➕
←
Psalms
Psa
102
→
[1]ܡܵܪܝܵܐ ܫܡܲܥ ܨܠܘܿܬ̣ܝ. [2]ܘܲܓ̣ܥܵܬ̣ܝ ܠܘܵܬ̣ܵܟ݂ ܬܹܥܘܿܠ. [3]ܠܵܐ ܬܲܗܦܸܟ݂ ܐܲܦܲܝ̈ܟ ܡܹܢܝ ܒܝܲܘܡܵܐ ܕܐܘܼܠܨܵܢܝ. [4]ܐܸܠܵܐ ܐܲܪܟܸ̇ܢ ܠܝܼ ܐܸܕ݂ܢܵܟ݂ ܒܝܲܘܡܵܐ ܕܐܸܩܪܹܝܟ݂ ܘܒܲܥܓܲܠ ܥܢܝܼܢܝ. [5]ܡܸܛܠ ܕܲܓ̣ܡܲܪܘ ܒܬܸܢܵܢܵܐ ܝܲܘ̈ܡܲܝ. [6]ܘܓܲܪ̈ܡܲܝ ܚܘ݂ܲܪܘ ܐܲܝܟ݂ ܡܲܘ̈ܩܕܹܐ. [7]ܚܡ݂ܵܐ ܠܹܒ̇ܝ ܐܲܝܟ݂ ܥܸܣܒܵܐ ܘܝܼܒܸܫ̣. [8]ܡܸܛܠ ܕܲܛܥܹܝ݁ܬ̣ ܡܹܐܟ̣ܘܼܠܬܹ̇ܗ ܕܠܲܚܡܝ. [9]ܡ̣ܢ ܩܵܠܵܐ ܕܬܸܢ̈ܚܵܬ̣ܝ ܕܒܸܩ̣ ܒܸܣܪ̱ܝ ܠܓܲܪ̈ܡܲܝ. [10]ܘܐܸܬ̇ܕܲܡܝܼܬ̣ ܠܩܵܩܵܐ ܕܲܒ̣ܡܲܕ݂ܒ̇ܪܵܐ. [11]ܘܲܗ̤ܘܹܝܬ̣ ܐܲܝܟ݂ ܥܘܿܕ݂ܵܐ ܒܚܲܪܒ̇ܬ̣ܵܐ. [12]ܣܸܪܕܹ̇ܬ̣ ܘܲܗ݀ܘܹܝܬ̣ ܒܲܠܚܘܿܕܲܝ. [13]ܐܲܝܟ݂ ܨܸܦܪܵܐ ܕܲܡܦܲܪܚܵܐ ܥܲܠ ܐܸܓܵܪܹ̈ܐ. [14]ܟܠܹܗ ܝܲܘܡܵܐ ܚܲܣܕ݂ܘܼܢܝ ܒܥܸܠܕ̇ܒ̣ܵܒܲܝ̈. [15]ܘܲܡܫܲܒܚܵܢܲܝ̈ ܒܝܼ ܝܑܼܡܵܘ. [16]ܡܸܛܠ ܕܩܸܛܡܵܐ ܐܲܝܟ݂ ܠܲܚܡܵܐ ܠܸܥܣܹ̇ܬ̣. [17]ܘܡܲܫܬܲܝ ܒܲܒ̣ܟ̣ܵܬ̣ܵܐ ܡܸܙ̇ܓܹ̇ܬ̣. [18]ܡ̣ܢ ܩܕ݂ܵܡ ܚܸܡܬ̣ܵܟ݂ ܘܪܘܼܓ̣ܙܵܟ݂. [19]ܕܐܲܪܝܼܡܬܵܢܝ ܘܲܫܕܲܝܬܵܢܝ. [20]ܝܲܘ̈ܡܲܝ ܐܲܝܟ݂ ܛܸܠܵܠܵܐ ܐܸܬ̣ܪ̱ܟܸܢܘ. [21]ܘܐܸܢܵܐ ܝܸܒ̣ܫܹ̇ܬ̣ ܐܲܝܟ݂ ܥܸܣܒܵܐ. [22]ܘܐܲܢ̄ܬ̇ ܡܵܪܝܵܐ ܠܥܵܠܲܡ ܩܲܝܵܡ ܐܲܢ̄ܬ̇. [23]ܘܕ݂ܘܼܟ̣ܪܵܢܵܟ݂ ܠܕ݂ܵܪܕܵܪ̈ܝܼܢ. [24]ܐܲܢ̄ܬ̇ ܩܘܼܡ ܘܪܲܚܸܡ ܥܲܠ ܨܸܗܝܘܿܢ. [25]ܡܸܛܠ ܕܲܡܛ݂ܵܐ ܙܲܒ̣ܢܵܐ ܠܲܡܪܲܚܵܡܘܼ ܥܠܹܝܗ̇. [26]ܡܸܛܠ ܕܲܨܒ̣ܵܘ ܥܲܒ̣ܕܲܝ̈ܟ ܒܟܹܐܦܹ̈ܝܗ̇ ܘܲܠܥܲܦܪܵܗ̇ ܪܚܸܡ݂ܘ. [27]ܢܸܕ݂ܚܠܘܼܢ ܥܲܡܡܹ̈ܐ ܠܲܫܡܵܟ݂ ܡܵܪܝܵܐ. [28]ܘܟ̣ܠܗܘܿܢ ܡܲܠ̈ܟܹ̇ܐ ܕܐܲܪܥܵܐ ܠܐܝܼܩܵܪܵܟ݂. [29]ܡܸܛܠ ܕܒ̣ܵܢܹ̇ܐ ܡܵܪܝܵܐ ܠܨܸܗܝܘܿܢ. [30]ܘܡܸܬ̣ܚܙܸܐ ܒܫܘܼܒ̣ܚܹܗ. ܘܡܸܬ̣ܦܢܸܐ ܥܲܠ ܨܠܘܿܬ̣ܵܐ ܕܡܸܣܟܹ̇ܢܹ̈ܐ. [32]ܘܠܵܐ ܫܵܐܹ̇ܛ ܨܠܘܿܬ̣ܗܘܿܢ. [33]ܬܸܬ̣ܟ̇ܬܸܒ̣ ܗܵܕܹܐ ܠܕ݂ܵܪܵܐ ܐ̄ܚܪܹܢܵܐ. [34]ܘܥܲܡܵܐ ܕܡܸܬ̣ܒ̇ܪܸܐ ܢܫܲܒܲܚ ܠܡܵܪܝܵܐ. [35]ܡܸܛܠ ܕܐܲܕ݂ܝܼܩ ܡ̣ܢ ܡܪܲܘܡܵܐ ܕܩܘܼܕ݂ܫܹܗ. [36]ܡܵܪܝܵܐ ܡ̣ܢ ܫܡܲܝܵܐ ܥܲܠ ܐܲܪܥܵܐ ܐܲܕ݂ܝܼܩ. [37]ܠܡܸܫܡܲܥ ܐܸܢܲܩܬܹܗ ܕܐܲܣܝܼܪܵܐ. [38]ܘܲܠܡܸܫܪܵܐ ܒܢܲܝ̈ܵܐ ܡ̣ܢ ܡܲܘܬܵܐ. [49]ܕܢܸܫܬܲܥܘܿܢ ܒܨܸܗܝܘܿܢ ܫܡܹܗ ܕܡܵܪܝܵܐ. ܗܸܢ̣ܘܿܢ ܥܵܒ̣ܪܝܼܢ ܘܐܲܢ̄ܬ̇ ܩܲܝܵܡ ܐܲܢ̄ܬ̇. [40]ܘܬܸܫܒ̇ܚܵܬܹܗ ܒܐܘܿܪܸܫܠܸܡ. [41]ܡܵܐ ܕܐܸܬ̣ܟܲܢܲܫܘ ܥܲܡܡܹ̈ܐ ܐܲܟ̣ܚ̄ܕ݂ܵܐ. [42]ܘܡܲܠ̈ܟ̇ܘܵܬ̣ܵܐ ܠܡܸܦܠܲܚ ܠܡܵܪܝܵܐ. [43]ܡܲܟܸܟ̣ܘ ܚܲܝܠܝ ܒܐܲܪܥܵܐ. [44]ܘܲܒ̣ܨܝܼܪܘܼܬ̣ܵܐ ܕܝܲܘ̈ܡܲܝ̈ ܐܸܡܲܪ݂ ܠܝܼ. [45]ܠܵܐ ܬܲܣܩܲܢܝ ܒܦܸܠܓ̇ܘܼܬ̣ ܝܲܘ̈ܡܲܝ. [46]ܘܲܠܕ݂ܵܪܕܵܪ̈ܝܼܢ ܫܢܲܝ̈ܟ. [47]ܡ̣ܢ ܠܩܘܼܕ݂ܡܝܼܢ ܐܲܪܥܵܐ ܬܲܩܸܢܬ̇. [48]ܘܲܥܒ̣ܵܕ݂ ܐܝܼ̈ܕܲܝܟ ܫܡܲܝܵܐ. [50]ܘܟ̣ܠܗܘܿܢ ܐܲܝܟ݂ ܠܒ̣ܘܼܫܵܐ ܒܵܠܹܝܢ. [51]ܘܐܲܝܟ݂ ܡܲܪܛܘܼܛܵܐ ܡܸܬ̣ܚܲܠܦܝܼܢ. [52]ܘܐܲܢ̄ܬ̇ ܐܲܝܟ݂ ܕܐܝܼܬܲܝܟ ܐܲܢ̄ܬ̇ ܘܲܫܢܲܝ̈ܟ ܠܵܐ ܓܵܡܪ̈ܵܢ. [53]ܘܲܒ̣ܢܲܝ̈ ܥܲܒ̣ܕܲܝ̈ܟ ܢܸܫܪܘܼܢ ܒܐܲܪܥܵܐ. [54]ܘܙܲܪܥ̱ܗܘܿܢ ܩܕ݂ܵܡܲܝܟ ܢܸܬ̣ܩܲܢ.
 
Top