➕
←
Psalms
Psa
148
→
[1]ܫܲܒܲܚܘ ܠܡܵܪܝܵܐ ܡ̣ܢ ܫܡܲܝܵܐ. [2]ܫܲܒ̇ܚܘܼܗܝ ܒܲܡܪ̈ܲܘܡܹܐ. [3]ܫܲܒ̇ܚܘܼܗܝ ܟܠܗܘܿܢ ܡܲܠܲܐܟ̣ܵܘ̈ܗܝ. [4]ܫܲܒ̇ܚܘܼܗܝ ܟܠܗܘܿܢ ܚܲܝ̈ܠܵܘܵܬܹܗ. [5]ܫܲܒ̇ܚܘܼܗܝ ܫܸܡܫܵܐ ܘܣܲܗܪܵܐ. [6]ܫܲܒ̇ܚܘܼܗܝ ܟܠ ܟܲܘܟ̇ܒܹ̈ܐ ܘܢܘܼܗܪܵܐ. [7]ܫܲܒ̇ܚܘܼܗܝ ܫܡܲܝ̈ ܫܡܲܝܵܐ. [8]ܡܲܝ̈ܵܐ ܕܲܠܥܸܠ ܡ̣ܢ ܫܡܲܝ̈ܵܐ ܢܫܲܒ̇ܚܘܼܢ ܠܲܫܡܹܗ ܕܡܵܪܝܵܐ. [9]ܡܸܛܠ ܕܗܘ݀ ܐܸܡܲܪ ܘܲܗܘ݀ܵܘ ܘܗܘ݀ ܦܩܲܕ݂ ܘܐܸܬ̣ܒ̇ܪܝܼܘ. [10]ܘܐܲܩܝܼܡ ܐܸܢܘܿܢ ܠܥܵܠܲܡ ܥܵܠܡܝܼܢ. [11]ܢܵܡܘܿܣܵܐ ܝܲܗ̄ܒ̣ ܘܠܵܐ ܥܵܒܲܪ. [12]ܫܲܒܲܚܘ ܠܡܵܪܝܵܐ ܡ̣ܢ ܐܲܪܥܵܐ. [13]ܬܲܢܝܼܢܹ̈ܐ ܘܟ̣ܠܗܘܿܢ ܬܗܘܿܡܹ̈ܐ. [14]ܢܘܼܪܵܐ ܘܒܲܪܕ݂ܵܐ ܘܬܲܠܓܵܐ ܘܲܓ̣ܠܝܼܕ݂ܵܐ. [15]ܪ̈ܘܼܚܹܐ ܘܥܲܠܥܵܠܹ̈ܐ ܥܒ݂ܵܕ݂ܵܐ ܕܡܸܠܬܹܗ. [16]ܛܘܼܪܹ̈ܐ ܘܟ̣ܠܗܹܝܢ ܪ̈ܵܡܵܬ̣ܵܐ. [17]ܐܝܼܠܵܢܹ̈ܐ ܕܦܹܐܪܹ̈ܐ ܘܟ̣ܠܗܘܿܢ ܐܲܪ̈ܙܹܐ. [18]ܚܲܝܘ̱ܬ̣ܵܐ ܘܟ̣ܠܵܗ̇ ܒܥܝܼܪܵܐ. [19]ܪ̈ܲܚܫܵܐ ܘܛܲܝܪܵܐ ܘܦܵܪܲܚܬ̣ܵܐ. [20]ܡܲܠ̈ܟܹ̇ܐ ܕܐܲܪܥܵܐ ܘܟ̣ܠܗܹܝܢ ܐܸܡ̈ܘܵܬ̣ܵܐ. [21]ܪܲܘ̱ܪ̈ܒ̣ܵܢܹܐ ܘܟ̣ܠܗܘܿܢ ܕܲܝܵܢܹ̈ܐ ܕܐܲܪܥܵܐ. [22]ܓܲܕ̇ܘܼܕܹ̈ܐ ܘܲܒ̣ܬ̣ܘܼ̈ܠܵܬ̣ܵܐ. [23]ܣܵܒܹ̈ܐ ܘܲܥܠܲܝܡܹ̈ܐ ܢܫܲܒ̇ܚܘܼܢ ܠܲܫܡܹܗ ܕܡܵܪܝܵܐ. [24]ܡܸܛܠ ܕܪܲܒ̇ܘܼ ܫܡܹܗ ܒܲܠܚܘܿܕ݂ܵܘܗܝ. [25]ܘܫܘܼܒ̣ܚܹܗ ܒܐܲܪܥܵܐ ܘܒܲܫܡܲܝܵܐ. [26]ܡܪܝܼܡ ܩܲܪܢܵܐ ܕܥܲܡܹܗ ܘܬܸܫܒ̇ܘܿܚܬܵܐ ܕܟ̣ܠܗܘܿܢ ܙܲܕ̇ܝܼ̈ܩܵܘܗܝ. [27]ܠܲܒ̣ܢܲܝ̈ ܝܑܼܣܪܵܝܹܠ ܥܲܡܵܐ ܕܩܲܪܝܼܒ̣ ܠܹܗ.
 
Top