➕
←
Ezekiel
Eze
8
→
[1]ܘܲܗܘ̤ܵܐ ܒܫܲܢ̄ܬܵܐ ܫܬ̇ܝܼܬ̣ܵܝܬܵܐ: ܒܚܲܡܸܫܬܵܐ ܒܝܲܪܚܵܐ ܫܬ̇ܝܼܬ̣ܵܝܵܐ: ܐܸܢܵܐ ܝܵܬܹܒ̣ ܗ̄ܘܹ̇ܝܬ̣ ܒܒܲܝܬ̇ܝ: ܘܣܵܒܹ̈ܐ ܕܲܝܗܘܼܕܼܵܐ ܝܵܬ̣ܒ̇ܝܼܢ ܗ̄ܘܼܵܘ ܩܕܼܵܡܲܝ: ܘܢܸܦܠܲܬ̤ ܥܠܲܝ ܬܲܡܵܢ ܐܝܼܕܹܗ ܕܡܵܪܹܐ ܡܵܪ̈ܵܘܵܬ̣ܵܐ. [2]ܘܲܚܙܹ̇ܝܬ̣ ܘܗܵܐ ܕܡܘܼܬ̣ܵܐ ܐܲܝܟ ܚܸܙܘܵܐ ܕܢܘܼܪܵܐ: ܡܢ ܚܸܙܘܵܐ ܕܚܲܨܵܘ̈ܗܝ ܘܲܠܬܲܚܬ̇ ܢܘܼܪܵܐ: ܘܡ̣ܢ ܚܲܨܵܘ̈ܗܝ ܘܲܠܥܸܠ: ܚܙܹܝܬ̣ ܐܲܝܟ ܚܸܙܘܵܐ ܕܙܲܗܪܵܐ: ܘܐܲܝܟ ܚܸܙܘܵܐ ܕܐܲܠܵܗܵܐ. [3]ܘܐܵܘܫܸܛ̣ ܒܲܕܼܡܘܼܬ̣ܵܐ ܕܐܝܼܕܼܵܐ ܘܐܲܚܕܲܢܝ ܒܥܸܕܼܩܹ̈ܐ ܕܪܹܫܝ: ܘܲܫܩܲܠܬܲܢܝ ܪܘܼܚܵܐ ܒܹܝܬ̣ ܐܲܪܥܵܐ ܠܲܫܡܲܝܵܐ: ܘܐܲܝܬ̇ܝܵܬܲܢܝ ܠܐܘܿܪܸܫܠܸܡ ܒܚܸܙܘܵܐ ܕܐܲܠܵܗܵܐ: ܠܡܲܥܠܵܢܵܐ ܕܬܲܪܥܵܐ ܕܙܵܘܝܼܬ̣ܵܐ ܕܚܵܐܲܪ ܠܓܲܪܒ̇ܝܵܐ: ܘܬܲܡܵܢ ܩܵܝ̇ܡܵܐ ܩܵܝܹܡܬ̣ܵܐ ܕܲܛܢܵܢܵܐ. [4]ܘܗܵܐ ܬܲܡܵܢ ܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ: ܐܲܝܟ ܚܸܙܘܵܐ ܕܵܚܙܹ̇ܝܬ̣ ܒܲܦܩܲܥܬ̣ܵܐ. [5]ܘܐܸܡܲܪ ܠܝܼ: ܒܲܪܢܵܫܵܐ: ܐܲܪܝܼܡ ܥܲܝ̈ܢܲܝܟ ܠܐܘܼܪܚܵܐ ܕܓܲܪܒ̇ܝܵܐ ܘܐܲܪܝܼܡܹ̇ܬ̣ ܥܲܝܢܲܝ̈ ܠܐܘܼܪܚܵܐ ܕܓܲܪܒ̇ܝܵܐ: ܘܗܵܐ ܡ̣ܢ ܓܲܪܒ̇ܝܵܝܹܗ ܕܬܲܪܥܵܐ ܡܲܕܼܢ̱ܚܵܝܵܐ: ܩܵܝ̇ܡܵܐ ܩܵܝܹܡܬ̣ܵܐ ܕܲܛܢܵܢܵܐ ܒܡܲܥܠܵܢܹܗ. [6]ܘܐܸܡܲܪ ܠܝܼ: