➕
   
Ezra
Ezr
1
→
[1]ܒܲܫܢܲܬ̣ ܚܕܼܵܐ ܠܟ̣ܘܼܪܸܫ ܡܲܠܟܵܐ ܕܦܵܪܹܣ: ܠܫܘܼܠܵܡ ܦܸܬ̣ܓ̣ܵܡܹܗ ܕܡܵܪܝܵܐ: ܡ̣ܢ ܦܸܬ̣ܓ̣ܵܡܹܗ ܕܐܹܪܲܡܝܵܐ ܢܒ̣ܝܼܵܐ: ܐܲܥܝܼܪ ܡܵܪܝܵܐ ܪܘܼܚܹܗ ܕܡܲܠܟܵܐ ܕܦܵܪܹܣ. ܘܐܲܥܒܲܪ ܩܵܠܵܐ ܒܟ̣ܠܵܗ̇ ܡܲܠܟ̇ܘܼܬܹܗ. ܘܐܵܦ ܒܲܟ̣ܬ̣ܵܒ̣ܵܐ ܐܸܡܲܪ. [2]ܗܵܟܲܢܵܐ ܐܵܡܲܪ ܟܘܼܪܸܫ ܡܲܠܟܵܐ ܕܦܵܪܹܣ: ܡܲܠܟ̇ܘܼܬ̣ܵܐ ܕܐܲܪܥܵܐ ܝܲܗ̄ܒ̣ ܠܝܼ ܡܵܪܝܵܐ ܐܲܠܵܗܵܐ ܕܲܫܡܲܝܵܐ. ܘܦܲܩܸܕܼ ܥܠܲܝ ܠܡܸܒ̣ܢܵܐ ܠܹܗ ܒܲܝܬܵܐ ܒܐܘܿܪܸܫܠܸܡ: ܩܪܝܼܬ̣ܵܐ ܕܒܲܝܗܘܼܕܼ. [3]ܡܲܢܘܼ ܕܐܝܼܬ̣ ܒܟ̣ܘܿܢ ܡ̣ܢ ܟܠܹܗ ܥܲܡܵܐ: ܘܗ̤ܘ ܐܲܠܵܗܹܗ ܥܲܡܹܗ: ܢܸܣܲܩ ܠܐܘܿܪܸܫܠܸܡ ܕܒܲܝܗܘܼܕܼ. ܘܢܸܒ̣ܢܸܐ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܗܵܘ̇ ܐܲܠܵܗܵܐ ܕܒ̣ܐܘܿܪܸܫܠܸܡ. [4]ܟܠ ܕܝܲܬ̇ܝܼܪ ܡ̣ܢ ܟܠ ܐܲܬ̣ܪ̈ܵܘܵܬ̣ܵܐ ܕܲܗܘ̤ܵܐ ܬܵܘܬܵܒ̣ܵܐ ܬܲܡܵܢ: ܢܸܫܩܠܘܼܢܹܗ ܐ̄ܢܵܫܲܝ̈ ܐܲܬ̣ܪܹܗ: ܒܟܸܣܦܵܐ: ܘܲܒ̣ܕܲܗܒ̣ܵܐ: ܘܲܒ̣ܩܸܢܝܵܢܵܐ: ܘܒܲܒ̣ܥܝܼܪܵܐ: ܥܲܡ ܦܘܼܪܫܵܢܵܐ ܠܒܲܝܬܵܐ ܕܐܲܠܵܗܵܐ ܕܒ̣ܐܘܿܪܸܫܠܸܡ. [5]ܘܩܵܡ̣ܘ ܪܹ̈ܫܲܝ ܐܲܒ̣ܵـ̈ـܗܵܬ̣ܵܐ ܕܲܝܗܘܼܕܼܵܐ: ܘܒܸܢܝܵܡܹܝܢ: ܘܟ̣ܘܼܡܪܹ̈ܐ: ܘܠܹܘܵܝܹ̈ܐ: ܘܟ̣ܠ ܕܐܲܥܝܼܪ ܐܲܠܵܗܵܐ ܪܘܼܚܹܗ: ܠܡܸܣܲܩ ܠܡܸܒ̣ܢܵܐ ܒܲܝܬܵܐ ܠܡܵܪܝܵܐ ܐܲܠܵܗܵܐ ܕܒ̣ܐܘܿܪܸܫܠܸܡ. [6]ܘܟ̣ܠ ܕܲܚܕܼܵܪ̈ܲܝܗܘܿܢ: ܐܸܚܲܕܼܘ ܒܐܝܼܕܲܝ̈ܗܘܿܢ ܡܵܐܢܲܝ̈ ܟܸܣܦܵܐ: ܘܕܲܗܒ̣ܵܐ: ܘܩܸܢܝܵܢܵܐ: ܘܲܒ̣ܥܝܼܪܵܐ: ܘܡܵܘܗ̈ܒ̣ܵܬ̣ܵܐ ܕܛܵܒ̣: ܡ̣ܢ ܐܲܝܠܹܝܢ ܕܐܸܨܛܒ̣ܝܼܘ. [7]ܘܡܲܠܟܵܐ ܟܘܼܪܸܫ ܐܲܦܸܩ̣ ܡܵܐܢܲܝ̈ ܒܲܝܬܹ̇ܗ ܕܡܵܪܝܵܐ: ܕܐܲܦܸܩ̣ ܗ̄ܘ̣ܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ ܕܒ̣ܵܒܹܠ ܡ̣ܢ ܐܘܿܪܸܫܠܸܡ: ܘܝܲܗ̄ܒ̣ ܐܸܢܘܿܢ ܒܹܝܬ̣ ܐܲܠܵܗܘܼܬܹܗ. [8]ܘܐܲܦܸܩ ܐܸܢܘܿܢ ܟܘܼܪܸܫ ܡܲܠܟܵܐ ܕܦܵܪܹܣ: ܥܲܠ ܐܝܼܕܼܵܐ ܕܡܲܗܕ̇ܪܲܬ̣ ܓܹܙܲܒ̣ܪܵܐ. ܘܐܲܫܠܸܡ ܐܸܢܘܿܢ ܠܫܸܫܡܵܨܵܪ ܪܲܒܵܐ ܕܲܝܗܘܼܕܼܵܐ. [9]ܘܗܵܠܹܝܢ ܡܸܢܝܵܢܗܘܿܢ. ܘܐܲܓܵܢܹ̈ܐ ܕܕܲܗܒ̣ܵܐ ܬܠܵܬ̣ܝܼܢ: ܘܐܲܓܵܢܹ̈ܐ ܕܟܸܣܦܵܐ ܐܵܠܹܦ: ܐܸܣܛ̈ܠܹܐ ܥܸܣܪܝܼܢ ܘܲܬ̣ܫܲܥ. [10]ܦܸܛܩܹ̈ܐ ܕܟܸܣܦܵܐ ܐܲܥܝܼܦܵܐ ܐܲܪܒܲܥܡܵܐܐ ܘܥܸܣܪܝܼܢ: ܬܘܼܒ̣ ܦܸܛܩܹ̈ܐ ܕܕܲܗܒ̣ܵܐ ܬܠܵܬ̣ܝܼܢ: ܘܡܵܐܢܹ̈ܐ ܐ̄ܚܪ̈ܵܢܹܐ ܐܵܠܹܦ. [11]ܟܠ ܡܵܐܢܹ̈ܐ ܕܕܲܗܒ̣ܵܐ ܘܲܕܼܣܹܐܡܵܐ: ܚܲܡܫܵܐ ܐܲܠܦ̈ܝܼܢ ܘܐܲܪܒܲܥܡܵܐܐ ܟܠܗܘܿܢ ܐܲܣܸܩ̣ ܐܸܢܘܿܢ ܫܸܫܡܵܨܵܪ ܥܲܡ ܡܲܣܩܵܢܹ̈ܐ ܕܲܫܒ̣ܝܼܬ̣ܵܐ ܕܣܸܠܩܲܬ̤ ܡ̣ܢ ܒܵܒܹܠ ܠܐܘܿܪܸܫܠܸܡ.
 
Top