|
|
| [1]ܘܟܲܕ݂ ܫ̣ܡܲܥ ܡܲܠܟܵܐ ܚܹܙܲܩܝܵܐ: ܨܲܪܝ ܠܒ̣ܘܼܫܵܘ̈ܗܝ: ܘܐܸܬ̣ܟܲܣܝܼ ܣܲܩܵܐ: ܘܥܲܠ̣ ܠܒܲܝܬܹ̇ܗ ܕܡܵܪܝܵܐ. |
[No book] |
| [2]ܘܫܲܕܲܪ ܠܐܸܠܝܵܩܝܼܡ ܪܲܒ̇ܒܲܝܬܵܐ: ܘܲܠܫܲܒ̣ܢܵܐ ܣܵܦܪܵܐ: ܘܲܠܣܵܒܹ̈ܐ ܕܟ݂ܵܗ̈ܢܹܐ ܟܲܕ݂ ܡܟܲܣܹܝܢ ܣܲܩܹ̈ܐ: ܠܘܵܬ̣ ܐܹܫܲܥܝܵܐ ܢܒ̣ܝܼܵܐ ܒܲܪ ܐܵܡܘܿܨ. |
[No book] |
| [3]ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܚܹܙܲܩܝܵܐ: ܝܵܘܡܵܐ ܗ̄ܘ̣ ܕܐܘܼܠܨܵܢܵܐ: ܘܲܕ݂ܡܲܟ̇ܣܵܢܘܼܬ̣ܵܐ ܘܲܕ݂ܪܘܼܓ̣ܙܵܐ ܝܵܘܡܵܢܵܐ. ܡܸܛܠ ܕܡܲܛܝܼܘ ܚܸܒ̣̈ܠܹܐ ܕܲܒ̣ܢܲܝܵܐ: ܘܠܲܝܬ̇ ܚܲܝܠܵܐ ܒܝܵܠܹܕܬܵܐ. |
[No book] |
| [4]ܛܵܟ݂ ܢܸܫܡܲܥ ܡܵܪܝܵܐ ܐܲܠܵܗܵܟ݂ ܡܸܠܵܘ̈ܗܝ ܕܪܲܒ̇ܫܵܩܹ̈ܐ: ܕܫܲܕ̇ܪܹܗ ܡܲܠܟܵܐ ܐܵܬ̣ܘܿܪܵܝܵܐ ܡܵܪܹܗ: ܠܲܡܚܲܣܵܕ݂ܘܼ ܠܐܲܠܵܗܵܐ ܚܲܝܵܐ: ܘܢܲܟ̇ܣܝܼܘܗܝ ܒܡܸܠܹ̈ܐ ܕܲܫ̣ܡܲܥ ܡܵܪܝܵܐ ܐܲܠܵܗܵܟ݂. ܘܬܸܒ̣ܥܸܐ ܘܲܬ̣ܨܲܠܹܐ ܥܲܠ ܫܲܪܟܵܐ ܕܐܸܫܬ̇ܚܲܪܘ. |
[No book] |
| [5]ܘܐܸܬ̣ܵܘ ܥܲܒ̣ܕܵܘ̈ܗܝ ܕܡܲܠܟܵܐ ܚܹܙܲܩܝܵܐ ܠܘܵܬ̣ ܐܹܫܲܥܝܵܐ. |
[No book] |
| [6]ܘܐܸܡܲܪ ܠܗܘܿܢ ܐܹܫܲܥܝܵܐ: ܗܵܟܲܢܵܐ ܬܹܐܡܪܘܼܢ ܠܡܵܪܟ݂ܘܿܢ: ܗܵܟܲܢܵܐ ܐܵܡܲܪ ܡܵܪܝܵܐ: ܠܵܐ ܬܸܕ݂ܚܲܠ ܡ̣ܢ ܩܕ݂ܵܡ ܡܸܠܹ̈ܐ ܕܲܫܡܲܥܬ̇: ܕܓܲܕܸ̇ܦܘ ܩܕ݂ܵܡܲܝ ܐܝܼܙܓܲܕܵܘ̈ܗܝ ܕܡܲܠܟܵܐ ܕܐܵܬ̣ܘܿܪ. |
[No book] |
| [7]ܗܵܐ ܝܵܗܹ̇ܒ̣ ܐ̄ܢܵܐ ܒܹܗ ܪܘܼܚܵܐ. ܘܢܸܫܡܲܥ ܛܸܒܵܐ: ܘܢܸܗܦܘܿܟ݂ ܠܐܲܪܥܹܗ. ܘܐܲܪܡܹܝܘܗܝ ܒܚܲܪܒܵܐ ܒܐܲܪܥܹܗ. |
[No book] |
| [8]ܘܲܗܦܲܟ݂ ܪܲܒ̇ܫܵܩܹ̈ܐ: ܘܐܸܫܟܲܚ ܠܡܲܠܟܵܐ ܕܐܵܬ̣ܘܿܪ ܟܲܕ݂ ܡܸܬ̣ܟܲܬܲܫ ܥܲܠ ܠܸܒ̣ܢܵܐ: ܡܸܛܠ ܕܲܫ̣ܡܲܥ ܕܲܫܩܲܠ ܡ̣ܢ ܠܟ݂ܝܼܫ. |
[No book] |
| [9]ܘܲܫܡܲܥ ܥܲܠ ܬܲܪܗܲܩ ܡܲܠܟܵܐ ܕܟܘܼܫ: ܕܲܢܦܲܩ ܠܡܸܬ̣ܟܲܬܵܫܘܼ ܥܲܡܹܗ. ܘܲܗܦܲܟ݂: ܘܫܲܕܲܪ ܐܝܼܙܓܲـ̈ـܕܹ̇ܐ ܠܘܵܬ̣ ܚܹܙܲܩܝܵܐ: ܘܐܸܡܲܪ. |
[No book] |
| [10]ܗܵܟܲܢܵܐ ܬܹܐܡܪܘܼܢ ܠܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܠܵܐ ܢܲܛܥܹܝܟ݂ ܐܲܠܵܗܵܟ݂ ܕܲܬ̣ܟ݂ܝܼܠ ܐܲܢ̄ܬ̇ ܥܠܵܘܗܝ: ܘܐܵܡܲܪ ܐܲܢ̄ܬ̇ ܕܠܵܐ ܡܸܫܬܲܠܡܵܐ ܐܘܿܪܸܫܠܸܡ ܒܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ. |
[No book] |
| [11]ܐܲܢ̄ܬ̇ ܫܡܲܥܬ̇ ܡܸܕܸ̇ܡ ܕܲܥܒܲܕ݂ܘ ܡܲܠ̈ܟܹ̇ܐ ܕܐܵܬ̣ܘܿܪ ܠܟ݂ܠܗܹܝܢ ܐܲܪ̈ܥܵܬ̣ܵܐ: ܘܐܲܚܪܸܒ̣ܘ ܐܸܢܹܝܢ: ܘܐܲܢ̄ܬ̇ ܡܸܬ̣ܦܲܨܹܐ ܐܲܢ̄ܬ̇. |
[No book] |
| [12]ܕܲܠܡܵܐ ܦܲܨܝܼܘ ܐܲܠܵܗܲܝ̈ܗܘܿܢ ܕܥܲܡܡܹ̈ܐ: ܕܲܚܪܲܒ̣ܘ ܐܲܒ̣ܵܗܲܝ̈: ܠܓ̣ܵܘܙܵܢ ܘܲܠܚܵܪܵܢ ܘܲܠܪܵܨܵܦ ܘܠܲܒ̣ܢܲܝ̈ ܥܕ݂ܢ ܕܲܒ̣ܕ݂ܵܠܵܣܵܪ. |
[No book] |
| [13]ܐܲܝܟܵܘ ܡܲܠܟܵܐ ܕܲܚܡܵܬ̣: ܘܡܲܠܟܵܐ ܕܲܪܦܵܕ݂: ܘܡܲܠܟܵܐ ܕܲܩܪܝܼܬ̣ܵܐ ܣܦܲܪܘܹܝܡ: ܘܲܕ݂ܢܵܥ: ܘܲܕ݂ܥܵܘܵܐ. |
