|
|
| [1]ܘܢܲܥܡܵܢ ܪܲܒ̇ ܚܲܝܠܵܐ ܕܡܲܠܟܵܐ ܕܐܲܕ݂ܘܿܡ: ܓܒܲܪ ܗ̄ܘ̣ܵܐ ܪܲܒ̇ ܩܕ݂ܵܡ ܡܵܪܹܗ: ܘܲܫܒ̣ܝܼܚ ܒܐܲܦܹ̈ܐ. ܡܸܛܠ ܕܒܹܗ ܥ̣ܒܲܕ݂ ܡܵܪܝܵܐ ܦܘܼܪܩܵܢܵܐ ܠܐܲܕ݂ܘܿܡ. ܘܓܲܒ̣ܪܵܐ ܢܲܥܡܵܢ ܓܲܢ̄ܒܵܪ ܚܲܝܠܵܐ ܗ̄ܘ̣ܵܐ: ܘܲܓ̣ܪܸܒ̣. |
[No book] |
| [2]ܘܐܲܕ݂ܘܿܡܵܝܹ̈ܐ ܢܦܲܩܘ ܒܓܲܝܣܹ̈ܐ: ܘܲܫܒ̣ܵܘ ܡ̣ܢ ܐܲܪܥܵܐ ܕܝܼܣܪܵܝܹܠ ܥܠܲܝܡܬ̣ܵܐ ܙܥܘܿܪܬܵܐ: ܘܲܗܘ̤ܵܬ̣ ܩܕ݂ܵܡ ܐܲܢ̄ܬ̇ܬܹܗ ܕܢܲܥܡܵܢ. |
[No book] |
| [3]ܘܐܸܡܪܲܬ̤ ܠܡܵܪܬܵܗ̇: ܛܘܼܒ̣ܵܘܗܝ ܠܡܵܪܝ ܐܸܢ ܢܹܐܙܲܠ ܠܘܵܬ̣ ܢܒ̣ܝܼܵܐ ܕܲܒ̣ܫܵܡܪܹܝܢ: ܡܸܚܕ݂ܵܐ ܡܲܐܣܸܐ ܠܹܗ ܡ̣ܢ ܓܲܪܒܹܗ. |
[No book] |
| [4]ܘܥܲܠܘ ܘܚܵܘܝܼܘ ܠܡܵܪܵܗ̇: ܘܐܸܡܲܪܘ ܠܹܗ: ܗܵܟܲܢܵܐ ܘܗܵܟܲܢܵܐ ܐܸܡܪܲܬ̤ ܥܠܲܝܡܬ̣ܵܐ ܕܡ̣ܢ ܐܲܪܥܵܐ ܕܝܼܣܪܵܝܹܠ. |
[No book] |
| [5]ܘܐܸܡܲܪ ܠܹܗ: ܡܲܠܟܵܐ ܕܐܲܕ݂ܘܿܡ ܬܵܐ ܙܸܠ: ܐܸܢܵܐ ܐܹܫܲܕܲܪ ܐܸܓܲܪܬܵܐ ܠܡܲܠܟܵܐ ܕܝܼܣܪܵܝܹܠ. ܘܐܸܙܲܠ̣ ܘܲܢܣܲܒ̣ ܒܐܝܼܕܹܗ ܥܣܲܪ ܟܲܟ̇ܪ̈ܝܼܢ ܕܟܸܣܦܵܐ: ܘܸܫܬܵܐ ܐܲܠܦ̈ܝܼܢ ܕܕܲܗܒ̣ܵܐ: ܘܥܸܣܪܵܐ ܙܵܘ̈ܓ̇ܝܼܢ ܕܢܲܚ̈ܬܹ̇ܐ. |
[No book] |
| [6]ܘܐܲܝܬ̇ܝܼ ܐܸܓܲܪܬܵܐ ܠܡܲܠܟܵܐ ܕܝܼܣܪܵܝܹܠ. ܘܗܵܟܲܢܵܐ ܟܬ̣ܝܼܒ̣ ܒܵܗ̇: ܒܫܵܥܬ̣ܵܐ ܕܡܵܛ̇ܝܵܐ ܐܸܓܲܪܬܵܐ ܗܵܕܹܐ ܠܘܵܬ̣ܵܟ݂: ܗܵܐ ܫܲܕܲܪܬ̇ ܠܘܵܬ̣ܵܟ݂ ܠܢܲܥܡܵܢ ܥܲܒ̣ܕܲܝ: ܐܲܣܵܝܗܝ ܡ̣ܢ ܓܲܪܒܹܗ. |
