➖ »
«
➖ ➕
Peshitta OT
PesOT
The Acts of Thomas
ActThom
←
2 Samuel
2Sa
19
→
[1]ܘܐܸܡܲܪܘ ܠܝܘܿܐܵܒ̣: ܕܗܵܐ ܒܵܟܹܐ ܡܲܠܟܵܐ: ܘܡܸܬ̣ܐ̱ܒܸܠ ܥܲܠ ܐܲܒ̣ܫܵܠܘܿܡ. [No book]
[2]ܘܲܗܘ̤ܵܐ ܒܗܵܘ̇ ܝܵܘܡܵܐ ܐܸܒ̣ܠܵܐ ܠܟ݂ܠܹܗ ܥܲܡܵܐ: ܡܸܛܠ ܕܲܫܡܲܥܘ ܥܲܡܵܐ ܒܗܵܘ̇ ܝܵܘܡܵܐ ܕܟ݂ܪܝܲܬ̤ ܠܡܲܠܟܵܐ ܥܲܠ ܒܪܹܗ. [No book]
[3]ܘܐܸܬ̣ܛܲܫܝܼܘ ܥܲܡܵܐ ܒܗܵܘ̇ ܝܵܘܡܵܐ ܠܡܸܥܲܠ ܠܲܩܪܝܼܬ̣ܵܐ: ܐܲܝܟ݂ ܕܡܸܬ̇ܛܲܫܸܐ ܥܲܡܵܐ ܕܒ̣ܵܗ̇ܬ̇ܝܼܢ ܡܵܐ ܕܥܵܪܩܝܼܢ ܡ̣ܢ ܩܪܵܒ̣ܵܐ. [No book]
[4]ܘܡܲܠܟܵܐ ܚܲܦܝܼ ܐܲܦܵܘ̈ܗܝ: ܘܐܲܝܠܸܠ ܒܩܵܠܵܐ ܪܵܡܵܐ: ܘܐܸܡܲܪ: ܒܹܪܝ ܐܲܒ̣ܫܵܠܘܿܡ: ܒܹܪܝ ܐܲܒ̣ܫܵܠܘܿܡ. [No book]
[5]ܘܥܲܠ ܝܘܿܐܵܒ̣ ܠܘܵܬ̣ ܡܲܠܟܵܐ: ܘܐܸܡܲܪ ܠܹܗ: ܐܲܒ̣ܗܬ̇ܬ̇ ܝܵܘܡܵܢܵܐ ܐܲܦܹ̈ܐ ܕܟ݂ܠܗܘܿܢ ܥܲܒ̣̈ܕܲܝܟ: ܕܦܲܠܸܛܘ ܢܲܦ̮ܫܵܟ݂ ܝܵܘܡܵܢܵܐ: ܘܢܲܦ̮ܫܵܐ ܕܲܒ̣̈ܢܲܝܟ ܘܕܲܒ̣̈ܢܵܬ̣ܵܟ݂: ܘܢܲܦ̮ܫܵܐ ܕܢܸܫܲܝ̈ܟ: ܘܢܲܦ̮ܫܵܐ ܕܲܕ݂ܪ̈ܘܼܟ݂ܵܬ̣ܵܟ݂. [No book]
[6]ܘܲܪܚܸܡܬ̇ ܣܵܢܐܲܝ̈ܟ: ܘܲܣܢܲܝܬ̇ ܪ̈ܵܚܡܲܝܟ: ܘܚܵܘܝܬ̇ ܝܵܘܡܵܢܵܐ: ܕܠܲܝܬ̇ ܠܵܟ݂ ܠܵܐ ܚܹܐܪܹ̈ܐ ܘܠܵܐ ܥܲܒ̣̈ܕܹܐ. ܝܵܕܲܥ ܐ̄ܢܵܐ ܝܵܘܡܵܢܵܐ: ܕܐܸܠܘܼ ܐܲܒ̣ܫܵܠܘܿܡ ܚܲܝ ܗ̄ܘ̣ܵܐ: ܟܠܲܢ ܡܝܼܬ̣ܝܼܢ ܗ̄ܘܲܝܢ: ܘܫܲܦܝܼܪ ܗ̄ܘ̣ܵܐ ܒܥܲܝܢܲܝ̈ܟ. [No book]
