➕
←
Jeremiah
Jer
2
→
[1]ܘܲܗܘܵܐ ܥܠܲܝ ܦܸܬ݂ܓ݂ܵܡܹܗ ܕܡܵܪܝܵܐ: ܠܡܹܐܡܲܪ. [2]ܙܸܠ ܘܐܲܟ݂ܪܸܙ ܒܐܸܕ݂ܢܲܝ̈ ܐܘܿܪܸܫܠܸܡ: ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܝܵܐ: ܐܸܬܿܕܟ݂ܪܹܬ݂ ܠܹܟ݂ܝ ܛܲܝܒܿܘܼܬ݂ܵܐ ܕܛܲܠܝܘܼܬܹܟ݂ܝ: ܪܸܚܡܬܵܐ ܕܲܡܣܲܝܒܿܪܵܢܘܼܬܹܟ݂ܝ: ܕܗܲܠܸܟ݂ܬܿ ܒܵܬܲܪܝ ܒܡܲܕ݂ܒܿܪܵܐ: ܒܐܲܪܥܵܐ ܕܠܵܐ ܡܸܙܕܲܪܥܵܐ. [3]ܩܲܕܸܫ ܝܼܣܪܵܝܹܠ ܠܡܵܪܝܵܐ ܪܹܫ ܥܲܠ̈ܠܵܬܹܗ: ܟܠ ܐܵܟ݂ܘܿܠܲܝ̈ܗܘܿܢ ܢܸܬ݂ܚܲܝܒ݂ܘܼܢ. ܒܝܼܫܬܵܐ ܬܹܐܬܸܐ ܥܠܲܝܗܘܿܢ: ܐܵܡܲܪ ܡܵܪܝܵܐ. [4]ܫܡܲܥܘ ܦܸܬ݂ܓ݂ܵܡܹܗ ܕܡܵܪܝܵܐ ܒܲܝܬܹܿܗ ܕܝܲܥܩܘܿܒ݂: ܘܟ݂ܠܗܹܝܢ ܫܲܖ̈ܒ݂ܬܵܐ ܕܒܹܝܬ݂ ܝܼܣܪܵܝܹܠ. [5]ܗܵܟܲܢܵܐ ܐܵܡܲܪ ܡܵܪܝܵܐ: ܡܵܢܵܘ ܥܵܘܠܵܐ ܕܐܸܫܟܲܚܘ ܒܝܼ ܐܲܒ݂ܵܗܲܝ̈ܟܿܘܿܢ ܕܐܲܪܚܸܩܘ ܡܹܢܝ: ܘܐܸܙܲܠܘ ܒܵܬܲܪ ܠܵܐ ܡܸܕܸܡ: ܘܡܸܕܸܡ ܠܵܐ ܝܑܼܬܲܪܘ. [6]ܘܠܵܐ ܐܸܡܲܪܘ ܐܲܝܟܵܘ ܡܵܪܝܵܐ ܕܐܲܣܩܲܢ ܡܢ ܐܲܪܥܵܐ ܕܡܸܨܪܹܝܢ: ܕܕܲܒܪܲܢ ܒܡܲܕ݂ܒܪܵܐ ܒܐܲܪܥܵܐ ܚܲܪܒܿܬܵܐ ܘܫܵܗܝܼܬܵܐ: ܒܐܲܪܥܵܐ ܨܵܕ݂ܝܼܬܵܐ ܕܛܸܠܵܠܲܝ̈ ܡܵܘܬܵܐ: ܒܐܲܪܥܵܐ ܕܠܵܐ ܥܒܲܪ ܒܵܗ ܓܒܲܪ: ܘܠܵܐ ܝܼܬܸܒ݂ ܒܲܪܢܵܫ ܬܲܡܵܢ. [7]ܘܐܲܝܬܿܝܼܬܟ݂ܘܿܢ ܠܐܲܪܥܵܐ ܕܟܲܪܡܠܵܐ: ܠܡܹܐܟܲܠ ܦܹܐܖܹ̈ܝܗ̇ ܘܛܵܒ݂ܵـ̈ܬ݂ܵܗ̇. ܘܐܸܬܲܝܬܿܘܿܢ ܘܛܲܡܲܐܬܿܘܿܢ ܐܲܪܥܝ. ܘܝܵܪܬܿܘܼܬ݂ܝ ܣܵܡܬܿܘܿܢ ܠܛܲܢܦܘܼܬܵܐ. [8]ܟܵܗܢܹ̈ܐ ܠܵܐ ܐܸܡܲܪܘ ܐܝܟܵܘ ܡܵܪܝܵܐ. ܘܐܲܚܝܼܕܲܝ̈ ܢܵܡܘܿܣܵܐ ܠܵܐ ܝܲܕ݂ܥܘܼܢܝ. ܘܖ̈ܵܥܵܘܵܬܵܐ ܕܲܓܸܿܠܘ ܒܝܼ. ܘܲܢܒ݂ܝܹ̈ܐ ܐܹܬ݂ܢܲܒܿܝܼܘ ܒܒܲܠܠܵܐ. ܘܒ݂ܵܬܲܪ ܡܸܕܸܡ ܕܠܲܝܬܿ ܒܹܗ ܝܘܼܬ݂ܪܵܢ ܐܸܙܲܠܘ. [9]ܡܸܛܠ ܗܵܢܵܐ ܐܸܬܿܬܿܕܿܝܼܢ ܥܲܡܟ݂ܘܿܢ ܐܵܡܲܪ ܡܵܪܝܵܐ: ܘܥܲܡ ܒܢܲܝ̈ ܒܢܲܝ̈ܟܘܿܢ ܐܸܬܿܬܿܕܿܝܼܢ. [10]ܥܒܲܪܘ ܠܓ݂ܵܙܖ̈ܵܬܵܐ ܕܟܹܬܵܝܹ̈ܐ ܘܲܚܙܵܘ: ܘܲܠܩܹܕܲܪ ܫܲܕܲܪܘ: ܘܛܵܒ݂ ܐܸܣܬܲܟܲܠܘ: ܘܲܚܙܵܘ ܐܸܢ ܗܘܵܬ݂ ܐܲܝܟ݂ ܗܵܕܹܐ. [11]ܡܚܲܠܦܝܼܢ ܥܲܡܡܹ̈ܐ ܐܲܠܵܗܲܝ̈ܗܘܿܢ ܐܲܝܠܹܝܢ ܕܠܵܐ ܗܘܵܘ ܐܲܠܵܗܹ̈ܐ: ܘܥܲܡܝ ܚܲܠܸܦ ܐܝܼܩܵܪܹܗ ܒܲܕ݂ܠܵܐ ܝܘܼܬ݂ܪܵܢ. [12]ܬܡܲܗܘ ܫܡܲܝܵܐ ܥܲܠ ܗܵܕܹܐ: ܘܙܘܼܥܘ ܘܲܕ݂ܚܲܠܘ ܛܵܒ݂ ܐܵܡܲܪ ܡܵܪܝܵܐ. [13]ܡܸܛܠ ܕܬܲܪܬܹܿܝܢ ܒܝܼ̈ܫܵܢ ܥܒܲܕ݂ܘ ܥܲܡܝ: ܠܝܼ ܫܒܲܩܘ ܡܲܒܘܼܥܵܐ ܕܡܲܝ̈ܵܐ ܚܲܝܹ̈ܐ: ܘܐܸܙܲܠܘ ܚܦܲܪ ܠܗܘܿܢ ܓܘܼ̈ܒܹܿܐ: ܓܘܼ̈ܒܑܹܿ ܖ̈ܥܝܼܥܹܐ ܕܠܵܐ ܡܸܫܟܚܝܼܢ ܠܡܸܩܒܵܐ ܒܗܘܿܢ ܡܲܝ̈ܵܐ. [14]܆ ܕܲܠܡܵܐ ܥܲܒ݂ܕܵܐ ܗ̄ܘ݂ ܝܼܣܪܵܝܹܠ: ܐܸܢ ܝܑܼܠܝܼܕ݂ ܒܲܝܬܵܐ ܗ̄ܘ: ܡܸܛܠ ܡܵܢܵܐ ܗܘ̤ܵܐ ܠܒܸܙܬ݂ܵܐ. [15]ܥܠܵܘܗܝ ܢܢܲܗܡܘܼܢ ܐܲܖ̈ܝܵܘܵܬܵܐ: ܘܲܢܪܝܼܡܘܼܢ ܩܵܠܗܘܿܢ: ܘܢܸܥܒܿܕ݂ܘܼܢ ܐܲܪܥܹܗ ܠܚܘܼܪܒܵܐ: ܘܩܘܼܖ̈ܝܹܗ ܢܸܨ̈ܕܿܝܵܢ ܡ̣ܢ ܒܠܲܝ ܕܝܵܬܹ݁ܒ݂. [16]ܐܵܦ ܒܢܲܝ̈ ܡܲܦܲܣ ܘܬܲܚܦܝܼܣ: ܢܸܪܥܘܼܢܹܟ݂ܝ ܪܹܫܵܐ ܪܹܫܵܐ. [17]ܗܵܐ ܗܵܟܲܢܵܐ ܢܸܬ݂ܥܒܸܕ݂ ܠܹܟ݂ܝ: ܥܲܠ ܕܲܫܒܲܩܬܿܝ ܠܡܵܪܝܵܐ ܐܲܠܵܗܹܟ݂ܝ: ܒܙܲܒ݂ܢܵܐ ܕܲܡܕܲܒܲܪ ܗ̄ܘܵܐ ܠܹܟ݂ܝ ܒܐܘܼܪܚܵܐ. [18]ܘܗܵܫܵܐ ܡܵܐ ܠܹܟ݂ܝ ܠܡܹܐܙܲܠ ܠܐܘܼܪܚܵܐ ܕܡܸܨܪܝܹܢ ܠܡܸܫܬܵܐ ܡܲܝ̈ܵܐ ܕܫܝܼܚܘܿܪ: ܘܡܵܐ ܠܹܟ݂ܝ ܠܡܹܐܙܲܠ ܠܐܘܼܪܚܵܐ ܕܐܵܬ݂ܘܿܪ: ܠܡܸܫܬܵܐ ܡܵܝ̈ܵܐ ܕܢܵܗܪܵܐ. [19]ܬܸܪܕܲܝܟ݂ܝ ܒܝܼܫܬܹܟ݂ܝ: ܘܲܬ̣ܝܵܒ̣ܘܼܬܹܟ݂ܝ ܬܲܟ̇ܣܹܟ݂ܝ. ܘܕܲܥܝ ܘܲܚܙܵܝ ܕܒ̣ܝܼܫ ܘܡܲܪܝܼܪ: ܥܲܠ ܕܲܫܒܲܩܬ̇ܝ ܠܡܵܪܝܵܐ ܐܲܠܵܗܹܟ݂ܝ: ܘܠܵܐ ܕܚܸܠܬ̇ܝ ܡܹܢܝ: ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ. [20]ܡܸܛܠ ܕܡ̣ܢ ܥܵܠܲܡ ܬܸܒ̣ܪܹܬ̣ ܢܝܼܪܹܟ݂ܝ. ܘܦܲܣܩܹ̇ܬ̣ ܚܢܵܩܵܝ̈ܟ̇ܝ. ܘܐܸܡܲܪܬ̇ܝ ܕܬ̣ܘܼܒ̣ ܠܐܲܠܵܗ ܐ̄ܚܪܹܝܢ ܠܵܐ ܐܸܦܠܘܿܚ. ܘܗܵܐ ܥܲܠ ܟܠ ܪܵܡܬ̣ܵܐ ܕܪܵܡܵܐ: ܘܲܬ̣ܚܹܝܬ̣ ܟܠ ܐܝܼܠܵܢ ܕܥܲܒ̇ܝܼܛ: ܐܲܢ̄ܬ̇ܝ ܛܵܥܝܵܐ ܘܲܡܙܲܢܝܵܐ. [21]ܘܐܸܢܵܐ ܢܨܲܒ݂ܬܹܟ݂ܝ ܫܲܒ̇ܘܼܩܵܐ ܕܟ݂ܠܹܗ ܙܲܪܥܵܐ ܕܩܘܼܫܬܵܐ. ܘܐܲܝܟܲܢܵܐ ܐܸܬ̣ܗ̱ܦܸܟ݂ܬ̇ܝ ܥܠܲܝ: ܘܲܡܪܲܕܬ̇ܝ ܐܲܝܟ݂ ܓܦܸܬܵܐ ܢܘܼܟ݂ܪܵܝܬܵܐ. [22]ܘܐܸܢ ܬܸܬ̣ܚܵܘܪܝܼܢ ܒܢܸܬ̣ܪܵܐ: ܘܬܲܣܓܹ̇ܝܢ ܠܹܟ݂ܝ ܟܸܒ̣ܪܝ̣ܬ̣ܵܐ: ܟܬܲܡ̣ܘ ܠܗܘܿܢ ܒܹܟ݂ܝ ܚܛܵܗܲܝܟܝ ܩܕ݂ܵܡܲܝ ܐܵܡܲܪ ܡܵܪܝܵܐ ܐܲܠܵܗܵܐ. [23]ܐܲܝܟܲܢܵܐ ܬܹܐܡܪܝܼܢ ܕܠܵܐ ܐܸܬ̇ܛܲܡ̇ܐܸܬ̣: ܘܒ̣ܵܬܲܪ ܒܲܥܠܵܐ ܠܵܐ ܐܸܙܹܠ̄ܬ̣. ܚܙܵܝ ܐܘܼܖ̈ܚܵܬܸܟ݂ܝ ܒܢܲܚ̈ܠܹܐ: ܘܕܲܥܝ ܡܵܢܵܐ ܥܒܲܕ̇ܬ̇ܝ: ܐܲܪܝܼܡܬ̇ܝ ܒܩܵܠܹܟ݂ܝ ܡܥܲܩܡܲܬ̣ ܐܘܼܖ̈ܚܵܬ̣ܵܐ. [24]ܐܲܝܟ݂ ܥܪܵܕ݂ܵܐ ܕܡܸܬ̣ܝܲܠܲܦ ܒܡܲܕ݂ܒܪܵܐ ܒܨܸܒ̣ܝܵܢܲܝ̈ ܢܲܦ̮ܫܹܗ: ܣܵܩ̣ܬ̇ܝ ܪܘܼܲܚܵܐ ܐܲܝܟ݂ ܝܵܪܘܼܪܵܐ. ܡܲܢ ܢܲܗܦܟ݂ܝܼܗ̇. ܟܠ ܡܵܢ ܕܒ̣ܵܥܹܐ݁ ܠܵܗ̇ ܠܵܐ ܢܸܬ̇ܛܲܪܲܦ: ܒܐܘܼܖ̈ܚܵܬ̣ܵܗ̇ ܢܸܫܟ̇ܚܝܼܗ̇. [25]ܟܠܵܝ ܖ̈ܓ̣ܠܲܝܟ̇ܝ ܡ̣ܢ ܚܦܝܵܝܘܼܬ̣ܵܐ: ܘܓܲܓܲܪܬܹܟ݂ܝ ܡ̣ܢ ܨܵܗܝܵܐ. ܘܐܸܡܲܪܬ̇ܝ ܐܸܬ̣ܚܲܝܠܹ̇ܬ̣ ܠܵܐ ܨܵܒ̣ܝܵܐ ܐ̄ܢܵܐ. ܡܸܛܠ ܕܪܸܚܡܹܬ̣ ܢܘܼܟ݂ܖ̈ܵܝܹܐ: ܘܒ̣ܵܬܲܪܗܘܿܢ ܐܹܙܲܠ. [26]ܐܲܝܟ݂ ܒܸܗܬܲܬ̣ ܓܲܢܵܒ̣ܵܐ ܟܲܪ ܕܡܸܫܬ̇ܟܲܚ: ܗܵܟ݂ܢܵܐ ܒܗܸܬ̣ܘ ܒܢܲܝ̈ ܝܼܣܪܵܝܹܠ: ܗܸܢܘܿܢ ܘܡܲܠܟܲܝ̈ܗܘܿܢ: ܘܪܵܘ̱ܖ̈ܒ̣ܵܢܲܝܗܘܿܢ: ܘܟ݂ܵܗܢܲܝ̈ܗܘܿܢ ܘܲܢܒ̣ܝܲܝ̈ܗܘܿܢ. [27]ܕܐܵܡܪܝܼܢ ܠܩܲܝܣܵܐ ܐܲܒ̣ܘܼܢ ܐܲܢ̄ܬ̇: ܘܲܠܟܹܐܦܵܐ ܕܐܲܢ̄ܬ̇ܝ ܝܼܠܸܕ̇ܬ̇ܝܼܢ. ܡܸܛܠ ܕܐܲܦܢܝ̣ܘ ܠܝܼ ܩܕ݂ܵܠܗܘܿܢ: ܘܠܵܐ ܐܲܦܲܝ̈ܗܘܿܢ. ܘܲܒ̣ܙܲܒ̣ܢܵܐ ܕܒ̣ܝܼܫܘܬ̇ܗܘܿܢ ܐܵܡܪܝܼܢ: ܩܘܼܡ ܥܲܕܲܪܝܢ ܘܲܦܪܘܿܩܵܝܢ. [28]ܘܐܲܝܟܵܐ ܐܸܢܘܿܢ ܐܲܠܵܗܲܝ̈ܟ ܕܲܥܒܲܕܬ̇ ܠܵܟ݂: ܢܩܘܼܡܘܼܢ ܘܢܸܦܪܩܘܼܢܵܟ݂ ܒܲܙܒܲܢ ܒܝܼܫܬܵܟ݂. ܡܸܛܠ ܕܐܲܝܟ݂ ܡܸܢܝܵܢܵܐ ܕܩܘܼܖ̈ܝܲܝܟ ܗܘܵܘ ܐܲܠܵܗܲܝ̈ܟ ܝܑܼܗܘܼܕ݂ܵܐ. [29]ܠܡܵܢܵܐ ܕܵܝܢ̇ܝܼܢ ܐ̄ܢܬ̇ܘܿܢ ܥܲܡܝ ܟܠܟ݂ܘܿܢ ܕܲܓܹ̇ܬ̇ܘܿܢ ܒܝܼ: ܐܵܡܲܪ ܡܵܪܝܵܐ. [30]ܣܪܝܼܩܵܐܝܼܬ̣ ܡܚܹ݁ܬ̣ ܠܲܒ̣ܢܲܝ̈ܟ̇ܘܿܢ. ܘܡܲܪܕܘܼܬ̣ܵܐ ܠܵܐ ܩܲܒܹ݁ܠ̣ܘ. ܐܸܟ݂ܠܲܬ̤ ܚܲܪܒܵܐ ܠܲܢܒ̣ܝܲܝ̈ܟ̇ܘܿܢ: ܐܲܝܟ݂ ܐܲܪܝܵܐ ܡܚܲܒ̇ܠܵܢܵܐ. [31]ܐܲܢ̄ܬ̇ܘܿܢ ܕܵܪܵܐ ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ: ܕܲܠܡܵܐ ܡܲܕ݂ܒ̇ܪܵܐ ܗ̄ܘܹܝܬ̣ ܠܝܼܣܪܵܝܹܠ: ܐܵܘ ܐܲܝܟ݂ ܐܲܪܝܵܐ ܚܲܪܒ̇ܬ̣ܵܐ: ܡܸܛܠ ܡܵܢܵܐ ܐܸܡܲܪ ܥܲܡܝ: ܢܚܸܬ̣ܢ ܠܵܐ ܢܹܐܬܸܐ ܬܘܼܒ ܠܘܵܬܵܟ݂. [32]ܕܲܠܡܵܐ ܛܵܥܝܵܐ ܒܬ̣ܘܼܠܬܵܐ ܥܘܼܢܕܵܢܵܗ̇: ܘܟܲܠܬ̣ܵܐ ܬܲܨܒ̇ܝܼܬ̣ܵܗ̇: ܥܲܡܝ ܕܝܹܢ ܛܥܵܐܘܼܢܝ ܝܵܘ̈ܡܵܬ̣ܵܐ ܕܠܲܝܬ̇ ܠܗܘܿܢ ܡܸܢܝܵܢ. [33]ܡܵܢܵܐ ܬܘܼܒ̣ ܡܲܬ̣ܩܢܲܬ̇ܝ ܐܘܼܖ̈ܚܵܬܹܟ݂ܝ ܠܡܸܒ̣ܥܵܐ ܪܸܚ̱ܡܬ̣ܵܐ: ܕܗܵܐ ܐܵܦ ܒܝܼܫܬܵܐ ܝܼܠܸܦܬ̇ܝ ܒܐܘܼܖ̈ܚܵܬܹܟ݂ܝ. [34]ܘܐܵܦ ܒܐܝܼܕܲܝ̈ܟ̇ܝ ܐܸܫܬ̇ܟܲܚ ܕܡܵܐ ܕܢܲܦ̮̈ܫܵܬ̣ܵܐ ܕܡܸܣܟܹ̇ܢܹ̈ܐ ܙܲܟܵܝܹ̈ܐ: ܠܵܐ ܗ̄ܘܵܐ ܒܦܘ̣ܠܫܬ̣ܵܐ ܐܸܫܟ̇ܚܹܬ̣ ܐܸܢܘܿܢ: ܐܸܠܵܐ ܬܚܹܬ̣ ܟܠ ܐܝܼܠܵܢ. [35]ܘܐܸܡܲܪܬ̇ܝ ܕܲܡܚܲܣܝܵܐ ܐ̄ܢܵܐ: ܡܸܛܠ ܗܵܢܵܐ ܐܲܗ̣ܦܸܟ݂ ܪܘܼܓ̣ܙܹܗ ܡܹܢܝ: ܗܵܐ ܕܵܐܹܢ ܐ̄ܢܵܐ ܠܹܟ݂ܝ ܥܲܠ ܕܐܸܡܲܪܬ̇ܝ ܕܠܵܐ ܚܛܹ̇ܝܬ̣. [36]ܡܵܢܵܐ ܡܸܙܕܲܠܠܲܬ̇ܝ ܛܵܒ̣ ܠܡܸܬ̣ܢܵܐ ܐܘܼܖ̈ܚܵܬܹܟ݂ܝ: ܐܵܦ ܡ̣ܢ ܡܸܨܪܹܝܢ ܬܸܒ̣ܗ̱ܬ̣ܝܼܢ ܐܲܝܟ݂ ܕܲܒ̣ܗܸܬ̇ܬ̇ܝ ܡ̣ܢ ܐܵܬܘܿܪ. [37]ܐܵܦ ܡ̣ܢ ܠܘܵܬ̣ ܗܵܢܵܐ ܬܸܦܩܝܼܢ ܟܲܕ݂ ܐܝܼܕܲܝ̈ܟ̇ܝ ܥܲܠ ܪܹܫܹܟ݂ܝ: ܕܲܪܓܸـ̣ܙ ܡܵܪܝܵܐ ܥܲܠ ܡܲܬ̣ܟ̇ܠܵܢܲܝ̈ܟ̇ܝ: ܘܠܵܐ ܬܲܨܠܚܝܼܢ ܒܗܘܿܢ.
 
Top