܐܹ̇ܠ: ܠܵܐ ܚܲܟ̇ܝܼܡܹ̈ܐ: ܘܠܵܐ ܡܓ̣ܘܼܫܹ̈ܐ: ܘܠܵܐ ܚܲܪ̈ܵܫܹܐ: ܘܠܵܐ ܐ̄ܫܘܿܦܹ̈ܐ: ܡܸܫܟ̇ܚܝܼܢ ܠܲܡܚܵܘܵܝܘܼ ܠܡܲܠܟܵܐ.
[
28
]
ܐܸܠܵܐ
ܐܝܼܬ̣ ܐܲܠܵܗܵܐ ܕܲܫܡܲܝܵܐ ܓܵܠܹ̇ܐ ܐ̄ܪ̈ܵܙܹܐ: ܕܢܵܘܕܲܥ ܠܡܲܠܟܵܐ ܢܒ̣ܘܼܟܲܕܼܢܲܨܲܪ ܡܵܐ ܕܢܸܗܘܹܐ ܒܝܵܘ̈ܡܵܬ̣ܵܐ ܐ̄ܚܪ̈ܵܝܹܐ: ܚܸܠܡܵܟ ܘܚܸܙܘܵܐ ܕܪܹܫܵܟ ܕܥܲܠ ܡܲܫܟ̇ܒ̣ܵܟ ܗܵܢܵܘ.
[
29
]
ܐܲܢ̄ܬ̇
ܡܲܠܟܵܐ ܡܲܚܫ̈ܒ̣ܵܬ̣ܵܟ ܥܲܠ ܠܸܒܵܟ ܣܠܸܩ̣: ܥܲܠ ܡܵܐ ܕܢܸܗܘܹܐ ܒܲܐ̄ܚܪܵܝܬܵܐ: ܘܓܹܠܹ̇ܐ ܐ̄ܪ̈ܵܙܹܐ ܐܵܘܕ̇ܥܵܟ ܡܵܐ ܕܢܸܗܘܹܐ.
[
30
]
ܘܐܸܢܵܐ
ܠܵܐ ܗ̄ܘܼܵܐ ܡܸܛܠ ܕܐܝܼܬ̣ ܒܝܼ ܚܸܟ̣ܡ̱ܬ̣ܵܐ ܝܲܬ̇ܝܼܪ ܡ̣ܢ ܟܠܗܘܿܢ ܚܲܝܹ̈ܐ ܐܸܬ̣ܓ̇ܠܝܼ ܠܝܼ ܐ̄ܪܵܙܵܐ ܗܵܢܵܐ: ܐܸܠܵܐ ܡܸܛܠ ܕܲܦܫܵܪܵܐ ܢܸܬ̣̱ܝܼܕܲܥ ܠܡܲܠܟܵܐ: ܘܡܸܕܸ̇ܡ ܕܐܸܬ̣ܚܲܫܲܒ̣ܬ̇ ܒܠܸܒܵܟ ܬܸܕܲܥ.
[
31
]
ܐܲܢ̄ܬ̇
ܡܲܠܟܵܐ ܚܵܙܹ̇ܐ ܗ̄ܘܲܝܬ̇: ܘܗܵܐ ܨܲܠܡܵܐ ܚܲܕܼ ܪܲܒܵܐ: ܕܛܵܒ̣ ܙܝܼܘܹܗ ܝܲܬܝܼܪ ܘܩܵܐܹ̇ܡ ܠܩܘܼܒ̣ܠܵܟ: ܚܸܙܘܹܗ ܕܚܝܼܠ.
[
32
]
ܪܹܫܹܗ
ܕܕܲܗܒ̣ܵܐ ܛܵܒ̣ܵܐ: ܚܲܕܼܝܹܗ ܘܲܕܼܪ̈ܵܥܵܘܗܝ ܕܣܹܐܡܵܐ: ܟܲܪܣܹܗ ܘܥܲܛܡܵܬܹ̈ܗ ܕܲܢܚܵܫܵܐ.
[
33
]
ܫܵܩܵܘ̈ܗܝ
ܕܦܲܪܙܠܵܐ: ܪܸ̈ܓ̣ܠܵܘܗܝ ܡܸܢܗܹܝܢ ܕܦܲܪܙܠܵܐ ܘܡܸܢܗܹܝܢ ܕܚܸܨܦܵܐ.
