➕
←
Jeremiah
Jer
44
→
[1]ܦܸܬ̣ܓ̣ܵܡܵܐ ܕܲܗܘ̤ܵܐ ܥܲܠ ܐܹܪܲܡܝܵܐ ܡ̣ܢ ܩܕ݂ܵܡ ܡܵܪܝܵܐ: ܕܢܸܬ̣ܢܲܒܸ̇ܐ ܥܲܠ ܟܠܗܘܿܢ ܝܗ̄ܘܼܕ݂ܵܝܹ̈ܐ ܕܝܵܬ̣ܒ̇ܝܼܢ ܒܐܲܪܥܵܐ ܕܡܸܨܪܹܝܢ: ܘܲܕ݂ܝܵܬ̣ܒ̇ܝܼܢ ܒܡܲܓ̣ܕ̇ܘܿܠ ܘܲܒ̣ܬܲܚܦܝܼܣ: ܘܲܒ̣ܡܲܦܲܣ: ܘܒܲܐܪܥܵܐ ܕܦܲܬ̣ܪܘܿܣ. [2]ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܐܲܢ̄ܬ̇ܘܿܢ ܚܙܲܝܬ̇ܘܿܢ ܟܠܵܗ̇ ܒܝܼܫܬܵܐ ܕܐܲܝܬܝܼܬ̇ ܥܲܠ ܐܘܿܪܸܫܠܸܡ: ܘܥܲܠ ܟܠܗܹܝܢ ܩܘܼܪ̈ܝܵܐ ܕܲܝܗܘܼܕ݂ܵܐ: ܘܗܸܢܹܝܢ ܚܲܪ̈ܒܵܢ ܝܵܘܡܵܢܵܐ: ܘܠܲܝܬ̇ ܒܗܹܝܢ ܐ̄ܢܵܫ ܕܝܵܬܹܒ̣. [3]ܡܸܛܠ ܟܠܵܗ̇ ܒܝܼܫܬܵܐ ܕܲܥܒܲܕ݂ܘ ܘܐܲܪܓ̇ܙܘܼܢܝ: ܘܐܸܙܲܠ̣ܘ ܣܵܡ̣ܘ ܒܸܣܡܹ̈ܐ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܐܲܝܠܹܝܢ ܕܠܵܐ ܝܼܕܲܥ̣ܘ ܐܸܢܘܿܢ ܗܸܢܘܿܢ ܘܐܲܒ̣ܵܗܲܝ̈ܗܘܿܢ. [4]ܘܫܲܕ̇ܪܹܬ̣ ܠܘܵܬ̣ܟ݂ܘܿܢ ܠܟ݂ܠܗܘܿܢ ܥܲܒ̣ܕܲܝ̈ ܢܒ̣ܝܹ̈ܐ: ܩܲܕܡܹܬ̣ ܘܫܲܕ̇ܪܹܬ̣ ܘܐܸܡ̇ܪܹܬ̣: ܠܵܐ ܬܸܥܒ̇ܕ݂ܘܼܢ ܛܲܢܦܘܼܬ̣ܵܐ ܗܵܕܹܐ ܕܲܣܢܹ̇ܝܬ̣. [5]ܘܠܵܐ ܫ̣ܡܲܥܘ ܘܠܵܐ ܨܠܵܘ ܐܸܕ݂ܢ̱ܗܘܿܢ ܕܢܸܗ̄ܦܟ݂ܘܿܢ ܡ̣ܢ ܒܝܼ̈ܫܵܬ̣ܗܘܿܢ: ܕܠܵܐ ܢܣܝܼܡܘܼܢ ܒܸܣܡܹ̈ܐ ܠܐܲܠܵܗܹ̈ܐ ܐ̄ܚܪ̈ܵܢܹܐ. [6]ܘܐܸܬ̇ܬ̇ܢܝܼܚܘ ܪܘܼܓ̣ܙܝܼ ܘܚܸܡܬ̣ܝ: ܘܐܸܚܕܲܬ̤ ܢܘܼܪܵܐ ܒܩܘܼܪ̈ܝܵܐ ܕܲܝܗܘܼܕ݂ܵܐ: ܘܲܒ̣ܫܘܼܩܹ̈ܝܗ̇ ܕܐܘܿܪܸܫܠܸܡ: ܘܲܗ̤ܘܲܝ̈ ܠܚܘܼܪܒܵܐ ܘܲܠܬܸܡܗܵܐ ܐܲܝܟ݂ ܕܝܵܘܡܵܢܵܐ. [7]ܘܗܵܫܵܐ ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܬ ܐܲܠܵܗܵܐ ܕܝܼܣܪܵܝܹܠ: ܠܡܵܢܵܐ ܥܵܒ̣ܕ̇ܝܼܬ̇ܘܿܢ ܒܝܼܫܬܵܐ ܪܲܒ̇ܬ̣ܵܐ ܥܲܠ ܢܲܦ̮̈ܫܵܬ̣ܟ݂ܘܿܢ: ܕܬ̣ܵܘܒ̇ܕ݂ܘܼܢ ܡܸܢܟ݂ܘܿܢ ܓܲܒ̣ܪܹ̈ܐ ܘܢܸܫ̈ܐ: ܘܲܥܠܲܝܡܹ̈ܐ ܘܝܲܠܘܼ̈ܕܹܐ ܡ̣ܢ ܓܵܘ ܝܑܼܗܘܼܕ݂ܵܐ: ܕܠܵܐ ܬܸܫܒ̇ܩܘܼܢ ܠܟ݂ܘܿܢ ܚܲܪܬ̣ܵܐ. [8]ܡܸܛܠ ܕܐܲܪܓܸ̇ܙܬ̇ܘܿܢܵܢܝ ܒܲܥܒ̣ܵܕ݂ ܐܝܼܕܲܝ̈ܟ̇ܘܿܢ: ܘܣܵܡ̣ܬ̇ܘܿܢ ܒܸܣܡܹ̈ܐ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܒܐܲܪܥܵܐ ܕܡܸܨܪܹܝܢ ܕܥܲܠܬ̇ܘܿܢ ܠܡܸܥܡܲܪ ܬܲܡܵܢ: ܕܐܵܘܒܸ̇ܕ݂ ܟ݂ܘܿܢ ܘܬܸܗܘܘܿܢ ܠܠܵܘܛܬ̣ܵܐ ܘܲܠܚܸܣܕܵܐ: ܒܟ݂ܠܗܘܿܢ ܥܲܡܡܹ̈ܐ ܕܐܲܪܥܵܐ. [9]ܠܡܵܐܛܥܲܝܬ̇ܘܿܢ ܒܝܼܫܬܵܐ ܕܐܲܒ̣ܵܗ̇ܝ̈ܟ̇ܘܿܢ: ܘܒ̣ܝܼܫܬܵܐ ܕܡܲܠ̈ܟܹ̇ܐ ܕܲܝܗܘܼܕ݂ܵܐ: ܘܒ̣ܝܼܫܬܵܐ ܕܢܸܫܲܝ̈ܗܘܿܢ: ܕܲܥܒܲܕ݂ܘ ܒܐܲܪܥܵܐ ܕܲܝܗܘܼܕ݂ܵܐ: ܘܲܒ̣ܫܘܼܩܹ̈ܝܗ̇ ܕܐܘܿܪܸܫܠܸܡ. [10]ܘܠܵܐ ܐܸܬ̇ܕܲܟ̇ܝܼܘ ܥܕܲܡܵܐ ܠܝܵܘܡܵܢܵܐ: ܘܠܵܐ ܕܚܸܠܘ: ܘܠܵܐ ܦܲܠܚܘܼܢܝ: ܘܠܵܐ ܗܲܠܸܟ݂ܘ ܒܢܵܡܘܿܣܝ ܘܒܲܩܝܵܡܝ ܕܝܸܗ̄ܒܹ̇ܬ̣ ܠܗܘܿܢ ܘܠܲܐܒ̣ܵܗܲܝ̈ܗܘܿܢ. [11]ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܣܵܐܹ̇ܡ ܐ̄ܢܵܐ ܐܲܦܲܝ̈ ܒܟ݂ܘܿܢ ܠܒ̣ܝܼܫܬܵܐ: ܘܲܠܡܵܘܒܵܕ݂ܘ ܠܟ݂ܠܗܘܿܢ ܕܒܹܝܬ̣ ܝܑܼܗܘܼܕ݂ܵܐ. [12]ܘܐܸܬ̣ܒܲܪ ܫܲܪܟܵܐ ܕܲܝܗܘܼܕ݂ܵܐ: ܕܣܵܡ̣ܘ ܐܲܦܲܝ̈ܗܘܿܢ ܠܡܸܥܲܠ ܠܡܸܨܪܹܝܢ ܠܡܸܥܡܲܪ ܬܲܡܵܢ: ܘܲܢܣܘܼܦܘܼܢ ܟܠܗܘܿܢ ܒܐܲܪܥܵܐ ܕܡܸܨܪܹܝܢ. ܘܲܢܡܘܼܬ̣ܘܼܢ ܒܚܲܪܒܵܐ: ܘܲܒ̣ܟܲܦܢܵܐ: ܘܲܒ̣ܡܵܘܬܵܢܵܐ: ܘܢܸܗܘܘܿܢ ܠܡܵܘ̈ܡܵܬ̣ܵܐ: ܘܲܠܬܸܡܗܵܐ: ܘܲܠܠܵܘܛܬ̣ܵܐ ܘܲܠܚܸܣܕܵܐ. [13]ܘܐܸܦܩܘܿܕ݂ ܥܲܠ ܕܝܵܬ̣ܒ̇ܝܼܢ ܒܐܲܪܥܵܐ ܕܡܸܨܪܹܝܢ: ܐܲܝܟ݂ ܕܦܸܩܕܹ̇ܬ̣ ܥܲܠ ܐܘܿܪܸܫܠܸܡ: ܒܚܲܪܒܵܐ: ܘܲܒ̣ܟܲܦܢܵܐ: ܘܲܒ̣ܡܵܘܬܵܢܵܐ. [14]ܘܠܵܐ ܢܸܗܘܹܐ ܠܗܘܿܢ ܦܲܠܝܼܛܵܐ ܘܲܣܪܝܼܕ݂ܵܐ: ܠܫܲܪܟܵܐ ܕܲܝܗܘܼܕ݂ܵܐ ܕܥܵܐܠܝܼܢ ܠܡܸܥܡܲܪ ܬܲܡܵܢ ܒܐܲܪܥܵܐ ܕܡܸܨܪܹܝܢ: ܘܲܠܡܸܗܦܲܟ݂ ܠܐܲܪܥܵܐ ܕܲܝܗܘܼܕ݂ܵܐ: ܕܗܸܢܘܿܢ ܣܲܒ̣ܪܝܼܢ ܒܢܲܦ̮ܫܗܘܿܢ ܠܡܸܗܦܲܟ݂ ܠܬܲܡܵܢ: ܠܵܐ ܢܸܗܞܦܟ݂ܘܿܢ ܐܸܠܵܐ ܐܸܢ ܙܥܘܿܪܹ̈ܐ. [15]ܘܲܥܢܵܘ ܘܐܸܡܲܪܘ ܠܐܹܪܲܡܝܵܐ: ܟܠ ܓܲܒ̣ܪܹ̈ܐ ܕܝܵܕ݂ܥܝܼܢ ܗ̄ܘ̣ܵܘ ܕܣܵܝ̈ܡܵܢ ܗ̄ܘܲܝ̈ ܢܸܫܲܝ̈ܗܘܿܢ ܒܸܣܡܹ̈ܐ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܘܟ݂ܠܗܹܝܢ ܢܸܫܹ̈ܐ ܕܩܵܝ̈ܡܵܢ ܟܸܢܫܵܐ ܪܲܒܵܐ: ܘܟ݂ܠܹܗ ܥܲܡܵܐ ܕܝܵܬ̣ܒܝܼܢ ܒܐܲܪܥܵܐ ܕܡܸܨܪܹܝܢ ܘܲܒ̣ܦܲܬ̣ܪܘܿܣ. [16]ܘܐܸܡܲܪܘ ܠܹܗ: ܦܸܬ̣ܓ̣ܵܡܵܐ ܕܐܸܡܪܹܬ̣ ܠܲܢ ܒܫܸܡ ܡܵܪܝܵܐ: ܠܵܐ ܫܵܡ̇ܥܝܼܢܲܢ ܠܵܟ݂. [17]ܐܸܠܵܐ ܥܵܒ̣ܕ̇ܝܼܢܲܢ ܟܠ ܦܸܬ̣ܓ̣ܵܡܵܐ ܕܲܢܦܲܩ̣ ܡ̣ܢ ܦܘܼܡܲܢ: ܠܲܡܣܵܡ ܒܸܣܡܹ̈ܐ ܠܦܘܼܠܚܵܢ ܫܡܲܝܵܐ: ܘܠܲܡܢܲܩܵܝܘܼ ܠܵܗ̇ ܢܘܼܩܵܝܹ̈ܐ: ܐܲܝܟ݂ ܕܲܥܒܲܕ݂ܢ ܚܢܲܢ: ܘܐܲܒ̣ܵܗܲܝ̈ܢ: ܘܡܲܠܟ̇ܝܼ̈ܢ: ܘܪܵܘܪ̈ܒ̣ܵܢܲܝܢ: ܒܩܘܼܪ̈ܝܵܐ ܕܲܝܗܘܼܕ݂ܵܐ ܘܲܒ̣ܫܘܼܩܹ̈ܝܗ̇ ܕܐܘܿܪܸܫܠܸܡ ܘܣܵܒ̣ܥܝܼܢ ܗ̄ܘܲܝܢ ܠܲܚܡܵܐ: ܘܛܵܒ̣ ܗ̄ܘ̣ܵܐ ܠܲܢ: ܘܒ̣ܝܼܫܬܵܐ ܠܵܐ ܚܙܲܝܢ. [18]ܘܗܵܐ ܡ̣ܢ ܕܦܵܫܢ ܡ̣ܢ ܕܠܲܡܣܵܡ ܒܸܣܡܹ̈ܐ ܠܦܘܼܠܚܵܢ ܫܡܲܝܵܐ: ܘܠܲܡܢܲܩܵܝܘܼ ܠܵܗ̇ ܢܘܼܩܵܝܹ̈ܐ: ܚܣܲܪ ܠܲܢ ܟܠ ܡܸܕܸ̇ܡ: ܘܲܒ̣ܚܲܪܒܵܐ ܘܲܒ̣ܟܲܦܢܵܐ ܣܵܦܢ. [19]ܘܲܥܢܲܝ̈ ܟܠܗܹܝܢ ܢܸܫܹ̈ܐ ܘܐܵܡܪ̈ܵܢ: ܟܲܕ݂ ܚܢܲܢ ܣܵܝ̈ܡܵܢ ܗ̄ܘܲܝܢ ܒܸܣܡܹ̈ܐ ܠܡܲܠܟܲܬ̣ ܫܡܲܝܵܐ: ܘܲܡܢܲܩ̈ܝܵܢ ܗ̄ܘܲܝܢ ܠܵܗ̇ ܢܘܼܩܵܝܹ̈ܐ: ܠܵܐ ܗ̄ܘ̣ܵܐ ܒܸܠܥܵܕ݂ ܡ̣ܢ ܓܲܒ̣ܪ̈ܲܝܢ ܥ̣ܒܲܕ݂ܢ ܠܵܗ̇ ܙܵܘܬ̇ܪܹ̈ܐ: ܘܢܲܩܝܼܢ ܠܵܗ̇ ܢܘܼܩܵܝܹ̈ܐ. [20]ܘܐܸܡܲܪ ܐܹܪܲܡܝܵܐ ܠܟ݂ܠܹܗ ܥܲܡܵܐ ܠܓܲܒ̣ܪܹ̈ܐ ܘܲܠܢܸܫܹ̈ܐ: ܘܲܠܟ݂ܠܹܗ ܥܲܡܵܐ ܕܐܸܡܲܪܘ ܠܹܗ ܡܸܠܹ̈ܐ ܗܵܠܹܝܢ. [21]ܗܵܘ̇ ܥܸܛܪܵܐ ܕܒܸܣܡܹ̈ܐ ܕܣܵܡܬ̇ܘܿܢ ܒܩܘܼܪ̈ܝܵܐ ܕܲܝܗܘܼܕ݂ܵܐ ܘܲܒ̣ܫܘܼܩܹ̈ܝܗ̇ ܕܐܘܿܪܸܫܠܸܡ: ܐܲܢ̄ܬ̇ܘܿܢ ܘܐܲܒ̣ܵܗܲܝ̈ܟ̇ܘܿܢ: ܘܡܲܠܟܲܝ̈ܟ̇ܘܿܢ: ܘܪܵܘܪ̈ܒ̣ܵܢܲܝܟ̇ܘܿܢ: ܘܥܲܡܵܐ ܕܐܲܪܥܵܐ: ܠܹܗ̤ܘ ܐܸܬ̇ܕ̇ܟܲܪ ܡܵܪܝܵܐ ܘܲܣܠܸܩ ܥܲܠ ܠܸܒܹ̇ܗ. [22]ܘܠܵܐ ܡܸܫܟܲܚ ܬܘܼܒ̣ ܡܵܪܝܵܐ ܠܡܸܫܒܲܩ ܠܟ݂ܘܿܢ: ܡܸܛܠ ܒܝܼܫܘܼܬ̣ܵܐ ܕܲܥܒ̣ܵܕܲܝ̈ܟ̇ܘܿܢ ܘܡܸܛܠ ܛܲܢܦܘܼܬ̣ܵܐ ܕܲܥܒܲܕ̇ܬ̇ܘܿܢ: ܘܲܗܘ̤ܵܬ̣ ܐܲܪ̱ܥܟ݂ܘܿܢ ܠܬܸܡܗܵܐ: ܘܲܠܠܵܘܛܬ̣ܵܐ: ܘܲܠܚܘܼܪܒܵܐ ܡ̣ܢ ܒܠܲܝ ܕܝܵܬܹ̇ܒ̣ ܐܲܝܟ݂ ܕܝܵܘܡܵܢܵܐ. [23]ܥܲܠ ܕܣܵܡܬ̇ܘܿܢ ܒܸܣܡܹ̈ܐ ܘܲܚܛܲܝܬ̇ܘܿܢ ܠܡܵܪܝܵܐ: ܘܠܵܐ ܫܡܲܥܬ̇ܘܿܢ ܒܩܵܠܹܗ ܕܡܵܪܝܵܐ: ܘܲܒ̣ܢܵܡܘܿܣܹܗ ܘܒܲܩܝܵܡܹܗ ܘܲܒ̣ܣܵܗ̈ܕ̇ܘܵܬܹܗ ܠܵܐ ܗܲܠܸܟ݂ܬ̇ܘܿܢ: ܡܸܛܠ ܗܵܢܵܐ ܐܲܕܪ̱ܟܲܬ̣ܟ݂ܘܿܢ ܒܝܼܫܬܵܐ ܗܵܕܹܐ ܐܲܝܟ݂ ܕܝܵܘܡܵܢܵܐ. [24]ܘܐܸܡܲܪ ܐܹܪܲܡܝܵܐ ܠܟ݂ܠܹܗ ܥܲܡܵܐ ܠܓܲܒ̣ܪܹ̈ܐ ܘܲܠܢܸܫܹ̈ܐ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ ܟܠܹܗ ܝܑܼܗܘܼܕ݂ܵܐ ܕܒܲܐܪܥܵܐ ܕܡܸܨܪܹܝܢ. [25]ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܐܲܢ̄ܬ̇ܘܿܢ ܘܢܸܫܲܝ̈ܟ̇ܘܿܢ ܐܸܡܲܪܬ̇ܘܿܢ ܒܦܘܼܡܟ݂ܘܿܢ ܘܒ̣ܐܝܼ̈ܕܲܝܟ̇ܘܿܢ: ܫܲܡܠܝܼܬ̇ܘܿܢ: ܘܐܸܡܲܪܬ̇ܘܿܢ ܢܲܫܲܪ ܢܸܕ݂ܪ̈ܲܝܢ ܕܲܢܕܲܪܢ ܠܲܡܣܵܡ ܒܸܣܡܹ̈ܐ ܠܦܘܼܠܚܵܢ ܫܡܲܝܵܐ: ܘܠܲܩܢܲܩܵܝܘܼ ܠܵܗ̇ ܢܘܼܩܵܝܹ̈ܐ: ܐܲܫܲܪܬ̇ܘܿܢ ܡܵܘ̈ܡܵܬ̣ܟ݂ܘܿܢ: ܘܲܥܒܲܕ̇ܬ̇ܘܿܢ ܢܸܕܪ̈ܲܝܟ̇ܘܿܢ. [26]ܡܸܛܠ ܗܵܢܵܐ ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ: ܟܠܹܗ ܝܑܼܗܘܼܕ݂ܵܐ ܕܝܵܬ̣ܒ̇ܝܼܢ ܒܐܲܪܥܵܐ ܕܡܸܨܪܹܝܢ: ܗܵܐ ܐܸܢܵܐ ܝܼܡܝܼܬ̣ ܒܫܹܡܝ ܪܲܒܵܐ ܐܵܡܲܪ ܡܵܪܝܵܐ: ܕܠܵܐ ܢܸܗܘܹܐ ܬܘܼܒ̣ ܫܹܡܝ ܒܦܘܼܡܗܘܿܢ ܕܒܹܝܬ̣ ܝܑܼܗܘܼܕ݂ܵܐ ܕܲܒ̣ܟ݂ܠܵܗ̇ ܐܲܪܥܵܐ ܕܡܸܨܪܹܝܢ: ܘܠܵܐ ܢܹܐܡܪܘܿܢ ܚܲܝ ܗ̄ܘ̣ ܡܵܪܝܵܐ ܐܲܠܵܗܵܐ. [27]ܐܸܢܵܐ ܓܹܝܪ ܡܣܲܪܗܸܒ̣ ܐ̄ܢܵܐ ܥܠܲܝܗܘܿܢ ܒܝܼܫܬܵܐ ܐܵܡܲܪ ܡܵܪܝܵܐ: ܘܲܢܣܘܼܦܘܼܢ ܟܠܗܘܿܢ ܓܲܒ̣ܪܹ̈ܐ ܕܲܝܗܘܼܕ݂ܵܐ ܕܒܲܐܪܥܵܐ ܕܡܸܨܪܹܝܢ: ܒܚܲܪܒܵܐ: ܘܲܒ̣ܟܲܦܢܵܐ: ܘܲܒ̣ܡܵܘܬܵܢܵܐ: ܥܕܲܡܵܐ ܕܐܓܲܡܲܪ ܐܸܢܘܿܢ. [28]ܘܦܲܠܝܼܛܲܝ̈ ܚܲܪܒܵܐ ܢܸܗ̄ܦܟ݂ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܠܐܲܪܥܵܐ ܕܲܝܗܘܼܕ݂ܵܐ ܩܲܠܝܼܠ ܒܡܸܢܝܵܢܵܐ: ܘܢܸܕ̇ܥܘܼܢ ܟܠܹܗ ܫܲܪܟܵܐ ܕܲܝܗܘܼܕ݂ܵܐ ܕܐܸܙܲܠ̣ܘ ܠܡܸܥܡܲܪ ܒܐܲܪܥܵܐ ܕܡܸܨܪܹܝܢ: ܦܸܬ̣ܓ̣ܵܡܵܐ ܕܡܲܢ ܢܸܫܲܪ: ܕܝܼܠܝ ܐܵܘ ܕܝܼܠܗܘܿܢ. [29]ܘܗܵܕܹܐ ܠܟ݂ܘܿܢ ܐܵܬ̤ܵܐ ܐܵܡܲܪ ܡܵܪܝܵܐ: ܕܦܵܩܹ̇ܕ݂ ܐ̄ܢܵܐ ܥܠܲܝܟ̇ܘܿܢ ܒܐܲܬ̣ܪܵܐ ܗܵܢܵܐ: ܕܬܸܕ̇ܥܘܼܢ ܕܫܵܪ̈ܵܢ ܡܸܠܲܝ̈ ܥܠܲܝܟ̇ܘܿܢ ܠܒ̣ܝܼܫܬܵܐ. [30]ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܡܲܫܠܸܡ ܐ̄ܢܵܐ ܠܹܗ ܠܦܸܪܥܘܿܢ ܚܓ̣ܝܼܪܵܐ ܡܲܠܟܵܐ ܕܡܸܨܪܹܝܢ: ܒܐܝܼܕ݂ܵܐ ܕܲܒ̣ܥܸܠܕ̇ܒ̣ܵܒ̣ܵܘ̈ܗܝ: ܘܒ̣ܐܝܼܕ݂ܵܐ ܕܐܲܝܠܹܝܢ ܕܒ̣ܵܥܹ̇ܝܢ ܢܲܦ̮ܫܹܗ: ܐܲܝܟ݂ ܕܐܲܫ̱ܠܡܹ̇ܬ̣ ܠܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܒܐܝܼܕ݂ܵܐ ܕܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܒܥܸܠܕ̇ܒ̣ܵܒܹܗ ܘܒ̣ܵܥܹ̇ܐ ܢܲܦ̮ܫܹܗ.
 
Top