|
|
| [1]ܘܐܹܠܝܼܫܲܥ ܐܸܡܲܪ ܠܐܲܢ̄ܬܬ̣ܵܐ ܕܐܲܚܝܼ ܒܪܵܗ̇: ܩܘܼܡܝ ܙܸܠܝ ܐܲܢ̄ܬ̇ܝ ܘܒܲܝܬܹ̇ܟ݂ܝ: ܘܲܥܡܲܪܝ ܐܲܝܟܵܐ ܕܥܵܡܪܵܐ ܐܲܢ̄ܬ̇ܝ. ܡܸܛܠ ܕܲܩܪܵܐ ܡܵܪܝܵܐ ܠܟܲܦܢܵܐ: ܘܐܵܦ ܐܵܬܹ̇ܐ ܥܲܠ ܐܲܪܥܵܐ ܫܒܲܥ ܫܢ̈ܝܼܢ. |
[No book] |
| [2]ܘܩܵܡܲܬ̤ ܐܲܢ̄ܬ̇ܬ̣ܵܐ ܘܥܸܒ̣ܕܲܬ̤ ܐܲܝܟ݂ ܦܸܬ̣ܓ̣ܵܡܹܗ ܕܲܢܒ̣ܝܹܗ ܕܐܲܠܵܗܵܐ. ܘܐܸܙܲܠ̄ܬ̇ ܗ̤ܝ ܘܲܒ̣̈ܢܲܝ ܒܲܝܬܵܗ̇. ܘܥܸܡܪܲܬ̣ ܒܐܲܪܥܵܐ ܕܲܦܠܸܫܬܵܝܹ̈ܐ ܫܒܲܥ ܫܢ̈ܝܼܢ. |
[No book] |
| [3]ܘܡ̣ܢ ܒܵܬܲܪ ܫܒܲܥ ܫܢ̈ܝܼܢ: ܗܸܦܟܲܬ̤ ܘܐܸܬܲܬ̤ ܡ̣ܢ ܐܲܪܥܵܐ ܕܲܦܠܸܫܬܵܝܹ̈ܐ ܘܐܸܙܲܠ̄ܬ̤ ܠܡܲܒܲܓܵܢܘܼ ܩܕ݂ܵܡ ܡܲܠܟܵܐ: ܥܲܠ ܒܲܝܬܹ̇ܗ ܘܥܲܠ ܚܲܩܠܵܗ̇. |
[No book] |
| [4]ܘܡܲܠܟܵܐ ܐܸܡܲܪ ܠܓܲܚܙܝܼ ܥܠܲܝܡܵܐ ܕܲܢܒ̣ܝܹܗ ܕܐܲܠܵܗܵܐ: ܐܸܫܬܲܥܵܐ ܠܝܼ ܟܠܗܹܝܢ ܪܵܘ̱ܪ̈ܒ̣ܵܬ̣ܵܐ ܕܲܥܒܲܕ݂ ܐܹܠܝܼܫܲܥ. |
[No book] |
| [5]ܘܟܲܕ݂ ܡܸܫܬܲܥܹܐ ܠܡܲܠܟܵܐ ܕܐܲܚܝܼ ܡܝܼܬ̣ܵܐ: ܚ̣ܙܵܐ ܐܲܢ̄ܬ̇ܬ̣ܵܐ ܕܐܲܚܝܼ ܒܪܵܗ̇: ܡܒܲܓܢܵܐ ܩܕ݂ܵܡ ܡܲܠܟܵܐ ܥܲܠ ܒܲܝܬܵܗ̇ ܘܥܲܠ ܚܲܩܠܵܗ̇ ܘܐܸܡܲܪ ܓܲܚܙܝܼ: ܡܵܪܝ ܡܲܠܟܵܐ: ܗܵܕܲܐ ܗ̄ܝ̣ ܐܲܢ̄ܬ̇ܬ̣ܵܐ: ܘܗܵܢܵܐ ܗ̄ܘ̣ ܒܪܵܗ̇ ܕܐܲܚܝܼ ܐܹܠܝܼܫܲܥ. |
[No book] |
| [6]ܘܫܲܐܠܵܗ̇ ܡܲܠܟܵܐ ܠܐܲܢ̄ܬ̇ܬ̣ܵܐ ܘܐܸܫܬܲܥܝܲܬ̤ ܠܹܗ. ܘܲܩܪܵܐ ܠܵܗ̇ ܡܲܠܟܵܐ: ܠܲܡܗܲܝܡܢܵܐ ܚܲܕ݂. ܘܐܸܡܲܪ ܠܹܗ: ܦܢܵܐ ܠܵܗ̇ ܟܠܡܸܕܸ̇ܡ ܕܐܝܼܬ̣ ܠܵܗ̇: ܘܟ݂ܠܵܗ̇ ܥܠܲܠܬ̣ܵܐ ܕܚܲܩܠܵܗ̇: ܡ̣ܢ ܝܵܘܡܵܐ ܕܫܒܲܩܬ̣ܵܗ̇ ܠܐܲܪܥܵܐ ܘܲܥܕܲܡܵܐ ܠܗܵܫܵܐ. |
[No book] |
| [7]ܘܐܸܬ̣ܵܐ ܐܹܠܝܼܫܲܥ ܠܕܲܪܡܣܘܿܩ ܘܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ ܐܸܬ̣ܟ̇ܪܲܗ̇. ܘܚܵܘܝܼܘܗܝ ܘܐܸܡܲܪܘ ܠܹܗ: ܐܸܬ̣ܵܐ ܢܒ̣ܝܹܗ ܕܐܲܠܵܗܵܐ ܠܗܵܪܟܵܐ. |
[No book] |
| [8]ܘܐܸܡܲܪ ܡܲܠܟܵܐ ܠܲܚܙܵܐܹܝܠ: ܣܲܒ̣ ܒܐܝܼܕ݂ܵܟ݂ ܩܘܼܪܒܵܢܵܐ: ܘܙܸܠ ܠܐܘܼܪܥܵܐ ܕܲܢܒ̣ܝܹܗ ܕܐܲܠܵܗܵܐ. ܘܲܫܐܲܠ ܡܸܠܬܹܗ ܕܡܵܪܝܵܐ ܡܸܢܹܗ. ܘܐܸܡܲܪ ܠܹܗ: ܐܸܢ ܡܸܬ̣ܚܠܸܡ ܐ̄ܢܵܐ ܡ̣ܢ ܟܘܼܪܗܵܢܝ ܗܵܢܵܐ. |
[No book] |
| [9]ܘܐܸܙܲܠ ܚܙܵܐܹܝܠ ܠܐܘܼܪܥܹܗ. ܘܲܫܩܲܠ̣ ܩܘܼܪܒܵܢܵܐ ܒܐܝܼܕܹܗ: ܡ̣ܢ ܟܠ ܛܘܼܒ̣ܵܐ ܕܕܲܪܡܣܘܼܩ: ܛܥܹܝܢ ܐܲܪܒ̇ܥܝܼܢ ܓܲܡ̈ܠܝܼܢ. ܘܐܸܬ̣ܵܐ ܘܩܵܡ ܩܕ݂ܵܡܵܘܗܝ: ܘܐܸܡܲܪ ܠܹܗ: ܒܪܵܟ݂ ܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ ܫܲܕ̇ܪܲܢܝ ܠܘܵܬ̣ܵܟ݂ ܘܐܵܡܲܪ: ܐܸܢ ܚܵܝܹ̇ܐ ܐ̄ܢܵܐ ܡ̣ܢ ܟܘܼܪܗܵܢܝ ܗܵܢܵܐ. |
[No book] |
| [10]ܘܐܸܡܲܪ ܠܹܗ ܐܸܠܝܼܫܲܥ: ܙܸܠ ܘܐܸܡܲܪ ܠܹܗ: ܡܸܚܵܐ ܬܸܚܹܐ: ܚܵܘܝܲܢܝ ܡܵܪܝܵܐ ܕܲܡܡܵܬ̣ ܬܡܘܼܬ̣. |
[No book] |
| [11]ܘܲܒ̣ܟ݂ܵܐ ܢܒ̣ܝܹܗ ܕܐܲܠܵܗܵܐ. |
[No book] |