[No book] |
| [14]ܘܲܢܣܲܒ̣ ܚܹܙܲܩܝܵܐ ܐܸܓܪ̈ܵܬ̣ܵܐ ܡ̣ܢ ܐܝܼܕ݂ܵܐ ܕܐܝܼܙܓܲـ̈ـܕܹ̇ܐ: ܘܲܩܪܵܐ ܐܸܢܹܝܢ. ܘܲܣܠܸܩ ܠܒܲܝܬܹ̇ܗ ܕܡܵܪܝܵܐ ܘܲܦܪܲܣ ܐܸܢܹܝܢ ܚܹܙܲܩܝܵܐ ܩܕ݂ܵܡ ܡܵܪܝܵܐ. |
[No book] |
| [15]ܘܨܲܠܝܼ ܚܹܙܲܩܝܵܐ ܩܕ݂ܵܡ ܡܵܪܝܵܐ ܘܐܸܡܲܪ: ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܕܝܵܬܹܒ̣ ܥܲܠ ܟܪ̈ܘܿܒܹܐ. ܐܲܢ̄ܬ̇ ܗ̄ܘ̣ ܐܲܠܵܗܵܐ ܒܲܠܚܘܿܕܲܝܟ ܥܲܠ ܟܠܗܹܝܢ ܡܲܠ̈ܟ̇ܘܵܬ̣ܵܐ ܕܐܲܪܥܵܐ. ܐܲܢ̄ܬ̇ ܥܒܲܕ̇ܬ̇ ܫܡܲܝܵܐ ܘܐܲܪܥܵܐ. |
[No book] |
| [16]ܨܠܝܼ ܡܵܪܝܵܐ ܐܸܕ݂ܢܵܟ݂: ܘܲܫܡܲܥ ܦܬܲܚ ܡܵܪܝܵܐ ܥܲܝܢܲܝ̈ܟ: ܘܲܚܙܝܼ ܘܲܫܡܲܥ ܟܠܗܹܝܢ ܡܸܠܵܘ̈ܗܝ ܕܣܲܢܚܹܝܪܝܼܒ̣ ܕܲܫܠܲܚ̣ ܠܲܡܚܲܣܵܕ݂ܘܼ ܠܐܲܠܵܗܵܐ ܚܲܝܵܐ. |
[No book] |
| [17]ܫܲܪܝܼܪܵܐܝܼܬ̣ ܡܵܪܝܵܐ ܚܪܲܒ̣ܘ ܡܲܠ̈ܟܹ̇ܐ ܕܐܵܬ̣ܘܿܪ ܥܲܡܡܹ̈ܐ ܘܐܲܪ̈ܥܵܬ̣ܗܘܿܢ. |
[No book] |
| [18]ܘܐܲܠܵܗܲܝ̈ܗܘܿܢ ܐܵܘܩܸܕ݂ܘ ܒܢܘܼܪܵܐ. ܡܸܛܠ ܕܠܵܐ ܗܘ̤ܵܘ ܐܲܠܵܗܹ̈ܐ: ܐܸܠܵܐ ܥܒ̣ܵܕ݂ ܐܝܼ̈ܕܲܝܵܐ ܕܲܒ̣ܢܲܝ̈ܢܵܫܵܐ: ܕܩܲܝܣܵܐ ܘܲܕ݂ܟܹܐܦܵܐ. ܘܐܵܘܒܸ̇ܕ݂ܘ ܐܸܢܘܿܢ. |
[No book] |
| [19]ܘܗܵܫܵܐ ܡܵܪܝܵܐ ܐܲܠܵܗܲܢ: ܦܪܘܿܩܲܝܢ ܡ̣ܢ ܐܝܼܕ݂ܵܘ̈ܗܝ. ܕܢܸ̈ܕܥܵܢ ܟܠܗܹܝܢ ܡܲܠ̈ܟ̇ܘܵܬ̣ܵܐ ܕܐܲܪܥܵܐ: ܕܐܲܢ̄ܬ̇ܘܼ ܡܵܪܝܵܐ ܐܲܠܵܗܵܐ ܒܲܠܚܘܿܕܲܝܟ. |
