➕
←
Psalms
Psa
38
→
[1]מזמור לדוד להזכיר [2]יהוה־אל־בקצפך תוכיחני ובחמתך תיסרני [3]כי־חציך נחתו בי ותנחת עלי ידך [4]אין־מתם בבשרי מפני זעמך אין־שלום בעצמי מפני חטאתי [5]כי עונתי עברו ראשי כמשא כבד יכבדו ממני [6]הבאישו נמקו חבורתי מפני אולתי [7]נעויתי שחתי עד־מאד כל־היום קדר הלכתי [8]כי־כסלי מלאו נקלה ואין מתם בבשרי [9]נפוגותי ונדכיתי עד־מאד שאגתי מנהמת לבי [10]אדני נגדך כל־תאותי ואנחתי ממך לא־נסתרה [11]לבי סחרחר עזבני כחי ואור־עיני גם־הם אין אתי [12]אהבי ורעי־מנגד נגעי יעמדו וקרובי מרחק עמדו [13]וינקשו מבקשי נפשי ודרשי רעתי דברו הוות ומרמות כל־היום יהגו [14]ואני כחרש לא אשמע וכאלם לא יפתח־פיו [15]ואהי־כאיש אשר לא־שמע ואין בפיו תוכחות [16]כי־לך יהוה הוחלתי אתה תענה אדני אלהי [17]כי־אמרתי פן־ישמחו־לי במוט רגלי עלי הגדילו [18]כי־אני לצלע נכון ומכאובי נגדי תמיד [19]כי־עוני אגיד אדאג מחטאתי [20]ואיבי חיים עצמו ורבו שנאי שקר [21]ומשלמי רעה תחת טובה ישטנוני תחת רדופי [Q: רדפי־] טוב [22]אל־תעזבני יהוה אלהי אל־תרחק ממני [23]חושה לעזרתי אדני תשועתי
Credit

Source: unbound.biola.edu
Top