|
|
| [1]ܘܐܸܡܲܪܘ ܒܢܲܝ̈ ܢܒ̣ܝܹ̈ܐ ܠܐܹܠܝܼܫܲܥ: ܗܵܢܵܐ ܐܲܬ̣ܪܵܐ ܕܝܵܬ̣ܒ̇ܝܼܢ ܚ̄ܢܲܢ ܒܹܗ ܗܵܪܟܵܐ ܩܕ݂ܵܡܲܝܟ: ܐܲܠܝܼܨ ܗ̄ܘ̣ ܠܲܢ. |
[No book] |
| [2]ܢܹܐܙܲܠ ܠܝܘܿܪܕܢܵܢ: ܘܢܸܦܣܘܿܩ ܡ̣ܢ ܬܲܡܵܢ ܓܒܲܪ ܚܕ݂ܵܐ ܚܕ݂ܵܐ ܩܵܪܝܼ: ܘܢܸܥܒܸ̇ܕ݂ ܠܲܢ ܐܲܬ̣ܪܵܐ ܠܡܸܬܲܒ̣ ܬܲܡܵܢ. ܘܐܸܡܲܪ: ܙܸܠܘ. |
[No book] |
| [3]ܘܲܥܢܵܐ ܚܲܕ݂ ܡܢܗܘܿܢ ܘܐܸܡܲܪ: ܐܸܢ ܨܵܒܹ̇ܐ ܐܲܢ̄ܬ̇: ܙܸܠ ܥܲܡ ܥܲܒ̣ܕܲܝ̈ܟ. ܘܐܸܡܲܪ: ܐܸܢܵܐ ܐܸܙܲܠ. |
[No book] |
| [4]ܘܐܸܙܲܠ ܥܲܡܗܘܿܢ: ܘܐܸܬ̣ܵܘ ܠܝܘܿܪܕ̇ܢܵܢ: ܘܲܦܣܲܩܘ ܩܲܝܣܹ̈ܐ. |
[No book] |
| [5]ܚܲܕ݂ ܡܸܢܗܘܿܢ ܟܲܕ݂ ܪܵܡܹ̇ܐ ܩܵܪܝܼܬ̣ܵܐ: ܢܦܲܠ ܦܲܪܙܠܹܗ ܒܓ̣ܵܘ ܡܲـ̈ـܝܵܐ. ܘܐܲܝܠܸܠ̣ ܘܐܸܡܲܪ: ܒܵܥܹ̇ܐ ܐ̄ܢܵܐ ܡܸܢܵܟ݂ ܡܵܪܝ: ܡܸܫܐܲܠ ܫܐܝܼܠ ܠܥܲܒ̣ܕܵܟ݂. |
[No book] |
| [6]ܘܐܸܡܲܪ ܠܹܗ ܢܒ̣ܝܹܗ ܕܐܲܠܵܗܵܐ ܐܲܝܟܵܐ ܢܦܲܠ̣ ܘܚܵܘܝܹܗ ܐܲܬ̣ܪܵܐ. ܘܲܦܣܲܩ ܩܲܝܣܵܐ: ܘܐܲܪܡܝܼ ܬܲܡܵܢ: ܘܛܵܦ ܦܲܪܙܠܵܐ. |
[No book] |
| [7]ܘܐܸܡܲܪ: ܐܲܪܝܼܡ ܕܝܼܠܵܟ݂. ܘܐܵܘܫܸܛ ܐܝܼܕܹܗ: ܘܢܲܣܒܹ̇ܗ. |
[No book] |
| [8]ܘܡܲܠܟܵܐ ܕܐܲܕ݂ܘܿܡ ܡܸܬ̣ܟܲܬܲܫ ܗ̄ܘ̣ܵܐ ܥܲܡ ܝܼܣܪܵܝܹܠ. ܘܐܸܬ̣ܡܲܠܲܟ݂ ܗ̤ܘ ܘܥܲܒ̣ܕܵܘ̈ܗܝ: ܘܐܸܡܲܪ: ܒܐܲܬܲܪ ܦܠܵܢ ܟܡܲܢܘ ܘܐܸܬ̇ܛܲܫܵܘ. |
[No book] |