[7]ܗܵܫܵܐ ܩܘܼܡ ܦܘܿܩ ܘܡܲܠܸܠ ܥܲܡ ܥܲܒ̣ܕܲܝ̈ܟ: ܡܸܛܠ ܕܲܒ̣ܡܵܪܝܵܐ ܝܼܡܝܼܬ̣: ܕܐܸܢ ܠܵܐ ܢܵܦܹܩ ܐܲܢ̄ܬ̇: ܠܵܐ ܒܵܐܹܬ̣ ܐ̄ܢܵܫ ܠܘܵܬ̣ܵܟ݂ ܒܠܸܠܝܵܐ ܗܵܢܵܐ: ܘܒ̣ܵܐܫܵܐ ܠܵܟ݂ ܗܵܕܹܐ ܡ̣ܢ ܟܠܗܹܝܢ ܒܝܼ̈ܫܵܬ̣ܵܐ ܕܐܸܬܲܝ̈ ܥܠܲܝܟ ܡ̣ܢ ܛܲܠܝܘܼܬ̣ܵܟ݂ ܘܲܥܕܲܡܵܐ ܠܗܵܫܵܐ. [No book]
[8]ܘܩܵܡ ܡܲܠܟܵܐ ܘܝܼܬܸܒ̣ ܒܬܲܪܥܵܐ. ܘܚܵܘܝܼܘ ܠܟ݂ܠܹܗ ܥܲܡܵܐ ܘܐܸܡܲܪܘ: ܕܗܵܐ ܡܲܠܟܵܐ ܝܵܬܹܒ̣ ܒܬܲܪܥܵܐ. ܘܐܸܬ̣ܵܐ ܟܠܹܗ ܥܲܡܵܐ ܩܕ݂ܵܡ ܡܲܠܟܵܐ: ܘܝܼܣܪܵܝܹܠ ܥܪܲܩܘ ܐ̄ܢܵܫ ܠܡܲܫܟ̇ܢܹܗ. [No book]
[9]ܘܲܗܘ̤ܵܐ ܟܠܹܗ ܥܲܡܵܐ ܪܵܢܹܝܢ ܒܟ݂ܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܘܐܵܡܪܝܼܢ: ܡܲܠܟܵܐ ܦܲܨܝܲܢ ܡ̣ܢ ܐܝܼܕ݂ܵܐ ܕܟ݂ܠܗܘܿܢ ܒܥܸܠܕܒ̣ܵܒܲܝ̈ܢ: ܘܗ̤ܘ ܦܲܠܛܲܢ ܡ̣ܢ ܐܝܼܕ݂ܵܐ ܕܲܦܠܸܫ̈ܬܵܝܹܐ. ܘܗܵܫܵܐ ܬܵܘ ܢܸܥܪܘܿܩ ܠܲܢ ܡ̣ܢ ܐܲܪܥܵܐ ܡ̣ܢ ܒܵܬܲܪ ܐܲܒ̣ܫܵܠܘܿܡ. [No book]
[10]ܐܲܒ̣ܫܵܠܘܿܡ ܓܹܝܪ ܕܲܡܫܲܚ̄ܢ ܘܐܲܩܝܼܡ̄ܢ ܥܠܲܢ ܡܲܠܟܵܐ: ܡܝܼܬ̣ ܠܹܗ ܒܲܩܪܵܒ̣ܵܐ. ܘܐܸܡܲܪܘ ܓܒܲܪ ܠܚܲܒ̣ܪܹܗ: ܠܡܵܢܵܐ ܡܸܟܹ̇ܝܠ ܡܸܬ̇ܬܵܘܫܝܼܢ ܐܢ̄ܬ̇ܘܿܢ: ܕܬܸܗܦܟ݂ܘܼܢ ܥܲܡ ܡܲܠܟܵܐ. ܬܵܘ ܢܲܗܦ̄ܟ݂ܝܼܘܗܝ ܠܒܲܝܬܹ̇ܗ. [No book]
[11]ܘܡܸܠܬ̣ܵܐ ܕܟ݂ܠܗܘܿܢ ܒ̈ܢܲܝ ܝܼܣܪܵܝܹܠ ܥܸܠܲܬ̤ ܩܕ݂ܵܡ ܡܲܠܟܵܐ. [No book]
[12]ܘܐܸܡܲܪ ܠܗܘܿܢ ܡܲܠܟܵܐ: ܐܲܚܲܝ̈ ܐܲܢ̄ܬ̇ܘܿܢ: ܘܒܸܣܪܝ: ܘܓܲܪ̈ܡܲܝ. ܠܡܵܢܵܐ ܗ̤ܘܲܝܬ̇ܘܿܢ ܐ̄ܚܪ̈ܵܝܹܐ ܕܬܸܗܦܟ݂ܘܼܢ ܥܲܡ ܡܲܠܟܵܐ. [No book]
[13]ܘܐܸܡܲܪ ܠܥܲܡܣܵܐ: ܗܵܐ ܒܸܣܪܝ ܐܲܢ̄ܬ̇ ܘܓܲܪܡ̄ܝ: ܗܵܟܲܢܵܐ ܢܸܥܒܸ̇ܕ݂ ܠܝܼ ܐܲܠܵܗܵܐ ܘܗܵܟܲܢܵܐ ܢܵܘܣܸܦ ܠܝܼ: ܐܸܢ ܠܵܐ ܪܲܒ̇ ܚܲܝܠܵܐ ܬܸܗܘܸܐ ܩܕ݂ܵܡܲܝ ܟܠܗܘܿܢ ܝܵܘ̈ܡܵܬ̣ܵܐ ܚܠܵܦ ܝܘܿܐܵܒ̣. [No book]
[14]ܘܐܲܣܛܝܼ ܠܸܒܵܐ ܕܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܐܲܝܟ݂ ܓܲܒ̣ܪܵܐ ܚܲܕ݂. ܘܲܫܠܲܚܘ ܠܡܲܠܟܵܐ ܘܐܸܡܲܪܘ ܠܹܗ: ܗܦܘܿܟ݂ ܐܲܢ̄ܬ̇ ܘܟ݂ܠܗܘܿܢ ܥܲܒ̣ܕܲܝ̈ܟ. [No book]
[15]ܘܲܗܦܲܟ݂ ܡܲܠܟܵܐ ܘܐܸܬ̣ܵܐ ܥܕܲܡܵܐ ܠܝܘܿܪܕܢܵܢ. ܘܲܝܗܘܼܕ݂ܵܐ ܐܸܬ̣ܵܐ ܠܓܲܠܓܵܠܵܐ: ܠܡܹܐܙܲܠ ܠܐܘܼܪܥܵܐ ܕܡܲܠܟܵܐ: ܠܡܲܥܒܵܪܘܼܬܹܗ ܝܘܿܪܕܢܵܢ ܠܡܲܠܟܵܐ. [No book]
[16]ܘܐܸܣܬܲܪܗܲܒ݂ ܫܲܡܥܝܼ ܒܲܪ ܓܹܐܪܵܐ ܕܡ̣ܢ ܒܸܢܝܵܡܹܝܢ: ܘܲܢܚܸܬ̣ ܓܲܒ̣ܪܹ̈ܐ ܕܲܝܗܘܼܕ݂ܵܐ ܠܐܘܼܪܥܹܗ ܕܡܲܠܟܵܐ ܕܵܘܝܼܕ݂. [No book]
