Peshitta OT
Peshitta OT
➕
←
Ruth
Rut
2
→
[
1
]
ܘܲܠܢܲܥܡܝܼ
ܐܝܼܬ̣ ܗ̄ܘܼܵܐ ܓܲܒ̣ܪܵܐ ܚܲܕܼ ܡܵܘܕܼܥܬ̣ܵܐ: ܡ̣ܢ ܫܲܪܒ̇ܬܹܗ ܕܐܹܠܝܼܡܲܠܟ ܒܲܥܠܵܗ̇: ܓܲܒ̣ܪܵܐ ܝܼܕܼܝܼܥܵܐ: ܘܲܫܡܹܗ ܒܵܥܵܙ.
[
2
]
ܘܐܸܡܲܪܲܬ̤
ܪܥܘܿܬ̣ ܡܘܼܐܒ̣ܵܝܬܵܐ ܠܢܲܥܡܝܼ ܚܡܵܬ̣ܵܗ̇ ܐܹܙܲܠ ܠܚܲܩܠܵܐ: ܘܐܸܠܩܘܿܛ ܠܩܵܛܵܐ ܒܵܬܲܪ ܦܵܥ̈ܠܹܐ ܡ̣ܢ ܕܐܸܫܟܲܚ ܪ̈ܲܚܡܹܐ ܒܥܲܝܬܵܘ̈ܗܝ. ܘܐܸܡܪܲܬ̤ ܠܵܗ̇ ܚܡܵܬ̣ܵܗ̇ ܙܸܠܝ ܒܪܲܬ̣ܝ.
[
3
]
ܘܐܸܙܲܠ̄ܬ̤
ܪܥܘܿܬ̣ ܠܡܸܠܩܲܛ ܠܩܵܛܵܐ ܒܬܲܪ ܚܵܨܘܿܕܹ̈ܐ: ܘܐܸܣܬܲܩܒ̇ܠܲܬ̤ ܒܦܵܠܓ̇ܘܼܬ̣ܵܐ ܕܚܲܩܠܹܗ ܕܒ̣ܵܥܵܙ ܒܲܪ ܫܲܪܒ̇ܬܹܗ ܕܐܹܠܝܼܡܲܠܟ.
[
4
]
ܘܗܵܐ
ܒܵܥܵܙ ܐܵܬܹܐ ܡ̣ܢ ܒܹܝܬ̣ ܠܚܸܡ: ܘܐܸܡܲܪ ܠܚܵܨܘܿܕܹ̈ܐ ܫܠܵܡܵܐ ܥܲܡܟ̣ܘܿܢ: ܘܐܵܡܪܝܼܢ ܠܹܗ ܡܵܪܝܵܐ ܢܒܲܪܟ̣ܵܟ.
[
5
]
ܘܐܸܡܲܪ
ܒܵܥܵܙ ܠܛܲܠܝܵܐ ܕܩܵܐܹܡ ܥܲܠ ܦܵܥ̈ܠܹܐ: ܡܵܐ ܛܸܒܵܗ̇ ܕܲܥܠܲܝܡܬ̣ܵܐ ܗܵܕܹܐ.
[
6
]
ܘܲܥܢܵܐ
ܛܲܠܝܵܐ ܘܐܸܡܲܪ ܠܹܗ: ܐܲܢ̄ܬ̇ܬ̣ܵܐ ܗ̄ܝ̣ ܡܘܼܐܵܒ̣ܵܝܬܵܐ: ܗܵܝ̇ ܕܐܸܬ̣ܵܬ̤ ܥܲܡ ܢܲܥܡܝܼ ܡ̣ܢ ܐܲܪܥܵܐ ܕܡܘܼܐܵܒ̣.
[
7
]
ܘܐܵܡܪܵܐ
ܐܸܠܩܘܿܛ ܠܩܵܛܵܐ ܒܵܬܲܪ ܦܵܥ̈ܠܹܐ. ܘܠܸܩܛܲܬ̤ ܡ̣ܢ ܨܲܦܪܵܐ ܘܲܥܕܲܡܵܐ ܠܲܢܝܵܚܬܵܐ.