| [12]ܘܐܸܡܲܪ ܚܙܵܐܹܝܠ ܡܸܛܠ ܡܵܢܵܐ ܒܵܟܹ̇ܐ ܡܵܪܝ: ܘܐܸܡܲܪ ܠܹܗ ܐܹܠܝܼܫܲܥ: ܝܵܕܲܥ ܐ̄ܢܵܐ ܒܝܼܫܬܵܐ ܕܥܵܒܹܕ݂ ܐܲܢ̄ܬ̇ ܠܲܒ̣ܢܲܝ̈ ܝܼܣܪܵܝܹܠ: ܟܲܪ̈ܟܲܝܗܘܿܢ ܡܵܘܩܸܕ݂ ܐܲܢ̄ܬ̇ ܒܢܘܼܪܵܐ: ܘܓܲܕ̇ܘܼܕܲܝ̈ܗܘܿܢ ܒܚܲܪܒܵܐ ܡܩܲܛܸܠ ܐܲܢ̄ܬ̇: ܘܝܲܠܘܼܕܲܝ̈ܗܘܿܢ ܡܫܲܩܸܦ ܐܲܢ̄ܬ̇: ܘܒܲܛܢܵܬ̣̈ܗܘܿܢ ܡܦܲܪܸܬ̣ ܐܲܢ̄ܬ̇. |
[No book] |
| [13]ܘܐܸܡܲܪ ܚܙܵܐܹܝܠ: ܡܵܢܵܐ ܚܫܝܼܒ̣ ܥܲܒ̣ܕܵܟ݂ ܟܲܠܒܵܐ: ܕܢܸܥܒܸ̇ܕ݂ ܦܸܬ̣ܓ̣ܵܡܵܐ ܗܵܢܵܐ ܪܲܒܵܐ: ܘܐܸܡܲܪ ܠܹܗ ܐܹܠܝܼܫܲܥ: ܚܵܘܝܲܢܝ ܡܵܪܝܵܐ ܕܐܲܢ̄ܬ̇ ܡܲܠܟܵܐ ܥܲܠ ܐܲܕ݂ܘܿܡ. |
[No book] |
| [14]ܘܐܸܬ̣ܵܐ ܚܙܵܐܹܝܠ ܡ̣ܢ ܠܘܵܬ̣ ܐܹܠܝܼܫܲܥ: ܘܐܸܙܲܠ ܠܘܵܬ̣ ܡܵܪܹܗ: ܘܐܸܡܲܪ ܠܹܗ ܡܵܪܹܗ: ܡܵܢܵܐ ܐܸܡܲܪ ܠܵܟ݂ ܐܹܠܝܼܫܲܥ: ܐܵܡܲܪ ܠܹܗ: ܗܵܟܲܢܵܐ: ܐܸܡܲܪ ܠܝܼ ܕܡܸܚܵܐ ܬܸܚܹܐ. |
[No book] |
| [15]ܘܡ̣ܢ ܒܵܬܲܪ ܝܵܘܡܵܐ ܢܣܲܒ̣ ܚܙܵܐܹܝܠ ܚܡܝܼܠܬܵܐ ܘܨܲܒ̇ܥܵܗ̇ ܒܡܲـ̈ـܝܵܐ: ܘܲܦܪܲܣ̣ ܥܲܠ ܐܲܦܵܘ̈ܗܝ ܘܡܝܼܬ̣. ܘܐܲܡ̣ܠܸܟ݂ ܚܙܵܐܹܝܠ ܒܵܬ̣ܪܹܗ. |
[No book] |
| [16]ܘܒܲܫܢܲܬ̣ ܚܲܡܸܫ ܕܝܘܿܪܵܡ ܒܲܪ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܐܲܡ̣ܠܸܟ݂ ܝܘܿܪܵܡ ܒܲܪ ܝܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ. |
[No book] |
| [17]ܒܲܪ ܬܠܵܬ̣ܝܼܢ ܗ̄ܘ̣ܵܐ ܘܬܲܪܬܹ̇ܝܢ ܫܢ̈ܝܼܢ ܟܲܕ݂ ܐܲܡ̣ܠܸܟ݂: ܘܲܬ̣ܡܵܢܹܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. |
