➖ »
«
➖ ➕
Peshitta OT
PesOT
The First Book of Clement
1Clem
←
Isaiah
Isa
30
→
[1]ܘܵܝ ܠܲܒ̣̈ܢܲܝܵܐ ܡܵܪ̈ܘܿܕܹܐ: ܐܵܡܲܪ ܡܵܪܝܵܐ: ܕܲܥ̣ܒܲܕ݂ܘ ܬܲܪܥܝܼܬ̣ܵܐ ܘܠܵܐ ܡܹܢܝ. ܘܢܲܩܝܼܘ ܢܘܼܩܵܝܹ̈ܐ: ܕܠܵܐ ܡ̣ܢ ܪܘܼܚܝ. ܕܢܵܘܣܦܘܼܢ ܚܛܵܗܹ̈ܐ ܥܲܠ ܚܛܵܗܹ̈ܐ. [No book]
[2]ܕܐܸܙܲܠ̣ܘ ܠܡܸܚܲܬ̣ ܠܡܸܨܪܹܝܢ: ܘܡ̣ܢ ܦܘܼܡܝ ܠܵܐ ܫܐܸܠܘ ܕܢܸܬ̣ܥܲܫܢܘܼܢ ܒܥܘܼܫܢܹܗ ܕܦܸܪܥܘܿܢ. ܘܢܸܣܬܲܬ̇ܪܘܼܢ ܒܛܸܠܵܠܵܗ̇ ܕܡܸܨܪܹܝܢ. [No book]
[3]ܢܸܗܘܸܐ ܠܟ݂ܘܿܢ ܥܘܼܫܢܹܗ ܕܦܸܪܥܘܿܢ ܠܒܸܗܬ̇ܬ̣ܵܐ: ܘܣܸܬܵܪܵܐ ܕܛܸܠܵܠܵܗ̇ ܕܡܸܨܪܹܝܢ ܠܬܲܚܦܝܼܬ̣ܵܐ. [No book]
[4]ܡܸܛܠ ܕܗ̤ܘ ܒܨܵܥܵܢ: ܘܪܵܘ̱ܪ̈ܒ̣ܵܢܵܘܗܝ ܘܡܲܠܲܐܟ݂ܵܘ̈ܗܝ ܚܲܠܦܹ̈ܐ ܢܹܠܐܘܿܢ. [No book]
[5]ܠܘܵܬ̣ ܥܲܡܵܐ ܕܠܵܐ ܡܵܘܬܪ ܠܗܘܿܢ: ܠܵܐ ܠܥܘܼܕ݂ܪܵܢܵܐ ܘܠܵܐ ܠܗܸܢܝܵܢܵܐ: ܐܸܠܵܐ ܠܒܸܗܬ̇ܬ̣ܵܐ ܘܲܠܚܸܣܕܵܐ. [No book]
[6]ܡܲܫܩ̄ܠܵܐ ܕܲܒ̣ܥܝܼܪܵܐ ܕܬܲܝܡ̄ܢܵܐ ܒܐܲܪܥܵܐ ܐܲܠܝܼܨܬܵܐ ܘܲܡܥܵܩܬܵܐ. ܐܲܪܝܵܐ ܘܓ̣ܘܼܪܝܵܐ ܕܐܲܪܝܵܐ: ܘܡܸܢܗܘܿܢ ܐܸܣܦܸܣ ܘܚܲܪܡܵܢܵܐ ܕܦܵܪܲܚ. ܢܫܩ̄ܠܘܼܢ ܥܲܠ ܚܲܨܵܐ ܕܥܝܼ̈ܠܹܐ ܥܘܼܬ̣ܪ̱ܗܘܿܢ: ܘܥܲܠ ܓܲܒܵܐ ܕܓܲܡ̈ܠܹܐ ܓܲܙܲܝ̈ܗܘܿܢ: ܠܘܵܬ̣ ܥܲܡܵܐ ܕܠܵܐ ܡܲܗܢܹܐ ܠܗܘܿܢ. [No book]