[
8
]
ܘܐܸܡܲܪ
ܒܵܥܵܙ ܠܲܪܥܘܿܬ̣: ܒܪܲܬ̣ܝ: ܠܵܐ ܫܡܝܼܥ ܠܹܟ̣ܝ ܒܡܲܬ̣ܵܠܵܐ: ܕܲܒ̣ܚܲܩܠܵܐ ܕܠܵܐ ܕܝܼܠܵܟ ܠܵܐ ܬܸܠܩܘܿܛ: ܡܸܛܠ ܗܵܢܵܐ ܩܵܘܿܝ ܘܒ̣ܘܼܬ̣ܝ ܬܢܵܢ ܥܲܡ ܛܲܠܝܵܬ̣̈ܝ.
[
9
]
ܘܲܗ̤ܘܲܝܬ̇ܝ
ܚܵܙܝܵܐ ܐܲܝܟܵܐ ܚܵܨܕܝܼܢ: ܘܲܗ̤ܘܲܝܬ̇ܝ ܐܵܙܵܠ̄ܐ ܒܵܬܲܪܗܘܿܢ: ܗܵܐ ܦܩܕܹܬ̣ ܠܲܛܠܵܝܹ̈ܐ ܕܐ̄ܢܵܫ ܠܵܐ ܢܲܗܪܹܟ̣ܝ. ܘܐܸܢ ܨܵܗ̇ܝܵܐ ܐܲܢ̄ܬ̇ܝ: ܙܸܠܝ ܘܐܸܫܬܵܝ ܡ̣ܢ ܡܵܐܢܹ̈ܐ ܕܡܵܠܹܝܢ ܛܠܵܝܹ̈ܐ.
[
10
]
ܘܢܸܦܠܲܬ̤
ܥܲܠ ܐܲܦܹܝ̈ܗ̇ ܐܲܪܥܵܐ ܘܣܸܓ̣ܕܲܬ̣ ܠܹܗ: ܘܐܸܡܪܲܬ̤: ܡܸܛܠ ܕܐܸܫܟ̇ܚܹܬ̣ ܪ̈ܲܚܡܹܐ ܒܥܲܝܢܲܝ̈ܟ ܠܡܸܕܲܥܲܢܝ ܕܐܲܟ̣ܣܢܵܝܬܵܐ ܐ̄ܢܵܐ.
[
11
]
ܐܵܡܲܪ
ܠܵܗ̇ ܒܵܥܵܙ: ܡܸܬ̣ܐܡܵܪܘܼ ܐܸܬ̣ܐܡܲܪ ܠܝܼ ܡܸܕܸܡ ܕܲܥܒܲܕܬ̇ܝ ܥܲܡ ܚܡܵܬܹܟ̣ܝ ܡ̣ܢ ܒܵܬܲܪ ܕܡܝܼܬ̣ ܒܲܥܠܹܟ̣ܝ: ܕܲܫܒܲܩܬ̇ܝ ܐܲܒ̣ܘܼܟ̣ܝ ܘܐܸܡܹܟ̣ܝ ܘܫܲܒ̇ܬܹܟ̣ܝ: ܘܐܸܬܲܝܬ̇ܝ ܠܥܲܡܵܐ ܕܠܵܐ ܝܵܕܼܥܵܐ ܗ̄ܘܲܝܬ̇ܝ ܡ̣ܢ ܐܸܬ̣ܡܵܠܝ ܘܡ̣ܢ ܡܢܵܬ̣ܡܵܠܝ.
[
12
]
ܢܸܦ̱ܪܥܹܟ̣ܝ
ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܢܸܬܸ̇ܠ ܐܲܓ̣ܪܹܟ̣ܝ ܗܵܘ̇ ܕܐ̤ܬܲܝܬ̇ܝ ܠܡܸܣܬܲܬܵܪܘܼ ܬܚܹܝܬ̣ ܟܸܢܦܵܘ̈ܗܝ.