[No book] |
| [18]ܘܗܲܠܸܟ݂ ܒܐܘܼܪܚܵܐ ܕܡܲܠ̈ܟܹ̇ܐ ܕܝܼܣܪܵܝܹܠ: ܐܲܝܟ݂ ܕܲܥܒܲܕ݂ܘ ܕܒܹܝܬ̣ ܐܵܚܵܒ̣: ܡܸܛܠ ܕܚܵܬܹܗ ܕܐܵܚܵܒ̣ ܗܘ̤ܵܬ̣ ܠܹܗ ܐܲܢ̄ܬ̇ܬ̣ܵܐ: ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ. |
[No book] |
| [19]ܘܠܵܐ ܨܒ̣ܵܐ ܡܵܪܝܵܐ ܠܲܡܚܲܒܵܠܘܼ ܠܲܝܗܘܼܕ݂ܵܐ: ܡܸܛܠ ܕܵܘܝܼܕ݂ ܥܲܒ̣ܕܹ̇ܗ ܐܲܝܟ݂ ܕܐܸܡܲܪ ܠܹܗ: ܕܢܸܬܸ̇ܠ ܠܹܗ ܫܪܵܓ̣ܵܐ ܠܲܒ̣ܢܵܘ̈ܗܝ ܟܠܗܘܿܢ ܝܵܘ̈ܡܵܬ̣ܵܐ. |
[No book] |
| [20]ܒܝܵܘܡܵܘ̈ܗܝ ܡܪܲܕ݂ ܐܲܕ݂ܘܿܡ ܡ̣ܢ ܬܚܹܝܬ̣ ܐܝܼܕ݂ܵܐ ܕܲܝܗܘܼܕ݂ܵܐ: ܘܐܲܡܠܸܟ݂ܘ ܥܠܲܝܗܘܿܢ ܡܲܠܟܵܐ. |
[No book] |
| [21]ܘܲܥܒܲܪ ܝܘܿܪܵܡ ܠܲܨܥܝܼܪܵܐ: ܘܟ݂ܠܗܘܿܢ ܪ̈ܲܟܵܒܹܐ ܥܲܡܹܗ. ܘܩܵܡ ܒܠܸܠܝܵܐ ܕܢܸܚܪܘܿܒ̣ ܠܐܲܕ݂ܘܿܡܵܝܹ̈ܐ ܕܲܟ݂ܪܝܼܟ݂ܝܼܢ ܠܹܗ: ܘܲܠܪܵܘ̱ܪ̈ܒ̣ܵܢܵܘܗܝ ܒܡܲܪ̈ܟ̇ܒ̣ܵܬ̣ܵܐ: ܘܲܥܪܲܩ̣ܘ ܥܲܡܵܐ ܠܡܲܫܟ̇ܢܲܝ̈ܗܘܿܢ. |
[No book] |
| [22]ܘܲܡܪܲܕ݂ ܐܲܕ݂ܘܿܡ ܡ̣ܢ ܬܚܹܝܬ̣ ܐܝܼܕ݂ܵܐ ܕܲܝܗܘܼܕ݂ܵܐ: ܥܕܲܡܵܐ ܠܝܵܘܡܵܢܵܐ. ܗܵܝܕܹ̇ܝܢ ܡܸܪܕܲܬ̤ ܠܸܒ̣ܢܵܐ ܒܙܲܒ̣ܢܵܐ ܗܵܘ̇. |
[No book] |
| [23]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܪܵܡ ܘܟ݂ܠ ܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ. |
[No book] |