ܒܲܪܢܵܫܵܐ: ܚܙܲܝܬ̇ ܡܵܢܵܐ ܥܵܒ̣ܕ̇ܝܼܢ: ܛܲܢܦ̈ܘܵܬ̣ܵܐ ܪܵܘܪ̈ܒ̣ܵܬ̣ܵܐ ܕܥܵܒ̣ܕ̇ܝܼܢ ܕܒܹܝܬ̣ ܝܑܼܣܪܵܝܹܠ: ܕܐܸܬ̣ܪܲܚܲܩܘ ܡ̣ܢ ܡܲܩܕ̇ܫܝ: ܬܘܼܒ̣ ܬܸܗܦܘܿܟ ܬܸܚܙܹܐ ܛܲܢܦ̈ܘܵܬ̣ܵܐ ܪܵܘܪ̈ܒ̣ܵܬ̣ܵܐ ܕܥܵܒ̣ܕ̇ܝܼܢ. [7]ܘܐܲܥܠܲܢܝ ܒܬܲܪܥܵܐ ܕܕܼܵܪܬܵܐ: ܘܲܚܙܹ̇ܝܬ̣ ܢܸܩܒܵܐ ܚܲܕܼ ܒܐܸܣܬ̣ܵܐ. [8]ܘܐܸܡܲܪ ܠܝܼ: ܒܲܪܢܵܫܵܐ: ܚܦܘܿܪ ܒܐܸܣܬ̣ܵܐ: ܘܚܸܦ̇ܪܹܬ̣ ܒܐܸܣܬ̣ܵܐ: ܘܐܸܫܟ̇ܚܹܬ̣ ܬܲܪܥܵܐ ܚܲܕܼ. [9]ܘܐܸܡܲܪ ܠܝܼ: ܥܘܿܠ: ܘܲܚܙܝܼ ܛܲܢܦ̈ܘܵܬ̣ܵܐ ܘܒ̣ܝܼ̈ܫܵܬ̣ܵܐ ܕܥܵܒ̣ܕ̇ܝܼܢ ܗܵܪܟܵܐ. [10]ܘܥܸܠܲܬ̣ ܘܲܚܙܹ̇ܝܬ̣ ܟܠ ܕܼܡ̈ܘܵܬ̣ܵܐ ܕܪ̈ܲܚܫܵܐ ܘܕܲܒ̣ܥܝܼܪܵܐ ܘܲܕܼܛܲܢܦ̈ܘܵܬ̣ܵܐ. ܘܟ̣ܠܗܹܝܢ ܕܸܚ̈ܠܵܬ̣ܵܐ ܕܒܹܝܬ̣ ܝܑܼܣܪܵܝܹܠ: ܕܨܝܼܪ̈ܵܢ ܥܲܠ ܐܸܣܬ̣ܵܐ ܟܲܕܼ ܚܵܕܼܪܵܐ. [11]ܘܫܲܒ̣ܥܝܼܢ ܓܲܒ̣ܪ̈ܝܼܢ ܡ̣ܢ ܣܵܒܹ̈ܐ ܕܒܹܝܬ̣ ܝܑܼܣܪܵܝܹܠ: ܘܝܲܥܙܲܢܝܵܐ ܒܲܪ ܫܵܦܵܢ ܩܵܐܹ̇ܡ ܗ̄ܘܼܵܐ ܒܲܝܢܵܬ̣ܗܘܿܢ ܘܗܸܢܘܿܢ ܩܵܝܡܝܼܢ ܗ̄ܘܼܵܘ ܩܕܼܵܡܵܘܗܝ: ܘܐ̄ܢܵܫ ܦܝܼܪܡܹܗ ܒܐܝܼܕܹܗ: ܘܥܸܛܪܵܐ ܕܬܸܢܵܢܵܐ ܕܒܸܣܡܹ̈ܐ ܣܵܠܹ̇ܩ. [12]ܘܐܸܡܲܪ ܠܝܼ: ܚܵܙܹ̇ܐ ܐܲܢ̄ܬ̇ ܒܲܪܢܵܫܵܐ: ܡܸܕܸ̇ܡ ܕܥܵܒ̣ܕ̇ܝܼܢ ܣܵܒܹ̈ܐ ܕܒܹܝܬ̣ ܝܑܼܣܪܵܝܹܠ ܒܚܸܫܘܿܟ̣ܵܐ: ܐ̄ܢܵܫ ܒܬ̣ܵܘܵܢܹܗ ܟܲܣܝܵܐ: ܘܐܵܡ̇ܪܝܼܢ ܠܵܐ ܚܵܙܹ̇ܐ ܠܲܢ ܡܵܪܝܵܐ: ܡܸܛܠ ܕܫܲܒ̣ܩܵܗ̇ ܡܵܪܝܵܐ ܠܐܲܪܥܵܐ. [13]ܘܐܸܡܲܪ ܠܝܼ: ܬܘܼܒ̣ ܬܸܗܦܘܿܟ ܬܸܚܙܹܐ ܛܲܢܦ̈ܘܵܬ̣ܵܐ ܪܵܘܪ̈ܒ̣ܵܬ̣ܵܐ ܕܥܵܒ̣ܕܝܼܢ. [14]ܘܐܲܝܬ̇ܝܲܢܝ ܠܡܲܥܠܵܢܵܐ ܕܬܲܪܥܵܐ ܕܒܲܝܬܹ̇ܗ ܕܡܵܪܝܵܐ ܕܲܒ̣ܓܲܪܒ̇ܝܵܐ: ܘܲܚܙܹ̇ܝܬ̣ ܬܲܡܵܢ ܢܸܫܹ̈ܐ ܟܕܼ ܝܵܬ̣̈ܒܵܢ ܘܲܡܒܲـ̈ـܟ̇ܝܵܢ ܠܬܲܡܘܼܙܵܐ. [15]ܘܐܸܡܲܪ ܠܝܼ: ܚܵܙܹ̇ܐ ܐܲܢ̄ܬ̇ ܒܲܪܢܵܫܵܐ: ܬܘܼܒ̣ ܬܸܗܦܘܿܟ ܬܸܚܙܹܐ ܛܲܢܦ̈ܘܵܬ̣ܵܐ ܕܪܵܘܪ̈ܒ̣ܵܢ ܡ̣ܢ ܗܵܠܹܝܢ. [16]ܘܐܲܥܠܲܢܝ ܠܕܼܵܪܲܬ̣ ܒܲܝܬܹ̇ܗ ܕܡܵܪܝܵܐ ܓܵܘܵܝܬܵܐ: ܘܲܚܙܹ̇ܝܬ̣ ܒܬܲܪܥܵܐ ܕܗܲܝܟ̇ܠܹܗ ܕܡܵܪܝܵܐ ܒܹܝܬ̣ ܩܸܣܛܪܘܿܡܵܐ ܠܡܲܕܼܒ̇ܚܵܐ: ܐܲܝܟ ܥܸܣܪܝܼܢ ܘܚܲܡܫܵܐ ܓܲܒ̣ܪ̈ܝܼܢ ܩܵܝ̇ܡܝܼܢ: ܘܚܲܨܲܝ̈ܗܘܿܢ ܠܘܼܩܒܲܠ ܗܲܝܟ̇ܠܹܗ ܕܡܵܪܝܵܐ: ܘܐܲܦܲܝ̈ܗܘܿܢ ܠܡܲܕܼܢ̱ܚܵܐ: ܘܲܡܩܲܕ̇ܡܝܼܢ ܘܣܵܓ̣ܕܝܼܢ ܠܫܸܡܫܵܐ. [17]ܝܙ:ܘܐܸܡܲܪ ܠܝܼ: ܚܵܙܹ̇ܐ ܐܲܢ̄ܬ̇ ܒܲܪܢܵܫܵܐ: ܕܲܠܡܵܐ ܙܥܘܿܪܝܵܐ ܗ̄ܝܼ ܠܲܕܼܒܹܝܬ̣ ܝܑܼܗܘܼܕܼܵܐ ܛܲܢܦܘܼܬ̣ܵܐ ܗܵܕܹܐ ܕܥܵܒ̣ܕ̇ܝܼܢ ܗܵܪܟܵܐ: ܕܲܡܠܵܐܘܼܗ̇ ܠܐܲܪܥܵܐ ܥܵܘܼܠܵܐ ܘܲܗܦܲܟ̣ܘ ܠܡܲܪܓܵܙܘܼܬܲܢܝ. ܘܗܸܢܘܿܢ ܡܲܦܩ̄ܥܝܼܢ ܒܲܢܚܝܼܪ̈ܲܝܗܘܿܢ. [18]ܐܵܦ ܐܸܢܵܐ ܐܸܥܒܸ̇ܕܼ ܒܚܸܡܬ̣ܵܐ: ܘܠܵܐ ܬܚܘܼܣ ܥܲܝܢܝ ܘܠܵܐ ܐܹܪܲܚܸܡ: ܘܢܸܩܪܘܿܢ ܒܐܸܕܼܢܲܝ̈ ܒܩܵܠܵܐ ܪܵܡܵܐ ܘܠܵܐ ܐܸܫܡܲܥ ܐܸܢܘܿܢ.
 
Top