| [9]ܘܲܫܠܲܚ ܢܒ̣ܝܼܵܐ ܕܐܲܠܵܗܵܐ ܠܡܲܠܟܵܐ ܕܝܼܣܪܵܝܹܠ: ܘܐܸܡܲܪ ܠܹܗ: ܐܸܙܕܲܗ̄ܪ: ܠܵܐ ܬܸܥܒܲܪ ܐܬ̣ܪܵܐ ܗܵܢܵܐ: ܡܸܛܠ ܕܬܲܡܵܢ ܐܲܕ݂ܘܿܡܵܝܹ̈ܐ ܟܡܝܼܢܝܼܢ. |
[No book] |
| [10]ܘܫܲܕܲܪ ܡܲܠܟܵܐ ܕܝܼܣܪܵܝܹܠ ܠܐܲܬ̣ܪܑܵ ܕܐܸܡܲܪ ܠܹܗ ܢܒ̣ܝܹܗ ܕܐܲܠܵܗܵܐ. ܘܙܲܗܪܹܗ ܕܢܸܙܕ̇ܗܲܪ ܡ̣ܢ ܬܲܡܵܢ: ܠܵܐ ܚܕ݂ܵܐ ܘܠܵܐ ܬܲܪܬܹ̇ܝܢ. |
[No book] |
| [11]ܘܐܸܬ̇ܕܲܠܲܚ ܠܸܒܹ̇ܗ ܕܡܲܠܟܵܐ ܕܐܲܕ݂ܘܿܡ: ܥܲܠ ܦܸܬ̣ܓ̣ܵܡܵܐ ܗܵܢܵܐ. ܘܲܩܪܵܐ ܠܥܲܒ̣ܕܵܘ̈ܗܝ ܘܐܸܡܲܪ ܠܗܘܿܢ: ܠܵܐ ܬܚܵܘܘܿܢܵܢܝ ܡ̇ܢ ܡ̣ܢ ܕܝܼܠܲܢ ܠܘܵܬ̣ ܡܲܠܟܵܐ ܕܝܼܣܪܵܝܹܠ. |
[No book] |
| [12]ܘܲܥ̣ܢܵܐ ܚܲܕ݂ ܡ̣ܢ ܥܲܒ̣ܕܵܘ̈ܗܝ ܘܐܸܡܲܪ: ܠܵܐ ܗ̄ܘ̣ܵܐ ܡ̣ܢ ܕܝܼܠܲܢ ܡܵܪܝ ܡܲܠܟܵܐ ܬܲܡܵܢ: ܐܸܠܵܐ ܐܹܠܝܼܫܲܥ ܗ̄ܘ̣ ܢܒ̣ܝܼܵܐ ܕܒ̣ܝܼܣܪܵܝܹܠ: ܡܚܵܘܸܐ ܠܡܲܠܟܵܐ ܕܝܼܣܪܵܝܹܠ ܡܸܕܸ̇ܡ ܕܥܵܒܹ̇ܕ݂ ܐܲܢ̄ܬ̇ ܒܩܲܝܛܘܿܢܵܐ ܕܡܲܫܟ̇ܒ̣ܵܟ݂. |
[No book] |
| [13]ܘܐܸܡܲܪ: ܙܸܠܘ ܚܙܵܘ ܐܲܝܟܵܘ ܐܹܫܲܕܲܪ ܐܸܕ݂ܒ̇ܪܝܼܘܗܝ ܘܚܵܘܝܼܘܗܝ ܘܐܸܡܲܪܘ ܠܹܗ: ܗܵܐ ܒܕ݂ܘܿܬ̣ܵܢ. |
[No book] |
| [14]ܘܫܲܕܲܪ ܠܬܲܡܵܢ ܪ̈ܲܟ݂ܫܵܐ ܘܪ̈ܲܟܵܒܹܐ ܘܚܲܝܠܵܐ ܥܲܫܝܼܢܵܐ. ܘܐܸܬ̣ܵܘ ܒܠܸܠܝܵܐ: ܘܐܸܬ̣ܟܲܪܟ̇ܘܼܗ̇ ܠܲܩܪܝܼܬ̣ܵܐ. |
[No book] |
| [15]ܘܩܲܕܸ̇ܡ ܡܫܲܡܫܵܢܵܐ ܕܲܢܒ̣ܝܹܗ ܕܐܲܠܵܗܵܐ ܠܡܸܦܲܩ. ܘܲܢܦܲܩ̣ ܘܲܚܙܵܐ ܚܲܝܠܵܐ ܕܲܟ݂ܪܝܼܟ݂ ܠܲܩܪܝܼܬ̣ܵܐ: ܘܪ̈ܲܟ݂ܫܵܐ ܘܪ̈ܲܟܵܒܹܐ. ܘܐܸܡܲܪ ܠܹܗ ܥܠܲܝܡܹܗ: ܐܘܿܗ ܡܵܪܝ ܐܲܝܟܲܢܵܐ ܢܸܥܒܸ̇ܕ݂. |