[No book] |
| [20]ܘܲܫܠܲܚ ܐܹܫܲܥܝܵܐ ܒܲܪ ܐܵܡܘܿܨ ܠܚܹܙܲܩܝܵܐ: ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡܸܕܸ̇ܡ ܕܨܲܠܝܼܬ̇ ܩܕ݂ܵܡܲܝ ܥܲܠ ܣܲܢܚܹܝܪܝܼܒ̣ ܡܲܠܟܵܐ ܕܐܵܬ̣ܘܿܪ: ܫܸܡ̇ܥܹܬ̣. |
[No book] |
| [21]ܗܵܢܵܐ ܗ̄ܘ̣ ܦܸܬ̣ܓ̣ܵܡܵܐ ܕܐܸܡܲܪ ܥܠܵܘܗܝ ܡܵܪܝܵܐ: ܫܸܝ̇ܛܵܐ ܠܵܟ݂ ܘܲܡܡܲܝܩܵܐ ܒܵܟ݂ ܒܬ̣ܘܼܠܬܵܐ ܒܲܪܬ̣ ܨܸܗܝܘܿܢ: ܘܒ̣ܵܬ̣ܪܵܟ݂ ܡܢܝܼܕ݂ܵܐ ܪܹܫܵܗ̇ ܒܲܪܬ̣ ܐܘܿܪܸܫܠܸܡ. |
[No book] |
| [22]ܠܡ̇ܢ ܚܲܣܕ̇ܬ̇: ܘܲܩܕ݂ܵܡ ܡ̇ܢ ܓ̇ܕܸ̇ܦܬ̇. ܘܥܲܠ ܡ̇ܢ ܐܲܪܝܼܡܬ̇ ܩܵܠܵܟ݂ ܐܲܪܝܼܡܬ̇ ܥܲܝܢܲܝ̈ܟ ܠܲܡܪܵܘܡܵܐ ܥܲܠ ܩܲܕ̇ܝܼܫܵܐ ܕܝܼܣܪܵܝܹܠ. |
[No book] |
| [23]ܘܒ̣ܐܝܼܕ݂ܵܐ ܕܐܝܼܙܓܲܕܲܝ̈ܟ ܚܲܣܕ̇ܬ̇ ܠܡܵܪܝܵܐ. ܘܐܸܡܪܬ̇ ܕܲܒ̣ܣܘܼܓ̣ܵܐܐ ܕܡܲܪ̈ܟ̇ܒ̣ܵܬ̣ܵܝ: ܐܸܢܵܐ ܐܸܣܲܩ ܠܪܵܘܡܵܐ ܕܛܘܼܪܹ̈ܐ: ܘܠܲܫܦܘܿܠܵܘ̈ܗܝ ܕܠܸܒ̣ܢܵܢ. ܘܐܸܦܣܘܿܩ ܩܵܘ̈ܡܵܬ̣ܵܐ ܕܐܲܪ̈ܙܘܗܝ: ܘܲܓܒܲـ̈ـܝܵܐ ܕܫܲܪ̈ܘܲܝܢܵܘܗܝ ܘܐܸܥܘܿܠ ܠܪܵܘܡܵܐ ܕܣܵܟܹܗ ܕܥܵܒ̣ܵܐ ܕܟܲܪܡ̄ܠܵܐ. |
[No book] |
| [24]ܐܸܢܵܐ ܐܸܚܦܘܿܪ: ܘܐܸܫܬܸ̇ܐ ܡܲـ̈ـܝܵܐ ܢܘܼܟ݂ܪ̈ܵܝܹܐ. ܘܐܵܘܒܸ̇ܫ ܒܦܲܪ̈ܣܵܬ̣ܵܐ ܕܪ̈ܲܟ݂ܫ̄ܝ: ܟܠܗܘܿܢ ܢܗܪ̈ܵܘܵܬ̣ܵܐ ܥܲܫܝܼܢܹ̈ܐ. |
[No book] |