| [24]ܘܲܫܟܸܒ̣ ܝܘܿܪܵܡ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܘܐܲܡ̣ܠܸܟ݂ ܐܹܚܲܙܝܵܐ ܒܪܹܗ ܒܵܬ̣ܪܹܗ. |
[No book] |
| [25]ܒܲܫܢܲܬ̣ ܚܕܲܥܸܣܪܹ̈ܐ ܠܝܘܿܪܵܡ ܒܲܪ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܐܲܡܠܸܟ݂ ܐܹܚܲܙܝܵܐ ܒܲܪ ܝܘܿܪܵܡ ܡܲܠܟܵܐ ܕܲܝܗܘܼܕ݂ܵܐ. |
[No book] |
| [26]ܒܲܪ ܥܸܣܪܝܼܢ ܗ̄ܘ̣ܵܐ ܘܬܲܪܬܹ̇ܝܢ ܫܢ̈ܝܼܢ ܐܹܚܲܙܝܵܐ ܟܲܕ݂ ܐܲܡܠܸܟ݂ ܘܫܲܢ̄ܬܵܐ ܚܕ݂ܵܐ ܐܲܡ̣ܠܸܟ݂ ܒܐܘܿܪܸܫܠܸܡ: ܘܲܫܡܵܗ̇ ܕܐܸܡܹܗ ܥܬܲܠܝܵܐ ܒܲܪܬ̣ ܥܲܡܪܝܼ ܡܲܠܟܵܐ ܕܝܼܣܪܵܝܹܠ. |
[No book] |
| [27]ܘܗܲܠܸܟ݂ ܒܐܘܼܪܚܵܐ ܕܒܹܝܬ̣ ܐܵܚܵܒ̣: ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ܘ ܕܒܹܝܬ̣ ܐܵܚܵܒ̣: ܡܸܛܠ ܕܚܲܬ̣ܢܵܐ ܗ̄ܘ̣ܵܐ ܕܒܹܝܬ̣ ܐܵܚܵܒ̣. |
[No book] |
| [28]ܘܐܸܙܲܠ̣ ܥܲܡ ܝܘܿܪܵܡ ܒܲܪ ܐܵܚܵܒ̣ ܠܲܩܪܵܒ̣ܵܐ. ܥܲܠ ܚܙܵܐܹܝܠ ܡܲܠܟܵܐ ܕܐܲܕ݂ܘܿܡ ܠܪܵܡܲܬ̣ ܓܸܠܥܵܕ݂. ܘܲܡܚܵܐܘܼܗܝ ܐܲܕ݂ܘܿܡܵܝܹ̈ܐ ܠܝܘܿܪܵܡ. |
[No book] |
| [29]ܘܲܗܦܲܟ݂ ܝܘܿܪܵܡ ܒܲܪ ܐܵܚܵܒ̣ ܠܡܸܬ̣ܐܲܣܵܝܘܼ ܒܐܝܼܙܲܪܥܹܝܠ: ܡ̣ܢ ܡܚܘܿܬ̣ܵܐ ܕܲܡܚܵܐܘܼܗܝ ܐܲܕ݂ܘܿܡܵܝܹ̈ܐ ܒܪܵܡܬ̣ܵܐ: ܟܲܕ݂ ܡܸܬ̣ܟܲܬܲܫ ܥܲܡ ܚܙܵܐܹܝܠ ܡܲܠܟܵܐ ܕܐܲܕ݂ܘܿܡ. ܘܐܹܚܲܙܝܵܐ ܒܲܪ ܝܘܿܪܵܡ ܡܲܠܟܵܐ ܕܲܝܗܘܼܕ݂ܵܐ: ܢܚܸܬ̣ ܠܡܸܚܙܵܐ ܠܝܘܿܪܵܡ ܒܲܪ ܐܵܚܵܒ̣ ܕܲܟ݂ܪܝܼܗ ܗ̄ܘ̣ܵܐ ܒܐܝܼܙܲܪܥܹܝܠ. |
[No book] |