[7]ܘܡܸܨܪ̈ܵܝܹܐ ܒܲܣܪܝܼܩܘܼܬ̣ܵܐ ܘܲܒ̣ܕܲܓܵܠܘܼܬ̣ܵܐ ܡܥܲܕ̇ܪܝܼܢ ܡܸܛܠ ܗܵܢܵܐ ܩܪܹܝܬ̣ ܠܗܘܿܢ: ܕܲܣܪܝܼܩ ܗ̄ܘܼ ܬܘܼܟ݂ܠܵܢܗܘܿܢ ܗܵܢܵܐ. [No book]
[8]ܡܸܟܹ̇ܝܠ ܬܵܐ ܟܬ̣ܘܿܒ̣ ܥܲܠ ܠܘܼܚܹ̈ܐ ܗܵܠܹܝܢ: ܘܥܲܠ ܟܬ̣ܵܒ̣ܵܐ ܕܲܩܝܵܡܗܘܿܢ: ܕܢܸܗܘܹܐ ܠܝܵܘܡܵܐ ܐ̄ܚܪܵܝܵܐ ܠܣܵܗܕ̇ܘܼܬ̣ܵܐ ܠܥܵܠܲܡ ܥܵܠܡܝܼܢ. [No book]
[9]ܡܸܛܠ ܕܥܲܡܵܐ ܗ̄ܘܼ ܡܡܲܪܡܪܵܢܵܐ: ܒ̈ܢܲܝܵܐ ܐܸܢܘܿܢ ܕܲܓܵܠܹ̈ܐ: ܒ̈ܢܲܝܵܐ ܕܠܵܐ ܨܒ̣ܵܘ ܠܡܸܫܡܲܥ ܢܵܡܘܿܣܹܗ ܕܡܵܪܝܵܐ. [No book]
[10]ܕܐܸܡܲܪܘ ܠܚܲܙܵܝܹ̈ܐ ܕܠܵܐ ܬܸܚܙܘܿܢ: ܘܠܲܢܒ̣ܝܹ̈ܐ ܕܠܵܐ ܬܸܬ̣ܢܲܒ̇ܘܿܢ ܠܲܢ ܡܲܟ̇ܣܵܢܘܼܬ̣ܵܐ ܡܲܠܸܠܘ ܠܲܢ ܦܵܠܓ̇ܘܼܬ̣ܵܐ: ܘܲܚܙܵܘ ܠܲܢ ܟܲܕܵܒ̣ܘܼܬ̣ܵܐ. [No book]
[11]ܘܐܲܣܛܵܐܘܼܢ ܡ̣ܢ ܐܘܼܪܚܵܐ. ܘܐܲܗܦܟ݂ܘܿܢ ܡ̣ܢ ܫܒ̣ܝܼ̈ܠܹܐ. ܘܒܲܛܸܠܘ ܡܸܢܲܢ ܠܩܲܕ̇ܝܼܫܵܐ ܕܝܼܣܪܵܝܹܠ. [No book]
[12]ܡܸܛܠ ܗܵܢܵܐ: ܗܵܟܲܢܵܐ ܐܵܡܲܪ ܡܵܪܝܵܐ ܩܲܕ̇ܝܼܫܵܐ ܕܝܼܣܪܵܝܹܠ: ܥܲܠ ܕܐܲܣܠܝܬ̇ܘܿܢ ܡܸܠܬ̣ܵܐ ܗܵܕܹܐ: ܘܐܸܬ̇ܬ̇ܟܸܠܬ̇ܘܿܢ ܒܲܛܠܘܼܡܝܵܐ: ܘܲܪܛܲܢܬ̇ܘܿܢ ܘܐܬ̇ܬ̇ܟܸܠܬ̇ܘܿܢ ܥܠܵܘܗܝ. [No book]
[13]ܡܸܛܠ ܗܵܢܵܐ ܬܸܗܘܹܐ ܠܟ݂ܘܿܢ ܚܛܝܼܬ̣ܵܐ ܗܵܕܹܐ ܐܲܝܟ݂ ܬܘܼܪ̱ܥܬ̣ܵܐ ܕܢܸܦܠܲܬ̤: ܘܐܲܝܟ݂ ܫܘܼܪܵܐ ܪܵܡܵܐ ܕܡ̣ܢ ܫܸܠܝܵܐ ܗܘ̤ܵܐ ܬܒ̣ܵܪܹܗ. [No book]
[14]ܘܲܬ̣ܒ̣ܵܪܹܗ ܐܲܝܟ݂ ܬܒ̣ܵܪܵܐ ܕܡܵܐܢܵܐ ܕܦܲܚܵܪܵܐ ܕܲܬ̣ܒ̣ܝܼܪ ܕܠܵܐ ܚܵܘܣܵܢ. ܕܠܵܐ ܡܸܫܬܲܟܲܚ ܒܬܸܒ̣ܪ̈ܵܘܗܝ ܚܸܨܦܵܐ ܠܡܸܣܲܒ̣ ܒܹܗ ܢܘܼܪܵܐ ܡ̣ܢ ܝܲܩܕܵܢܵܐ: ܘܐܵܦܠܵܐ ܠܡܸܓ̣ܪܲܦ ܒܹܗ ܡܲـ̈ـܝܵܐ ܡ̣ܢ ܓܘܼܒܵܐ. [No book]
[15]ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܩܲܕ̇ܝܼܫܵܐ ܕܝܼܣܪܵܝܹܠ: ܡܵܐ ܕܬ̣ܵܒ̣ܬ̇ܘܿܢ ܘܐܸܬ̇ܬܲܢܲܚܬ̇ܘܿܢ: ܬܸܬ̣ܦܲܪܩܘܼܢ. ܘܲܒ̣ܫܸܠܝܵܐ ܘܲܒ̣ܣܲܒ̣ܪܵܐ ܬܸܗܘܹܐ ܓܲܢ̄ܒܵܪܘܼܬ̣ܟ݂ܘܿܢ ܘܠܵܐ ܐܸܬ̇ܛ̣ܦܝܼܣܬ̇ܘܿܢ. [No book]
[16]ܘܐܸܡܲܪܬ̇ܘܿܢ ܠܵܐ ܗܵܟܲܢܵܐ: ܥܲܠ ܪ̈ܲܟ݂ܫܵܐ ܢܸܪܟܲܒ̣. ܘܥܲܠ ܩܲܠܝܼ̈ܠܹܐ ܢܸܥܪܘܿܩ. ܡܸܛܠ ܗܵܢܵܐ ܬܸܥ̱ܪܩܘܼܢ: ܘܢܸܗܘܘܿܢ ܩܲܠܝܼܠܝܼܢ ܪ̈ܵܕ݂ܘܼܦܲܝܟ̇ܘܿܢ. [No book]
[17]ܐܵܠܹܦ ܡ̣ܢ ܟܐܵܬ̣ܵܐ ܕܚܲܕ݂: ܘܡ̣ܢ ܟܐܵܬ̣ܵܐ ܕܚܲܡܫܵܐ ܬܸܥ̱ܪܩܘܼܢ: ܥܕܲܡܵܐ ܕܬܸܫܬܲܚܪܘܼܢ ܐܲܝܟ݂ ܥܪܵܪܵܐ ܥܲܠ ܪܹܫ ܛܘܼܪܵܐ: ܘܐܲܝܟ݂ ܐܵܬ̤ܵܐ ܥܲܠ ܪܵܡܬ̣ܵܐ. [No book]
