➕
←
Proverbs
Pro
8
→
[1]הלא־חכמה תקרא ותבונה תתן קולה [2]בראש־מרמים עלי־דרך בית נתיבות נצבה [3]ליד־שערים לפי־קרת מבוא פתחים תרנה [4]אליכם אישים אקרא וקולי אל־בני אדם [5]הבינו פתאים ערמה וכסילים הבינו לב [6]שמעו כי־נגידים אדבר ומפתח שפתי מישרים [7]כי־אמת יהגה חכי ותועבת שפתי רשע [8]בצדק כל־אמרי־פי אין בהם נפתל ועקש [9]כלם נכחים למבין וישרים למצאי דעת [10]קחו־מוסרי ואל־כסף ודעת מחרוץ נבחר [11]כי־טובה חכמה מפנינים וכל־חפצים לא ישוו־בה [12]אני־חכמה שכנתי ערמה ודעת מזמות אמצא [13]יראת יהוה שנאת־רע גאה וגאון ודרך רע ופי תהפכות שנאתי [14]לי־עצה ותושיה אני בינה לי גבורה [15]בי מלכים ימלכו ורזנים יחקקו צדק [16]בי שרים ישרו ונדיבים כל־שפטי צדק [17]אני אהביה [Q: אהבי] אהב ומשחרי ימצאנני [18]עשר־וכבוד אתי הון עתק וצדקה [19]טוב פריי מחרוץ ומפז ותבואתי מכסף נבחר [20]בארח־צדקה אהלך בתוך נתיבות משפט [21]להנחיל אהבי יש ואצרתיהם אמלא [22]יהוה־קנני ראשית דרכו קדם מפעליו מאז [23]מעולם נסכתי מראש מקדמי־ארץ [24]באין־תהמות חוללתי באין מעינות נכבדי־מים [25]בטרם הרים הטבעו לפני גבעות חוללתי [26]עד־לא עשה ארץ וחוצות וראש עפרות תבל [27]בהכינו שמים שם אני בחקו חוג על־פני תהום [28]באמצו שחקים ממעל בעזוז עינות תהום [29]בשומו לים חקו ומים לא יעברו־פיו בחוקו מוסדי ארץ [30]ואהיה אצלו אמון ואהיה שעשועים יום יום משחקת לפניו בכל־עת [31]משחקת בתבל ארצו ושעשעי את־בני אדם [32]ועתה בנים שמעו־לי ואשרי דרכי ישמרו [33]שמעו מוסר וחכמו ואל־תפרעו [34]אשרי אדם שמע־לי לשקד על־דלתתי יום יום־לשמר מזוזת פתחי [35]כי מצאי מצאי [Q: מצא] חיים ויפק רצון מיהוה [36]וחטאי חמס נפשו כל־משנאי אהבו מות
Credit

Source: unbound.biola.edu
Top