➕
←
Psalms
Psa
58
→
[1]ܐܹܝܢ ܫܲܪܝܼܪܵܐܝܼܬ̣ ܙܲܕ̇ܝܼܩܘܼܬ̣ܵܐ ܡܡܲܠܠܝܼܢ ܐ̄ܢܬ̇ܘܿܢ. [2]ܘܲܬ̣ܪܝܼܨܘܼܬ̣ܵܐ ܕܵܝ̇ܢܝܼܢ ܐ̄ܢܬ̇ܘܿܢ ܒܢܲܝ̈ܢܵܫܵܐ. [3]ܗܵܐ ܟܠܟ̣ܘܿܢ ܥܲܘܠܵܐ ܡܡܲܠܠܝܼܢ ܐ̄ܢܬ̇ܘܿܢ ܒܐܲܪܥܵܐ. [4]ܘܲܒ̣ܥܲܘܠܵܐ ܡܥܲܪ̈ܙܠܵܢ ܐܝܼܕܲܝ̈ܟ̇ܘܿܢ. [5]ܐܸܬ̣ܦܪܸܫܘ ܥܲܘܵܠܹ̈ܐ ܡ̣ܢ ܟܲܪܣܵܐ. [6]ܘܲܛܥ݂ܵܘ ܡ̣ܢ ܡܲܪܒ̇ܥܵܐ ܕܲܡܡܲܠܠܝܼܢ ܕܲܓܵܠܘܼܬ̣ܵܐ. [7]ܚܸܡܬ̣ܗܘܿܢ ܐܲܝܟ݂ ܕܚܸܘܝܵܐ ܚܲܪܡܵܢܵܐ. [8]ܘܐܲܝܟ݂ ܕܐܸܣܦܸܣ ܚܲܪܫܬ̣ܵܐ. [9]ܕܲܡܣܲܟ̇ܪܵܐ ܐܸܕ݂ܢܹ̈ܝܗ̇ ܕܠܵܐ ܬܸܫܡܲܥ. [10]ܩܵܠܵܐ ܕܠܵܚܘܿܫܵܐ ܘܲܕ݂ܚܲܒܵܪܵܐ ܘܲܕ݂ܚܲܟ̇ܝܼܡܵܐ. [11]ܐܲܠܵܗܵܐ ܢܬܲܒܲܪ ܫܸܢܲܝ̈ܗܘܿܢ ܒܦܘܼܡܗܘܿܢ. [12]ܘܢܝܼܒܲܝ̈ܗܘܿܢ ܕܐܲܪ̈ܝܵܘܵܬ̣ܵܐ ܥܵܩܲܪ ܡܵܪܝܵܐ. [13]ܢܸܣܬ̇ܠܘܼܢ ܐܲܝܟ݂ ܡܲܝ̈ܵܐ ܕܡܸܬ̣ܐܲܫܕ̇ܝܼܢ. [14]ܘܢܸܫܕܸ̇ܐ ܓܹܐܪ̈ܵܘܗܝ ܥܕܲܡܵܐ ܕܲܢܣܘܼܦܘܼܢ. [15]ܐܲܝܟ݂ ܫܥܘܿܬ̣ܵܐ ܕܡܸܬ̣ܦܲܫܪܵܐ ܘܢܵܦ݁ܠܵܐ ܡ̣ܢ ܩܕ݂ܵܡ ܢܘܼܪܵܐ ܢܸܬ̣ܚܲܪܒ̇ܘܼܢ. [16]ܢܸܦܠܲܬ̤ ܢܘܼܪܵܐ ܘܠܵܐ ܚܙ݂ܵܘ ܫܸܡܫܵܐ ܘܠܵܐ ܐܸܣܬܲܟܲܠܘ. [17]ܢܸܗܘܘܿܢ ܟܘܼܒܲܝ̈ܗܘܿܢ ܗܲܛܛܹ̈ܐ. [18]ܘܪܘܼܓ̣ܙܵܐ ܢܕܲܠܲܚ ܐܸܢܘܿܢ. [19]ܢܸܚܕܸ̇ܐ ܙܲܕ̇ܝܼܩܵܐ ܕܚܵܙܹ̇ܐ ܦܘܼܪܥܵܢܵܐ. [20]ܘܐܝܼܕ݂ܵܘ̈ܗܝ ܢܫܝܼܓ̣ ܒܲܕ݂ܡܹܗ ܕܪܲܫܝܼܥܵܐ. [21]ܘܢܹܐܡܲܪ ܒܲܪܢܵܫܵܐ ܐܝܼܬ̣ ܗ̄ܘ̣ ܦܹܐܪܹ̈ܐ ܠܙܲܕ̇ܝܼܩܵܐ. [22]ܘܐܝܼܬ̣ ܐܲܠܵܗܵܐ ܕܲܢܕ݂ܘܼܢ ܐܸܢܘܿܢ ܒܐܲܪܥܵܐ.
 
Top