| [25]ܠܵܐ ܫܡܲܥܬ̇ ܡ̣ܢ ܪܘܼܚܩܵܐ ܠܵܗ̇ ܥܸܒ̣ܕܹ̇ܬ̣: ܘܡ̣ܢ ܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ ܠܵܗ̇ ܥܲܬ̇ܕܹ̇ܬ̣ ܘܗܵܫܵܐ ܐܝܼܬ̇ܝܼܬܵܗ̇ ܕܬܸܗܘܹܐ ܠܚܘܼܪܒܵܐ ܘܲܠܨܕ݂ܝܵܐ: ܐܲܝܟ݂ ܡܕ݂ܝܼ̈ܢܵܬ̣ܵܐ ܥܲܫܝܼ̈ܢܵܬ̣ܵܐ. |
[No book] |
| [26]ܕܝܲܬܵܒܲܝ̈ܗܹܝܢ ܙܥܲܪ ܚܲܝ̱ܠܗܘܿܢ: ܘܐܸܬ̇ܬ̇ܒܲܪܘ ܘܲܒ̣ܗܸܬ̣ܘ ܘܲܗܘ̤ܵܘ ܐܲܝܟ݂ ܥܸܣܒܵܐ ܕܚܲܩܠܵܐ: ܘܐܲܝܟ݂ ܝܘܼܪܵܩܵܐ ܕܬܸܕܐܵܐ: ܘܐܲܝܟ݂ ܥܡܝܼܪܵܐ ܕܐܸܓܵܪܵܐ: ܘܐܲܝܟ݂ ܒܘܼܚܫܝܼܢܵܐ ܩܕ݂ܵܡ ܩܵܝܑܹܡܬ̣ܵܐ. |
[No book] |
| [27]ܡܵܘܬ̇ܒ̣ܵܟ݂ ܘܡܲܥܠܵܟ݂ ܘܡܲܦܩܵܟ݂ ܝܵܕܲܥ ܐ̄ܢܵܐ. ܘܕܸܐܬ̣ܪܵܘܪܲܒ̣ܬ̇ ܥܠܲܝ: ܥܲܠ ܕܐܲܡܪܲܚܬ̇ ܘܐܸܬ̣ܪܵܘܪܲܒ̣ܬ̇ ܥܠܲܝ. |
[No book] |
| [28]ܘܓ̣ܘܼܕܵܦܵܟ݂ ܣܠܸܩ ܒܐܸܕ݂ܢܲܝ̈ ܐܲܪܡܸܐ ܩܠܵܕ݂ܵܐ ܒܲܢܚܝܼܪܵܟ݂: ܘܲܒ̣ܠܵܡܵܐ ܒܣܸܦ̈ܘܵܬ̣ܵܟ݂ ܘܐܲܗܦܟ݂ܵܟ݂ ܒܐܘܼܪܚܵܐ ܕܐܸܬܲܝܬ̇ ܒܵܗ̇. |
[No book] |
| [29]ܘܗܵܕܹܐ ܐܵܬ̤ܵܐ ܬܸܗܘܹܐ ܠܵܟ݂: ܐܵܟܹ̇ܠ ܐܲܢ̄ܬ̇ ܫܲܢ̄ܬܵܐ ܗܵܕܹܐ ܟܵܬ̣ܵܐ. ܘܫܲܢ̄ܬܵܐ ܕܬܲܪܬܹ̇ܝܢ: ܟܵܬ̣ ܟܵܬ̣ܵܐ. ܘܫܲܢ̄ܬܵܐ ܬܠܝܼܬ̣ܵܝܬܵܐ: ܙܵܪܘܿܥܘ ܘܲܚܨܘܿܕ݂ܘ: ܘܨܘܿܒ̣ܘ ܟܲܪ̈ܡܹܐ: ܘܐܲܟ݂ܘܿܠܘ ܦܹܐܪ̈ܲܝܗܘܿܢ. |
[No book] |
| [30]ܘܢܵܘܣܦܘܼܢ ܫܲܪܟܵܐ ܕܒܹܝܬ̣ ܝܼܗܘܼܕ݂ܵܐ. ܕܐܸܫܬ̇ܚܲܪܘ: ܫܵܕܹܝܢ ܥܸܩܵܪܵܐ ܠܬܲܚܬ̇: ܘܥܵܒ̣ܕ̇ܝܼܢ ܦܹܐܪܹ̈ܐ ܠܥܸܠ. |
[No book] |
