➕
←
Ezra
Ezr
5
→
[1]ܘܐܸܬ̣ܢܲܒ̇ܝܼ ܚܲܓܝ ܢܒ̣ܝܼܵܐ: ܘܲܙܟܲܪܝܵܐ ܒܲܪ ܥܲܕ̇ܘܿ ܢܒ̣ܝܼܵܐ: ܥܲܠ ܝܗ̄ܘܼܕܼܵܝܹ̈ܐ ܕܐܝܼܬ̣ ܒܐܘܿܪܸܫܠܸܡ: ܘܒܲܝܗܘܼܕܼ: ܒܲܫܡܵܐ ܕܐܲܠܵܗܵܐ ܕܝܼܣܪܵܝܹܠ ܥܲܠܝܗܘܿܢ. [2]ܘܗܵܝܕܹ̇ܝܢ ܩܵܡ̣ ܙܘܼܪܒܵܒܹܠ ܒܲܪ ܫܸܠܲܬ̣ܐܹܝܠ: ܘܝܼܫܘܿܥ ܒܲܪ ܝܘܿܙܵܕܼܵܩ ܘܫܲܪܝܼܘ ܠܡܸܒ̣ܢܵܐ ܒܲܝܬܵܐ ܕܐܲܠܵܗܵܐ ܕܒ̣ܐܘܿܪܸܫܠܸܡ: ܘܥܲܡܗܘܿܢ ܢܒ̣ܝܹ̈ܐ ܕܐܲܠܵܗܵܐ: ܡܥܲܕܪܝܼܢ ܠܗܘܿܢ. [3]ܒܹܗ ܕܹܝܢ ܒܙܲܒ̣ܢܵܐ ܗܵܘ̇: ܐܸܬ̣ܵܐ ܥܠܲܝܗܘܿܢ ܬܲܬ̣ܢܲܝ ܫܲܠܝܼܛܵܐ ܕܒܲܥܒܲܪ ܢܲܗܪܵܐ. ܘܐܸܫܬܲܢܒ̇ܘܿܙܵܢ ܘܕܲܐܟ̣ܘܵܬ̣ܗܘܿܢ. ܘܗܵܟܲܢܵܐ ܐܵܡ̇ܪܝܼܢ ܠܗܘܿܢ ܘܲܠܫܲܪܟܵܐ: ܡܲܢܘܼ ܦ̣ܩܲܕܼ ܠܟ̣ܘܿܢ ܒܲܝܬܵܐ ܗܵܢܵܐ ܠܡܸܒ̣ܢܵܐ: ܘܫܘܼܪܵܐ ܗܵܢܵܐ ܠܲܡܪܵܡܘܼ. [4]ܘܗܵܝܕܹ̇ܝܢ ܐܲܝܟ̣ ܢܵܡܘܿܣܵܐ ܐܸܡܲܪܘ ܠܗܘܿܢ.ܡܲܢ ܐܸܢܘܿܢ ܫܡܵܗܹ̈ܐ ܕܓܲܒ̣ܪܹ̈ܐ ܗܵܠܹܝܢ: ܕܗܵܢܵܐ ܒܸܢܝܵܢܵܐ ܒܵܢܹ̇ܝܢ. [5]ܘܥܲܝܢܵܐ ܕܐܲܠܵܗܵܐ ܗܘ̤ܵܬ̣ ܥܲܠ ܫܒ̣ܝܼܬ̣ܵܐ ܕܲܝܗܘܼܕܼܵܐ. ܘܠܵܐ ܒܛܸܠܘ ܥܕܲܡܵܐ ܕܦܸܬ̣ܓ̣ܵܡܵܐ ܠܕܼܵܪܝܵܘܵܫ ܢܹܐܙܲܠ. ܘܗܵܝܕܹ̇ܝܢ ܢܸܬ̣ܝܼܒ̣ܘܼܢ ܦܸܬ̣ܓ̣ܵܡܵܐ ܥܲܠ ܗܵܕܹܐ. [6]ܦܲܪܫܲܓ̣ܢܵܐ ܕܐܸܓܲܪܬܵܐ ܕܫܲܕܲܪ ܬܲܬ̣ܢܝ ܫܲܠܝܼܛܵܐ ܕܒܲܥܒܲܪ ܢܲܗܪܵܐ: ܘܐܸܫܬܲܢܒ̇ܘܿܙܵܢ ܘܚܲܒ̣ܪ̈ܵܘܗܝ ܕܒܲܥܒܲܪ ܢܲܗܪܵܐ: ܠܘܵܬ̣ ܕܵܪܝܵܘܵܫ ܡܲܠܟܵܐ. [7]ܦܸܬ̣ܓ̣ܵܡܵܐ ܫܲܕܲܪܘ ܠܘܵܬܹܗ. ܘܗܵܟܲܢܵܐ ܟܬ̣ܝܼܒ̣ ܒܹܗ. ܠܕܼܵܪܝܵܘܵܫ ܡܲܠܟܵܐ: ܫܠܵܡ. [8]ܢܸܗܘܹܐ ܕܹܝܢ ܝܵܕܲܥ ܡܲܠܟܵܐ: ܕܐܸܙܲܠܢܲܢ ܠܲܝܗܘܼܕܼ ܠܲܡܕܼܝܼܢ̄ܬܵܐ ܕܐܲܠܵܗܵܐ ܪܲܒܵܐ. ܘܗ̤ܝ ܡܸܬ̣ܒܲܢܝܵܐ ܒܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ. ܘܥܲܪ̈ܩܹܐ ܣܘܿܓ̣ܵܐܐ ܩܛܝܼܪ̈ܵܢ ܒܐܸܣܹ̈ܝܗ̇. ܘܲܥܒ̣ܝܼܕܼܵܬ̣ܵܐ ܪܵܘ̱ܪ̈ܒ̣ܵܬ̣ܵܐ ܡܸܬ̣ܥܲܒ̣̈ܕܵܢ ܬܲܡܵܢ. ܘܲܥܒ̣ܵܕܼܵܐ ܪܲܒܵܐ ܣܵܠܹܩ ܘܐܵܙܹ̇ܠ ܠܪܹܫ ܒܐܝܼܕܲܝ̈ܗܘܿܢ. [9]ܘܗܵܝܕܹ̇ܝܢ ܫܲܐܸܠ̄ܢ ܐܸܢܘܿܢ ܠܩܲܫܝܼܫܹ̈ܐ ܗܵܢܘܿܢ: ܘܗܵܟܲܢܵܐ ܐܸܡܲܪܢ ܠܗܘܿܢ: ܡܲܢܘܼ ܦ̣ܩܲܕܼ ܠܟ̣ܘܿܢ ܒܲܝܬܵܐ ܗܵܢܵܐ ܠܡܸܒ̣ܢܵܐ: ܘܫܘܼܪܵܐ ܗܵܢܵܐ ܠܲܡܪܵܡܘܼ. [10]ܘܐܵܦ ܫܡܵܗܲܝ̈ܗܘܿܢ ܫܲܐܸܠ̄ܢ ܐܸܢܘܿܢ: ܕܢܵܘܕ̇ܥܵܟ ܘܲܕܼܢܸܟ̣ܬ̇ܘܿܒ̣ ܫܡܵܗܹ̈ܐ ܕܓܲܒ̣ܪܹ̈ܐ ܕܲܒ̣ܪܹ̈ܫܲܝܗܘܿܢ. [11]ܘܗܵܟܲܢܵܐ ܐܲܬ̣ܝܼܒ̣ܘܼܢ ܦܸܬ̣ܓ̣ܵܡܵܐ ܘܐܵܡ̇ܪܝܼܢ: ܚܢܲܢ ܐܸܢܘܿܢ ܥܲܒ̣ܕܵܘ̈ܗܝ ܕܐܲܠܵܗ ܫܡܲܝܵܐ. ܘܒܸܢܝܵܢܵܐ ܕܒܲܝܬܵܐ ܗܵܢܵܐ ܕܒ̣ܵܢܹܝܢܲܢ: ܒܢܸܐ ܗ̄ܘ̣ܵܐ ܡ̣ܢ ܩܕܼܵܡ ܫܢܲـ̈ـܝܵܐ ܣܲܓܝܼ̈ܐܵܬ̣ܵܐ. ܘܡܲܠܟܵܐ ܕܝܼܣܪܵܝܹܠ ܘܪܵܘ̱ܪ̈ܒ̣ܵܢܵܘܗܝ ܫܲܟ̣ܠܠܘܼܗܝ. [12]ܐܸܠܵܐ ܡܸܛܠ ܕܐܲܪܓܸ̇ܙܘ ܐܲܒ̣ܵܗܲܝ̈ܢ ܠܐܲܠܵܗ ܫܡܲܝܵܐ: ܝܲܗ̄ܒ̣ ܐܸܢܘܿܢ ܒܐܝܼܕܵܐ ܕܲܢܒ̣ܘܼܟܲܕܼܢܵܨܲܪ ܡܲܠܟܵܐ ܟܲܠܕܵܝܵܐ. ܗܵܢܵܐ ܣܲܬ̣ܪܹܗ. ܘܥܲܡܵܐ ܫܒ̣ܵܐ ܠܒ̣ܵܒܹܠ. [13]ܒܪܲܡ ܒܲܫܢܲܬ̣ ܚܕܼܵܐ ܠܟ̣ܘܼܪܸܫ ܡܲܠܟܵܐ ܕܦܵܪܹܣ: ܟܘܼܪܸܫ ܡܲܠܟܵܐ ܣܵܡ̣ ܢܵܡܘܿܣܵܐ: ܕܒܹܝܬ̣ ܐܲܠܵܗܵܐ ܗܵܢܵܐ ܠܡܸܒ̣ܢܵܐ. [14]ܘܐܵܦ ܡܵܐܢܹ̈ܐ ܕܕܲܗܒ̣ܵܐ ܘܲܕܼܣܹܐܡܵܐ ܕܒܹܝܬ̣ ܐܲܠܵܗܵܐ: ܕܐܲܦܸܩ̣ ܗ̄ܘ̣ܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ ܡ̣ܢ ܗܲܝܟ̇ܠܵܐ ܕܒ̣ܐܘܿܪܸܫܠܸܡ: ܘܐܵܘܒܸ̇ܠ̣ ܐܸܢܘܿܢ ܠܒ̣ܵܒܹܠ ܠܗܲܝܟ̇ܠܹܗ. ܘܐܲܦܸܩ̣ ܐܸܢܘܿܢ ܟܘܼܪܸܫ ܡܲܠܟܵܐ ܡ̣ܢ ܗܲܝܟ̇ܠܵܐ ܕܒ̣ܵܒܹܠ: ܘܝܲܗ̄ܒ̣ ܐܸܢܘܿܢ ܠܫܸܫܡܵܨܵܪ ܫܡܹܗ: ܡܸܛܠ ܕܫܲܠܝܼܛܵܐ ܥܵܒ̣ܕܹ̇ܗ. [15]ܘܐܸܡܲܪ ܠܹܗ: ܕܗܵܠܹܝܢ ܡܵܐܢܹ̈ܐ ܫܩܘܿܠ: ܙܠ ܘܐܵܘܒܸ̇ܠ: ܣܝܼܡ ܐܸܢܘܿܢ ܒܗܲܝܟ̇ܠܵܐ ܕܒ̣ܐܘܿܪܸܫܠܸܡ. ܘܗ̤ܘ ܗ̄ܘ̣ ܒܲܝܬܵܐ: ܒܐܲܬ̣ܪܹܗ ܢܸܬ̣ܒ̇ܢܹܐ. [16]ܗ̤ܘ ܕܹܝܢ ܫܸܫܡܵܨܵܪ ܐܸܬ̣ܵܐ: ܘܐܲܪܡܝܼ ܫܲܬ̣̱ܐܣܹ̈ܐ ܕܒܲܝܬܵܐ ܗܵܢܵܐ ܕܒ̣ܐܘܿܪܸܫܠܸܡ ܘܡ̣ܢ ܗܵܝܕܹ̇ܝܢ ܘܲܥܕܲܡܵܐ ܠܗܵܫܵܐ ܡܸܬ̣ܒ̇ܢܹܐ: ܘܠܵܐ ܓܵܡܲܪ. [17]ܡܸܟܹ̇ܝܠ ܐܸܢ ܫܲܦܝܼܪܵܐ ܩܕܼܵܡ ܡܲܠܟܵܐ: ܢܸܒ̣ܨܹܐ ܒܲܟ̣ܬ̣ܵܒܹ̈ܐ: ܕܐܝܼܬ̣ ܒܹܝܬ̣ ܓܲܙܵܐ ܕܡܲܠ̈ܟܹ̇ܐ ܕܒ̣ܵܒܹܠ ܐܸܢ ܐܝܼܬ̣ܵܘܗܝ: ܘܡ̣ܢ ܟܘܼܪܸܫ ܡܲܠܟܵܐ ܦܩܝܼܕܼ: ܕܢܸܬ̣ܒ̇ܢܹܐ ܒܲܝܬܵܐ ܗܵܢܵܐ ܕܐܲܠܵܗܵܐ ܕܒ̣ܐܘܿܪܸܫܠܸܡ ܘܨܸܒ̣ܝܵܢܹܗ ܕܡܲܠܟܵܐ ܥܲܠ ܗܵܕܹܐ ܢܸܫܬܲܕܲܪ ܠܘܵܬܲܢ.
 
Top