[
34
]
ܘܲܚ̣ܙܲܝܬ̇
ܕܐܸܬ̣ܓܲܙܪܲܬ̤ ܟܹܐܦܵܐ ܕܠܵܐ ܒܐܝܼ̈ܕܝܼܢ: ܘܲܡܚܵܬܹܗ ܠܨܲܠܡܵܐ ܥܲܠ ܪܸ̈ܓ̣ܠܵܘܗܝ ܕܦܲܪܙܠܵܐ ܘܲܕܼܚܸܨܦܵܐ: ܘܕܲܩܩܲܬ̤ ܐܸܢܹܝܢ ܛܵܒ̣.
[
35
]
ܘܐܸܬ̣ܕ̇ܩܸܩܘ
ܐܲܟ̣ܚ̄ܕܼܵܐ ܕܦܲܪܙܠܵܐ: ܘܲܢܚܵܫܵܐ: ܘܚܸܨܦܵܐ: ܘܣܹܐܡܵܐ: ܘܕܲܗܒ̣ܵܐ: ܘܲܗܘ̤ܵܘ ܐܲܝܟ ܥܘܼܪܵܐ ܕܡ̣ܢ ܐܸܟ̇ܪܵܐ ܕܩܲܝܛܵܐ: ܘܢܸܣܒܲܬ̤ ܐܸܢܘܿܢ ܪܘܼܚܵܐ ܬܲܩܝܼܦܬܵܐ: ܘܐܲܬܲܪ ܠܵܐ ܐܸܫܬ̇ܟܲܚ ܠܗܘܿܢ: ܘܟܹܐܦܵܐ ܕܲܡܚܵܬܹܗ ܠܨܲܠܡܵܐ: ܗܘ̤ܵܬ̣ ܠܛܘܼܪܵܐ ܪܲܒܵܐ: ܘܲܡܠܵܬ̤ ܡܸܢܵܗ̇ ܟܠܵܗ̇ ܐܲܪܥܵܐ.
[
36
]
ܗܵܢܵܘ
ܚܸܠܡܵܐ: ܘܲܦܫܵܪܹܗ ܐܹܡܲܪ ܩܕܼܵܡ ܡܲܠܟܵܐ.
[
37
]
ܐܲܢ̄ܬ̇
ܡܲܠܟܵܐ ܡܠܸܟ ܟܲܠ̈ܟܹ̇ܐ: ܐܲܠܵܗܵܐ ܡܪܲܝܡܵܐ: ܡܲܠܟ̇ܘܼܬ̣ܵܐ ܚܲܣܝܼܢܬܵܐ ܘܐܝܼܩܵܪܵܐ ܝܲܗ̄ܒ̣ ܠܵܟ.
[
38
]
ܘܟ̣ܠ
ܐܲܬܲܪ ܕܥܵܡܘܿܪܝܼܢ ܒܹܗ ܒܢܲܝ̈ܢܵܫܵܐ: ܘܦܵܪܲܚܬ̣ܵܐ ܕܲܫܡܲܝܵܐ ܘܚܲܝ̄ܘܬ̣ܵܐ ܕܕܲܒ̣ܪܵܐ ܝܲܗ̄ܒ̣ ܒܐܝܼܕܲܝ̈ܟ: ܘܐܲܫ̱ܠܛܵܟ ܥܲܠ ܟܠܗܘܿܢ: ܐܲܢ̄ܬ̇ܘܼ ܪܹܫܵܐ ܕܕܲܗܒ̣ܵܐ.
[
39
]
ܘܒ̣ܵܬ̣ܪܵܟ
ܬܩܘܼܡ ܡܲܠܟ̇ܘܼܬ̣ܵܐ ܐ̄ܚܪܹܬ̣ܵܐ ܕܡܲܟ̇ܝܼܟ̣ܵܐ ܡܸܢܵܟ: ܘܡܲܠܟ̇ܘܼܬ̣ܵܐ ܐ̄ܚܪܹܬܵܐ ܕܲܬ̣ܠܵܬ̣ ܕܐܝܼܬܹܝܗ̇ ܢܚܵܫܵܐ: ܬܸܫܠܲܛ ܒܟ̣ܠܵܗ̇ ܐܲܪܥܵܐ.