[No book] |
| [16]ܘܐܸܡܲܪ ܠܹܗ: ܠܵܐ ܬܸܕ݂ܚܲܠ: ܡܸܛܠ ܕܣܲܓ̇ܝܼܐܝܼܢ ܐܸܢܘܿܢ ܕܥܲܡܲܢ ܡ̣ܢ ܕܥܲܡܗܘܿܢ. |
[No book] |
| [17]ܘܨܲܠܝܼ ܐܹܠܝܼܫܲܥ ܩܕ݂ܵܡ ܡܵܪܝܵܐ: ܘܐܸܡܲܪ: ܡܵܪܝܵܐ ܦܬܲܚ ܥܲܝܢܵܘ̈ܗܝ: ܘܢܸܚܙܹܐ ܘܲܦܬܲܚ̣ ܡܵܪܝܵܐ ܥܲܝܢܵܘ̈ܗܝ ܕܛܲܠܝܵܐ ܘܲܚ̣ܙܸܵܐ: ܘܗܵܐ ܛܘܼܪܵܐ ܡܠܸܐ ܪ̈ܲܟ݂ܫܵܐ: ܘܪ̈ܲܟܵܒܹܐ ܕܢܘܼܪܵܐ ܚܕ݂ܵܪ̈ܵܘܗܝ ܕܐܹܠܝܼܫܲܥ. |
[No book] |
| [18]ܘܲܢܚܸܬ̣ ܠܘܵܬ̣ܗܘܿܢ. ܘܨܲܠܝܼ ܐܹܠܝܼܫܲܥ ܩܕ݂ܵܡ ܡܵܪܝܵܐ: ܘܐܸܡܲܪ: ܡܚܝܼ ܠܥܲܡܵܐ ܗܵܢܵܐ ܒܲܫܪܲܓ̣ܪ̈ܵܓ̣ܝܵܬ̣ܵܐ. ܘܲܡܚܵܐ ܐܸܢܘܿܢ ܒܲܫܪܲܓ̣ܪ̈ܵܓ̣ܝܵܬ̣ܵܐ ܐܲܝܟ݂ ܦܸܬ̣ܓ̣ܵܡܹܗ ܕܐܹܠܝܼܫܲܥ. |
[No book] |
| [19]ܘܐܸܡܲܪ ܠܗܘܿܢ ܐܹܠܝܼܫܲܥ: ܠܵܐ ܗܘ̤ܵܬ̣ ܗܵܕܹܐ ܐܘܼܪܚܵܐ: ܘܠܵܐ ܗܘ̤ܵܬ̣ ܗܵܕܹܐ ܩܪܝܼܬ̣ܵܐ. ܬܵܘ ܒܵܬܲܪܝ: ܘܐܵܘܒܸ̇ܠܟ݂ܘܿܢ ܠܘܵܬ̣ ܓܲܒ̣ܪܵܐ ܕܒ̣ܵܥܹ̇ܝܢ ܐܢܬܘܿܢ ܘܐܵܘܒܸ̇ܠ ܐܸܢܘܿܢ ܠܫܵܡܪܹܝܢ. |
[No book] |
| [20]ܘܟܲܕ݂ ܥܲܠܘ ܠܫܵܡܪܝܼܢ: ܐܸܡܲܪ ܐܹܠܝܼܫܲܥ: ܡܵܪܝܵܐ ܦܵܬܲܚ̣ ܥܲܝܢܲܝ̈ܗܘܿܢ ܕܗܵܠܹܝܢ: ܘܢܸܚܙܘܿܢ. ܘܲܦܬܲܚ̣ ܡܵܪܝܵܐ ܥܲܝܢܲܝ̈ܗܘܿܢ: ܘܲܚܙܵܘ: ܘܗܵܐ ܒܓ̣ܵܘ ܫܵܡܪܹܝܢ ܐܸܢܘܿܢ. |
[No book] |
| [21]ܘܐܸܡܲܪ ܡܲܠܟܵܐ ܕܝܼܣܪܵܝܹܠ ܠܐܹܠܝܼܫܲܥ ܟܲܕ݂ ܚ̣ܙܵܐ ܐܸܢܘܿܢ: ܡܸܡܚܵܐ ܐܸܡܚܸܐ ܐܸܢܘܿܢ: ܐܵܒ̣ܝ. |
[No book] |