[No book] |
| [7]ܘܟܲܕ݂ ܩܪܵܐ ܡܲܠܟܵܐ ܕܝܼܣܪܵܝܹܠ ܐܸܓܲܪܬܵܐ: ܨܲܪܝܼ ܠܒ̣ܘܼܫܵܘܗܝ: ܘܐܸܡܲܪ: ܐܸܢܵܐ ܐܲܠܵܗܵܐ ܐ̄ܢܵܐ ܕܲܡܡܝܼܬ̣ ܘܡܲܚܸܐ: ܕܲܫܠܲܚ ܠܝܼ ܗܵܢܵܐ ܕܐܲܣܸܐ ܓܲܒ̣ܪܵܐ ܡ̣ܢ ܓܲܪܒܹܗ. ܡܸܟܹ̇ܝܠ ܕܲܥܘ ܘܲܚܙܵܘ ܕܡܸܬ̣ܓܲܪܵܝܘܼ ܡܸܬ̣ܓܲܪܸܐ ܥܲܡܝ. |
[No book] |
| [8]ܘܟܲܕ݂ ܫ̣ܡܲܥ ܐܹܠܝܼܫܲܥ ܢܒ̣ܝܹܗ ܕܐܲܠܵܗܵܐ: ܕܨܲܪܝܼ ܡܲܠܟܵܐ ܠܒ̣ܘܫܵܘ̈ܗܝ: ܫܠܲܚ ܠܡܲܠܟܵܐ: ܘܐܸܡܲܪ ܠܹܗ: ܠܡܵܢܵܐ ܨܲܪܝܼܬ̇ ܠܒ̣ܘܼܫܲܝ̈ܟ ܢܹܐܬܹܐ ܠܘܵܬ̣ܝ: ܘܢܸܕܲܥ ܕܐܝܼܬ̣ ܢܒ̣ܝܼܵܐ ܒܝܼܣܪܵܝܹܠ. |
[No book] |
| [9]ܘܐܸܬ̣ܵܐ ܢܲܥܡܵܢ ܒܪ̈ܲܟ݂ܫܹܗ ܘܲܒ̣ܡܲܪ̈ܟ̇ܒ̣ܵܬܹܗ. ܘܩܵܡ̣ ܒܲܬ̣ܪܲܥ ܒܲܝܬܹ̇ܗ ܕܐܹܠܝܼܫܲܥ. |
[No book] |
| [10]ܘܲܫܠܲܚ ܠܹܗ ܐܹܠܝܼܫܲܥ ܒܝܲܕ݂ ܡܲܠܲܐܟ݂ܵܐ: ܙܸܠ ܘܲܣܚܝܼ ܫܒܲܥ ܙܲܒ̣ܢ̈ܝܼܢ ܒܝܘܿܪܕ̇ܢܵܢ: ܘܲܢܬ̣ܘܼܒ̣ ܒܸܣܪܵܟ݂ ܥܠܲܝܟ: ܘܢܸܬ̇ܕܲܟܸ̇ܐ. |
[No book] |
| [11]ܘܲܪܓܸ̇ܙ ܢܲܥܡܵܢ ܘܐܸܙܲܠ̣: ܘܐܸܡܲܪ: ܐܸܢܵܐ ܐܸܡ̇ܪܹܬ̣ ܕܡܸܦܘܿܩ ܠܘܵܬ̣ܝ: ܘܲܢܩܘܼܡ ܘܢܸܩܪܸܐ ܒܲܫܡܹܗ ܕܡܵܪܝܵܐ ܐܲܠܵܗܹܗ: ܘܲܢܢܝܼܦ ܐܝܼܕܹܗ ܥܲܠ ܕܘܼܟ̇ܬ̣ܵܐ: ܘܐܸܬ̣ܐܲܣܸܐ ܡ̣ܢ ܓܲܪܒ̣ܵܐ. |
[No book] |
