➕
←
Psalms
Psa
51
→
[1]למנצח מזמור לדוד [2]בבוא־אליו נתן הנביא כאשר־בא אל־בת־שבע [3]חנני אלהים כחסדך כרב רחמיך מחה פשעי [4]הרבה [Q: הרב] כבסני מעוני ומחטאתי טהרני [5]כי־פשעי אני אדע וחטאתי נגדי תמיד [6]לך לבדך חטאתי והרע בעיניך עשיתי למען תצדק בדברך תזכה בשפטך [7]הן־בעוון חוללתי ובחטא יחמתני אמי [8]הן־אמת חפצת בטחות ובסתם חכמה תודיעני [9]תחטאני באזוב ואטהר תכבסני ומשלג אלבין [10]תשמיעני ששון ושמחה תגלנה עצמות דכית [11]הסתר פניך מחטאי וכל־עונתי מחה [12]לב טהור ברא־לי אלהים ורוח נכון חדש בקרבי [13]אל־תשליכני מלפניך ורוח קדשך אל־תקח ממני [14]השיבה לי ששון ישעך ורוח נדיבה תסמכני [15]אלמדה פשעים דרכיך וחטאים אליך ישובו [16]הצילני מדמים אלהים אלהי תשועתי תרנן לשוני צדקתך [17]אדני שפתי תפתח ופי יגיד תהלתך [18]כי לא־תחפץ זבח ואתנה עולה לא תרצה [19]זבחי אלהים רוח נשברה לב־נשבר ונדכה אלהים לא תבזה [20]היטיבה ברצונך את־ציון תבנה חומות ירושלם [21]אז תחפץ זבחי־צדק עולה וכליל אז יעלו על־מזבחך פרים
Credit

Source: unbound.biola.edu
Top