➖ »
«
➖ ➕
Aleppo Codex (~920)
Alep
The First Book of Clement
1Clem
←
Judges
Jdg
11
→
[1]ויפתח הגלעדי היה גבור חיל והוא בן אשה זונה ויולד גלעד את יפתח [No book]
[2]ותלד אשת גלעד לו בנים ויגדלו בני האשה ויגרשו את יפתח ויאמרו לו לא תנחל בבית אבינו־כי בן אשה אחרת אתה [No book]
[3]ויברח יפתח מפני אחיו וישב בארץ טוב ויתלקטו אל יפתח אנשים ריקים ויצאו עמו [No book]
[4]ויהי מימים וילחמו בני עמון עם ישראל [No book]
[5]ויהי כאשר נלחמו בני עמון עם ישראל וילכו זקני גלעד לקחת את יפתח מארץ טוב [No book]
[6]ויאמרו ליפתח־לכה והייתה לנו לקצין ונלחמה בבני עמון [No book]
[7]ויאמר יפתח לזקני גלעד הלא אתם שנאתם אותי ותגרשוני מבית אבי ומדוע באתם אלי עתה כאשר צר לכם [No book]
[8]ויאמרו זקני גלעד אל יפתח לכן עתה שבנו אליך והלכת עמנו ונלחמת בבני עמון והיית לנו לראש לכל ישבי גלעד [No book]
[9]ויאמר יפתח אל זקני גלעד אם משיבים אתם אותי להלחם בבני עמון ונתן יהוה אותם לפני־אנכי אהיה לכם לראש [No book]
[10]ויאמרו זקני גלעד אל יפתח יהוה יהיה שמע בינותינו־אם לא כדברך כן נעשה [No book]
[11]וילך יפתח עם זקני גלעד וישימו העם אותו עליהם לראש ולקצין וידבר יפתח את כל דבריו לפני יהוה במצפה [No book]
[12]וישלח יפתח מלאכים אל מלך בני עמון לאמר מה לי ולך כי באת אלי להלחם בארצי [No book]
[13]ויאמר מלך בני עמון אל מלאכי יפתח כי לקח ישראל את ארצי בעלותו ממצרים מארנון ועד היבק ועד הירדן ועתה השיבה אתהן בשלום [No book]
[14]ויוסף עוד יפתח וישלח מלאכים אל מלך בני עמון [No book]
[15]ויאמר לו כה אמר יפתח לא לקח ישראל את ארץ מואב ואת ארץ בני עמון [No book]
[16]כי בעלותם ממצרים וילך ישראל במדבר עד ים סוף ויבא קדשה [No book]
[17]וישלח ישראל מלאכים אל מלך אדום לאמר אעברה נא בארצך ולא שמע מלך אדום וגם אל מלך מואב שלח ולא אבה וישב ישראל בקדש [No book]
[18]וילך במדבר ויסב את ארץ אדום ואת ארץ מואב ויבא ממזרח שמש לארץ מואב ויחנון בעבר ארנון ולא באו בגבול מואב כי ארנון גבול מואב [No book]
[19]וישלח ישראל מלאכים אל סיחון מלך האמרי מלך חשבון ויאמר לו ישראל נעברה נא בארצך עד מקומי [No book]
[20]ולא האמין סיחון את ישראל עבר בגבלו ויאסף סיחון את כל עמו ויחנו ביהצה וילחם עם ישראל [No book]
[21]ויתן יהוה אלהי ישראל את סיחון ואת כל עמו ביד ישראל־ויכום ויירש ישראל את כל ארץ האמרי יושב הארץ ההיא [No book]
[22]ויירשו את כל גבול האמרי־מארנון ועד היבק ומן המדבר ועד הירדן [No book]
[23]ועתה יהוה אלהי ישראל הוריש את האמרי מפני עמו ישראל ואתה תירשנו [No book]
[24]הלא את אשר יורישך כמוש אלהיך־אותו תירש ואת כל אשר הוריש יהוה אלהינו מפנינו־אותו נירש [No book]
[25]ועתה הטוב טוב אתה מבלק בן צפור מלך מואב הרוב רב עם ישראל אם נלחם נלחם בם [No book]
[26]בשבת ישראל בחשבון ובבנותיה ובערעור ובבנותיה ובכל הערים אשר על ידי ארנון שלש מאות שנה־ומדוע לא הצלתם בעת ההיא [No book]
[27]ואנכי לא חטאתי לך ואתה עשה אתי רעה להלחם בי ישפט יהוה השפט היום בין בני ישראל ובין בני עמון [No book]
[28]ולא שמע מלך בני עמון אל דברי יפתח אשר שלח אליו [No book]
[29]ותהי על יפתח רוח יהוה ויעבר את הגלעד ואת מנשה ויעבר את מצפה גלעד וממצפה גלעד עבר בני עמון [No book]
[30]וידר יפתח נדר ליהוה ויאמר אם נתון תתן את בני עמון בידי [No book]
[31]והיה היוצא אשר יצא מדלתי ביתי לקראתי בשובי בשלום מבני עמון־והיה ליהוה והעליתיהו עלה [No book]
[32]ויעבר יפתח אל בני עמון להלחם בם ויתנם יהוה בידו [No book]
[33]ויכם מערוער ועד באך מנית עשרים עיר ועד אבל כרמים מכה גדולה מאד ויכנעו בני עמון מפני בני ישראל [No book]
[34]ויבא יפתח המצפה אל ביתו והנה בתו יצאת לקראתו בתפים ובמחלות ורק היא יחידה אין לו ממנו בן או בת [No book]
[35]ויהי כראותו אותה ויקרע את בגדיו ויאמר אהה בתי הכרע הכרעתני ואת היית בעכרי ואנכי פציתי פי אל יהוה ולא אוכל לשוב [No book]
[36]ותאמר אליו אבי פציתה את פיך אל יהוה־עשה לי כאשר יצא מפיך אחרי אשר עשה לך יהוה נקמות מאיביך־מבני עמון [No book]
[37]ותאמר אל אביה יעשה לי הדבר הזה הרפה ממני שנים חדשים ואלכה וירדתי על ההרים ואבכה על בתולי אנכי ורעיתי [Q: ורעותי] [No book]
[38]ויאמר לכי וישלח אותה שני חדשים ותלך היא ורעותיה ותבך על בתוליה על ההרים [No book]
[39]ויהי מקץ שנים חדשים ותשב אל אביה ויעש לה את נדרו אשר נדר והיא לא ידעה איש ותהי חק בישראל [No book]
[40]מימים ימימה תלכנה בנות ישראל לתנות לבת יפתח הגלעדי־ארבעת ימים בשנה [No book]
Source: unbound.biola.edu
 Translation: Charles H. Hoole (1885)
Source: www.earlychristianwritings.com
Top