| [12]ܠܵܐ ܗ̄ܘ̣ܵܐ ܛܵܒ̣ ܐܲܡܢܵܢ ܘܦܲܪܦܵܪ ܢܲܗܪ̈ܵܘܵܬ̣ܵܐ ܕܕܲܪܡܣܘܿܩ: ܡ̣ܢ ܟܠܗܘܿܢ ܡܲـ̈ـܝܵܐ ܕܝܼܣܪܵܝܹܠ. ܐܸܙܲܠ ܐܸܣܚܸܐ ܒܗܘܿܢ: ܡܲܬ̇ܕܲܟܸ̇ܐ ܐ̄ܢܵܐ. ܘܐܸܬ̣ܦܢܝܼ: ܘܐܸܙܲܠ̣ ܒܚܸܡܬ̣ܵܐ. |
[No book] |
| [13]ܘܲܩܪܸܒ̣ܘ ܥܲܒ̣ܕܵܘ̈ܗܝ ܘܐܵܡ̇ܪܝܼܢ ܠܹܗ: ܡܵܪܲܢ: ܐܸܠܘܼ ܦܸܬ̣ܓ̣ܵܡܵܐ ܪܲܒܵܐ ܐܸܡܲܪ ܗ̄ܘ̣ܵܐ ܠܵܟ݂ ܢܒ̣ܝܼܵܐ: ܘܵܠܹ̇ܐ ܗ̄ܘ̣ܵܐ ܠܵܟ݂ ܠܡܸܥܒܲܕ݂. ܐܸܠܵܐ ܗܵܐ ܦܸܬ̣ܓ̣ܵܡܵܐ ܗ̄ܘ̣ ܙܥܘܿܪܵܐ ܐܸܡܲܪ ܠܵܟ݂: ܙܸܠ ܣܚܝܼ ܘܲܕ݂ܟ݂ܝ. |
[No book] |
| [14]ܘܐܸܙܲܠ ܣܚ̣ܵܐ ܒܝܘܿܪܕ̇ܢܵܢ ܫܒܲܥ ܙܲܒ̣ܢ̈ܝܼܢ: ܐܲܝܟ݂ ܦܸܬ̣ܓ̣ܵܡܹܗ ܕܲܢܒ̣ܝܼܵܐ ܕܐܲܠܵܗܵܐ. ܘܲܗܦܲܟ݂ ܒܸܣܪܹܗ ܐܲܝܟ݂ ܒܸܣܪܵܐ ܕܛܲܠܝܵܐ ܙܥܘܿܪܵܐ: ܘܐܸܬ̇ܕܲܟ̇ܝܼ. |
[No book] |
| [15]ܘܲܗܦܲܟ݂ ܠܘܵܬ̣ ܢܒ̣ܝܹܗ ܕܐܲܠܵܗܵܐ: ܗ̤ܘ ܘܟ݂ܠܵܗ̇ ܡܲܫܪܝܼܬܹܗ: ܘܐܸܬ̣ܵܐ ܘܩܵܡ ܩܕ݂ܵܡܵܘܗܝ: ܘܐܸܡܲܪ ܠܹܗ ܗܵܫܵܐ ܗ̄ܘ̣ ܝܸܕܥܹܬ̣ ܕܠܲܝܬ̇ ܐܲܠܵܗܵܐ ܒܟ݂ܠܵܗ̇ ܐܲܪܥܵܐ: ܐܸܠܵܐ ܐܸܢ ܒܝܼܣܪܵܝܹܠ ܘܗܵܫܵܐ ܣܲܒ̣ ܒܘܼܪܟ̇ܬ̣ܵܐ ܗܵܕܹܐ ܡ̣ܢ ܥܲܒ̣ܕܵܟ݂. |
[No book] |
| [16]ܘܐܸܡܲܪ ܐܹܠܝܼܫܲܥ: ܚܲܝ ܗ̄ܘ̣ ܡܵܪܝܵܐ ܕܩܵܡܹ̇ܬ̣ ܩܕ݂ܵܡܵܘܗܝ: ܕܠܵܐ ܐܸܣܲܒ̣ ܘܲܒ̣ܥܵܐ ܡܸܢܹܗ ܕܢܸܣܲܒ̣: ܘܠܵܐ ܨܒ̣ܵܐ. |
[No book] |
