Peshitta OT
Peshitta OT
➕
←
Judges
Jdg
13
→
[
1
]
ܘܐܵܘܣܸܦܘ
ܬܘܼܒ̣ ܒ̈ܢܲܝ ܝܼܣܪܵܝܹܠ ܠܡܸܥܒܲܕܼ ܕܒ̣ܝܼܫ ܩܕܼܵܡ ܡܵܪܝܵܐ: ܘܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕܼܵܐ ܕܲܦܠܸܫܬܵܝܹ̈ܐ ܐܲܪܒ̇ܥܝܼܢ ܫܢ̈ܝܼܢ.
[
2
]
ܘܲܗܘ̤ܵܐ
ܓܲܒ̣ܪܵܐ ܚܲܕܼ ܡ̣ܢ ܨܸܕܼܥܵܐ: ܡ̣ܢ ܫܲܪܒ̇ܬ̣ܵܐ ܕܕܼܵܢ: ܘܲܫܡܹܗ ܡܢܘܿܚ: ܘܐܲܢ̄ܬ̇ܬܹܗ ܥܩܲܪܬ̣ܵܐ ܗ̄ܘ̣ܵܬ̣ ܘܠܵܐ ܝܵܠܕܵܐ.
[
3
]
ܘܐܸܬ̣ܚܙܝܼ
ܡܲܠܲܐܟܹܗ ܕܡܵܪܝܵܐ ܠܐܲܢ̄ܬ̇ܬ̣ܵܐ ܗܵܝ̇: ܘܐܸܡܲܪ ܠܵܗ̇: ܗܵܐ ܐܲܢ̄ܬ̇ܝ ܥܲܩܪܵܐ ܘܠܵܐ ܝܵܠܕܵܐ: ܗܵܫܵܐ ܬܸܒ̣ܛܢܝܼܢ ܘܬܹܐܠܕ̇ܝܼܢ ܒܪܵܐ.
[
4
]
ܐܸܙܕܲܗ̄ܪܝ
ܕܲܠܡܵܐ ܬܸܫܬܹ̇ܝܢ ܚܲܡܪܵܐ ܐܵܘ ܫܲܟ̣ܪܵܐ. ܘܠܵܐ ܬܹܐܟ̣ܠܝܼܢ ܟܠ ܡܸܕܸ̇ܡ ܕܲܛܡܲܐ.
[
5
]
ܡܸܛܠ
ܕܗܵܐ ܒܵܛܢܵܐ ܐܲܢ̄ܬ̇ܝ ܘܝܵܠܕܵܐ ܐܲܢ̄ܬ̇ܝ ܒܪܵܐ: ܘܲܡܕܲܟܝܵܐ ܠܵܐ ܢܸܣܲܩ ܥܲܠ ܪܹܫܹܗ: ܡܸܛܠ ܕܲܢܙܝܼܪܹܗ ܕܐܲܠܵܗܵܐ ܢܸܗܘܹܐ ܛܲܠܝܵܐ ܡ̣ܢ ܡܲܪܒ̇ܥܵܐ: ܘܗ̤ܘ ܢܫܲܪܸܐ ܠܡܸܦܪܲܩ ܠܝܼܣܪܵܝܹܠ ܡ̣ܢ ܐܝܼܕܼܵܐ ܕܲܦܠܸܫܬܵܝܹ̈ܐ.
[
6
]
ܘܐܸܬ̣ܵܬ̣
ܐܲܢ̄ܬ̇ܬ̣ܵܐ ܘܐܸܡܪܲܬ̤ ܠܒ̣ܵܥܠܵܗ̇: ܓܲܒ̣ܪܵܐ ܕܐܲܠܵܗܵܐ ܐܸܬ̣ܵܐ ܠܘܵܬ̣ܝ: ܘܐܸܬ̣ܚ̄ܙܝܼ ܠܝܼ ܒܚܸܙܘܵܐ ܕܡܲܠܲܐܟ̣ܵܐ ܕܐܲܠܵܗܵܐ: ܘܙܵܥܹܬ̣ ܛܵܒ̣: ܘܠܵܐ ܫܲܐܠܬܹ̇ܗ ܡ̣ܢ ܐܲܝܡܸܟܵܐ ܗ̄ܘ̣: ܘܲܫܡܹܗ ܠܵܐ ܚܵܘܝܼ̈ܢܝ.