[
13
]
ܘܐܸܡܪܲܬ̤
ܠܹܗ: ܡܸܛܠ ܕܐܸܫܟ̇ܚܹܬ̣ ܪ̈ܲܚܡܹܐ ܒܥܲܝܢܲܝ̈ܟ ܡܵܪܝ: ܘܒܲܝܲܐܬܵܢܝ ܘܲܡܠܲܝܬ̇ ܒܠܸܒܵܗ̇ ܕܐܲܡܬ̣ܵܟ: ܘܐܸܢܵܐ ܐܸܗܘܸܐ ܐܲܝܟ ܚܕܼܵܐ ܡ̣ܢ ܐܲܡ̈ܗܵܬ̣ܵܟ.
[
14
]
ܘܐܸܡܲܪ
ܠܵܗ̇ ܒܵܥܵܙ ܒܥܸܕܵܢܵܐ ܘܫܵܪܘܼܬ̣ܵܐ: ܩܪܘܿܒ̣ܝ ܘܐܲܟ̣ܘܿܠܝ ܡ̣ܢ ܠܲܚܡܵܐ: ܘܐܵܘܬ̇ܒ̣ܵܗ̇ ܥܲܠ ܓܹܢ̄ܒ̣ ܚܵܨܘܿܕܹ̈ܐ: ܘܝܲܗ̄ܒ̣ ܠܵܗ̇ ܫܲܚܬ̇ܝܼܬ̣ܵܐ: ܘܲܨܒܲܥ ܠܲܚܡܵܐ ܒܚܲܠܒ̣ܵܐ: ܘܐܲܪܡܝܼ ܦܸܬܹ̈ܐ ܕܲܦܪ̈ܝܼܟ̣ܵܬ̣ܵܐ. ܘܝܲܗ̣̄ܒ̣ ܠܵܗ̇: ܘܐܸܟ̣ܠܲܬ̤ ܘܣܸܒ̣ܥܲܬ̤ ܘܐܵܘܬ̇ܪܲܬ̤.
[
15
]
ܘܩܵܡܲܬ̤
ܠܡܸܠܩܲܛ: ܘܦܲܩܸܕܼ ܒܵܥܵܙ ܠܥܲܒ̣ܕܵܘ̈ܗܝ: ܘܐܸܡܲܪ: ܬܸܠܩܘܿܛ ܡ̣ܢ ܒܲܝܢܵܬ̣ ܟܲܦܹ̈ܐ ܘܠܵܐ ܬܲܗܪܘܼܢܵܗ̇.
[
16
]
ܘܚܲܠܨܘ
ܠܵܗ̇ ܐܵܦ ܡ̣ܢ ܒܲܝܢܵܬ̣ ܟܲܦܹ̈ܐ. ܘܫܘܼܒ̣ܩܘܼܗ̇ ܠܵܩܵܛܵܐ: ܘܠܵܐ ܬܲܗܪܘܼܢܵܗ̇.
[
17
]
ܘܲܗܘ̤ܵܬ̣
ܠܵܩܵܛܵܐ ܒܚܲܩܠܵܐ ܥܕܲܡܵܐ ܠܪܲܡܫܵܐ: ܘܚܲܒ̇ܛܲܬ̤ ܐܸܢܹܝܢ: ܐܸܫܟ̇ܚܲܬ̤ ܒܗܹܝܢ ܐܲܝܟ ܡܠܸܐ ܟܲܝܠܵܐ ܕܲܣܥܵܪܹ̈ܐ.
[
18
]
ܘܫܸܩܠܲܬ̤
ܐܸܢܹܝܢ ܘܥܸܠܲܬ̤ ܠܲܡܕܼܝܼܢ̄ܬܵܐ: ܘܚܵܘܝܲܬ̤ ܠܲܚܡܵܬ̣ܵܗ̇ ܠܩܵܛܵܐ ܕܠܸܩܛܲܬ̤: ܘܝܸܗ̄ܒܲܬ̤ ܠܵܐ ܡ̣ܢ ܗܵܘ̇ ܡܵܐ ܕܠܸܥܣܲܬ̤ ܘܐܵܘܬ̇ܪܲܬ̤.