| [17]ܘܐܸܡܲܪ ܢܲܥܡܵܢ: ܘܡܵܐ ܕܠܵܐ: ܢܸܬ̣̱ܝܼܗܸܒ̣ ܠܥܲܒ̣ܕܵܟ݂ ܛܲܥܢܵܐ ܕܲܬ̣ܪܹܝܢ ܟܘܼܕܲܢ̈ܘܵܢ ܐܲܕ݂ܡ̱ܬ̣ܵܐ ܡܸܛܠ ܕܬ̣ܘܼܒ̣ ܠܵܐ ܥܵܒܹ̇ܕ݂ ܥܲܒ̣ܕܵܟ݂ ܥܠܵـ̈ـܘܵܬ̣ܵܐ ܕܕܸܒ̣ܚܹ̈ܐ ܠܐܲܠܵܗ ܐ̄ܚܪܹܝܢ: ܐܸܠܵܐ ܐܸܢ ܠܡܵܪܝܵܐ ܒܲܠܚܘܿܕ݂ܵܘܗܝ. |
[No book] |
| [18]ܘܥܲܠ ܨܒ̣ܘܼܬ̣ܵܐ ܗܵܕܹܐ ܢܸܫܒ̇ܘܿܩ ܡܵܪܝܵܐ ܠܥܲܒ̣ܕܵܟ݂: ܡܵܐ ܕܥܵܐܹ̇ܠ ܡܵܪܝ ܠܒܹܝܬ̣ ܪܲܡܘܿܢ ܠܡܸܣܓܲܕ݂ ܬܲܡܵܢ: ܘܗ̤ܘ ܡܸܣܬܲܡܲܟ݂ ܥܲܠ ܐܝܼ̈ܕܲܝ: ܘܐܸܣܓܘܿܕ݂ ܒܹܝܬ̣ ܪܲܡܘܿܢ. ܘܡܵܐ ܕܣܲܓܕܹ̇ܬ̣ ܒܹܝܬ̣ ܪܡܘܿܢ: ܢܸܫܒ̇ܘܿܩ ܡܵܪܝܵܐ ܠܥܲܒ̣ܕܵܟ݂ ܥܲܠ ܨܒ̣ܘܼܬ̣ܵܐ ܗܵܕܹܐ. |
[No book] |
| [19]ܘܐܸܡܲܪ ܠܹܗ: ܙܸܠ ܒܲܫܠܵܡܵܐ. ܘܐܸܙܲܠ̣ ܡ̣ܢ ܠܘܵܬܹܗ ܐܲܝܟ݂ ܦܲܪܣܚܵܐ ܕܐܲܪܥܵܐ. |
[No book] |
| [20]ܘܐܸܡܲܪ ܓܲܚܙܝܼ ܬܲܠܡܝܼܕܹܗ ܕܐܹܠܝܼܫܲܥ ܢܒ̣ܝܹܗ ܕܐܲܠܵܗܵܐ: ܗܵܐ ܚܣܲܟ݂ ܡܵܪܝ ܠܢܲܥܡܵܢ ܐܲܕ݂ܘܿܡܵܝܵܐ: ܘܠܵܐ ܢܣܲܒ̣ ܡܸܢܹܗ ܡܸܕܸ̇ܡ ܕܐܲܝܬ̇ܝ. ܚܲܝ ܗ̄ܘ̣ ܡܵܪܝܵܐ: ܐܸܠܵܐ ܐܸܪܗܲܛ ܒܵܬ̣ܪܹܗ: ܘܐܸܣܲܒ̣ ܡܸܢܹܗ ܡܸܕܸ̇ܡ. |
[No book] |
| [21]ܘܲܪܗܸܛ ܓܲܚܙܝܼ ܒܵܬܲܪ: ܢܲܥܡܵܢ ܘܲܚܙܵܐ ܢܲܥܡܵܢ ܕܪܵܗܹ̇ܛ ܒܵܬ̣ܪܹܗ: ܘܲܢܚܸܬ̣ ܡ̣ܢ ܡܲܪܟܲܒ̣ܬܹܗ ܠܐܘܼܪܥܹܗ: ܘܐܸܡܲܪ ܠܹܗ: ܫܠܵܡ ܐܸܬܲܝܬ̇. |
[No book] |