[
7
]
ܘܐܸܡܲܪ
ܠܝܼ: ܕܗܵܐ ܒܵܛܢܵܐ ܐܲܢ̄ܬ̇ܝ ܘܝܵܠܕܵܐ ܐܲܢ̄ܬܲܝ ܒܪܵܐ: ܡܸܟܹ̇ܝܠ ܠܵܐ ܬܸܫܬܹ̇ܝܢ ܚܲܡܪܵܐ ܘܫܲܟ̣ܪܵܐ: ܘܠܵܐ ܬܹܐܟ̣ܠܝܼܢ ܟܠ ܡܸܕܸ̇ܡ ܕܲܛܡܲܐ: ܡܸܛܠ ܕܲܢܙܝܼܪܹܗ ܕܐܲܠܵܗܵܐ ܢܸܗܘܹܐ ܛܲܠܝܵܐ ܡ̣ܢ ܡܲܪܒ̇ܥܵܐ ܥܕܲܡܵܐ ܠܝܵܘܡܵܐ ܕܡܵܐܹ̇ܬ̣.
[
8
]
ܘܲܒ̣ܥܵܐ
ܡܢܘܿܚ ܡ̣ܢ ܡܵܪܝܵܐ ܘܐܸܡܲܪ: ܒܒ̣ܵܥܘܼ ܡܵܪܝܵܐ: ܓܲܒ̣ܪܵܐ ܕܐܲܠܵܗܵܐ ܕܫܲܕܲܪܬ̇: ܢܹܐܬܹܐ ܬܘܼܒ̣ ܠܘܵܬܲܢ: ܘܢܲܠܦܲܢ ܡܵܢܵܐ ܢܸܥܒܸ̇ܕܼ ܠܹܗ ܠܛܲܠܝܵܐ ܕܡܸܬ̣̱ܝܼܠܸܕܼ.
[
9
]
ܘܲܫ̣ܡܲܥ
ܡܵܪܝܵܐ ܒܩܵܠܹܗ ܕܲܡܢܘܿܚ: ܘܐܸܬ̣ܵܐ ܬܘܼܒ̣ ܡܲܠܲܐܟܹ̇ܗ ܕܡܵܪܝܵܐ ܠܘܵܬ̣ ܐܲܢ̄ܬ̇ܬ̣ܵܐ: ܘܗ̤ܝ ܝܵܬ̣ܒܵܐ ܗ̄ܘ̣ܵܬ̣ ܒܚܲܩܠܵܐ: ܘܲܡܢܘܿܚ ܒܲܥܠܵܗ̇ ܠܵܐ ܗ̄ܘ̣ܵܐ ܠܘܵܬ̣ܵܗ̇.
[
10
]
ܘܐܸܣܬܲܪ̱ܗܒܲܬ̤
ܐܲܢ̄ܬ̇ܬ̣ܵܐ: ܘܪܸܗܛܲܬ̤ ܘܚܵܘܝܲܬ̤ ܠܒܲܥܠܵܗ̇: ܘܐܵܡ̇ܪܵܐ ܠܹܗ: ܗܵܐ ܐܸܬ̣ܚ̄ܙܝܼ ܠܝܼ ܓܲܒ̣ܪܵܐ ܕܐܸܬ̣ܵܐ ܒܗܵܘ̇ ܝܵܘܡܵܐ ܠܘܵܬ̣ܝ.
[
11
]
ܘܩܵܡ
ܡܢܘܿܚ ܘܐܸܙܲܠ ܥܲܡ ܐܲܢ̄ܬ̇ܬܹܗ: ܘܐܸܬ̣ܵܐ ܠܘܵܬ̣ ܓܲܒ̣ܪܵܐ: ܘܐܸܡܲܪ ܠܹܗ: ܐܲܢ̄ܬ̇ ܗ̄ܘ̣ ܓܲܒ̣ܪܵܐ ܕܡܲܠܠܸܬ̇ ܥܲܡ ܗܵܕܹܐ ܐܲܢ̄ܬ̇ܬ̣ܵܐ. ܘܐܸܡܲܪ ܐܸܢܵܐ ܗ̄ܘ̣.