| [22]ܘܐܸܡܲܪ ܠܹܗ: ܠܵܐ ܬܸܡܚܸܐ ܐܸܢܘܿܢ: ܕܲܫܒܲܝܬ̇ ܒܚܲܪܒܵܟ݂: ܘܲܒ̣ܩܸܫܬܵܟ݂ ܡܵܚܹ̇ܐ ܐܲܢ̄ܬ̇. ܣܝܼܡ ܠܲܚܡܵܐ ܘܡܲـ̈ـܝܵܐ ܩܕ݂ܵܡܲܝܗܘܿܢ. ܢܹܐܟ݂ܠܘܼܢ ܘܢܸܫܬ̇ܘܿܢ: ܘܢܹܐܙܠ̄ܘܿܢ ܠܘܵܬ̣ ܡܵܪܗܘܿܢ. |
[No book] |
| [23]ܘܬܲܩܸܢ ܠܗܘܿܢ ܫܵܪܘܼܬ̣ܵܐ ܪܲܒ̇ܬ̣ܵܐ. ܘܐܸܟܲܠܘ ܘܐܸܫܬ̇ܝܼܘ: ܘܫܲܕܲܪܘ ܐܸܢܘܿܢ ܘܐܸܙܲܠܘ ܠܘܵܬ̣ ܡܵܪܗܘܿܢ. ܘܬ̣ܘܼܒ̣ ܠܵܐ ܐܵܘܣܸܦܘ ܓܲܝܵܣܹ̈ܐ ܕܐܲܕ݂ܘܿܡ ܠܡܹܐܬ̣ܵܐ ܠܲܬ̣ܚܘܼܡܵܐ ܕܝܼܣܪܵܝܹܠ. |
[No book] |
| [24]ܘܡ̣ܢ ܒܵܬܲܪ ܗܵܝܕܹ̇ܝܢ: ܟܲܢܸܫ ܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ ܟܠܵܗ̇ ܡܲܫܪܝܼܬܹܗ: ܘܲܣܠܸܩ ܘܲܫܪܵܐ ܥܲܠ ܫܵܡܪܹܝܢ: ܘܐܸܬ̣ܟܲܬܲܫ ܥܲܡܵܗ̇. |
[No book] |
| [25]ܘܲܗܘ̤ܵܐ ܟܲܦܢܵܐ ܪܲܒܵܐ ܒܫܵܡܪܹܝܢ ܟܲܕ݂ ܗܸܢܘܿܢ ܫܪܹܝܢ ܥܠܹܝܗ̇: ܥܕܲܡܵܐ ܕܐܸܙܕܲܒܲܢ ܪܹܫܵܐ ܕܲܚܡܵܪܵܐ ܒܲܬ̣ܡܵܢܐܝܼܢ ܕܟܸܣܦܵܐ: ܘܪܘܼܒ̣ܥܵܐ ܕܩܲܒܵܐ ܕܲܚܪܲܝ ܝܵܘܢܵܐ ܒܚܲܡܫܵܐ ܕܟܸܣܦܵܐ. |
[No book] |
| [26]ܘܡܲܠܟܵܐ ܕܝܼܣܪܵܝܹܠ ܥܵܒܲܪ ܗ̄ܘ̣ܵܐ ܥܲܠ ܫܘܼܪܵܐ: ܘܐܲܢ̄ܬ̇ܬ̣ܵܐ ܚܕ݂ܵܐ ܡܒܲܓ̇ܢܵܐ ܩܕ݂ܵܡܵܘܗܝ ܘܐܵܡ̇ܪܵܐ: ܦܪܘܿܩܲܝܢܝ ܡܵܪܝ ܡܲܠܟܵܐ. |
[No book] |
| [27]ܘܐܸܡܲܪ ܠܵܗ̇: ܢܸܦ̱ܪܩܹܟ݂ܝ ܡܵܪܝܵܐ: ܡ̣ܢ ܐܲܝܡܸܟܵܐ ܐܸܦ̣ܪܩܹܟ݂ܝ: ܡ̣̤ ܐܸܕܪܵܐ ܐܵܘ ܡ̣ܢ ܡܲܥܨܲܪܬܵܐ. |
[No book] |