| [22]ܘܐܸܡܲܪ ܫܠܵܡ: ܡܵܪܝ ܫܲܕܲܪܲܢܝ: ܘܐܵܡܲܪ: ܗܵܫܵܐ ܐܸܬ̣ܵܘ ܠܘܵܬ̣ܝ ܬܪܹܝܢ ܓܲܒ̣ܪܝܼܢ ܡܢ ܛܘܼܪܵܐ ܕܐܲܦܪܹܝܡ ܡ̣ܢ ܒܢܲܝ̈ ܢܒ̣ܝܹ̈ܐ. ܗܲܒ̣ ܠܗܘܿܢ ܟܲܟ̇ܪܵܐ ܕܟܸܣܦܵܐ: ܘܲܬ̣ܪܹܝܢ ܙܵܘ̈ܓ̇ܝܼܢ ܕܢܲܚ̈ܬܹ̇ܐ. |
[No book] |
| [23]ܘܐܸܡܲܪ ܢܲܥܡܵܢ: ܒܵܥܹ̇ܐ ܐ̄ܢܵܐ: ܣܲܒ̣ ܬܲܪܬܹ̇ܝܢ ܟܲܟ̇ܪ̈ܝܼܢ. ܘܐܲܠܨܹܗ ܘܨܲܪ ܬܲܪܬܹ̇ܝܢ ܟܲܟ̇ܪ̈ܝܼܢ ܕܟܸܣܦܵܐ ܒܲܬ̣ܪܹܝܢ ܣܸܕܘܿܢ̈ܝܼܢ: ܘܲܬ̣ܪܹܝܢ ܙܵܘ̈ܓ̇ܝܼܢ ܕܢܲܚ̈ܬܹ̇ܐ. ܘܝܲܗ̄ܒ̣ ܠܲܬ̣ܪܹܝܢ ܥܠܲܝܡܵܘ̈ܗܝ. ܘܲܫܩܲܠܘ ܩܕ݂ܵܡܵܘܗܝ. |
[No book] |
| [24]ܘܐܸܬ̣ܵܐ ܠܓܸܢܝܵܐ: ܘܲܢܣܲܒ̣ ܡܸܢܗܘܿܢ: ܘܐܲܛܲܪ ܒܒܲܝܬܵܐ. ܘܫܲܕܲܪܘ ܐܸܢܘܿܢ ܠܓܲܒ̣ܪܹ̈ܐ: ܘܐܸܙܲܠ̣ܘ. |
[No book] |
| [25]ܘܗ̤ܘ ܐܸܬ̣ܵܐ ܘܩܵܡ̣ ܩܕ݂ܵܡ ܡܵܪܹܗ. ܘܐܸܡܲܪ ܠܹܗ ܐܹܠܝܼܫܲܥ: ܐܲܝܡܸܟܵܐ ܓܲܚܙܝܼ ܘܐܸܡܲܪ: ܠܵܐ ܐܸܙܲܠ ܥܲܒ̣ܕܵܟ݂ ܠܵܐ ܠܟ݂ܵܐ ܘܠܵܐ ܠܟ݂ܵܐ. |
[No book] |
| [26]ܘܐܸܡܲܪ ܠܹܗ: ܠܹܒ̇ܝ ܚܵܘܝܲܢܝ ܟܲܕ݂ ܢܚܸܬ̣ ܓܲܒ̣ܪܵܐ ܡ̣ܢ ܡܵܪܟܲܒ̣ܬܹܗ ܠܐܘܼܪܥܵܟ݂. ܗܵܢܵܘ ܙܲܒ̣ܢܵܐ ܕܬܸܩܢܸܐ ܠܵܟ݂ ܟܸܣܦܵܐ: ܘܬܸܩܢܹܐ ܠܒ̣ܘܼܫܹ̈ܐ ܘܙܲܝ̈ܬܹܐ ܘܟܲܪ̈ܡܹܐ: ܘܥܵـ̈ـܢܵܐ ܘܬ̣ܵܘܪܹ̈ܐ ܘܥܲܒ̣̈ܕܹ̇ܐ ܘܐܲܡ̈ܗܵܬ̣ܵܐ. |
[No book] |
| [27]ܓܲܪܒܹܗ ܕܢܲܥܡܵܢ ܢܸܕ݂ܒܲܩ ܒܵܟ݂: ܘܲܒ̣ܙܲܪܥܵܟ݂ ܠܥܵܠܲܡ. ܘܲܢܦܲܩ ܡ̣ܢ ܩܕ݂ܵܡܵܘܗܝ ܟܲܕ݂ ܓܪܸܒ̣ ܐܲܝܟ݂ ܬܲܠܓܵܐ. |
[No book] |