➕
←
Ezekiel
Eze
21
→
[1]ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ. [2]ܒܲܪܢܵܫܵܐ: ܣܝܼܡ ܐܲܦܲܝ̈ܟ ܠܐܘܿܪܸܫܠܸܡ: ܘܚܘܼܪ ܒܡܲܩܕܲܫܗܘܿܢ: ܘܐܸܬ̣ܢܲܒܵܐ ܥܲܠ ܐܲܪܥܵܐ ܕܝܼܣܪܵܝܹܠ. [3]ܘܐܸܡܲܪ ܠܐܲܪܥܵܐ ܕܝܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܐ ܥܠܲܝܟ̇ܝ: ܘܐܲܦܸܩ ܝܲܦ̮ܣܹܪܝ ܡ̣ܢ ܚܸܠܬ̣ܵܗ̇: ܘܐܵܘܒܸ̇ܕܼ ܡܸܢܹܟ̣ܝ ܙܲܕ̇ܝܼܩܵܐ ܘܚܲܛܵܝܵܐ. [4]ܘܥܲܠ ܕܐܵܘܒ̇ܕܹܬ̣ ܡܸܢܹܟ̣ܝ ܙܲܕܝܼܩܵܐ ܘܚܲܛܵܝܵܐ: ܡܸܛܠܗܵܢܵܐ ܬܸܦܘܿܩ ܣܲܦ̮ܣܹܪܝ ܡ̣ܢ ܚܸܠܬ̣ܵܗ̇ ܥܲܠ ܟܠ ܒܣܲܪ: ܡ̣ܢ ܬܲܝܡ̄ܢܵܐ ܘܲܥܕܲܡܵܐ ܠܓܲܪܒ̇ܝܵܐ. [5]ܘܢܸܕ̇ܥܘܼܢ ܟܠ ܒܣܲܪ: ܕܐܸܢܵܐ ܡܵܪܝܵܐ ܐܲܦܩܹ̇ܬ̣ ܣܲܦ̮ܣ݂ܹܪܝ ܡ̣ܢ ܚܸܠܬ̣ܵܗ̇: ܘܬ̣ܘܼܒ̣ ܠܵܐ ܬܸܗܦܘܿܟ. [6]ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܬ̇ܬܲܢܲܚ ܒܲܬ̣ܒ̣ܵܪܵܐ ܕܚܲܨܵܐ: ܘܲܒ̣ܡܲܪܝܼܪܘܼܬ̣ܵܐ ܐܸܬ̇ܬܲܢܲܚ ܠܥܹܢܲܝܗܘܿܢ. [7]ܘܐܸܢ ܐܵܡܪܝܼܢ ܠܵܟ ܠܡܵܢܵܐ ܡܸܬ̇ܬܲܢܲܚ ܐܲܢ̄ܬ̇: ܐܸܡܲܪ ܠܗܘܿܢ: ܥܲܠ ܛܸܒܵܐ ܕܐܵܬܹ̇ܐ: ܘܡܸܬ̣ܡ̱ܣܹܝܢ ܟܠܗܘܿܢ ܠܸܒܵـ̈ـܘܵܬ̣ܵܐ: ܘܡܸܬ̣ܪ̈ܲܫܥܵܢ ܟܠܗܹܝܢ ܐܝܼ̈ܕܲܝܵܐ: ܘܟ̣ܵܝ̈ܒܵܢ ܟܠܗܹܝܢ ܪ̈ܘܼܚܵܬ̣ܵܐ: ܘܟ̣ܠܗܹܝܢ ܒܘܼܪ̈ܟܹ̇ܐ ܡܲܪ̈ܕ̇ܝܵܢ ܡܲـ̈ـܝܵܐ: ܗܵܐ ܐܸܬܲܬ̤ ܘܗܵܘܝܵܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. [8]ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ. [9]ܒܲܪܢܵܫܵܐ: ܐܸܬ̣ܢܲܒܵܐ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܣܲܝܦܵܐ ܣܲܝܦܵܐ ܐܸܬ̣ܠܲܛ̄ܫ. [10]ܘܐܸܬ̇ܛܲܝܲܒ̣ ܕܬܸܩܛܘܿܠ ܩܸܛܠܵܐ: ܕܬܲܒ̣ܪܸܩ ܘܐܸܬ̇ܛܲܝܲܒ̣ ܠܡܲܪܬܵܥܘܼ ܠܫܲܪܒ̇ܬܹܗ ܕܒܹܪܝ: ܘܐܲܣܠܵܐ ܟܠ ܩܹܝܣ. [11]ܘܝܲܗ̄ܒܹ̇ܗ ܠܛܘܼܝܵܒ̣ܵܐ: ܘܲܠܡܹܐܚܲܕܼ ܐܝܼܕܼܵܐ ܕܣܲܝܦܵܐ ܠܛܝܼܫܵܐ ܘܲܡܛܲܝܒ̣ܵܐ: ܕܢܲܫ̱ܠܡܝܼܘܗܝ ܒܐܝܼܕܼܵܐ ܕܩܵܛܘܿܠܹ̈ܐ. [12]ܓܠܝܼ ܘܐܲܝܠܸܠ ܒܲܪܢܵܫܵܐ: ܡܸܛܠ ܕܗ̤ܘ ܗܘ̤ܵܐ ܥܲܠ ܥܲܡܝ: ܘܥܲܠ ܟܠܗܘܿܢ ܪܵܘܪ̈ܒ̣ܵܢܹܐ ܕܝܼܣܪܵܝܹܠ. [13]ܩܘܿܫ ܟܲܦܵܐ ܡܸܛܠ ܕܐܸܙܕܲܕ̇ܩܲܬ̤ ܗܵܕܹܐ: ܘܐܸܢ ܫܲܪܒ̇ܬ̣ܵܐ ܐܸܣܬܲܠܝܲܬ̤: ܠܵܐ ܬܸܗܘܹܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. [14]ܐܲܢ̄ܬ̇ ܕܹܝܢ ܒܲܪܢܵܫܵܐ ܐܸܬ̣ܢܲܩܵܐ: ܘܩܘܿܫ ܟܲܦܵܐ ܐܝܼܕܼܵܐ ܥܲܠ ܐܝܼܕܼܵܐ: ܘܢܸܬ̣ܐ̱ܥܸܦ ܣܲܝܦܵܐ: ܘܣܲܝܦܵܐ ܕܲܬ̣ܠܵܬ̣ܵܐ ܕܲܩܛܝܼ̈ܠܹܐ ܗ̄ܘܼ: ܘܣܲܝܦܵܐ ܕܲܩܛܝܼ̈ܠܹܐ ܕܪܲܒܵܐ ܗ̄ܘܼ ܕܲܡܙܝܼܥ ܠܗܘܿܢ. [15]ܕܢܸܬ̇ܬ̇ܒܲܪ ܠܸܒ̇ܗܘܢ: ܘܢܸܣܓ̇ܘܿܢ ܟܪ̈ܝܼܗܹܐ ܒܟ̣ܠ ܬܲܪ̈ܥܲܝܗܘܿܢ: ܐܲܫ̱ܠܡܹ̇ܬ̣ ܐܸܢܘܿܢ ܠܣܲܝܦܵܐ ܕܲܠܛܝܼܫ ܘܡܲܒ̣ܪܸܩ: ܘܲܡܛܲܝܲܒ̣ ܠܩܸܛܠܵܐ. [16]ܚܲܡܣܸܢܝ ܝܲܡܝܼܢܝ ܘܚܲܡܣܸܢܝ ܣܸܡܵܠܝ: ܠܐܲܬܲܪ ܕܲܡܛܲܝ̈ܒ̣ܵܢ ܐܲܦܲܝ̈. [17]ܐܵܦ ܐܸܢܵܐ ܐܸܩܘܿܫ ܟܲܦܵܐ ܐܝܼܕܼܝ ܥܲܠ ܐܝܼܕܼܝ: ܚܸܡܬ̣ܝ: ܐܸܢܵܐ ܡܵܪܝܵܐ ܐܸܡ̇ܪܹܬ̣. [18]ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ. [19]ܐܲܢ̄ܬ̇ ܕܹܝܢ ܒܲܪܢܵܫܵܐ: ܥܒܸܕܼ ܠܵܟ ܬܲܪܬܹ̇ܝܢ ܐܘܼܪ̈ܚܵܢ: ܕܢܹܐܬܹܐ ܣܲܝܦܹܗ ܕܡܲܠܟܵܐ ܕܒ̣ܵܒܹܠ: ܘܡ̣ܢ ܐܲܪܥܵܐ ܚܕܼܵܐ ܢܸܦܩܘܼܢ ܬܪ̈ܲܝܗܘܿܢ: ܘܐܝܼܕܼܵܐ ܓܒ̣ܝܼܬ̣ܵܐ ܥܲܠ ܪܹܫ ܐܘܼܪܚܵܐ ܕܲܡܕܼܝܼܢ̄ܬܵܐ ܓܒ̣ܝܼܬ̣ܵܐ. [20]ܘܲܥܒܸܕܼ ܐܘܼܪܚܵܐ ܕܢܹܐܬܹܐ ܣܲܝܦܵܐ ܥܲܠ ܪܲܒ̇ܬ̣ ܕܲܒ̣ܢܲܝ̈ ܥܲܡܘܿܢ: ܘܥܲܠ ܝܑܼܗܘܼܕܼܵܐ ܘܥܲܠ ܐܘܿܪܸܫܠܸܡ ܥܲܫܝܼܢܬܵܐ. [21]ܡܸܛܠ ܕܩܵܡ ܡܲܠܟܵܐ ܕܒ̣ܵܒܹܠ: ܥܲܠ ܪܹܫ ܐܘܼܪܚܵܐ ܕܦܵܠܫܲܬ̣ ܐܘܼܪ̈ܚܵܬ̣ܵܐ ܠܡܸܩܨܲܡ ܩܸܨܡܵܐ: ܫܕܼܵܐ ܓܹܐܪܵܐ: ܘܲܫܐܸܠ ܒܲܦܬܲܟ̣ܪܹܗ: ܚܙ̣ܵܘ ܒܫܘܼܒ̣ܚܹܗ. [22]ܘܲܒ̣ܝܲܡܝܼܢܹܗ ܗܘ̤ܵܐ ܩܸܨܡܵܐ ܥܲܠ ܐܘܿܪܸܫܠܸܡ: ܕܢܲܟ̣ܡܸܢ ܥܠܹܝܗ̇ ܟܡܹܐܢܹ̈ܐ: ܘܢܸܦ̮ܬ̣ܚ ܦܘܼܡܹܗ ܒܥܘܼܫܢܹܗ: ܘܲܢܪܝܼܡ ܩܵܠܹܗ ܒܲܩܥܵܬ̣ܵܐ: ܘܲܢܩܝܼܡ ܬܸܠܹ̈ܐ ܠܘܼܩܒܲܠ ܬܲܪ̈ܥܹܝܗ̇: ܘܢܲܟ̣ܡܸܢ ܟܡܹܐܢܹ̈ܐ ܘܢܸܒ̣ܢܸܐ ܕܵܘܩܹ̈ܐ. [23]ܘܢܸܗܘܹܐ ܠܗܘܿܢ ܐܲܝܟ ܩܸܨܡܵܐ ܣܪܝܼܩܵܐ ܠܘܼܩܒܲܠ ܥܲܝܢܲܝ̈ܗܘܿܢ: ܘܗ̤ܘ ܢܸܬ̇ܕ̇ܟܲܪ ܥܵܘܼܠܵܐ ܘܢܸܬ̇ܬ̇ܚܸܕܼ. [24]ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܬ̇ܕ̇ܟ̣ܪܬ̇ܘܿܢ ܥܵܘܼܠܟ̣ܘܿܢ ܒܲܫܒ̣ܝܼܬ̣ܵܐ ܕܲܚܛܵܗܲܝ̈ܟ̇ܘܿܢ: ܘܲܚܙܲܝܬ̇ܘܿܢ ܚܛܵܗܲܝ̈ܟ̇ܘܿܢ ܘܟ̣ܠܗܹܝܢ ܨܸܢ̈ܥܵܬ̣ܟ̣ܘܿܢ: ܒܐܝܼܕܼܵܐ ܬܸܬܲܚܕ̇ܘܼܢ. [25]ܐܲܢ̄ܬ̇ ܕܹܝܢ ܛܲܢܦܵܐ ܚܲܛܵܝܵܐ ܪܲܒܵܐ ܕܝܼܣܪܵܝܹܠ: ܕܲܡ̣ܛܵܐ ܝܵܘܡܵܟ ܘܙܲܒ̣ܢܵܐ ܕܥܵܘܼܠܵܟ ܘܚܲܪܬ̣ܵܟ. [26]ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܣܲܒ̣ ܡܸܢܵܟ ܡܲܨܢܲܦܬ̣ܵܐ: ܘܐܲܢܝܼܚ ܡܸܢܵܟ ܟܠܝܼܠܵܐ: ܡܲܟ̇ܝܼܟ̣ܵܐ ܐܲܪܝܼܡ: ܘܪܵܡܵܐ ܐܲܡܸܟ. [27]ܐܵܦ ܗܵܕܹܐ ܠܥܵܘܼܠܵܐ ܘܲܠܥܸܬܵܐ ܐܸܥܒ̇ܕܼܝܼܗ̇: ܥܕܲܡܵܐ ܕܢܹܐܬܹܐ ܡ̣ܢ ܕܕܼܝܼܠܹܗ ܗ̤ܘ ܕܝܼܢܵܐ ܘܐܲܫ̱ܠܡܝܼܘܗܝ ܠܹܗ. [28]ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܬ̣ܢܲܒܵܐ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܒܢܲܝ̈ ܥܲܡܘܿܢ ܘܥܲܠ ܚܸܣܕ̇ܗܘܿܢ: ܘܐܸܡܲܪ: ܣܲܝܦܵܐ ܣܲܝܦܵܐ: ܕܲܡܛܲܝܲܒ̣ ܠܩܸܛܠܵܐ: ܘܲܠܛܝܼܫ ܘܡܲܒ̣ܪܸܩ. [29]ܥܲܠ ܚܸܙ̱ܘܟ̣ܘܿܢ ܣܪܝܼܩܵܐ: ܘܥܲܠ ܩܸܨܡܟ̣ܘܿܢ ܕܲܓܵܠܵܐ: ܠܡܸܬ̇ܠܵܟ ܥܲܠ ܨܵܘܪ̈ܲܝܗܘܿܢ ܕܚܲܛܵܝܹ̈ܐ ܥܵܘܿܠܹܐ: ܕܲܡ̣ܛܵܐ ܝܵܘܡܗܘܿܢ ܘܙܲܒ̣ܢܵܐ ܕܥܵܘܼܠܗܘܿܢ ܘܩܸܨܗܘܿܢ. [30]ܐܸܬ̣ܚܲܡ̄ܠ ܒܚܸܠܬ̣ܵܟ ܒܐܲܬ̣ܪܵܐ ܕܐܸܬ̣̱ܝܼܠܸܕ̇ܬ̇ ܒܹܗ: ܘܬܲܡܵܢ ܐܸܕ̇ܘܢܲܟ. [31]ܘܐܹܫܘܿܕܼ ܥܠܲܝܟ ܪܘܼܓ̣ܙܝ: ܘܲܒ̣ܢܘܼܪܵܐ ܕܚܸܡܬ̣ܝ ܐܸܦܘܿܚ ܒܵܟ: ܘܐܲܫ̱ܠܡܵܟ ܒܐܝܼܕܼܵܐ ܕܓܲܒ̣ܪܹ̈ܐ ܒܲܥܪܝܼܪ̈ܵܝܹܐ ܕܣܵܥ̇ܪܝܼܢ ܚܒ̣ܵܠܵܐ. [32]ܘܬܸܗܘܹܐ ܡܹܐܟ̣ܘܼܠܬܵܐ ܠܢܘܼܪܵܐ: ܘܲܕܼܡܵܟ ܢܸܗܘܹܐ ܒܓ̣ܵܘ ܐܲܪܥܵܐ: ܘܠܵܐ ܬܸܬ̇ܕ̇ܟܲܪ. ܡܸܛܠ ܕܐܸܢܵܐ ܡܵܪܝܵܐ ܡܲܠܠܹܬ̣.
 
Top