[
40
]
ܘܡܲܠܟ̇ܘܼܬ̣ܵܐ
ܪܒ̣ܝܼܥܵܝܬܵܐ ܬܸܗܘܹܐ ܚܲܣܝܼܢܵܐ ܐܲܝܟ ܦܲܪܙܠܵܐ: ܘܐܲܝܟ ܕܦܲܪܙܠܵܐ ܐܵܪܹܫ ܘܲܡܕܲܩܸܩ ܟܠ: ܗܵܟܲܢܵܐ ܐܵܦ ܗ̤ܝ ܬܸܫܚܘܿܩ ܬܸܟ̣ܒ̇ܘܿܫ ܟܠ.
[
41
]
ܘܕܲܚ̣ܙܲܝܬ̇
ܪܸ̈ܓ̣ܠܹܐ ܘܨܸܒ̣̈ܥܵܬ̣ܵܐ: ܕܡܸܢܗܹܝܢ ܕܚܸܨܦܵܐ ܕܦܲܚܵܪܵܐ: ܘܡܸܢܗܹܝܢ ܕܦܲܪܙܠܵܐ: ܡܲܠܟ̇ܘܼܬ̣ܵܐ ܬܸܗܘܹܐ ܦܠܝܼܓ̣ܵܐ: ܘܡ̣ܢ ܥܸܩܵܪܵܐ ܕܦܲܪܙܠܵܐ ܢܸܗܘܹܐ ܒܵܗ̇: ܐܲܝܟܲܢܵܐ ܕܲܚܙܲܝܬ̇ ܦܲܪܙܠܵܐ ܕܲܡܚܲܠܲܛ ܒܚܸܨܦܵܐ ܕܛܝܼܢܵܐ.
[
42
]
ܘܨܸܒ̣̈ܥܵܬ̣ܵܐ
ܕܪܸ̈ܓ̣ܠܹܐ ܕܲܚܙܲܝܬ̇: ܕܡܸܢܗܘܿܢ ܕܦܲܪܙܠܵܐ ܘܡܸܢܗܹܝܢ ܕܚܸܨܦܵܐ: ܡܸܢܵܗ̇ ܡ̣ܢ ܡܲܠܟ̇ܘܼܬ̣ܵܐ ܬܸܗܘܹܐ ܥܲܫܝܼܢܵܐ: ܘܡܸܢܵܗ̇ ܬܸܗܘܹܐ ܬܒ̣ܝܼܪܵܐ.
[
43
]
ܘܕܲܚܙ̣ܲܝܬ̇
ܦܲܪܙܠܵܐ ܕܲܡܚܲܠܲܛ ܒܚܸܨܦܵܐ ܕܛܝܼܢܵܐ: ܗܵܟܲܢܵܐ ܢܸܬ̣ܚܲܠܛܘܼܢ ܒܲܙܪܲܥ ܐ̄ܢܵܫܵܐ: ܘܠܵܐ ܢܸܗܘܘܿܢ ܕܵܒ̣ܩ̇ܝܼܢ ܚܲܕܼ ܠܚܲܕܼ: ܐܲܝܟ ܦܲܪܙܠܵܐ ܕܠܵܐ ܡܸܬ̣ܚܲܠܲܛ ܥܲܡ ܛܝܼܢܵܐ.
[
44
]
ܘܲܒ̣ܝܵܘ̈ܡܵܬ̣ܗܘܿܢ
ܕܡܲܠ̈ܟܹ̇ܐ ܗܵܢܘܿܢ: ܢܩܝܼܡ ܐܲܠܵܗ ܫܡܲܝܵܐ: ܡܲܠܟ̇ܘܼܬ̣ܵܐ ܕܲܠܥܵܠܡܝܼܢ: ܠܵܐ ܬܸܬ̣ܚܲܒܲܠ: ܘܡܲܠܟ̇ܘܼܬ̣ܵܐ ܠܥܲܡܵܐ ܐ̄ܚܪܹܢܵܐ ܠܵܐ ܬܸܫܒ̇ܘܿܩ: ܐܸܠܵܐ ܬܕܲܩܸܩ ܘܲܬ̣ܣܝܼܦ ܟܠܗܹܝܢ ܡܲܠܟ̇ܘܵܬ̣ܵܐ ܗܵܠܹܝܢ: ܘܗ̤ܝ ܬܩܘܼܡ ܠܥܵܠܡܝܼܢ.