[18]ܡܸܛܠ ܕܲܢܫܲܪܸܐ ܡܵܪܝܵܐ ܠܲܡܪܲܚܵܡܘܼ ܥܠܲܝܟ̇ܘܿܢ. ܘܢܸܬ̇ܬ̇ܪܝܼܡ ܠܲܡܪܲܚܵܦܘܼ ܥܠܲܝܟ̇ܘܿܢ ܡܸܛܠ ܕܐܲܠܵܗܵܐ ܗ̄ܘܼ ܕܲܝܵܢܵܐ ܡܵܪܝܵܐ. ܘܛܘܼܒܲܝܗܘܿܢ ܠܟ݂ܠ ܕܲܡܣܲܟܹ̇ܝܢ ܠܹܗ. [No book]
[19]ܡܸܛܠ ܕܥܲܡܵܐ ܒܨܸܗܝܘܿܢ ܝܵܬܹܒ̣: ܘܒ̣ܐܘܿܪܸܫܠܸܡ ܡܸܒ̣ܟܵܐ ܠܵܐ ܬܸܒ̣ܟ̇ܘܿܢ ܡܪܲܚܵܡܘܼ ܢܪܲܚܸܡ ܥܲܠ ܩܵܠܵܐ ܕܲܓ̣ܥܵܬ̣ܟ݂ܘܿܢ: ܘܡܵܐ ܕܲܫ̣ܡܲܥ ܢܸܥܢܹܝܟ݂ܘܿܢ. [No book]
[20]ܘܢܸܬܸ̇ܠ ܠܟ݂ܘܿܢ ܡܵܪܝܵܐ ܠܲܚܡܵܐ ܒܐܘܼܠܨܵܢܵܐ: ܘܡܲـ̈ـܝܵܐ ܒܐܘܼܠܨܵܢܵܐ. ܘܠܵܐ ܢܟܲܢܸܫ ܬܘܼܒ̣ ܠܡܲܛܥ̱ܝܵܢܲܝ̈ܟ̇ܘܿܢ ܘܢܸܚܙ̈ܝܵܢ ܥܲܝܢܲܝ̈ܟ̇ܘܿܢ ܒܡܲܛܥ̱ܝܵܢܲܝ̈ܟ̇ܘܿܢ. [No book]
[21]ܘܐܸܕ݂ܢܲܝ̈ܟ̇ܘܿܢ ܢܸܫ̱ܡ̈ܥܵܢ ܡܸܠܬ̣ܵܐ ܡ̣ܢ ܒܸܣܬܲܪܟ݂ܘܿܢ. ܕܐܵܡܪܵܐ: ܗܵܕܲܐ ܗ̄ܝܼ ܐܘܼܪܚܵܐ: ܙܸܠܘ ܒܵܗ̇. ܘܠܐ ܬܸܣܛܘܿܢ ܠܝܲܡܝܼܢܵܐ ܘܲܠܣܸܡܵܠܵܐ. [No book]
[22]ܘܲܬ̇ܛܵܘܫܘܼܢ ܣܹܐܡܵܐ ܕܲܩܪܝܼܡ ܠܲܦܬܲܟ݂ܪ̈ܲܝܟ̇ܘܿܢ: ܘܦܸܕ̇ܬܵܐ ܕܢܸܣܟ̇ܬ̣ܵܐ ܕܕܲܗܒ̣ܗܘܿܢ. ܘܬܸܕ݂ܪܘܿܢ ܐܸܢܘܿܢ ܐܲܝܟ݂ ܡܲـ̈ـܝܵܐ ܕܟܸܦ̮ܣܵܢܝܼܬ̣ܵܐ. ܘܐܲܝܟ݂ ܢܦܵܬ̣ܵܐ ܬܲܦܩܘܼܢ ܐܸܢܘܿܢ. [No book]
[23]ܘܢܸܬ̣ܝܼܗܸܒ̣ ܡܸܛܪܵܐ ܠܙܲܪ̱ܥܟ݂ܘܿܢ: ܕܬܸܙ̱ܪܥܘܼܢ ܒܐܲܪܥܵܐ: ܘܲܥܒ̣ܘܼܪܵܐ ܕܙܲܪܥܵܐ ܕܐܲܪܥܵܐ. ܢܸܗܘܹܐ ܕܲܗܝܼܢ ܘܫܲܡܝܼܢ: ܪܸܥܝܵܐ ܕܲܒ̣ܥܝܼܪܟ݂ܘܿܢ ܒܝܵܘܡܵܐ ܗܵܘܿ ܒܐܲܬ̣ܪܵܐ ܫܲܡܝܼܢܵܐ. [No book]
[24]ܘܒܲܩܪܹ̈ܐ ܘܐܲܪ̈ܘܵܢܹܐ ܕܦܵܠܚܝܼܢ ܒܐܲܪܥܵܐ: ܒܠܝܼܠܵܐ ܚܲܡܝܼܡܵܐ ܢܹܐܟ݂ܠܘܼܢ: ܕܲܡܣܲܠܲܩ ܒܪܲܦ̮ܫܵܐ ܘܲܒ̣ܡܲܕ݂ܪ̱ܝܵܐ. [No book]
[25]ܘܢܸܗܘܹܐ ܥܲܠ ܟܠ ܛܘܼܪ ܕܪܵܡ: ܘܥܲܠ ܟܠ ܪܵܡܬ̣ܵܐ ܕܪܵܡܵܐ: ܢܸܪܕܘܿܢ ܬܲܦܹ̈ܐ ܕܡܲـ̈ـܝܵܐ ܒܝܵܘܡܵܐ ܕܩܸܛܠܵܐ ܪܲܒܵܐ: ܘܲܒ̣ܣܘܼܚܵܦܵܐ ܕܡܲܓ̣̈ܕ̇ܠܹܐ. [No book]
[26]ܘܢܸܗܘܹܐ ܢܘܼܗܪܹܗ ܕܣܲܗܪܵܐ ܐܲܝܟ݂ ܢܘܼܗܪܹܗ ܕܫܸܡܫܵܐ. ܘܢܘܼܗܪܹܗ ܕܫܸܡܫܵܐ ܢܸܗܘܹܐ ܚܲܕ݂ ܒܫܲܒ̣ܥܵܐ: ܐܲܝܟ݂ ܢܘܼܗܪܵܐ ܕܫܲܒ̣ܥܵܐ ܝܵܘ̈ܡܝܼܢ: ܒܝܵܘܡܵܐ ܕܢܸܥܨܘܿܒ̣ ܡܵܪܝܵܐ ܬܒ̣ܵܪܵܐ ܕܥܲܡܹܗ: ܘܟܹܐܒ̣ܵܐ ܕܲܡܚܘܿܬܹܗ ܢܲܐܣܹܐ. [No book]
[27]ܗܵܐ ܫܡܹܗ ܕܡܵܪܝܵܐ ܐܵܬܹ̇ܐ ܡ̣ܢ ܪܘܼܚܩܵܐ ܝܵܩܹ̇ܕ݂ ܪܘܼܓ̣ܙܹܗ: ܘܲܫܒ̣ܝܼܚ ܡܲܫܩ̄ܠܹܗ. ܘܣܸܦ̈ܘܵܬܹܗ ܡܲܠ̈ܝܵܢ ܪܘܼܓ̣ܙܵܐ ܘܠܸܫܵܢܹܗ ܐܲܝܟ݂ ܢܘܼܪܵܐ ܕܝܵܩ̇ܕܵܐ. [No book]
[28]ܘܪܘܼܚܹܗ ܐܲܝܟ݂ ܢܲܚܠܵܐ ܕܓܵܪܹܦ. ܥܕܲܡܵܐ ܠܨܵܘܪܵܐ ܢܸܦܣܘܿܩ: ܠܡܸܕ݂ܠܲܚ ܥܲܡܡܹ̈ܐ ܡܸܛܠ ܛܵܠܝܘܼܬ̣ܗܘܿܢ ܣܪܝܼܩܬܵܐ: ܘܠܲܦܓ̣ܘܼܕ̇ܬܵܐ ܡܲܛܥ̱ܝܵܢܝܼܬ̣ܵܐ ܕܥܲܠ ܦܲܟܲܝ̈ܗܘܿܢ ܕܥܲܡܡܹ̈ܐ. [No book]