[
12
]
ܘܐܸܡܲܪ
ܡܢܘܿܚ: ܗܵܫܵܐ ܗܵܘܹ̇ܐ ܦܸܬ̣ܓ̣ܵܡܵܟ̣: ܐܸܡܲܪ ܠܝܼ ܡܵܢܵܘ ܕܝܼܢܹܗ ܕܛܲܠܝܵܐ ܘܥܲܒ̣ܕܼܵܘ̈ܗܝ.
[
13
]
ܘܐܸܡܲܪ
ܡܲܠܲܐܟܹ̇ܗ ܕܡܵܪܝܵܐ ܠܲܡܢܘܿܚ: ܡ̣ܢ ܟܠ ܡܸܕܸ̇ܡ ܕܐܸܡ̇ܪܹܬ̣ ܠܐܲܢ̄ܬ̇ܬ̣ܵܐ ܬܸܙܕ̇ܗܲܪ.
[
14
]
ܘܡ̣ܢ
ܟܠ ܕܢܵܦܹ̇ܩ ܡ̣ܢ ܓܦܸܬܵܐ ܠܵܐ ܬܹܐܟ̣ܘܿܠ: ܘܚܲܡܪܵܐ ܘܫܲܟ̣ܪܵܐ ܠܵܐ ܬܸܫܬܹ̇ܐ: ܘܟ̣ܠ ܕܲܛܡܲܐ ܠܵܐ ܬܹܐܟ̣ܘܿܠ: ܘܟ̣ܠ ܕܦܲܩܸܕ̇ܬܵܗ̇ ܬܸܛܲܪ.
[
15
]
ܘܐܸܡܲܪ
ܡܢܘܿܚ ܠܡܲܠܲܟܹܗ ܕܡܵܪܝܵܐ: ܢܸܟ̣ܠܹܝܟ ܘܢܸܥܒܸ̇ܕܼ ܓܲܕܼܝܵܐ ܕܥܸܙܹ̈ܐ ܩܕܼܵܡܲܝܟ.
[
16
]
ܘܐܸܡܲܪ
ܡܲܠܲܐܟܹ̇ܗ ܕܡܵܪܝܵܐ ܠܲܡܢܘܿܚ: ܐܸܢ ܬܸܟ̣ܠܹܝܢܝ ܠܵܐ ܐܹܟܘܿܠ ܡ̣ܢ ܠܲܚܡܵܟ̣. ܘܐܸܢ ܬܲܣܸܩ ܥܠܵܬ̣ܵܐ: ܠܡܵܪܝܵܐ ܬܲܣܩܝܼܗ̇ ܡܸܛܠ ܕܠܵܐ ܝܵܕܼܵܥ ܗ̄ܘ̣ܵܐ ܡܢܘܿܚ ܕܡܲܠܲܟܹ̇ܗ ܗ̄ܘ̣ ܕܡܵܪܝܵܐ.
[
17
]
ܘܐܸܡܲܪ
ܡܢܘܿܚ ܠܡܲܠܲܐܟܹܗ ܕܡܵܪܝܵܐ: ܡܵܢܵܘ ܫܡܵܟ̣ ܕܡܵܐ ܕܲܗܘ̤ܵܐ ܦܸܬ̣ܓ̣ܵܡܵܟ̣ ܢܸܩܪܹܝܟ.
[
18
]
ܘܐܸܡܲܪ
ܠܹܗ ܡܲܠܲܐܟܹܗ ܕܡܵܪܝܵܐ: ܠܡܵܢܵܐ ܫܵܐܹܠ ܐܲܢ̄ܬ̇ ܥܲܠ ܫܹܡܝ ܕܗ̤ܘ ܡܫܲܒܲܚ.
[
19
]
ܘܲܢܣܲܒ̣
ܡܢܘܿܚ ܓܲܕܼܝܵܐ ܕܥܸܙܹ̈ܐ: ܘܲܣܡܝܼܕܼܵܐ: ܘܐܲܣܸܩ ܥܲܠ ܟܹܐܦܵܐ ܠܡܵܪܝܵܐ ܘܲܡܫܲܒܲܚ ܗ̄ܘ̣ܵܐ ܠܡܵܪܝܵܐ.