[17]ܘܨܝܼܒ̣ܵܐ ܛܲܠܝܹܗ ܕܫܵܐܘܿܠ: ܘܚܲܡܸܫܬܲܥܣܲܪ ܒܢܵܘ̈ܗܝ ܘܥܸܣܪܝܼܢ ܥܲܒ̣ܕܵܘ̈ܗܝ ܥܲܡܹܗ ܥܒܲܪܘ: ܘܲܓ̣ܫܲܪܘ ܝܘܿܪܕܢܵܢ ܩܕ݂ܵܡ ܡܲܠܟܵܐ. [No book]
[18]ܘܲܥܒܲܕ݂ܘ ܡܥܲܒ̇ܪ̈ܵܢܹܐ ܕܢܲܥܒ̇ܪܘܼܢ ܠܲܕ݂ܒܹܝܬ̣ ܡܲܠܟܵܐ: ܘܲܕ݂ܢܸܥܒ̇ܕ݂ܘܼܢ ܡܸܕܸܡ ܕܫܲܦܝܼܪ ܒܥܲܝܢܵܘ̈ܗܝ. ܘܫܲܡܥܝܼ ܒܲܪ ܓܹܐܪܵܐ ܢܦܲܠ ܩܕ݂ܵܡ ܡܲܠܟܵܐ ܟܲܕ݂ ܥܵܒܲܪ ܝܘܿܪܕܢܵܢ. [No book]
[19]ܘܐܸܡܲܪ ܠܹܗ ܠܡܲܠܟܵܐ: ܠܵܐ ܬܸܚܫܘܿܒ̣ ܠܝܼ ܡܵܪܝ ܣܲܟ݂ܠܘܼܬ̣ܵܐ: ܘܠܵܐ ܬܸܬ̇ܕܲܟܲܪ ܠܝܼ ܡܸܕܸܡ ܕܐܲܣܟܸ̇ܠ ܗ̄ܘ̣ܵܐ ܥܲܒ̣ܕܵܟ݂: ܒܝܵܘܡܵܐ ܕܲܢܦܲܩ ܡܵܪܝ ܡܲܠܟܵܐ ܡ̣ܢ ܐܘܿܪܫܠܸܡ. ܠܵܐ ܢܲܝܬܹ̇ܐ ܡܵܪܝ ܡܲܠܟܵܐ ܥܲܠ ܒܵܠܹܗ. [No book]
[20]ܝܵܕܲܥ ܐ̄ܢܵܐ ܥܲܒ̣ܕܵܟ݂ ܕܲܚܛܹܝܬ̣: ܘܗܵܐ ܐܸܬܹܝܬ̣ ܐܸܢܵܐ ܝܵܘܡܵܢܵܐ ܩܲܕ݂ܡܵܝ ܡ̣ܢ ܟܠܗܘܿܢ ܕܒܹܝܬ̣ ܝܵܘܣܸܦ: ܘܢܸܚܬܹܬ̣ ܠܐܘܼܪܥܹܗ ܕܡܵܪܝ ܡܲܠܟܵܐ. [No book]
[21]ܘܲܥܢܵܐ ܐܲܒ̣ܝܫܲܝ ܒܲܪ ܨܘܿܪܝܼܵܐ: ܘܐܸܡܲܪ: ܐܵܦܠܵܐ ܡܸܛܠ ܗܵܕܹܐ ܢܡܘܼܬ̣ ܫܲܡܥܝܼ: ܕܨܲܚܝܼ ܠܲܡܫܝܼܚܹܗ ܕܡܵܪܝܵܐ. [No book]
[22]ܘܐܸܡܲܪ ܕܵܘܝܼܕ݂ ܡܵܐ ܠܝܼ ܘܲܠܟ݂ܘܿܢ ܒ̈ܢܲܝ ܨܘܿܪܝܼܵܐ: ܕܗܵܘܹܝܢ ܐܢ̄ܬ̇ܘܿܢ ܠܝܼ ܝܵܘܡܵܢܵܐ ܣܵܛܵܢܵܐ. ܝܵܘܡܵܢܵܐ ܠܵܐ ܢܡܘܼܬ̣ ܐ̄ܢܵܫ ܒܝܼܣܪܵܝܹܠ. ܠܵܐ ܝܵܕܲܥ ܐ̄ܢܵܐ ܝܵܘܡܵܢܵܐ ܕܡܲܠܟܵܐ ܐ̄ܢܵܐ ܒܝܼܣܪܵܝܹܠ. [No book]
[23]ܐܵܡܲܪ ܠܹܗ ܡܲܠܟܵܐ ܠܫܲܡܥܝܼ ܠܵܐ ܡܵܐܹܬ̣ ܐܲܢ̄ܬ̇. ܘܝܼܡܵܐ ܠܹܗ ܡܲܠܟܵܐ. [No book]
[24]ܘܡܲܦܝܼܒ̣ܵܫܬ̇ ܒܲܪ ܝܘܿܢܵܬ̣ܵܢ ܒܲܪ ܫܵܐܘܿܠ: ܢܚܸܬ̣ ܠܐܘܼܪܥܹܗ ܕܡܲܠܟܵܐ. ܘܠܵܐ ܣܲܦܲܪ ܕܲܩܢܹܗ: ܘܠܵܐ ܫܲܚܠܸܦ ܡܵܐܢܵܘ̈ܗܝ ܡ̣ܢ ܝܵܘܡܵܐ ܕܐܸܙܲܠ ܡܲܠܟܵܐ: ܘܲܥܕܲܡܵܐ ܠܝܵܘܡܵܐ ܕܐܸܬ̣ܵܐ ܡܲܠܟܵܐ ܒܲܫܠܵܡܵܐ. [No book]
[25]ܘܟܲܕ݂ ܐܸܬ̣ܵܐ ܠܐܘܿܪܸܫܠܸܡ ܠܐܘܼܪܥܹܗ ܕܡܲܠܟܵܐ: ܐܵܡܲܪ ܠܹܗ ܡܲܠܟܵܐ: ܡܲܦܝܼܒ̣ܵܫܬ̇: ܠܡܵܢܵܐ ܠܵܐ ܐܸܙܲܠ ܥܲܡܝ. [No book]
[26]ܐܵܡܲܪ ܠܹܗ ܡܲܦܝܼܒ̣ܵܫܬ̇: ܡܵܪܝ ܡܲܠܟܵܐ ܥܲܒ̣ܕܲܝ ܢܲܟ݂ܠܲܢܝ: ܐܸܡܪܹܬ̣ ܠܹܗ ܓܹܝܪ ܐܲܪܡܵܐ ܠܝܼ ܥܲܠ ܚܡܵܪܵܐ: ܐܸܪܟܲܒ̣ ܥܠܵܘܗܝ ܘܐܹܙܲܠ ܥܲܡ ܡܵܪܝ ܡܲܠܟܵܐ: ܡܸܛܠ ܕܲܚܓ̣ܝܼܪ ܗ̄ܘ̣ ܥܲܒ̣ܕܵܟ݂. [No book]
[27]ܘܕܲܓܸܠ ܒܝܼ ܥܲܒ̣ܕܝ ܡܵܪܝ ܡܲܠܟܵܐ. ܘܐܲܢ̄ܬ̇ ܡܵܪܝ ܡܲܠܟܵܐ. ܐܲܝܟ݂ ܡܲܠܲܐܟܹܗ ܐܲܢ̄ܬ̇ ܕܐܲܠܵܗܵܐ: ܥܒܸܕ݂ ܡܸܕܸܡ ܕܫܲܦܝܼܪ ܒܥܲܝܢܲܝ̈ܟ. [No book]
