➕
←
Jeremiah
Jer
4
→
[1]ܐܸܢ ܬܬ̣ܘܼܒ̣ ܝܼܣܪܵܝܹܠ ܐܵܡ݁ܲܪ ܡܵܪܝܵܐ: ܠܘܵܬ̣ܝ ܬܬ̣ܘܼܒ̣. ܘܐܸܢ ܬܲܥܒܲܪ ܛܲܢܦܘܼܬ̣ܵܟ݂ ܡ̣ܢ ܩܕ݂ܵܡܲܝ ܠܵܐ ܬܙܘܼܥ. [2]ܘܬܹܐܡܸܐ ܚܲܝ ܗ̄ܘ̣ ܡܵܪܝܵܐ: ܒܩܘܼܫܬܵܐ ܘܲܒ̣ܕ݂ܝܼܢܵܐ ܘܲܒ̣ܙܲܕ̇ܝ̣ܩܘܼܬ̣ܵܐ: ܘܢܸܬ̣ܒܲܪܟ݂ܘܼܢ ܒܹܗ ܥܲܡܡܹ̈ܐ ܘܒܹܗ ܢܸܫܬܲܒ̇ܚܘܼܢ. [3]ܡܸܛܠ ܕܗܵܟ݂ܢܵܐ ܐܵܡܲ݁ܪ ܡܵܪܝܵܐ: ܠܓܲܒ̣ܖܹ̈ܐ ܕܲܝܗܘܼܕ݂ܵܐ ܘܲܠܥܵܡܘܿܖܹ̈ܝܗ̇ ܕܐܘܿܪܸܫܠܸܡ: ܐܲܢܗܲܪܘ ܠܟ݂ܘܿܢ ܫܪܵܓ̣ܵܐ: ܘܠܵܐ ܬܸܙ̱ܪܥܘܼܢ ܥܲܠ ܟܘܼ̈ܒܹ̇ܐ. [4]ܓܙܘܿܪܘ ܠܡܵܪܝܵܐ ܘܐܲܥܒܲܪܘ ܥܘܼܪܠܘܼܬ̣ܵܐ ܕܠܸܒ̇ܟ݂ܘܿܢ: ܓܲܒ̣ܖܹ̈ܐ ܕܲܝܗܘܼܕ݂ܵܐ ܘܥܵܡܘܿܖܹ̈ܝܗ̇ ܕܐܘܿܪܸܫܠܸܡ: ܕܲܠܡܵܐ ܬܸܦܘܿܩ ܐܲܝܟ݂ ܢܘܼܪܵܐ ܚܸܡܬ̣ܝ: ܘܬ̣ܵܘܩܸܕ݂ ܘܠܲܝܬ̇ ܕܲܡܕܲܥܸܟ݂: ܡܸܛܠ ܒܝܼܫܘܼܬ݂ܵܐ ܕܲܥܒ̣ܵܕܲܝ̈ܟ̇ܘܿܢ. [5]ܚܵܘܵܘ ܒܲܝܗܘܼܕ݂ܵܐ: ܘܒ̣ܐܘܿܪܸܫܠܸܡ ܐܲܫܡܲܥܘ: ܘܐܸܡܲܪܘ: ܩܪܵܘ ܫܝܼܦܘܿܪܵܐ ܒܐܲܪܥܵܐ: ܩܪܵܘ ܒܩܵܠܵܐ ܪܵܡܵܐ: ܘܐܸܡܲܪܘ: ܐܸܬ̣ܟܲܢܲܫܘ ܘܢܸܥܘܿܠ ܠܩܘܼܖ̈ܝܵܐ ܥܲܫ̈ܝܼܢܵܬܵܐ. [6]ܫܩܘܿܠܘ ܐܵܬ̣ܵܐ ܠܨܸܗܝܘܿܢ: ܐܸܬ̣ܥܲܫܢܘ ܘܠܵܐ ܬܩܘܼܡܘܼܢ: ܡܸܛܠ ܕܒ̣ܝܼܫܬܵܐ ܡܲܝܬܹ̇ܐ ܐ̄ܢܵܐ ܡ̣ܢ ܓܲܪܒ̇ܝܵܐ ܘܲܬ̣ܒ̣ܵܪܵܐ ܪܲܒܵܐ. [7]ܡܠܸܟ݂ ܬܲܩܝܼܦ ܣܵܠܹ̇ܩ ܐܲܝܟ݂ ܐܲܪܥܵܐ ܡ̣ܢ ܥܵܒܹܗ: ܘܲܡܚܲܒܸ̇ܠ ܥܲܡܡܹ̈ܐ. ܫ̣ܩܲܠ ܘܲܢܦܲܩ̣ ܡ̣ܢ ܐܲܬ̣ܪܹܗ: ܠܡܸܥܒܲܕ݂ ܐܲܪܥܵܟ݂ ܠܚܘܼܪܒܵܐ: ܘܩܘܼܖ̈ܝܵܟ݂ ܢܸܨ̈ܕܝܵܢ ܡ̣ܢ ܒܠܲܝ ܕܝܵܬܹܒ̣. [8]ܥܲܠ ܗܵܕܹܐ ܐܸܬ̣ܟ̇ܒܸܢܘ ܣܲܩܹ̈ܐ: ܘܐܲܪܩܸܕ݂ܘ ܘܐܲܝܠܸܠܘ: ܡܸܛܠ ܕܠܵܐ ܗܸܦܟܲܬ̤ ܚܸܡܬ̣ܵܐ ܕܪܘܼܓ̣ܙܹܗ ܕܡܵܪܝܵܐ ܡܸܢܟ݂ܘܿܢ. [9]ܘܢܸܗܘܸܐ ܒܝܵܘܡܵܐ ܗܵܘ̇ ܐܵܡ݁ܲܪ ܡܵܪܝܵܐ: ܢܹܐܒܲܕ݂ ܠܸܒܵܐ ܕܡܲܠ̈ܟܹܐ: ܘܠܸܒܵܐ ܕܫܲܠܝܼܛܵܢܹ̈ܐ. ܘܢܸܬ̣ܡ̱ܗܘܼܢ ܟܵܗܢܹ̈ܐ: ܘܲܢܒ̣ܝܹ̈ܐ ܢܸܬ̇ܕܲܡܪܘܼܢ. [10]ܘܐܸܡ̇ܪܹܬ̣ ܒܒ̣ܵܥܘܼ ܡܵܪܝܵܐ ܐܲܠܵܗܵܐ: ܫܲܪܝܼܪܵܐܝܼܬ̣ ܡܲܛܥܵܝܘ ܐܲܛܥ̇ܝܼܬ̣ ܠܥܲܡܵܐ ܗܵܢܵܐ: ܘܠܐܘܿܪܸܫܠܸܡ: ܕܐܸܡ̇ܪܹܬ̣ ܫܠܵܡܵܐ ܢܸܗܘܸܐ ܠܟ݂ܘܿܢ: ܘܗܵܐ ܩܸܪܒܲܬ̤ ܚܲܪܒܵܐ ܥܕܲܡܵܐ ܠܢܲܦ̮ܫܵܐ. [11]ܒܹܗ ܒܲܙܢܵܐ ܗܵܘ̇: ܢܸܬ̣ܐ̱ܡܲܪ ܠܥܲܡܵܐ ܗܵܢܵܐ: ܘܠܐܘܿܪܸܫܠܸܡ: ܐܲܝܟ݂ ܪܘܼܚܵܐ ܛܵܥܝܼܬ̣ܵܐ ܕܒܲܫܒ̣̈ܝܼܠܹܐ ܕܡܲܕ݂ܒ̇ܪܵܐ ܐܘܼܪܚܵܗ̇ ܕܒܲܪܬ̣ܝ ܥܲܡܝ: ܠܵܐ ܠܡܸܕ݂ܪܵܐ ܘܠܵܐ ܠܡܸܚܡܲܠ. [12]ܪܘܼܚܵܐ ܕܡܲܠܝܵܐ ܡ̣ܢ ܗܵܠܹܝܢ ܬܹܐܬܸܐ ܠܝܼ: ܡܸܟܹ̇ܝܠ ܐܵܦ ܐܸܢܵܐ ܐܹܡܲܠܸܠ ܕܝܼܢܲܝ̈ ܥܲܡܗܘܿܢ. [13]ܗܵܐ ܐܲܝܟ݂ ܥܢܵܢܵܐ ܢܸܣܲܩ: ܘܐܲܝܟ݂ ܥܲܠܥܵܠܵܐ ܡܲܪܟܲܒ̣ܬܹܗ: ܩܲܠܝܼܠܝܼܢ ܡ̣ܢ ܢܸܫܖܹ̈ܐ ܖ̈ܟ݂ܫܹܗ: ܘܵܝ ܠܲܢ ܕܐܸܬ̣ܒ̇ܙܸܙܢ. [14]ܐܲܫܝܼܓ̣ܝ ܠܸܒܹܟ݂ܝ ܡ̣ܢ ܒܝܼܫܬܵܐ ܐܘܿܪܸܫܠܸܡ: ܡܸܛܠ ܕܬܸܬ̣ܦܲܪܩܝܼܢ: ܥܕܲܡܵܐ ܠܐܸܡܲܬ̣ ܢܒ̣ܘܼ̈ܬ̣ܵܢ ܒܓ̣ܵܘܹܟ݂ܝ ܡܲܚܫ̈ܒ̣ܵܬܹܟ݂ܝ ܒܝܼ̈ܫܵܬܵܐ. [15]ܡܸܛܠ ܩܵܠܵܐ ܕܲܡܚܵܘܸܐ ܡ̣ܢ ܕܵܢ: ܘܡܲܫܡܲܥ ܟܹܐܒ̣ܵܐ ܡ̣ܢ ܛܘܼܪܵܐ ܕܐܲܦܪܹܝܡ. [16]ܐܲܕ݂ܟܲܪܘ ܠܥܲܡܡܹ̈ܐ: ܘܐܲܫܡܲܥܘ ܠܐܘܿܪܸܫܠܸܡ: ܗܵܐ ܟܸܢܫܹ̈ܐ ܕܥܲܡܡܹ̈ܐ ܐܵܬܸ݁ܝܢ ܡ̣ܢ ܐܲܪܥܵܐ ܪܲܚܝܼܩܬܵܐ: ܘܲܢܪܝܼܡܘܼܢ ܩܵܠܗܘܿܢ ܥܲܠ ܩܘܼܖ̈ܝܵܐ ܕܲܝܗܘܼܕ݂ܵܐ. [17]ܐܲܝܟ݂ ܢܲܛܖ̈ܲܝ ܚܲܩ̈ܠܵܬ̣ܵܐ ܗܘ̤ܵܘ ܥܠܹܝܗ̇ ܡ̣ܢ ܚܕ݂ܵܖܹ̈ܝܗ: ܡܸܛܠ ܕܠܝܼ ܡܲܪܡܪܲܬ̤ ܐܵܡܲ݁ܪ ܡܵܪܝܵܐ. [18]ܐܘܼܖ̈ܚܵܬܹܟ݂ܝ ܘܲܥܒ̣ܵܕܲܝ̈ܟ̇ܝ ܥ̣ܒܲܕ݂ܘ ܠܹܟ݂ܝ ܗܵܠܹܝܢ: ܗܵܕܲܐ ܗ̄ܝ̣ ܒܝܼܫܬܹ̇ܟ݂ܝ ܕܡܸܪܲܬ̤ ܘܩܸܪܒܲܬ̤ ܥܕܲܡܵܐ ܠܠܸܒܹ̇ܟ݂ܝ. [19]ܡܥܲܝ̈ ܡܥܲܝ̈ ܟܵܝ݁ܒ̇ܝܼܢ ܠܝܼ ܘܬ̣ܵܠܵܘܵܬ̣ܝ̈. ܠܸܒ̇ܝ: ܡܫܵܘܲܪ ܠܝܼ ܠܹܒ̇ܝ ܘܠܵܐ ܫܵܬܹ̇ܩ: ܡܸܛܠ ܕܩܵܠܵܐ ܕܫܝܼܦܘܿܪܵܐ ܫܸܡܥܲܬ̤ ܢܲܦ̮ܫܝ: ܘܝܘܼܒܵܒ̣ܵܐ ܕܲܩܪܵܒ̣ܵܐ. [20]ܬܒ̣ܵܪܵܐ ܥܲܠ ܬܒ̣ܵܪܵܐ ܢܹܐܬܹܐ: ܡܸܛܠ ܕܐܸܬ̣ܒܲܙܙܲܬ̤ ܟܠܵܗ̇ ܐܲܪܥܵܐ: ܡ̣ܢ ܫܹܠܝ ܐܸܬ̣ܒ̇ܙܸܙ ܡܲܫܟܲܢܝ: ܘܲܢܦܲܠ ܝܵܖ̈ܝܼܥܵܬ̣ܝ. [21]ܥܕܲܡܵܐ ܠܐܸܡܲܬ̣ܝ ܐܸܚܙܸܐ ܠܲܕ݂ܥܵܪܹܩ: ܘܐܸܫܡܲܥ ܩܵܠܵܐ ܕܫܝܼܦܘܿܪܵܐ. [22]ܡܸܛܠ ܕܲܫ̣ܛܵܘ ܥܲܡܝ: ܘܠܝܼ ܠܵܐ ܝܼܕܲܥܘ. ܐܸܢܘܿܢ ܣܲܟ݂̈ܠܹܐ: ܘܠܵܐ ܗ̄ܘ̣ܵܘ ܚܲܟ̇ܝܼܡܹ̈ܐ. ܚܲܟ̇ܝܼܡܝܼܢ ܐܸܢܘܿܢ ܠܒ̣ܝܼܫܬܵܐ: ܘܛܵܒ̣ܬ̣ܵܐ ܠܵܐ ܝܵܕ݂ܥܝܼܢ. [23]ܚܵܪܹܬ̣ ܒܐܲܪܥܵܐ: ܘܗܵܐ ܬܘܿܗ̇ ܘܒ̣ܘ̇ܗ̇: ܘܠܲܫܡܲܝܵܐ ܘܠܲܝܬ̇ ܢܘܼܗ̱ܪܗܘܿܢ. [24]ܚܙܹ̇ܝܬ̣ ܛܘܼܖܹ̈ܐ ܘܗܵܐ ܙܵܝ݁ܥܝܼܢ: ܘܟ݂ܠܗܹܝܢ ܖ̈ܵܡܵܬ̣ܵܐ ܐܸܬ̣ܦܲܪܲܩ. [25]ܚܵܪܹܬ̣ ܘܗܵܐ ܠܲܝܬ̇ ܒܲܪܢܵܫ: ܘܟ݂ܠܵܗ̇ ܦܵܪܚܬ̣ܵܐ ܕܲܫܡܲܝܵܐ ܦܸܪܕܲܬ̤. [26]ܚܙܹ̇ܝܬ̣ ܘܗܵܐ ܟܲܪܡܠܵܐ ܚܪܸܒ̣ ܐܲܝܟ݂ ܡܲܕ݂ܒ̇ܪܵܐ: ܘܟ݂ܠܗܹܝܢ ܩܘܼܪܝܹܗ ܐܸܬ̣ܥ̱ܩܲܪ: ܡ̣ܢ ܩܕܵܡ ܡܵܪܝܵܐ: ܘܡ̣ܢ ܩܕܵܡ ܚܸܡܬ݂ܵܐ ܕܪܘܼܓ̣ܙܹܗ. [27]ܡܸܛܠ ܕܗܵܟܲܢܵܐ ܐܵܡ݁ܲܪ ܡܵܪܝܵܐ ܐܲܠܵܗܵܐ: ܠܲܚܒ̣ܵܠܵܐ ܬܸܗܘܸܐ ܟܠܵܗ̇ ܐܲܪܥܵܐ: ܘܲܓ̣ܡܘܼܪܝܵܐ ܠܵܐ ܐܸܥܒܸ̇ܕ݂. [28]ܡܸܛܠ ܗܵܠܹܝܢ ܬܸܬ̣ܐ̱ܒܸܠ ܐܲܪܥܵܐ: ܘܢܸܚܫܟ݂ܘܼܢ ܫܡܲܝܵܐ ܡ̣ܢ ܠܥܸܠ. ܟܠ ܕܡܲܠܠܹ̇ܬ̣ ܘܐܸܬ̣ܪܲܥܝܼ̇ܬ̣: ܠܵܐ ܐܸܬ̇ܬ̇ܘܸܐ ܘܠܵܐ ܐܲܗܦܸܟ݂ ܡܸܢܵܗ̇. [29]ܡ̣ܢ ܩܵܠܵܐ ܕܦܲܖ̈ܵܫܹܐ ܘܲܕ݂ܫܵܕܹܝܢ ܒܩܸܫܬܵܐ: ܥܸܪܩܲܬ̤ ܟܠܵܗ̇ ܩܪܝܼܬ̣ܵܐ: ܥܲܠ̣ܘ ܒܥܵܒܹ̈ܐ: ܘܒܲܫܩܝܼܦܹ̈ܐ ܣܠܸܩ̣ܘ: ܟܠܗܹܝܢ ܩܘܼܖ̈ܝܵܐ ܐܸܫܬ̇ܒܸܩ: ܘܠܲܝܬ̇ ܒܲܪܢܵܫ ܕܝܵܬܹ݁ܒ̣ ܒܗܹܝܢ. [30]ܘܐܲܢ̄ܬ̇ܝ ܒܙܝܼܙܬܵܐ ܡܵܢܵܐ ܬܸܥܒ̇ܕ݂ܝܼܢ: ܟܲܕ݂ ܬܸܠܒ̇ܫܝܼܢ ܙܚܘܿܖ̈ܝܵܬ̣ܵܐ: ܟܲܕ݂ ܬܸܨܛܲܒ̇ܬ̣ܝܼܢ ܒܬܲܨܒ̇ܝܼܬܵܐ ܕܕܲܗܒ̣ܵܐ: ܟܲܕ݂ ܬܸܟ݂ܚ̄ܠܝܼܢ ܒܲܨܕ݂ܝܼܕ݂ܵܐ ܥܲܝܢܲܝ̈ܟ̇ܝ: ܠܲܣܪܝܼܩܘܼܬܵܐ ܗ̄ܘ ܡܸܨܛܲܒ̇ܬ̣ܵܐ ܐܲܢ̄ܬܝ: ܫܲܒ̣ܩ̣ܘܼܟ݂ܝ ܚܲܒ̣ܖ̈ܲܝܟ̇ܝ: ܘܢܲܦ̮ܫܹܟ݂ܝ ܒܵܥܹ̇ܝܢ. [31]ܡܸܛܠ ܕܩܵܠܵܐ ܐܲܝܟ݂ ܟܪܝܼܗܬܵܐ ܫܸܡܥܸ̇ܬ̣: ܘܥܵܩܬ̣ܵܐ ܐܲܝܟ݂ ܐܲܢ̄ܬ̇ܬ̣ܵܐ ܕܲܡܚܲܒ̇ܠܵܐ ܠܡܹܐܠܲܕ݂: ܩܵܠܵܐ ܕܒܲܪܬ̣ ܨܸܗܝܘܿܢ ܕܡܸܬ̇ܛܲܪܦܵܐ: ܘܲܡܦܲܪܣܵܐ ܐܝܼܕܹܝ̈ܗ̇ ܘܐܵܡ̇ܪܵܐ: ܘܵܝ ܠܝܼ ܕܐܸܬ̇ܛܲܪܦܲܬ̤ ܢܲܦ̮ܫܝ ܥܲܠ ܩܛܝܼ̈ܠܲܝ.
 
Top