| [31]ܡܸܛܠ ܕܡ̣ܢ ܐܘܿܪܸܫܠܸܡ ܢܸܦܘܿܩ ܫܲܪܟܵܢܵܐ: ܘܦܘܼܠܵܛܵܐ ܡ̣ܢ ܛܘܼܪܵܐ ܕܨܵܗܝܘܿܢ. ܩܸܢ̱ܐܬܹܗ ܕܡܵܪܝܵܐ ܚܲܝܠܬ̣ܵܢܵܐ ܬܸܥܒܸ̇ܕ݂ ܗܵܕܹܐ. |
[No book] |
| [32]ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܥܲܠ ܡܲܠܟܵܐ ܕܐܵܬ̣ܘܿܪ: ܠܵܐ ܢܸܥܘܿܠ ܠܲܩܪܝܼܬ̣ܵܐ ܗܵܕܹܐ: ܘܠܵܐ ܢܸܫܕܹ̇ܐ ܬܲܡܵܢ ܓܹܐܪܵܐ: ܘܠܵܐ ܢܩܲܕ̇ܡܝܼܗ̇ ܒܣܲܟ̇ܪܵܐ: ܘܠܵܐ ܢܲܟ݂ܡܸܢ ܥܠܹܝܗ̇ ܟܡܹܐܢܵܐ. |
[No book] |
| [33]ܐܸܠܵܐ ܒܐܘܼܪܚܵܐ ܕܐܸܬ̣ܵܐ ܒܵܗ̇: ܢܸܗܦܘܿܟ݂ ܘܠܲܩܪܝܼܬ̣ܵܐ ܗܵܕܹܐ ܠܵܐ ܢܸܥܘܿܠ: ܐܵܡܲܪ ܡܵܪܝܵܐ. |
[No book] |
| [34]ܘܐܲܓܸ̇ܢ ܥܲܠ ܩܪܝܼܬ̣ܵܐ ܗܵܕܹܐ ܘܐܸܦ̱ܪܩܝܼܗ̇: ܡܸܛܠܵܬ̣ܝ ܘܡܸܛܠ ܕܵܘܝܼܕ݂ ܥܲܒ̣ܕܝ. |
[No book] |
| [35]ܘܲܗܘ̤ܵܐ ܒܠܸܠܝܵܐ ܗܵܘ̇: ܘܲܢܦܲܩ ܡܲܠܲܐܟܹܗ ܕܡܵܪܝܵܐ: ܘܩܲܛܸܠ ܒܡܲܫܪܝܼܬܹܗ ܕܐܵܬ̣ܘܿܪܵܝܵܐ: ܡܵܐܐ ܘܲܬ̣ܡܵܢܐܝܼܢ ܘܚܲܡܫܵܐ ܐܲܠܦ̈ܝܼܢ. ܘܩܲܕܸ̇ܡ̣ܘ ܒܨܲܦܪܵܐ ܘܚܵܙܹ̇ܝܢ: ܘܗܵܐ ܟܠܗܘܿܢ ܦܲܓ̣ܪܹ̈ܐ ܡܝܼ̈ܬܹܐ. |
[No book] |
| [36]ܘܲܫܩܲܠܘ ܘܐܸܙܲܠܘ ܘܲܗܦܲܟ݂ ܣܲܢܚܹܝܪܝܼܒ̣ ܡܲܠܟܵܐ ܕܐܵܬ̣ܘܿܪ: ܘܝܼܬܸܒ̣ ܒܢܝܼܢܘܹܐ. |
[No book] |
| [37]ܘܟܲܕ݂ ܣܵܓܹܕ݂ ܗ̄ܘ̣ܵܐ ܒܹܝܬ̣ ܢܲܣܪܵܟ݂ ܐܲܠܵܗܹܗ: ܐܲܕܲܪܡܲܠܟ ܘܫܵܪܵܐܨܵܪ ܒܢܵܘ̈ܗܝ ܩܲܛܠܘܼܗܝ ܒܚܲܪܒܵܐ. ܗܸܢܘܿܢ ܐܸܬ̣ܦܲܠܲܛܘ ܠܐܲܪܥܵܐ ܕܐܲܪܕ݂ܵܛ. ܘܐܲܡ̣ܠܸܟ݂ ܣܲܪܚܲܕ̇ܘܿܡ ܒܪܹܗ ܒܵܬ̣ܪܹܗ. |
[No book] |