[28]ܡܸܛܠ ܕܟ݂ܠܹܗ ܒܹܝܬ̣ ܐܵܒ̣ܝ ܚܲܝܵܒ̣ܝܼܢ ܗ̄ܘ̣ܵܘ ܡܵܘܬܵܐ: ܠܵܐ ܡܵܪܝ ܡܲܠܟܵܐ. ܘܲܚܫܲܒ̣ܬܵܝܗܝ ܠܥܲܒ̣ܕܵܟ݂ ܡ̣ܢ ܐܵܟ݂̈ܠܲܝ ܦܵܬ̣ܘܿܪܵܟ݂. ܡܸܟܹܝܠ ܠܵܐ ܡܸܫܟܲܚ ܐ̄ܢܵܐ ܕܐܸܙܟܸ̇ܐ: ܘܐܵܦܠܵܐ ܕܐܹܡܲܠܸܠ ܩܕ݂ܵܡ ܡܵܪܝ ܡܲܠܟܵܐ. [No book]
[29]ܐܵܡܲܪ ܠܹܗ ܡܲܠܟܵܐ ܟܲܕܲܘܼ ܐܸܡܲܪܬ̇ ܡܸܠܲܝ̈ܟ: ܐܸܡܪܹܬ̣ ܕܒܲܝ̈ܢܲܝܟ ܘܲܠܨܝܼܒ̣ܵܐ ܢܸܬ̣ܦܲܠܓ̣ܢ ܚܲܩ̈ܠܵܬ̣ܵܐ. [No book]
[30]ܐܵܡܲܪ ܠܹܗ ܡܲܦܝܼܒ̣ܵܫܬ̇ ܠܡܲܠܟܵܐ: ܐܵܦ ܟܠܹܗ ܥܒ̣ܵܕ݂ܵܐ ܢܸܣܲܒ̣: ܡܸܟܹܠ ܕܐܸܬ̣ܵܐ ܡܵܪܝ ܡܲܠܟܵܐ ܒܲܫܠܵܡܵܐ ܠܒܲܝܬܹ̇ܗ. [No book]
[31]ܘܒܲܪܙܸܠܝܼ ܓܸܠܥܵܕ݂ܵܝܵܐ ܢܸܚܸܬ̣ ܡ̣ܢ ܕܘܼܒ̣ܠܝܼܢ: ܘܲܥܒܲܪ ܥܲܡ ܡܲܠܟܵܐ ܝܘܿܪܕܢܵܢ ܕܲܢܫܲܕܪܝܼܘܗܝ ܡ̣ܢ ܬܲܡܵܢ. [No book]
[32]ܘܒܲܪܙܸܠܝܼ ܣܐܸܒ̣ ܗ̄ܘ̣ܵܐ ܛܵܒ̣: ܘܒܲܪ ܬܡܵܢܐܝܼܢ ܗ̄ܘ̣ܵܐ ܫܢܝܼ̈ܢ. ܘܗ̤ܘ ܬܲܪܣܝܼ ܗ̄ܘ̣ܵܐ ܠܡܲܠܟܵܐ ܟܲܕ݂ ܝܵܬܹܒ̣ ܗ̄ܘ̣ܵܐ ܒܡܲܚܢܝܼܡ: ܡܸܛܠ ܕܓܲܒ̣ܪܵܐ ܗ̄ܘ̣ܵܐ ܪܲܒܵܐ. [No book]
[33]ܐܵܡܲܪ ܠܹܗ ܡܲܠܟܵܐ ܠܒܲܪܙܸܠܝܼ: ܐܵܦ ܐܲܢ̄ܬ̇ ܥܒܲܪ ܥܲܡܝ: ܘܐܹܬܲܪܣܹܝܟ݂ ܥܲܡܝ ܒܐܘܿܪܸܫܠܸܡ. [No book]
[34]ܐܵܡܲܪ ܒܲܪܙܸܠܝܼ ܠܡܲܠܟܵܐ: ܟܡܵܐ ܐܸܢܹܝܢ ܫܢܲـ̈ܝܵܐ ܕܚܲܝܲܝ̈: ܕܐܸܣܲܩ ܥܲܡ ܡܲܠܟܵܐ ܠܐܘܿܪܸܫܠܸܡ. [No book]