[
20
]
ܘܲܡܢܘܿܚ
ܘܐܲܢ̄ܬ̇ܬܹܗ ܚܵܙܹܝܢ ܗ̄ܘ̣ܵܘ: ܟܲܕܼ ܣܸܠܩܲܬ̤ ܫܲܠܗܹܒ̣ܝܼܬ̣ܵܐ ܕܢܘܼܪܵܐ ܡ̣ܢ ܟܹܐܦܵܐ ܠܲܫܡܲܝܵܐ: ܘܲܣܠܸܩ ܡܲܠܲܐܟܹܗ ܕܡܵܪܝܵܐ ܒܫܵܠܗܹܒ̣ܝܼܬ̣ܵܐ ܕܡܲܕܼܒ̇ܚܵܐ: ܘܲܡܢܘܿܚ ܘܐܲܢ̄ܬ̇ܬܹܗ ܚ̣ܙܵܘ: ܘܲܢܦܲܠܘ ܥܲܠ ܐܲܦܲܝ̈ܗܘܿܢ ܥܲܠ ܐܲܪܥܵܐ: ܘܲܣܓܸܕܼܘ.
[
21
]
ܘܠܵܐ
ܐܵܘܣܸܦ ܬܘܼܒ̣ ܡܲܠܲܐܟܹܗ ܕܡܵܪܝܵܐ ܠܡܸܬ̣ܚܙܵܝܘܼ ܠܲܡܢܘܿܚ ܘܠܲܐܢ̄ܬ̇ܬܹܗ: ܘܗܵܝܕܹ̇ܝܢ ܝܼܕܲܥ̣ܘ ܡܢܘܿܚ ܘܐܲܢ̄ܬ̇ܬܹܗ: ܕܡܲܠܲܐܟܹܗ ܗ̄ܘ̣ ܕܡܵܪܝܵܐ.
[
22
]
ܘܐܸܡܲܪ
ܡܢܘܿܚ ܠܐܲܢ̄ܬ̇ܬܹܗ: ܡܡܵܬ̣ ܡܵܝܬܝܼܢ ܚ̄ܢܲܢ: ܡܸܛܠ ܕܠܲܐܠܵܗܵܐ ܚܙܲܝܢ.
[
23
]
ܘܐܸܡܪܲܬ̤
ܠܹܗ ܐܲܢ̄ܬ̇ܬܹܗ: ܐܸܠܘܼ ܨܵܒܹ̇ܐ ܗ̄ܘ̣ܵܐ ܐܲܠܵܗܵܐ ܕܲܢܡܝܼܬܲܢ: ܠܵܐ ܡܩܲܒܸ̇ܠ ܗ̄ܘ̣ܵܐ ܡܸܢܲܢ ܥܠܵܬ̣ܵܐ ܘܲܣܡܝܼܕܼܵܐ: ܘܠܵܐ ܡܚܵܘܸܐ ܗ̄ܘ̣ܵܐ ܠܲܢ ܗܵܠܹܝܢ ܟܠܗܹܝܢ ܒܗܵܢܵܐ ܙܲܒ̣ܢܵܐ: ܘܠܵܐ ܡܲܫܡܲܥ ܗ̄ܘ̣ܵܐ ܠܲܢ ܗܵܠܹܝܢ.
[
24
]
ܘܝܸܠܕܲܬ̤
ܐܲܢ̄ܬ̇ܬ̣̱ܵܐ ܒܪܵܐ: ܘܲܩܪܵܬ̤ ܫܡܹܗ ܫܸܡܫܘܿܢ: ܘܲܪܒ̣ܵܐ ܛܲܠܝܵܐ. ܘܒܲܪܟܹܗ ܡܵܪܝܵܐ.
[
25
]
ܘܫܲܪܝܲܬ̤
ܪܘܼܚܹܗ ܕܡܵܪܝܵܐ ܠܲܡܗܲܠܵܟ̣ܘܼܬܹܗ ܒܡܲܫܪܝܼܬ̣ܵܐ ܕܕܼܵܢ: ܒܹܝܬ̣ ܨܸܕܼܥܵܐ ܘܒܹܝܬ̣ ܐܸܫܬ̇ܘܼܐܹܝܠ.
Top