➕
←
Psalms
Psa
10
→
[1]למה יהוה תעמד ברחוק תעלים לעתות בצרה [2]בגאות רשע ידלק עני יתפשו במזמות זו חשבו [3]כי־הלל רשע על־תאות נפשו ובצע ברך נאץ יהוה [4]רשע־כגבה אפו בל־ידרש אין אלהים כל־מזמותיו [5]יחילו דרכו בכל־עת־מרום משפטיך מנגדו כל־צורריו יפיח בהם [6]אמר בלבו בל־אמוט לדר ודר אשר לא־ברע [7]אלה פיהו מלא־ומרמות ותך תחת לשונו עמל ואון [8]ישב במארב חצרים־במסתרים יהרג נקי עיניו לחלכה יצפנו [9]יארב במסתר כאריה בסכה יארב לחטוף עני יחטף עני במשכו ברשתו [10]ודכה [Q: ידכה] ישח ונפל בעצומיו חלכאים [Q: חל כאים] [11]אמר בלבו שכח אל הסתיר פניו בל־ראה לנצח [12]קומה יהוה־אל נשא ידך אל־תשכח עניים [Q: ענוים] [13]על־מה נאץ רשע אלהים אמר בלבו לא תדרש [14]ראתה כי־אתה עמל וכעס תביט לתת בידך עליך יעזב חלכה יתום אתה היית עוזר [15]שבר זרוע רשע ורע תדרוש־רשעו בל־תמצא [16]יהוה מלך עולם ועד אבדו גוים מארצו [17]תאות ענוים שמעת יהוה תכין לבם תקשיב אזנך [18]לשפט יתום ודך בל־יוסיף עוד־לערץ אנוש מן־הארץ
Credit

Source: unbound.biola.edu
Top