| [28]ܐܵܡܲܪ ܠܵܗ̇ ܡܲܠܟܵܐ ܡܵܠ ܠܹܟ݂ܝ: ܐܵܡܪܵܐ ܠܹܗ: ܐܲܢ̄ܬ̇ܬ̣ܵܐ ܗܵܕܹܐ ܐܸܡܪܲܬ̤ ܠܝܼ: ܗܲܒ̣ܝ ܒܪܹܟ݂ܝ ܢܹܐܟ݂ܠܝܼܘܗܝ ܝܵܘܡܵܢܵܐ: ܘܒܹܪܝ ܢܹܐܟ݂ܘܿܠ ܡܚܵܪ. |
[No book] |
| [29]ܘܒܲܫܠ̄ܢ ܒܹܪܝ ܘܐܸܟܲܠܢܵܝܗܝ: ܘܐܸܡ̇ܪܹܬ̣ ܠܵܗ̇ ܠܝܵܘܡܵܐ ܐ̄ܚܪܹܢܵܐ: ܗܲܒ̣ܝ ܒܪܹܟ݂ܝ: ܢܹܐܟ݂ܠܝܼܘܗܝ ܘܐܲܛܫܝܵܬܹܗ ܠܲܒ̣ܪܵܗ̇. |
[No book] |
| [30]ܘܟܲܕ݂ ܫܡܲܥ̣ ܡܲܠܟܵܐ ܡܸܠܹܝܗ̇ ܕܐܲܢ̄ܬ̇ܬ̣ܵܐ ܟܲܕ݂ ܡܗܲܠܸܟ݂ ܥܲܠ ܫܘܼܪܵܐ: ܨܲܪܝܼ ܠܒ̣ܘܼܫܵܘ̈ܗܝ ܘܲܚ̣ܙܵܐ ܥܲܡܵܐ ܕܣܲܩܵܐ ܠܒ̣ܝܼܫ ܥܲܠ ܒܸܣܪܹܗ ܡ̣ܢ ܠܓ̣ܵܘ. |
[No book] |
| [31]ܘܐܸܡܲܪ: ܗܵܟܲܢܵܐ ܢܸܥܒܸ̇ܕ݂ ܠܝܼ ܐܲܠܵܗܵܐ: ܘܗܵܟܲܢܵܐ ܢܵܘܣܸܦ ܠܝܼ: ܐܸܢ ܢܦܘܼܫ ܪܹܫܹܗ ܕܐܹܠܝܼܫܲܥ ܒܲܪ ܫܵܦܵܛ ܥܠܵܘܗܝ ܝܵܘܡܵܢܵܐ. |
[No book] |
| [32]ܘܐܹܠܝܼܫܲܥ ܝܵܬܹܒ̣ ܒܒܲܝܬܹ̇ܗ: ܘܣܵܒܹ̈ܐ ܝܵܬ̣ܒ̇ܝܼܢ ܗ̄ܘ̣ܵܘ ܩܕ݂ܵܡܵܘܗܝ. ܘܫܲܕܲܪ ܓܲܒ̣ܪܵܐ ܡ̣ܢ ܩܕ݂ܵܡܵܘܗܝ: ܘܥܲܕ݂ܠܵܐ ܢܹܐܬܹܐ ܐܝܼܙܓܲܕܵܐ ܥܠܵܘܗܝ: ܐܸܡܲܪ ܗ̤ܘ ܠܣܵܒܹ̈ܐ: ܚܙܲܝܬ̇ܘܿܢ ܕܫܲܕܲܪ ܒܲܪ ܩܵܛܘܿܠܵܐ ܗܵܢܵܐ ܠܡܸܣܲܒ̣ ܪܹܫܝ. ܚܙܵܘ ܡܵܐ ܕܐܸܬ̣ܵܐ ܐܝܼܙܓܲܕܵܐ: ܐܲܚܘܿܕ݂ܘ ܬܲܪܥܵܐ: ܘܚܘܼܒ̣ܨܘܼܗܝ ܠܒܲܪ. ܡܸܛܠ ܕܩܵܠܵܐ ܕܪܸ̈ܓ̣ܠܲܝ ܡܵܪܹܗ ܒܵܬ̣ܪܹܗ. |
[No book] |
| [33]ܘܥܲܕ݂ ܗ̤ܘ ܡܡܲܠܸܠ ܥܲܡܗܘܿܢ: ܐܸܬ̣ܵܐ ܐܝܼܙܓܲܕܵܐ ܥܠܵܘܗܝ. ܘܐܸܡܲܪ: ܗܵܐ ܗܵܕܲܐ ܗ̄ܝ̣ ܒܝܼܫܬܵܐ ܡ̣ܢ ܩܕ݂ܵܡ ܡܵܪܝܵܐ. ܡܵܢܵܐ ܐܹܨܲܠܹܐ ܬܘܼܒ̣ ܠܡܵܪܝܵܐ. |
[No book] |