[29]ܬܸܫܒ̇ܘܿܚܬܵܐ ܢܸܗܘܹܐ ܠܟ݂ܘܿܢ ܟܠܝܼܠܵܐ ܕܐܹܬ̣ܩܲܕܲܫ ܒܚܲܓܵܐ. ܘܚܲܕ݂ܘܼܬܹܗ ܕܠܸܒܵܐ ܐܲܝܟ݂ ܗܵܘ ܕܲܡܗܲܠܸܟ݂ ܒܚܲܕ݂ܘܼܬ̣ܵܐ: ܠܡܹܐܬ̣ܵܐ ܠܛܘܼܪܹܗ ܕܡܵܪܝܵܐ: ܠܘܵܬ̣ ܬܲܩܝܼܦܵܐ ܕܝܲܥܩܘܿܒ̣. [No book]
[30]ܘܢܲܫܡܲܥ ܡܵܪܝܵܐ ܫܘܼܒ̣ܚܵܐ ܕܩܵܠܹܗ. ܘܲܡܚܘܿܬ̣ܵܐ ܕܲܕ݂ܪܵܥܹܗ ܢܚܵܘܹܐ ܒܚܸܡܬ̣ܵܐ ܕܪܘܼܓ̣ܙܵܐ: ܘܲܒ̣ܫܲܠܗܹܒ̣ܝܼܬ̣ܵܐ ܕܢܘܼܪܵܐ ܕܐܵܟ݂ܠܵܐ: ܒܙܵܪܝܼܦ̮ܬܵܐ ܕܚܵܒ̣ܛܵܐ ܘܟܹܐܦܹ̈ܐ ܕܒܲܪܕ݂ܵܐ. [No book]
[31]ܡܸܛܠ ܕܡ̣ܢ ܩܕ݂ܵܡ ܪܲܒ̇ܘܼܬܹܗ ܕܡܵܪܝܵܐ ܢܸܬ̇ܬ̇ܒܲܪ ܐܵܬ̣ܘܿܪܵܝܵܐ: ܘܲܒ̣ܫܲܒ̣ܛܵܐ ܢܸܒ̣ܠܲܥ. [No book]
[32]ܘܢܸܗܘܹܐ ܒܟ݂ܠܗܘܿܢ ܥܒ̣ܵܕ݂ܵܘ̈ܗܝ: ܚܘܼܛܪܵܐ ܕܫܘܼܥܒܵܕ݂ܵܐ ܕܲܢܢܝܼܚ ܡܵܪܝܵܐ ܥܠܵܘܗܝ: ܒܲܦܠܲܓܹ̈ܐ: ܘܲܒ̣ܟܸܢܵܪܹ̈ܐ ܘܒܲܩܪܵܒ̣ܵܐ ܥܲܫܝܼܢܵܐ ܢܸܬ̣ܟܲܬܲܫ ܒܹܗ. [No book]
[33]ܡܸܛܠ ܕܲܡܛܲܝܸܒ̣ ܡ̣ܢ ܩܕ݂ܵܡ ܝܵܘ̈ܡܵܬ̣ܵܐ ܡܹܐܟ݂ܘܼܠܬܹ̇ܗ ܐܵܦ ܗ̤ܝ ܐܸܬ̇ܛܲܝܒܲܬ̤ ܕܬܲܡܠܸܟ݂: ܘܥܲܡܩܲܬ̣ ܘܪܵܘܚܲܬ̤ ܒܹܝܬ̣ ܡܲܥܡܪܵܗ̇ ܣܲܓ̇ܝܼܐܝܼܢ ܩܲܝܣܹ̈ܐ ܘܢܘܼܪܵܐ. ܘܲܢܫܲܡܬܹܗ ܕܡܵܪܝܵܐ ܐܲܝܟ݂ ܢܲܚܠܵܐ ܕܟܸܒ̣ܪܝܼܬ̣ܵܐ ܕܝܵܩܕܵܐ ܒܹܗ. [No book]
Translation: Charles H. Hoole (1885)
Source: www.earlychristianwritings.com
Top