[
19
]
ܘܐܸܡܪܲܬ̤
ܠܵܗ̇ ܚܡܵܬ̣ܵܗ̇: ܐܲܝܟܵܐ ܠܵܩܛܵܐ ܗ̣̄ܘܲܝܬ̇ܝ ܝܵܘܡܵܢܵܐ: ܘܐܲܬܲܪ ܕܲܗ̤ܘܲܝܬ̇ܝ ܢܸܗܘܸܐ ܒܪܝܼܟ: ܘܗܵܘ̇ ܡ̇ܢ ܕܐܸܫܟܲܚܬ̇ܝ ܪ̈ܲܚܡܹܐ ܒܥܲܝܢܵܘ̈ܗܝ. ܘܐܸܫܬܲܥܝܲܬ̤ ܠܲܚܡܵܬ̣ܵܗ̇ ܐܲܝܟܵܐ ܗܘ̤ܵܬ̣: ܘܐܵܡܪܵܐ ܠܵܗ̇: ܒܵܥܵܙ ܫܡܹܗ ܠܓܲܒ̣ܪܵܐ ܕܠܵܩܛܵܐ ܗ̄ܘܹܝܬ̣ ܒܚܲܩܠܹܗ ܝܵܘܡܵܢܵܐ.
[
20
]
ܘܐܸܡܪܲܬ̤
ܢܲܥܡܝܼ ܠܟܲܠܬ̣ܵܗ̇: ܒܪܝܼܟ ܗ̄ܘ̣ ܡܵܪܝܵܐ ܕܠܵܐ ܐܲܥܒܲܪ ܚܸܣܕܹܗ ܡ̣ܢ ܚܲܝܹ̈ܐ ܘܡ̣ܢ ܡܝܼܬܹ̈ܐ. ܘܐܸܡܪܲܬ̤ ܠܵܗ̇ ܢܲܥܡܝܼ: ܩܲܪܝܼܒܲܢ ܗ̄ܘ̣ ܓܲܒ̣ܪܵܐ: ܘܡ̣ܢ ܬܵܒ̣ܥܝ̈ ܥܝܵܪܬܲܢ ܗ̄ܘ̣.
[
21
]
ܘܐܸܡܪܲܬ̤
ܪܥܘܿܬ̣ ܠܲܚܡܵܬ̣ܵܗ̇: ܘܐܸܡܲܪ ܠܝܼ ܬܘܼܒ̣: ܕܲܕܼܒܲܩܝ ܠܥܲܒ̣̈ܕܲܝ ܥܕܲܡܵܐ ܕܢܸܓ̣ܡܲܪ ܚܨܵܕܼܵܐ ܟܠܹܗ.
[
22
]
ܘܐܸܡܪܲܬ̤
ܢܲܥܡܝܼ ܠܲܪܥܘܿܬ̣ ܟܲܠܬ̣ܵܗ̇: ܛܘܼܒܲܝܟ̇ܝ ܒܪܲܬ̣ܝ ܕܲܕܼܒܸܩܬ̇ܝ ܠܲܥܠܲܝ̈ܡܵܬܹܗ: ܘܠܵܐ ܐ̄ܢܵܫ ܐܲܗܪܹܟ̣ܝ ܒܚܲܩܠܵܐ ܕܠܵܐ ܝܼܕܲܥܬ̇ܝ.
[
23
]
ܐܸܠܵܐ
ܢܩܸܦܬ̇ܝ ܠܐܲܡ̈ܗܵܬܹܗ ܕܒ̣ܵܥܵܙ ܠܡܸܠܩܲܛ: ܥܕܲܡܵܐ ܕܢܸܫܠܲܡ ܚܨܵܕܼܵܐ ܕܲܣܥܵܪܹ̈ܐ ܕܘܲܕܼܚܸܛܹ̈ܐ.
Top