[
45
]
ܐܲܝܟܲܢܵܐ
ܕܲܚܙܲܝܬ̇ ܕܡ̣ܢ ܛܘܼܪܵܐ ܐܸܬ̣ܓܲܙܪܲܬ̤ ܟܹܐܦܵܐ ܕܠܵܐ ܒܐܝܼܕܼܝܼ̈ܢ: ܘܕܲܩܩܲܬ̤ ܦܲܪܙܠܵܐ: ܘܲܢܚܵܫܵܐ: ܘܚܸܨܦܵܐ: ܘܣܹܐܡܵܐ ܘܕܲܗܒ̣ܵܐ: ܐܲܠܵܗܵܐ ܪܲܒܵܐ ܐܵܘܕ̇ܥܵܟ ܡܵܐ ܕܢܸܗܘܹܐ ܒܝܵܘ̈ܡܵܬܵܐ ܐ̄ܚܪ̈ܵܝܹܐ: ܫܲܪܝܼܪ ܚܸܠܡܵܐ ܘܲܡܗܲܝܡܲܢ ܦܫܵܪܹܗ.
[
46
]
ܗܵܝܕܹ̇ܝܢ
ܢܒ̣ܘܼܟܲܕܼܢܵܨܲܪ ܡܲܠܟܵܐ: ܢܦܲܠ̣ ܥܲܠ ܐܵܦܵܘ̈ܗܝ: ܠܕܼܵܐܢܝܼܐܹܝܠ ܝܓܸܕܼ: ܘܒܸܣܡ̈ܝܼܢ ܘܩܘܼܪ̈ܒܵܢܝܼܢ ܐܸܡܲܪ ܠܲܡܩܲܪܵܒ̣ܘܼ ܠܹܗ.
[
47
]
ܥܢ̣ܵܐ
ܡܲܠܟܵܐ ܘܐܸܡܲܪ ܠܕܼܵܢܝܼܐܹܝܠ: ܒܩܘܼܫܬܵܐ ܐܲܠܵܗܟ̣ܘܿܢ ܗ̤ܘܝܘܼ ܐܲܠܵܗ ܐܲܠܵܗ̈ܝܼܢ: ܘܡܵܪܹܐ ܡܲܠܟ̇ܝܼ̈ܢ: ܘܓ̣ܵܠܹ̇ܐ ܐ̄ܪ̈ܵܙܝܼܢ: ܕܐܸܫ̣ܟܲܚܬ̇ ܠܡܸܓ̣ܠܵܐ ܐ̄ܪܵܙܵܐ ܗܵܢܵܐ.
[
48
]
ܗܵܝܕܹ̇ܝܢ
ܡܲܠܟܵܐ ܐܵܘܪܸܒ̣ ܠܕܼܵܢܝܼܐܹܝܠ: ܘܡܵܘ̈ܗܒ̣ܵܬ̣ܵܐ ܣܲܓ̇ܝܼܵܐ̈ܬ̣ܵܐ ܝܲܗ̄ܒ̣ ܠܹܗ: ܘܐܲܫ̱ܠܛܹܗ ܥܲܠ ܟܠܵܗ̇ ܐܲܪܥܵܐ ܕܒ̣ܵܒܹܠ: ܘܐܲܩܝܼܡܹܗ ܪܹܫܵܐ ܥܲܠ ܟܠܗܘܿܢ ܪ̈ܲܒܲܝ ܚܲܝ̈ܠܹܐ: ܘܥܲܠ ܟܠܗܘܿܢ ܚܲܟ̇ܝܼܡܹ̈ܐ ܕܒܵܒܹܠ.
[
49
]
ܘܕܼܵܢܝܼܐܹܝܠ
ܒܥ̣ܵܐ ܡ̣ܢ ܡܲܠܟܵܐ: ܘܐܲܫܠܸܛ ܥܲܠ ܥܒ̣ܵܕܼܵܐ ܕܲܡܕܼܝܼܢܲܬ̣ ܒܵܒܹܠ: ܠܫܸܕܼܪܵܟ: ܘܡܝܼܫܵܟ: ܘܲܥܒܸܕܼܢܵܓ̣ܘܿ: ܘܕܼܵܢܝܼܐܹܝܠ ܗܘ̤ܵܐ ܒܬ̣ܵܪܥܵܐ ܕܡܲܠܟܵܐ.
Top