|
|
| [1]Videns autem populus quod moram faceret descendendi de monte Moyses, congregatus adversus Aaron, dixit: Surge, fac nobis deos, qui nos præcedant: Moysi enim huic viro, qui nos eduxit de terra Ægypti, ignoramus quid acciderit. |
[No book] |
| [2]Dixitque ad eos Aaron: Tollite inaures aureas de uxorum, filiorumque et filiarum vestrarum auribus, et afferte ad me. |
[No book] |
| [3]Fecitque populus quæ jusserat, deferens inaures ad Aaron. |
[No book] |
| [4]Quas cum ille accepisset, formavit opere fusorio, et fecit ex eis vitulum conflatilem: dixeruntque: Hi sunt dii tui Israël, qui te eduxerunt de terra Ægypti. |
[No book] |
| [5]Quod cum vidisset Aaron, ædificavit altare coram eo, et præconis voce clamavit dicens: Cras solemnitas Domini est. |
[No book] |
| [6]Surgentesque mane, obtulerunt holocausta, et hostias pacificas, et sedit populus manducare, et bibere, et surrexerunt ludere. |
[No book] |
| [7]Locutus est autem Dominus ad Moysen, dicens: Vade, descende: peccavit populus tuus, quem eduxisti de terra Ægypti. |
[No book] |
| [8]Recesserunt cito de via, quam ostendisti eis: feceruntque sibi vitulum conflatilem, et adoraverunt, atque immolantes ei hostias, dixerunt: Isti sunt dii tui Israël, qui te eduxerunt de terra Ægypti. |
[No book] |
| [9]Rursumque ait Dominus ad Moysen: Cerno quod populus iste duræ cervicis sit: |
[No book] |
| [10]dimitte me, ut irascatur furor meus contra eos, et deleam eos, faciamque te in gentem magnam. |
[No book] |
| [11]Moyses autem orabat Dominum Deum suum, dicens: Cur, Domine, irascitur furor tuus contra populum tuum, quem eduxisti de terra Ægypti, in fortitudine magna, et in manu robusta? |
[No book] |
| [12]Ne quæso dicant Ægyptii: Callide eduxit eos, ut interficeret in montibus, et deleret e terra: quiescat ira tua, et esto placabilis super nequitia populi tui. |
[No book] |
| [13]Recordare Abraham, Isaac, et Israël servorum tuorum, quibus jurasti per temetipsum, dicens: Multiplicabo semen vestrum sicut stellas cæli; et universam terram hanc, de qua locutus sum, dabo semini vestro, et possidebitis eam semper. |
[No book] |
| [14]Placatusque est Dominus ne faceret malum quod locutus fuerat adversus populum suum. |
[No book] |
| [15]Et reversus est Moyses de monte, portans duas tabulas testimonii in manu sua, scriptas ex utraque parte, |
[No book] |
| [16]et factas opere Dei: scriptura quoque Dei erat sculpta in tabulis. |
[No book] |
| [17]Audiens autem Josue tumultum populi vociferantis, dixit ad Moysen: Ululatus pugnæ auditur in castris. |
[No book] |
| [18]Qui respondit: Non est clamor adhortantium ad pugnam, neque vociferatio compellentium ad fugam: sed vocem cantantium ego audio. |
[No book] |
| [19]Cumque appropinquasset ad castra, vidit vitulum, et choros: iratusque valde, projecit de manu tabulas, et confregit eas ad radicem montis: |
[No book] |
| [20]arripiensque vitulum quem fecerant, combussit, et contrivit usque ad pulverem, quem sparsit in aquam, et dedit ex eo potum filiis Israël. |
[No book] |
| [21]Dixitque ad Aaron: Quid tibi fecit hic populus, ut induceres super eum peccatum maximum? |
[No book] |
| [22]Cui ille respondit: Ne indignetur dominus meus: tu enim nosti populum istum, quod pronus sit ad malum: |
[No book] |
| [23]dixerunt mihi: Fac nobis deos, qui nos præcedant: huic enim Moysi, qui nos eduxit de terra Ægypti, nescimus quid acciderit. |
[No book] |
| [24]Quibus ego dixi: Quis vestrum habet aurum? Tulerunt, et dederunt mihi: et projeci illud in ignem, egressusque est hic vitulus. |
[No book] |
| [25]Videns ergo Moyses populum quod esset nudatus (spoliaverat enim eum Aaron propter ignominiam sordis, et inter hostes nudum constituerat), |
[No book] |
| [26]et stans in porta castrorum, ait: Si quis est Domini, jungatur mihi. Congregatique sunt ad eum omnes filii Levi: |
[No book] |
| [27]quibus ait: Hæc dicit Dominus Deus Israël: Ponat vir gladium super femur suum: ite, et redite de porta usque ad portam per medium castrorum, et occidat unusquisque fratrem, et amicum, et proximum suum. |
[No book] |
| [28]Feceruntque filii juxta sermonem Moysi, cecideruntque in die illa quasi viginti tria millia hominum. |
[No book] |
| [29]Et ait Moyses: Consecrastis manus vestras hodie Domino, unusquisque in filio, et in fratre suo, ut detur vobis benedictio. |
[No book] |
| [30]Facto autem altero die, locutus est Moyses ad populum: Peccastis peccatum maximum: ascendam ad Dominum, si quomodo quivero eum deprecari pro scelere vestro. |
[No book] |
| [31]Reversusque ad Dominum, ait: Obsecro, peccavit populus iste peccatum maximum, feceruntque sibi deos aureos: aut dimitte eis hanc noxam, |
[No book] |
| [32]aut si non facis, dele me de libro tuo quem scripsisti. |
[No book] |
| [33]Cui respondit Dominus: Qui peccaverit mihi, delebo eum de libro meo: |
[No book] |
| [34]tu autem vade, et duc populum istum quo locutus sum tibi: angelus meus præcedet te. Ego autem in die ultionis visitabo et hoc peccatum eorum. |
[No book] |
| [35]Percussit ergo Dominus populum pro reatu vituli, quem fecerat Aaron. |
[No book] |