[35]ܒܲܪ ܬܡܵܢܐܝܼܢ ܐ̄ܢܵܐ ܫܢ̈ܝܼܢ ܝܵܘܡܵܢܵܐ: ܘܠܵܐ ܝܵܕܲܥ ܐ̄ܢܵܐ ܒܹܝܬ̣ ܛܵܒ̣. ܡܸܕܸܡ ܕܐܵܟܹ̇ܠ ܥܲܒ̣ܕܵܟ݂ ܘܡܸܕܸܡ ܕܫܵܬܹܐ: ܠܵܐ ܡܸܬ̇ܛܥܸܡ ܠܹܗ: ܐܵܦܠܵܐ ܬܘܼܒ̣ ܡܸܫܟܲܚ ܐ̄ܢܵܐ ܕܐܸܫܡܲܥ ܒܩܵܠ ܡܫܲܒ̇ܚܵܢܹ̈ܐ ܘܲܡܫܲܒ̇ܚܵܢ̈ܝܵܬ̣ܵܐ. ܠܡܵܢܵܐ ܗܵܘܹܐ ܬܘܼܒ̣ ܥܲܒ̣ܕܵܟ݂ ܝܼܩܲܪܬܵܐ ܠܡܵܪܝ ܡܲܠܟܵܐ. [No book]
[36]ܠܡܲܚܣܸܢ ܓܹܝܪ ܥܒܲܪ ܥܲܒ̣ܕܵܟ݂ ܝܘܿܪܕܢܵܢ ܥܲܡ ܡܵܪܝ ܡܲܠܟܵܐ: ܠܵܐ ܢܸܦ̱ܪܥܲܢܝ ܡܵܪܝ ܡܲܠܟܵܐ ܦܘܼܪܥܵܢܵܐ ܗܵܢܵܐ. [No book]
[37]ܢܦܘܼܫ ܥܲܒ̣ܕܵܟ݂ ܐܹܡܘܼܬ̣ ܒܲܩܪܝܼܬ̣ܝ: ܥܲܠ ܓܹܢ̄ܒ̣ ܩܲܒ̣ܪܵܐ ܕܐܵܒ̣ܝ ܘܕܹܐܡܝ. ܗܵܐ ܐܝܼܬ̣ ܥܲܡܵܟ݂ ܥܲܒ̣ܕܵܟ݂ ܒܹܪܝ ܒܸܡܗܲܡ: ܢܸܥܒܲܪ ܥܲܡ ܡܵܪܝ ܡܲܠܟܵܐ: ܘܲܥܒܸܕ݂ ܠܹܗ ܡܸܕܸܡ ܕܫܲܦܝܼܪ ܒܥܲܝܢܲܝ̈ܟ. [No book]
[38]ܐܵܡܲܪ ܡܲܠܟܵܐ: ܥܲܡܝ ܢܸܥܒܲܪ ܒܸܡܗܲܡ: ܘܐܸܢܵܐ ܐܸܥܒܸ̇ܕ݂ ܠܹܗ ܡܸܕܸܡ ܕܫܲܦܝܼܪ ܒܥܲܝܢܲܝ̈. ܘܟ݂ܠ ܕܒ̣ܵܥܹܝܬ̇ ܡܹܢܝ: ܐܸܥܒܸ̇ܕ݂ ܠܵܟ݂. [No book]
[39]ܘܲܥܒܲܪܘ ܥܲܡܵܐ ܟܠܹܗ ܝܘܿܪܕܢܵܢ: ܘܐܵܦ ܡܲܠܟܵܐ ܥܒܲܪ: ܘܢܲܫܩܹܗ ܡܲܠܟܵܐ ܠܒܲܪܙܸܠܝܼ ܘܒܲܪܟܹܗ: ܘܲܗܦܲܟ݂ ܠܐܲܬ̣ܪܹܗ. [No book]
[40]ܘܲܥܒܲܪ ܡܲܠܟܵܐ ܠܓܲܠܓܵܠܵܐ: ܘܲܥܒܲܪ ܒܸܡܗܲܡ ܥܲܡܹܗ. ܘܟ݂ܠܹܗ ܥܲܡܵܐ ܕܲܝܗܘܼܕ݂ܵܐ ܥܒܲܪ ܥܲܡ ܡܲܠܟܵܐ: ܘܐܵܦ ܦܸܠܓܹܗ ܕܥܲܡܵܐ ܕܝܼܣܪܵܝܹܠ. [No book]
[41]ܘܟ݂ܠܹܗ ܝܼܣܪܵܝܹܠ ܐܸܬ̣ܵܘ ܠܘܵܬ̣ ܡܲܠܟܵܐ: ܘܐܵܡܪܝܼܢ ܠܹܗ ܠܡܲܠܟܵܐ: ܠܡܵܢܵܐ ܐܲܛܫܝܘܼܟ݂ ܐܲܚܲܝ̈ܢ ܐ̄ܢܵܫܵܐ ܕܲܝܗܘܼܕ݂ܵܐ: ܘܐܲܥܒ̇ܪܘܼܟ݂ ܝܘܿܪܕܢܵܢ ܠܵܟ݂ ܡܲܠܟܵܐ ܘܲܠܟ݂ܠܗܘܿܢ ܒ̈ܢܲܝ ܒܲܝܬܵܟ݂: ܘܲܠܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܥܲܡܵܟ݂. [No book]
[42]ܘܲܥܢܵܘ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܘܐܵܡܪܝܼܢ ܠܲܕ݂ܒܹܝܬ̣ ܝܼܣܪܵܝܹܠ: ܡܸܛܠ ܕܩܲܪܝܼܒ̣ ܠܲܢ ܡܲܠܟܵܐ: ܠܡܵܢܵܐ ܐܸܬ̣ܒ̇ܐܸܫ ܠܟ݂ܘܿܢ ܥܲܠ ܗܵܕܹܐ ܡܸܠܬ̣ܵܐ. ܕܲܠܡܵܐ ܡܹܐܟܲܠ ܐܸܟܲܠ̄ܢ ܡ̣ܢ ܡܲܠܟܵܐ: ܐܵܘ ܡܵܘܗܲܒ̣ܬ̣ܵܐ ܐܸܬ̣ܝܲܗ̄ܒܲܬ̤ ܠܲܢ. [No book]
[43]ܘܲܥܢܵܘ ܕܒܹܝܬ̣ ܝܼܣܪܵܝܹܠ ܘܐܵܡܪܝܼܢ ܠܲܕ݂ܒܹܝܬ̣ ܝܼܗܘܼܕ݂ܵܐ: ܥܣܲܪ ܡ̈ܢܵܘܵܢ ܐܝܼܬ̣ ܠܲܢ ܒܡܲܠܟܵܐ: ܘܐܵܦ ܒܕ݂ܵܘܝܼܕ݂ ܝܲܬ̇ܝܼܪ ܡܸܢܗܟ݂ܘܿܢ: ܠܡܵܢܵܐ ܐܸܙܲܠܬ̇ܘܿܢܵܢ. ܠܲܢ ܗ̄ܘ̣ ܓܹܝܪ ܘܵܠܹܐ ܗ̄ܘ̣ܵܐ ܕܢܸܗܘܸܐ ܩܲܕ݂ܡܵـ̈ܝܹܐ ܕܢܲܗܦܸܟ݂ ܠܡܲܠܟܵܐ. ܘܥܸܫܢܲܬ̤ ܡܸܠܬ̣ܵܐ ܕܒܹܝܬ̣ ܝܼܗܘܼܕ݂ܵܐ ܡ̣ܢ ܡܸܠܬ̣ܵܐ ܕܒܹܝܬ̣ ܝܼܣܪܵܝܹܠ. [No book]
 
Top